Masroloelik Tu In Met Kaksak Ke Insemwomwo Fwin Fwalu Nu Fon
“Komwos in kaksakin Jeova. Kaksak, O komwos met kulansap lun Jeova, kaksakin en Jeova.”—SAM 113:1.
JEOVA GOD el Met Orala Lulap lun kosrao a fwalu, Met Ku Liki Ku lasr ma patpat. El arulanu fwal ke kaksak mwolanu lasr. Ke ma inge Sam 113:1-3 el sapkin nu sesr: “Komwos in kaksakin Jeova! Kaksak, O komwos met kulansap lun Jeova, kaksakin en Jeova. Insemwomwo en Jeova misinge a nu tok ma patpat. Ke fwatu takak nu ke tili en Jeova a fwa kaksakinyuk.”
2 Oanu Met Lo lun God, kut insemwomwo in oru ou inge. Fuka sie me insemwomwo na paye meyen kitin pal lula Jeova el oru on in kaksak inge su kut onkin misinge in nekla fwalu nu fon! (Sam 22:27) Ya pusrem ku in longyuk inmaslon choir lulap inge fwin fwalu nu fon? Fwin aok, fuka sie me insemwomwo na paye meyen ma inge oru kom in siena liki fwalu se inge su kitakatelik, a wangin insemwomwo!
3 Orekma lasr in sang kaksak nu sin Jeova ke inse siefwunnu oru kut in siena liki. Kut sramsram a luti ke inse siefwunnu a orekmakin akmwuk siefwunnu in sulkakin ‘mwo lulap lun Jeova.’ (Sam 145:7) Aok, oanu met lun Jeova su mwolela tari, kut nu kemwa masroloelik tari tu in kulansap nu sin God, Jeova. God el fwak nu sin met lal in pal meeta, Israel, elos in fwasr liki mutanfwal puspis su raunilosla a in nasnas liki orekma koluk nu kemwa lun mutanfwal puspis inge. (Exodus 34:12-16) El sang ma sap nu sin met lal tu elos in ku in oru ma inge. Oupanu ke len lasr, Jeova el ase nu sesr Kas Mutal Lal, Baibel. Kas in luti su oasr ka akkalemye nu sesr fuka kut ku in fwasr liki fwalu se inge. (2 Korint 6:17; 2 Timote 3:16, 17) Kut tia masroloelik oanu kut muta ke monasteries a convents, oanu ma sikyuk ke monk a nun lun Babulon Lulap. In fwasr tukun me srikasrak lal Kraist, kut nu kemwa met sang kaksak lun Jeova nu sin metu.
Etawi Met Kaksak Lulap lun Jeova
4 Jisus el tia fwasr liki nien sun lal in sang kaksak nu sin Jeova ke kutena pal. A ma inge oru lan siena liki fwalu se inge. Ke imwen longok a ke tempel in an Jerusalem, el kaksakin e mutal lun God. Ke fwin eol ku ke likinpot, in an nu kemwa su metu elos toeni, Jisus el luti ma paye lun Jeova ye mutun metu. El fwak: “Nga kaksakin kom ye mutun metu, O Papa, Leum lun kosrao a fwalu.” (Mattu 11:25) Fwinne ke pal se ma el muta ye mutun nununku lal Pailat, Jisus el fwak: “Ke ma inge Nga na isusla, a ke ma inge Nga tuku nu fwalu, tu Nga fwa orek ma lo nu ke ma paye.” (Jon 18:37) Jisus el arulanu aksaokye orekma lal. An nu kemwa el muta, Jisus el orek ma lo kel Jeova a el kaksakunul ye mutun metu.
5 In Sam 22:22, kut ku in konaok kas palu se inge su sramsramkin Met Kaksak Lulap lun Jeova: “Nga fwa fwakak em nu sin met lik; in maslon mwalilu Nga fwa kaksakin kom.” In Hibru 2:11, 12, met sap Poul el orekmakin fus inge nu sin Leum Jisus a nu selos nu kemwa su Jeova el akmutalye in eis mwolanu in kosrao. Oanu el, elos tia mwekin in sang kaksak nu ke en Jeova ye mutun mwalilu. Ya oasr yurosr kain in nunuk inge ke pal se ma kut wi ke meeting nu kemwa lun congregation lasr? Insemwomwo lasr in wi ke meeting, ke nunuk a kas, sang kaksak nu sin Jeova. Tusruktu ya kas in kaksak lasr el safla ke ma inge?
6 Fwal nu ke Mattu 5:14-16, Leum Jisus el ouyepa sang kunokon nu sin met tumal lutlut lal in lela kalem lalos in tolak in purakak kutu met in sang kaksak nu sin Jeova. El fwak: “Komwos kalem lun fwalu. . . . Ou inge komwos sang kalem lomwos in tolak ye mutun metu, tu elos fwa liye orekma mwo lomwos, a kaksakin Papa tumomwos su in kosrao.” Elos nu kemwa su lungse kalem elos sang mwolanu nu sin God. Ya elos oru ou inge ke elos fwak a oru na orekma mwo, sin met atalani lalos? Mo, a elos oru ou inge ke pal se ma elos tukeni nu sie sang mwolanu nu sin Jeova. Aok, elos nu kemwa su lungse kalem elos mwolela moul lalos nu sin God a ekla met kaksak insemwomwo lal. Ya kom oru tari oiye se inge?
Insemwomwo Su Tuku ke Kaksak Nu Sin Jeova
7 Efu met kaksak lun Jeova elos engun? Meyen engun el sie fwako lun ngun mutal lun God. In Galetia 5:22, ma inge simusyukla tukun lungse. Met tumal lutlut lal Jisus ke century se meet akkalemye fwako se inge lun ngun mutal lun Jeova. Ke len in Pentecost 33 C.E., ke pal se ma God el oru in putati ngun mutal lal nu sin met tumal lutlut 120 lal Jisus, elos mutamwauk in sang kaksak nu sin Jeova ke loa puspis. Met Ju puspis lun an puspis su lungse in alu elos tuku nu Jerusalem ‘elos toninfong a lut.’ Elos fwak: “Kut longolos kaskaskin orekma sakuruk lun God in kas lasr”! (Orekma 2:1-11) Mea fwokin kas in kaksak inge nu sin Jeova? Apkurun 3,000 met Ju a met saye elos eis peng mwo lun Togusrai lun God in Messaia. Elos inge baptaisla, eis ngun mutal, a kas lalos toeni nu sin met kaksak lun Jeova ke insemwomwo. (Orekma 2:37-42) Fuka sie me insemwomwo na paye pa inge!
8 Report el tafwela: “A len nu len, ke elos muta ku ke inse siefwunnu in tempel, a in kunsalik bred yen selos, elos mongo me mongo nelos ke engun a paye insielos, kaksakin God, a oi yurin met e nu kemwa. A Leum el esani nu selos elos su fwa moul pinganu len.” (Orekma 2:46, 47) Ya asrouki lalos sie sin sie a tukeni mongo pa oralosla in engun na paye? Mo. Insemwomwo lalos na paye tuku ke orekma lalos in sang kaksak nu sin Jeova len nu len. A insemwomwo lalos yokyokelik ke pal se ma elos liye la tausen sin met elos loang nu ke peng lun molela lalos. Oupanu ke len lasr misinge.
Met Sang Kaksak ke Insemwomwo ke Mutanfwal nu Kemwa
9 Jeova el tia lungse la orekma in tolak ke kalem lun met tumal lutlut lal orekla ke mutanfwal siefwunnu. Ke ma inge mutamwauk 36 C.E., el sang pal mwo nu sin met in mutanfwal nu kemwa in long peng mwo lal. Ke kolyuk lun God, Piter el som nu ke loom lun sie met lulap ke solse lun met Pegan fwin an Caesarea. Fwin an we el konaok Cornelius wekunang kamwuk futoto a sou lal. Ke pal in long mwo lalos ke kas lal Piter, elos akkalemye lalalfongi nu sin Jisus ke insielos. Efu kut etu ou inge? Meyen ngun mutal lun God putati nu sin met Pegan inge su lalalfongi. Pal puspis, me sang lun God ke ngun mutal etukyung nu sin sie met tukun baptais lal, tusruktu ke pal inge Jeova el akkalemye insemwomwo lal nu sin met Pegan inge su lalalfongi meet liki baptais lalos. Fwin Jeova el tia oru ou inge, Piter el tia ku in etu na paye la God el insemwomwo a eis tari met Pegan su lalalfongi oanu met kulansap Lal a ke ma inge elos fwal in eis baptais.—Orekma 10:34, 35, 47, 48.
10 Ke mutamwauk me, Jeova el palye tari la met puspis ke mutanfwal nu kemwa elos fwa sang kaksak nu sel. Oasr met kaksak insemwomwo lal ke kais sie an. In akpayeye ma inge, met sap Poul el srukak kas palu puspis su tuku ke Ma Simusla lun Hibru. El sramsram nu sin kain in met nu kemwa in congregation lun met Kristian fwin an Rom: “Ke ma inge komwos in eis sie sin sie, aok oanu Kraist el ouyepa eis komwos, nu ke mwolanu lun God. Tu Nga fwak, tu orekla Kraist tari met kulansap nu sin met kosroila ke ma paye lun God, tu el fwa akpayeye mwoleung su etukyung nu sin papa tuma, a tu met Pegan fwa akmwoye God ke kulang lal. Oanu ma simusla, [in Sam 18:49]: ‘Ke ma inge Nga fwa sot kaksak nu sum in maslon met Pegan, a on nu ke em.’ A el sifwil fwak [in Duteronomi 32:43]: ‘Komwos in engunak, komwos met Pegan, yurin met lal.’ A sifwilpa [in Sam 117:1]: “Komwos in kaksakin Jeova, komwos met Pegan nu kemwa, a lela met nu kemwa in kaksakin el.’ ”—Rom 15:7-11.
11 Met nu kemwa elos tia ku in kasakin Jeova ke inse siefwunnu elos fwin tia filiye lalalfongi lalos nu sin Jisus Kraist, el su God el pakiye in kol nu sin met nu kemwa ke mutanfwal nu kemwa. In kasrelos engunkin ma paye Lal, God el oakiye sie program in lutlut fwin fwalu nu fon. Inkanek in kol lal akkalemyeyuk ke inkanek lun un met kulansap oaru lal. (Mattu 24:45-47) Mea fwokin ma inge? Pus liki limekosr million met elos akkalemye pusralos ke insemwomwo in on in sang kaksak nu sin Jeova ke an 230 kutu. A sulpa million puspis sin met elos akkalemye pwar lalos in oru pa ou inge. Srike in tuni met nu kemwa su wi ke Memorial ke 1996: 12,921,933. Sakuruk na paye!
Sie U Lulap lun Met Insemwomwo Su Sang Kaksak Akkalemyeyuk Tari Meet
12 Ke arurumu lal, met sap Jon el liye sie “u lulap” su tuku ke mutanfwal nu kemwa. (Fwakyuk 7:9) Mea sifwen kas in kaksak su u lulap se inge el on wikin met akmusrala lun God? Jon el fwak nu sesr: “Lango nu sin God lasr su muta fwin tron, a nu sin Lam.” (Fwakyuk 7:10) Ma inge akkalemyeyuk ke pulaik in an nu kemwa fwin fwalu. Kut srukye pam in paosr, oanu kas pupulyuk, kut inse siefwunnu in sang kaksak nu sin God oanu Ku Liki Ku a insemwomwo in fwak ye mutun kosrao a fwalu la “lango” nu sin God lasr su muta fwin tron, a nu sin Lam, Jisus Kraist. Fuka sie me insemwomwo yok nu sel met sap Jon in liye arurumu sakuruk inge ke u lulap! A fuka sie me insemwomwo na paye sesr in liye, a in wi ipen u se inge, in ekla sie me akpayeye moul ke ma Jon el liye!
13 Oanu met kulansap lun Jeova, kut insemwomwo in wis enel. (Isaia 43:10, 12) Ke sripen kut Met Lo lun Jeova paenang kut siena liki fwalu se inge. Fuka sie me insemwomwo in wis e pengpeng lun God a in oru orekma mutal lal oanu nien sun lun moul lasr! Akmwuk lulap na paye lun Jeova in akmutalye e mutal lal a in akkalemye sumwos lal in kol in kosrao a fwin fwalu ke inkanek lun Togusrai lal a ma inge oasr kalme yok ke moul lasr. A el kasru kut tu in oasr an sesr ke akmwuk mutal lal ke el a ke Togusrai lal. Ma inge el oru ke inkanek tulo.
Etukyung Nu Sesr Ma Paye
14 Ma se meet, Jeova el sang nu sin met lal ma paye. Sie me fwakak mwo na paye pa Togusrai lal el mutamwauk in liaung ke 1914. (Fwakyuk 12:10) Togusrai inge in kosrao siena liki togusrai fwin an Jerusalem in pal meeta, an se ma togusra nu kemwa su tuku sel Devid elos muta ke tron. Togusrai se inge musalla tari, a mutamwauk 607 B.C.E., Jerusalem el muta ye koko lun met Pegan su ku fwin fwalu. Togusrai sasu su Jeova el oakiye ke 1914 pa sie akmwuk in kol in kosrao su tia etukyung nu sin kutena met, a ma lun Jeova mukena a ma inge on nu tok ma patpat. (Daniel 2:44) Ouyepa, inkanek in kol lal siena liki. Ke inkanek fuka? Fwakyuk 11:15 el topuk ke kusensiyuk inge: “Togusrai lun fwalu ekla tari togusrai lun Leum lasr, a lan Kraist lal, a el fwa togusra ma patpat a ma patpat.’ ”
15 “Togusrai lun Leum lasr a lun Kraist lal” el fwa kol met nu kemwa fwin fwalu. Kolyuk sasu se inge lun Jeova God, wikin Mwen nutul su Messaia a met 144,000 wiel su apkurun elos nu kemwa moulyuk tari in mwolanu in kosrao, tia sie me lutlut na su purakak nunuk—ku sie me lutlut su tulik lutlut elos lungse in tuni. Mo, togusrai se inge in kosrao sie guferment na paye. A fwinsrak mwolanu lasr in moul ma patpat ke sumwosmwos ke sripen kolyuk lal, wise nu sesr sripe tu kut in tafwela insemwomwo. Meyen etukyung nu sesr ma paye ke Kas lun Jeova paenang ma inge mokle kut in sramsram ka pal nu kemwa. (Sam 56:10) Ya kom oru ou inge pal nu kemwa ke sramsram nu sin met nu kemwa a akkalemye la Togusrai lun God ye koko lun Messaia mutamwauk in kol in kosrao?
Eis Kasru Sin Ngun Mutal a Un Met Lili Fwin Fwalu Nu Fon
16 Inkanek akluo ke kasru lun God tu in oasr an sesr ke akmwuk mutal lal pa el ase nu sesr ngun mutal, su oru kut in oswela fwako mwomwo lal ke moul lasr a ke ma inge kut eis insemwomwo lal. (Galetia 5:22, 23) Sayen ma inge, Poul el sim leta nu sin met Kristian akmusrala: “A kut eis . . . ngun sin God, tu kut fwa ku in etu ma su God el ase yok nu sesr.” (1 Korint 2:12) Ke kut pusisel nu ke ngun mutal lun Jeova, kut nu kemwa ku in etu ingenu a kalem ke ma mwo puspis su el ase nu sesr ke kulang—mwolela lal, ma sap, akmwuk, a ma puspis.—Srike liye Mattu 13:11.
17 Fwin ke inkanek aktulo su God el orekmakin in kasru kut, oasr met lili wiesr fwin fwalu nu fon a akmwuk mwolanu lun u lun Jeova ke oiyen alu. Met sap Piter el sramsram ke ma se inge ke pal se ma el kaifwe nu sesr in “lungse met lili.” (1 Piter 2:17) Un met lili wiesr fwin fwalu nu fon su oanu sie sou a lungse sie sin sie, elos kasru kut in kulansap nu sin Jeova ke engun ma lulap, oanu Sam 100:2 el sapkin: “Kulansapu Jeova ke engun. Komwos in tuku nu ye mutal ke on.” Fus 4 el tafwela in fwak: “Utyuk nu in mutunoanoa sel ke kulo, a nu in kalkal lal ke kaksak. Sang kulo nu sel, a kaksakin el.” Paenang fwinne kut wi orekma lun forfor sie loom nu ke sie loom ku kut wi ke meeting nu kemwa, kut ku in pulakin insemwomwo. Misla a wangin sangeng kut konaok ke kalkal kato ke tempel in ngun lun Jeova!
Kaksakin Jeova ke Engun!
18 Ke kutena luma a ma sikyuk su tianu fwusesr, kolyai, ku kutu ma upa su sun kut, lela kut in insemwomwo meyen kut muta ke loom alu lun Jeova. (Isaia 2:2, 3) Esam la engun tuku ke inse. Met lili Kristian wiesr in pal meeta elos met kaksak insemwomwo lun Jeova fwinne elos sun kain in ma upa puspis a pukanten ma tula nu selos. (Hibru 10:34) Met lili Kristian wiesr misinge elos oupanu oru ou inge.—Mattu 5:10-12.
19 Kut nu kemwa su kulansap nu sin Jeova kut insemwomwo in akos kas in kaifwe lun Baibel in sang kaksak nu sel. Pal puspis buk lun Fwakyuk el akfulatye kas in kaksak nu sin God a orekmakin kas inge “Kaksakin Jah!” (Fwakyuk 19:1-6) Ke fus onkosr lun Sam 150, kut nu kemwa sapkinyuk pal 13 in kaksakin Jeova. Ma inge me siyuk nu sin ma orekla nu kemwa in tukeni nu sie ke insemwomwo in on kin on kaksak nu sin Jeova. Moul ma patpat lasr oakiyuki nu ke akesrui lasr in wi ke on lulap inge Hallelujah! Aok, met nu kemwa su ku in moul ma patpat pa elos mukena su sang kaksak nu sin Jeova ma patpat. Ke ma inge, kut kaifweung na paye in fulyung nu ke congregation oaru lal fwin fwalu nu fon ke kut liye tu pal futotoeni. Na, kut ku in fwinsrak in liye kas safla lun Sam 150 in akpayeye: “Lela ma nu kemwa su oasr momong la—in kaksakin Jah. Komwos in kaksakin Jeova!”
Fuka Kom Topuk?
◻ Mea oru met lun Jeova in siena liki, a sakuruk?
◻ Efu met kulansap lun Jeova elos insemwomwo?
◻ Mea ma inge su oru kut in siena liki fwalu se inge?
◻ Inkanek tulo fuka God el orekmakin in kasru kut in oasr an sesr ke akmwuk mutal lal?
[Study Questions]
1, 2. (a) Fwal nu ke Sam 113:1-3, su fwal in eis kaksak ke insemwomwo lasr? (b) Kain in kusensiyuk fuka fwal in siyukyuk?
3. (a) Mea oru met lun Jeova in siena liki, a sakuruk? (b) Ke inkanek fuka kut nu kemwa masroloelik?
4. Fuka Jisus el orala me srikasrak ke orekma in kaksakin Jeova?
5. Nu sin su Sam 22:22 fwal in orekmakin, a oiye fuka kut enenu in akkalemye?
6. Kain in kunokon fuka Jisus el sang nu sin met tumal lutlut lal, a fuka met su lungse kalem elos sang kaksak nu sin God?
7. Efu met sang kaksak nu sin Jeova elos insemwomwo, a kain in insemwomwo fuka oasr yurolos ke len in Pentecost 33 C.E.?
8. Tukun Pentecost, mea met Kristian elos oru in akyokye insemwomwo lalos?
9. (a) Nga a fuka God el mutamwauk in sang nu sin met Pegan pal mwo in long peng mwo? (b) Efu ku ngun mutal putati nu sel Cornelius a met su wilul meet liki baptais lalos?
10. Fuka kas palu in pal meeta akkalemye la met Pegan elos e fwa sang kaksak nu sin Jeova?
11. Fuka God el sang kasru nu sin met nu kemwa ke mutanfwal nu kemwa in etu ma paye, a mea fwokin ma inge?
12. Kain in arurumu fuka su purakak insiel met sap Jon el liye, a mea mea akpayeye moul ke arurumu se inge?
13. Mea ma inge su orala met lun Jeova in siena liki fwalu?
14, 15. (a) Mea sie inkanek su God el orekmakin in kasru kut in oasr an sesr ke akmwuk mutal lal ke el a Togusrai lal? (b) Fuka Togusrai se inge su oakiyuki ke 1914 C.E. siena liki togusrai su musalla ke yiu 607 B.C.E.?
16, 17. Mea inkanek akluo a aktulo su God el orekmakin in kasru kut in oasr an sesr ke akmwuk mutal lal?
18. Efu kut ku in insemwomwo ke orekma lasr in sang kaksak nu sin Jeova fwinne kut sun kain in ma upa puspis?
19. (a) Kain in kas in kaifwe puspis fuka purakak insiesr in kaksakin Jeova? (b) Moul ma patpat lasr oakiyuki nu ke mea, a mea nien sun lasr na paye su kut lungse in sun?