Jesus El Fahkwack Pweng Ke Tohkohsrahi

Tukun Jesus el bacptaislac, el muhtwacwacack in fahkwack: ‘Tohkohsrahi luhn God apkuhran me.’ Mwet tuhma lutlut weluhl ke el fuhfahsryucsr nuh in acn Galilee ac acn Judea. Ke pacl se Jesus el fohlohklac nuh acn sel, Nazareth, el som nuh in iwen lohlngohk, el ikacslah puk lihmlihm lal Isaiah, ac el riti ma inge ke puhsra luhlahp: ‘Jeova el acse nuh sihk nguhn muhtahl tuh nga kuh in fahkwack pweng wo uh.’ Meac kalmen ma inge? Kalmac pa, finne mwet uh luhngse Jesus elan oraclah mwenmwen, srihpac se yohk emeet pwacnacng God el sang nuh sel nguhn muhtahl pa in fahkwack pweng wo. Tukun ma inge, el fahk nuh sin mwet suc lohngohl: ‘Mihsenge kahs pahluh se inge ahkpwacyeiyuck.’

Tohkoh, Jesus el som nuh Meoa Galilee, ac in acn we el etwaclah mwet pahtuhr ahkosr suc eklac mwet tuhma lutlut lal. El solwacltahl: ‘Fahsruh wiyuc, ac nga fah oruh komtacl mwet pahtuhri mwet.’ Mukul inge pa Peter, Andrew, James, ac John. In pacl sacna eltahl fihliyac nwek nahtuhltahl ac weluhl som. Eltahl som nuh in acn Galilee nohfohn ac fahkwack pweng wo ke Tohkohsrahi luhn Jeova. Eltahl fahkwack in iwen lohlngohk, acn in kuhka, ac inkacnek uh. Un mwet pucspucs fahsr tohkohltahl yen nuhkewa eltahl som. Pweng kacl Jesus fahsrelihk yen nuhkewa, nwe ke acn Syria.

Kuhtuh pacl tok, Jesus el sang kuh nuh sin kuhtuh mwet tuhma lutlut lal in ahkkweyelah mas luhn mwet, ac in sislah demon. Kuhtuh seltahl weluhl in fahkwack pweng wo nuh in siti ac mura pucspucs. Oasr muhtwacn oaru oacna Mary Magdalene, Joanna, Susanna, ac muhtwacn pac sahyac, suc kahsrel Jesus ac mwet tuhma lutlut lal.

Tukun Jesus el sang ahkpah nuh sin mwet tuhma lutlut lal, el sapkihn nuh seltahl in fahkwack. Ke eltahl fuhfahsryucsr in acn Galilee nohfohn, puhs mwet suc eklac mwet tuhma lutlut ac eis bacptais. Ke srihpen puhs mwet suc luhngse in eklac oacna mwet tuhma lutlut lal Jesus, el puhpuhlyuckkihn ma inge nuhke sie imac ma apkuhran in kosracni. El fahk: ‘Komtacl in puhruhe nuh sin Jeova tuh elan suhpwaclah mwet orekma in oruh orekma in kosracni.’ Tiac paht, el sulaclah mwet tuhma lutlut 70 lal ac el suhpweloselihk kais luo in fahkwack pweng wo fin acn Judea nohfohn. Eltahl luti nuh sin kain in mwet nuhkewa ke Tohkohsrahi uh. Ke mwet tuhma lutlut inge fohlohklac, eltahl engan in sruhmuhn nuh sel Jesus ma sikyak ah. Devil el tiac kuh in tulokihnyac orekma in fahkwack inge.

Jesus el oraclah oakwuck tuh mwet tuhma lutlut lal in tahfwelah na in oruh orekma na yohk srihpac inge finne el oasr tari inkuhsrao. El fahk nuh seltahl: ‘Komtacl in fahkwack pweng wo nuh sin mwet nuhkewa fin facluh nohfohn. Komtacl luti mwet ke Kahs luhn God, ac bacptaiseloslac.’