Jesus El Kihteyac Tausin Pucspucs Sin Mwet

Meet liki Kuhfwen Ahluhkwelah in yac 32, mwet sap eltahl fohlohkoh liki orekma in fahkwack laltahl. Eltahl arlac tohtohlah, pwacnacng Jesus el sap eltahl in weluhl som nuh Bethsaida wi ke oak soko tuh eltahl in kuh in monglac we. Tuhsruhktuh ke oak uh apkuhran nuh fin mes uh, Jesus el liye tausin pucspucs sin mwet soaneltahl we. Finne Jesus el luhngse in muhkwelacna muhta wi mwet sap lal, el paing mwet nuhkewa inge. El ahkkweyelah mwet mas laltahl ac lotweltahl. Lwen fohn se Jesus el lotweltahl ke Tohkohsrahi luhn God. Ke ekwelah, mwet sap lal eltahl kaluckyang nuh yohrohl ac fahk: ‘Pwacye lah mwet inge eltahl masrinsracl tari. Suhpwaclah mwet uh tuh eltahl kuh in konwacack mongo nwacltahl.’

Jesus el fahk: ‘Eltahl tiac enenuh in som. Komtacl sang kuhtuh mongo an eltahl in kang.’ Mwet sap eltahl siyuck: ‘Yac kom luhngse kuht in som moul bread in kihtacltahl?’ Philip, sie sin mwet sap el fahk: ‘Finne oasr mani puhkantwen lasr, kuht tiac kuh in konwacack mongo ma ac fal in kihteyac u na luhlahp se inge.’

Jesus el siyuck: ‘Fuhkah luhpan mwe mongo ma oasr yohrohsr?’ Andrew el fahk: ‘Ma oasr yohrohsr pa lof in bread lihmekohsr ac ik srihsrihk lukwac. Suhfal na pwacye.’ Jesus el fahk: ‘Use nuh sihk bread ac ik ngacn.’ El fahk in oraclihk mwet uh nuhke u, kais 50 ke u se ac kais 100, ac muhta fin mah. Jesus el eis bread ac ik ac el ngwetack nuh inkuhsrao ac puhruhe. Tohkohyang, el sang mongo inge nuh sin mwet sap, ac eltahl kihtaclah nuh sin mwet uh. Mukul 5,000, wi muhtwacn ac tuhlihk srihsrihk eltahl nuhkewa mongo nwe kihpi. Tukun mwet uh mongo, mwet sap eltahl oracni ma yolyak an, tuh in tiac kuhnausten. Eltahl oracni luwen mongo uh ac nwacklah fohtoh 12! Arlacna usrnguck mwenmwen se inge!

Mwet inge eltahl fwefwelac na pwacye pasis eltahl luhngse in oracl Jesus in tohkohsrah laltahl. Tuhsruhktuh, Jesus el etuh lah tiac pa inge pacl pakiyucki luhn Jeova tuh elan eklac sie tohkohsrah. Pwacnacng, Jesus el sapkihn mwet inge in fohlohklac nuhke lohm seltahl sifacna ac el fahk nuh sin mwet sap eltahl in kalot meet nuh lefahlo ke Meoa Galilee. Eltahl sroacng nuh fin oak uh, ac Jesus el fanyak nuh finohl uh. Efuh? Mweyen el luhngse in puhruhe nuh sin Pahpah tuhmwacl. Pwacye, puhkantwen orekma lal Jesus, ne ohinge el puhruhe pacl nuhkewa.