Peng Mwo lun Togusrai Mea Se Inge?

Ke yiu tari’a in an 235 fwin fwalu nu fon, oasr met 6,035,564, sin met fwusr a met matu, elos kisekinla 1,171,270,425 aur in sramsram nu sin kutu met ke ma se inge. In toeni nu ke orekma in tafwela ma inge nu sin kutu met ke inkanek lun kas a oalu, elos kitalik pa nu sin met 700 million kutu ipen me rid su sulkakin a aketeye ma inge. Elos ouyepa kitalik tausen puspis ke audiocassettes a videocassettes in sulkakin ma inge. Mea “se” inge?

“PA INGE” peng mwo lun Togusrai lun God. Paye, soena orek ke me sramsram lun met, orekma yok inge in sulkakin “peng mwo lun Togusrai” su kut ku in liye ke len inge.​—Mattu 24:14.

Elos nu kemwa su oru orekma in fwakak a luti fwin fwalu nu fon elos volunteer ku tia eis mol. Ke nunuk lun met, elos sufwalkin ke orekma inge. Ke ma inge, mea kasrelos in pulaik a kutangla? Ku lun peng mwo lun Togusrai pa me kasru yok, meyen pa inge sie kain in news su me insemwomwo nu sin metu. Pa inge me insemwomwo su met nu kemwa elos sano​—insemwomwo, sukosokla liki ma upa ke me enenu lun moul, guferment mwomwo, misla a wangin sangeng, a ma se su met puspis misinge elos nunku yok ka—​moul ma patpat! Peng mwo na paye pa inge nu sin met nu kemwa su suk kalme a akmwuk lun moul. Aok, me insemwomwo inge nu kemwa a oasr pa ma saye su ku in ma lane lom kom fwin akos a akkalemye insemwomwo nu ke me fwakak ke peng mwo lun Togusrai.

Mea Se Inge Togusrai?

Ke ma inge, mea Togusrai se inge su sulkakinyuk oanu peng mwo se? Pa inge Togusrai su million puspis sin met elos lutiyuk in siyuk ke pre pengpeng se inge: “Papa tumasr su in kosrao, Em in akmutalyeyuk. Togusrai lom in tuku. Ma lungse lom in orek, oanu in kosrao, ou inge fwin fwalu.”​—Mattu 6:9, 10.

Pa inge Togusrai su sramsramkinyuk sin sie met palu lun an Hibru pangpang Daniel ke lusen century 25 somla ke pal se el simusla: “A in len lun togusra ingo, God in kosrao fwa tulokunak sie togusrai su fwa tianu kunausyukla, ku filiye mwal ka nu sin siepa mutanfwal; a a fwa musalsallu a kunausla togusrai inge nu kemwa, a a fwa tu ma patpat.”​—Daniel 2:44.

Ke ma inge, peng mwo se inge ma ke Togusrai, ku guferment, lun God su akola in kunausla ma koluk nu kemwa na, el fwa mutamwauk in kol in misla fwin fwalu nu fon. Ma inge el oru in akpayeye akmwuk lun Met Orekula ke mutamwauk me nu sin met a ke fwalu se inge.​—Genesis 1:28.

“Togusrai lun God in Kosrao Apkurun”

Apkurun yiu 2,000 somla, peng mwo lun Togusrai sulkakinyuk ke pal se meet sin sie mokul oaru a oru orekma su arulanu purakak nunuk lun metu. Mokul se inge pa Jon Baptais, mwen nutin sie met tol Ju pangpang Zekaraia a mutan kiel, Elizabeth. Jon el nukom sie nuknuk su orek ke unen kamel, a me lol orek ke kulin kosro infwulwel, oanu met palu Elaija, su pitse nu sel. Tusruktu, kas in luti lal purakak nunuk lun met puspis. “Komwos in auliyuk,” el fwak, “tu togusrai in kosrao apkurun me.”​—Mattu 3:1-6.

Met su longol Jon pa met Ju, su fwak la elos lalalfongi God paye, Jeova. Oanu sie mutanfwal, elos eis Ma Sap lun mwoleuang ke inkanek lal Moses yiu 1,500 somla. Srakna oasr tempel mwolanu inge fwin an Jerusalem, an se su me kise kisekinyuk fwal nu ke Ma Sap, su Met Ju elos pulakin na paye la alu lalos sumwos ye mutan God.

Tusruktu, ke pal se elos porongol Jon, kutu sin met elos akilenak la alu lalos tila oanu meeta. Fasin a lalmetmet lun met Greek el ilyuk tari nu ke me luti lun met Ju. Ma Sap su elos eis ke inkanek lal Moses oasr ma kikiap tari ka, a aklusrongtenyeyuk ke sripen lalalfongi a me luti lun met. (Mattu 15:6) Meyen elos keapeyukla sin met kol lun alu su inse fulat a wangin pakoten yuro, paenang pus sin met elos alu nu sin God ke inkanek su tia akinsemwomwoyel. (Jemes 1:27) Elos enenu in auliyuk liki ma koluk lalos in lain God a lain Ma Sap lun mwoleaung.

Ke pal inge, met Ju puspis elos sano ke sikme lun Messaia, ku Kraist, su oasr mwolela ka, a kutu sin met elos asiyuki insielos kel Jon: “El la Kraist ku tia?” Tusruktu, Jon el fwak la el tia, a el akkalemye ke nunuk lalos ke sie met saye, su el fwak ou inge ke sie kas: “Nga tia fwal tulala aa losyen fwaluk [lal].” (Luk 3:15, 16) Ke pal sa el akkalemyel Jisus nu sin met tuma lutlut lal, Jon el fwak: “Liye, Lam lun God, su wisla ma koluk lun fwalu!”​—Jon 1:29.

Sie peng mwo na paye pa inge, meyen Jon, el srisrngiye nu sin met nu kemwa inkanek nu ke moul a insemwomwo​—sel Jisus, el su “wisla ma koluk lun met.” Oanu mwen nutul Edam a If, met nu kemwa isusla ye ma upa lun ma koluk a mise. Rom 5:19 el aketeye: “Tu oanu ke seakos lun sie met [Edam] ma puspis elos kolukla, aok, ouyepa ke akos lun sie [Jisus], ma puspis elos fwa sumwosla.” Jisus, oanu sie lam su kisekinyuk, el ‘wisla ma koluk lun met,’ a el ekulla luma upa lun met. “Molin ma koluk mise,” Baibel el aketeye,” “a me kulang lun God moul ma patpat in Kraist Jisus Leum Lasr.”​—Rom 6:23.

Oanu sie met sumwosmwos​—paye, sie met su yok emeet inmaslon met nu kemwa su moul fwin fwalu—​Jisus el luti ke peng mwo. Me sramsram lun Baibel in Mark 1:14, 15 fwakak nu sesr: “A tokin tukakinyukyuk Jon, Jisus el tuku nu in Galili, a luti mwosasu lun God a fwak: ‘Pal fwalnu, a togusrai lun God apkurun me. Komwos auliyuk a lalalfongi mwosasu.’ ”

Elos nu kemwa su porongo Jisus a akkalemye lalalfongi ke peng mwo elos akinsemwomwoyeyuk ke inkanek yok. Jon 1:12 el fwak: “A elos nu kemwa su esal [Jisus] el sang nu selos fwal in ekla tulik nutin God, nu selos su lalalfongi el.” Oanu tulik nutin God, ku mwen nutin God, oasr pal mwo lalos in eis me sang ke moul ma patpat.​—1 Jon 2:25.

Tusruktu pal mwo in eis me insemwomwo lun Togusrai tia fwal nu sin met ke century se meet mukena. Oanu ma akkalemyeyuk tari ke mutamwauk, peng mwo lun Togusrai lun God sulkakinyuk a lutiyuk fwin fwalu nu fon ke len inge. Ke ma inge, kut srakna ku in eis me insemwomwo lun Togusrai. Mea kom enenu in oru tu kom in eis me insemwomwo inge? Me lutlut toko fwa aketeye ma inge.