Jesus El Ahkkweyelah Mwet Mas Ke Lwen Sabbath

Mwet Pharisee eltahl arlac kasrkuhsrak nuh sel Jesus pasis eltahl suk inkacnek in sruokilyac. Eltahl fahk muh el tiac kuh in unwelah mwet mas ke lwen Sabbath. Sie lwen in Sabbath, Jesus el liyacack sie mwet kun ma muhta nguhsr ah. El fahk nuh sin mwet tuhma lutlut lal: ‘Komtacl in liye lah God el ac fah orekmakihn fuhkah kuh lal in kahsruh mukul se inge.’ Jesus el acniyac nuh in fohk uh in oraclah fohk fuhrahrrahr, ac sang mosrwelah muhtuhn mukul sac. Jesus el fahk: ‘Fahlac ac twanla motom ke luhluh in kof Siloam.’ Mukul se inge el oruh ma fahk nuh sel inge, ac ke pacl se emeet ke moul lal, el kuh in liye.

Mwet uh eltahl arlacna lut kac. Eltahl asiyucki: ‘Tiac pa inge mwet se ma muhta nguhsr ah, kuh el oacna mwet sac?’ Mukul sac el tahk: ‘Nga pa mwet se suc nuhna isuslac kun!’ Mwet uh siyuck sel: ‘Fuhkah tuh kom kuh in liye inge?’ Ke pacl el sruhmuhn ke ma sikyak ah, eltahl usacllah nuh yurin mwet Pharisee.

Mukul se fahk nuh sin mwet Pharisee: ‘Jesus el sang fohk fuhrahrrahr nuhke muhtuhk ac el fahk nuh sihk ngan twanla muhtuhk. Nga oruh ma el fahk an, ac inge nga kuh in liye.’ Mwet Pharisee eltahl fahk: ‘Ke Jesus el ahkkweyelah mwet mas ke lwen Sabbath, kuh lal inge tiac ma sin God me.’ Tuhsruhktuh mwet sahyac uh fahk: ‘Fin kuh lal tiac ma sin God, el tiac kuh in unwelah mwet mas.’

Mwet Pharisee eltahl pahngon pahpah ac ninac kiyacn mukul se, ac siyuck seltahl: ‘Na fuhkah tuh tuhlihk nuhtumtacl el kuh in liye ingena?’ Pahpah ac ninac kiyacn mukul se inge eltahl sahngweng mweyen mwet Pharisee fahk muh kuhtwena mwet suc luhlahlfongel Jesus ac fah sisilac liki iwen lohlngohk. Pwacnacng eltahl topuk: ‘Kuht tiac etuh. Komtacl siyuck sel.’ Pacl na puhs mwet Pharisee siyuck kac sin mwet se inge nwe ke el fahk nuh seltahl: ‘Nga fahk tari nuh sumtacl ma nuhkewa. Efuh kuh komtacl sifwilpac siyuck?’ Mwet Pharisee eltahl muhlat nuh sel ac sisuhllah liki acn sacn.

Jesus el suk mukul sac ac siyuck sel: ‘Yac kom luhlahlfongi ke Messiah?’ Mukul sac el fahk: ‘Ahok, nga fin kuh in etwacllah.’ Jesus el fahk nuh sel: ‘Nga pa Messiah.’ Pwacye lah Jesus el arlacna kuhlwacng. Sahyen el ahkkweyelah mukul se inge, el oacyacpac kahsrel in oasr luhlahlfongi.