Lalmetmet lun God Fuka In Akkalemye Ma Inge?

“LALMETMET lun met sikasrup se pilesreyuk, a kas lal tia longyuk.” Ke kas lal inge, Togusra lalmetmet Solomon el aksafyela me sramsram lal ke met sikasrup se inge su lalmetmet a molela sie siti in tia kunanela. Tusruktu, sie me asor, “wangin sie met esam met sikasrup se.”​—Ekklisiastis 9:14-16.

Pal nu kemwa metu lungse in pilesru kutu met su sikasrup, el fwinne oru orekma mwo puspis. Ma inge arulanu paye ke ma sikyuk kel Jisus. Isaia el palye kel: “El srungeyuk a met sisella, sie met pakomuta, a el etu asor.” (Isaia 53:3) Jisus el ekla me srungeyuk sin kutu met meyen el tia met oasr mwal yok la ku pengpeng yurin met kol in pal lal. Aok, oasr yurol lalmetmet su yok liki lalmetmet lun met sesumwos. Met ke an lal Jisus elos srunga in akilen la “mwen nutin karpenter” inge akkalemye kain in lalmetmet inge a oru orekma sakuruk puspis. Aok, sie tafongla na yok pa inge, meyen me sramsram tafwela in fwak la Jisus “el tia oru ma sakuruk puspis we meyen silalalfongi lalos.” Sie ma tula lulap pa inge nu sin met fwin an we!​—Mattu 13:54-58.

Lela kut in tia oru kain in tafongla inge. “A lalmetmet aksumwosyeyuk ke orekma la,” Jisus el fwak. Elos nu kemwa su oru orekma lun God a sulkakin lalmetmet lung me arulanu kalem, tia ke sripen mwal lalos ku pengpeng lalos ye mutan metu, a ke “fwako mwo” lalos su elos akkalemye​—lalalfongi a orekma lalos su tuku ke Baibel.​—Mattu 7:18-20; 11:19.