Mea Molin Sie Ella Nasnas?

“SAPKINYUK nu ke Guferment in Eis R$20,000.” Kain in news lulap inge tufwanu sikyuk ke sie newspaper fwin an Brazil pangpang Correio do Povo. Me sramsram inge akkalemye ma sikyuk nu sel Luiz Alvo de Araújo, sie met orekma ke post ofus, su kukakunla ipen an se lal ke guferment. Tokin el aksafyela pepu ke transfer lun an lal nu ke guferment, Luiz el lut ke pal se el akilen la lupan mani su guferment el sang nu sel in molela an lal pus liki molin ma eltal insese ka, oasr ke R$20,000 (apkurun nu ke $8,000, U.S.) ma yolyuk ka!

In folokonmu mani se inge tia fwusesr. Fwinne el muteta tari pal ekasr ke department puspis lun guferment in folokonang mani se, guferment el srunga in eis ma inge, a elos kaifwe nu sel Luiz in eis sie lawyer lal in aksumwosye ma upa lal ke court. “Arulanu kalem la sie met el tafongla, a ke sripen red tape ku ma upa su ku in sikyuk in aksumwosye ma inge, paenang wangin kutena met su etu fuka in aksumwosye ma upa inge,” pa inge ma judge su sapkin nu ke guferment in sifwil eisla mani a molela molin ma orek ke court el fwak. “Pa inge case se meet ke kain in oiye se inge su Nga liye.”

Luiz, sie sin Met Lo lun Jeova, el fwak: “Ella luk su pala ke ke me luti lun Baibel tia lela Nga in eis ma tia ma luk. Nga enenu in kaifweung in folokonma mani se inge.”

Met puspis elos koneak la kain in oiye se inge sie ma sakuruk ku nunuk lalfon. Tusruktu Kas lun God akkalemye la met Kristian paye elos aksaokye na paye sie ella nasnas ke orekma nu kemwa su elos akkalemye ke ku su fulat lukelos. (Rom 13:5) Met Lo lun Jeova elos kaifweung in srukye sie ‘ella mwo a oru orekma sumwos in ma nu kemwa.’—Hibru 13:18.