Efu Elos Som Liki Alu Lalos?
KE mutamweyen century ak19, kom tia ku in long la sie met fwin an Prussia (northern Germany ke pal inge) el tia wi ke alu. Ke ma paye, el fwin wi ke alu lulap na tok el ekla nu ke alu srisrik su siena luti lal na policeman el mutamwauk in tuni mokuikui lal. Arulanu yok na paye ma ekla ke lusen pal inge!
Ke len inge, sie pise yok lun met German elos som liki alu lalos. Ke sie report akkalemye la 1 met inmaslon met 4 elos tia wi ke kutena alu. Kain in oiye se inge ku in liyeyuk pa fwin an Austria a Switzerland. Fwin met el lumeyuk nu ke sran alu, na sran alu fwin an Europe el oanu surorla lukel tari nu ke na el mise,” met sim German inge Reimer Gronemeyer el fwak.
Efu Elos Som Liki Alu
Efu met puspis elos som liki alu lalos? Pal nu kemwa, ma inge sikyuk ke sripen mani, yokna ke an puspis su alu el siyuk sin met in moli tax lalos ke alu. Met puspis elos siyuk, ‘Efu mani su nga eis ke sripen orekma upa luk enenu in som nu ke alu?’ Kutu met elos srungela ke sripen me kasrup a ku lulap lun alu. Elos insese ke ma Cardinal Joachim Meisner lun an Cologne, Germany, el fwak la me kasrup lun alu arulanu moklel in loang yok nu ke ma puspis lun fwalu a “tia loang yok nu ke lalalfongi in Kraist.”
Kutu met elos som liki alu lalos ke sripen elos totola ka tari, el tianu purakak insiel, el tianu sang ma enenu lal in ngun. Elos keok ke sral su met palu Emos el palye, “tia sral ke bred, ku sie malu ke kof, a ke long kas lun Jeova.” (Emos 8:11) Meyen elos eis me kasru srisrik na ke alu lalos paenang elos som liki alu lalos.
Fwinne ma upa se inge su sikyuk arulanu paye, tusruktu ya fwal nu sin sie met in som liki kain in alu nu kemwa? Nunku ke sie met musrensral su liye ma se su oanu loaf in bred se. Tusruktu ke pal se ma el srike in kangla el konaok la ma inge orek ke fwokintata. Ya el nunku in tia sulpa mongo in akfwalye ma enenu lal ke mongo? Mo, ma el akola in oru pa, el suk me mongo na paye. In oupanu ou inge, fwin sie alu el tia ku in sang ma enenu lun met lal ke ma lun ngun, ya fwal nu selos in som liki kutena alu? Ya tia sie inkanek lalmetmet nu selos in suk sie inkanek in akfwalye ma enenu lalos ke me mongo in ngun?