Luseka Pal Kut Ku in Moul?

Met puspis elos moul loes, oru kutu met elos nunku la, ‘Luseka pal kut ku in moul?’

FWAL nu ke The New Encyclopædia Britannica (1995), in pal meeta, met puspis elos lalalfongi la Pierre Joubert pa met se ma moul loes emeet. In 1814 el mise ke el yiu 113 matwe. Paye, kutu met elos nunku mu oasr kutu met su moul loes, tusruktu lusen matwelos tia eteyuk. Fwinne ou inge, oasr sie record mwo orekla a akkalemye la oasr pisen met su moul loes lukel Pierre Joubert.

Jeanne Louise Calment el isusla fwin an Arles, southeastern France, ke February 21, 1875. El mise ke August 4, 1997​—tokin el yiu 122​—arulanu pengpeng. In 1986, Shigechiyo Izumi lun an Japan el mise ke el yiu 120 matwe. Buk inge Guinness Book of Records 1999 el simusla la Sarah el sun yiu 118 matwe in oanu met matu se emeet ke pal se simla buk inge. El isusla ke September 24, 1880, in an Pennsylvania, U.S.A. Ke pal se Marie-Louise Febronie Meilleur fwin an Quebec, Canada, el mise in 1998 ke yiu 118 matwe, el matu lukel Sarah ke len 26.

Paye, pisen met matu arulanu yokyokelik na paye. Pisen met centenarians akilenyuk tari kapek ka su oasr ka 2.2 million ke lusen century se tafwu toko! In oupanu, pisen met su oasr ke 80 yiu matwe ku elos su matu liki elos kapek liki 26.7 million ke 1970 nu ke 66 million ke 1998. Oasr kapek ke percent 147, kut fwin srikeye nu ke percent 60 su kapek ke pisen met nu kemwa su muta fwin fwalu.

Met puspis tia moul mukena ke lusen pal loes. A elos oru pa ma puspis su met fwusr yiu 20 matwe elos tia ku in oru. Ke 1990, mokul se inge John Kelly su yiu 82-matwe el aksafyela sie sritel in akutun su pangpang marathon​—su akutun kasrusr se inge oasr ke mail 26​—ke lusen aur limekosr a minit limekosr. In 1991, nine matu se su yiu 84-matwe su pangpang Mavis Lindgren el aksafyela lusen mail inge ke aur itkosr a minit eu. A ke pal futoto somla, oasr sie mokul matu yiu 91 matwe el aksafyela akutun kasrusr ke New York City Marathon!

Ma inge tia kalmekin la met matu in pal meeta elos tia oru kutu orekma pengpeng. Ke pal se ma el yiu 99 matwe, met patriarch se ke Baibel pangpang Ebream el “kasrusr in osun” nu sin met su fwasr in muteta nu yurol. Ke pal se ma el yiu 85 matwe, Caleb el fwak: “Oanu ku luk in pal se [yiu 45 somla], ou inge ku luk inge, ke meun, a ke illa a ilyuk.” A Baibel el fwak kel Moses la ke pal se ma el yiu 120 matwe, “mutal sumwena okla, ku wanginla ku lal.”​—Genesis 18:2; Josua 14:10, 11; Duteronomi 34:7.

Jisus Kraist el sramsram ke mokul se meet, Edam, a met musa oak Noa oanu met pengpeng in pal meeta. (Mattu 19:​4-6; 24:37-​39) Genesis el fwak la Edam el moul ke lusen yiu 930, a Noa el moul ke lusen yiu 950. (Genesis 5:5; 9:​29) Ya metu ku in moul na paye ke lusen pal inge? Ya kut ku in moul loes lukelos, saap ma patpat? Nunuk munas tuni me akpayeye ke me lutlut toko.