Jesus El Oraclah Mwenmwen Pucspucs

Jesus el tuhkuh nuh facluh tuh elan fahkwack pweng wo ke Tohkohsrahi luhn God. In ahkkahlwemye ke ma Jesus elac fah oruh ke pacl se el Tohkohsrah lac, Jeova el sang nuh sel nguhn muhtahl tuh elan kuh in oraclah mwenmwen. Mas nuhkewa el kuh in unwelah. Yen nuhkewa el som nuh we, mwet mas uh ukwacl, ac el ahkkweyelah mas luhn mwet nuhkewa inge. Mwet kun eltahl kuh in liye, mwet suhlohngkahs kuh in lohng, mwet ul eltahl fahsr, ac mwet suc oan ye kuh luhn demon eltahl sukohsohklah. Ke eltahl kalye puhlan nuknuk lal ah, eltahl kwelac ke mas laltahl uh. Mwet uh ukwacl Jesus yen nuhkewa el som nuh we. Finne ke pacl se ma el luhngse in muhkwena muhta, Jesus el tiacna luhsuhltahllah.

Sie pacl ah, mwet uh tuhkuh us mukul mihsen ul se nuhke lohm se ma Jesus el muhta we. Iktoklac lohm uh, pwacnacng eltahl tiac kuh in utyak nuh loac. Ke srihpac se inge, eltahl ikacslah mahngon lohm uh, ac eltahl koelah kilus se ma mwet ul se oan fac suwohsna nuhke acn se Jesus el muhta we. Jesus el fahk nuh sin mukul se: ‘Tuhkahkack, ac kom in fahsr.’ Ke pacl se el fahsr, mwet uh arulacna fwefwelac.

Ke sie pac pacl ah, ke Jesus el utyak nuhke sie mura, oasr mwet mihsen lepa 10 suc tu yen loes kuhtuh eltahl wowoyak ac fahk: ‘Jesus, kom in kahsre kuht!’ In pacl sacn, mwet lepa uh tiac lweyucklac in tuhkuh apkuhran nuh yurin mwet uh. Jesus el fahk nuh sin mukul inge eltahl in som nuh in tempuhl. Pa inge ma Masap luhn Jeova sapkihnyuck nuh sin mwet lepa eltahl fin kwelac ke mas laltahl inge. Ke eltahl fahsr in som nuhke tempuhl, eltahl kwelac tari. Ke sie sin mwet lepa inge liye tuh el kwelac, el fohlohkoh ac sang kuloh nuh sel Jesus ac in kaksakihn God. Ke mwet singucul inge suc oasr mihsen lepa, mwet se muhkwena sang kuloh nuh sel Jesus.

Oasr sie muhtwacn suc mas ke lusen yac 12 el luhngse na pwacye in kwelac. El fahsryak inmahsrlon mwet uh nuh tohkohl Jesus ac kahlye puhlan nuknuk lal ah. Kihtin pacl ah na el kwelac. Jesus el siyuck: “Suc kahlyucwi uh?” Muhtwacn se el rahrrahr, tuhsruhktuh el fahsryak nuh yohrohl Jesus ac fahk ma el oruh ah. Jesus el ahkwoyellah ac fahk: ‘Acn nuhtihk, som in mislac.’

Sie mwet kol suc pahngpahng Jairus el kwacfe sel Jesus: ‘Fahsruh, som nuh lohm sihk uh! Tuhlihk muhtwacn se nuhtihk el arlacna mas, ac apkuhran in misac.’ Tuhsruhktuh, meet liki na Jesus el tuhkuh nuhke lohm sel Jairus, tuhlihk muhtwacn se el misac. Ke Jesus el sun lohm sac, el liye mwet pucspucs oasr tari we suc tuhng wi sucu sacn. Jesus el fahk: ‘Nimet komtacl tuhng, el mutul na.’ Na el sruokyac poun tuhlihk sac ac fahk nuh sel: “Tuhlihk se, tuhkahkack!” In pacl sac na tuhlihk muhtwacn se el tuhkahkack, ac Jesus el fahk nuh sin pahpah ac ninac kiyacl in sang mongo nwacl. Pwacye lah pahpah ac ninac kiyacl inge arlacna engan!