Jonathan El Puhlaik, Oaru ac Pwacye

Jonathan, wen se suc mahtuh emeet nahtuhl Tohkohsrah Saul el mwet mweun na puhlaik se. David el fahk lah Jonathan el muhi liki eagle ac fokoko liki soko lion. Ke sie lwen ah, Jonathan el liye mwet solse Philistia 20 fin inging soko. El fahk nuh sin mwet se suc us mwe mweun nahtuhl ah: ‘Kuht ac fah lainuhltahl muhkwena fin Jeova el use nuh sesr mwe akucl. Fin mwet Philistia inge fahk nuh sesr kuht in som nuh yohrohltahl, na kuht ac muhtwacwacack in mweun.’ Mwet Philistia inge wowoyak ac fahk: ‘Fahsruh nuh yohrohsr ac mweun!’ Na mukul luo inge fanyak nuh fin inging uh ac kuhtanglah mwet solse inge.

Ke srihpen Jonathan pa mahtuh emeet nahtuhl Saul, pwacnacng el pa mwet se tok in eklac tohkohsrah. Tuhsruhktuh, Jonathan el etuh lah Jeova el sulacllah David in el pa tohkohsrah se tok luhn mwet Israel. Pwacnacng el tiac ahkkahlwemye ohiyen sok, a Jonathan ac David eklac kawuck na fototo. Eltahl wuhlelah in karihngihn ac loangelah sie sin sie. Jonathan el sang nuh sel David nuknuk lal sifacna, cutlass nahtuhl, mwe pihsr nahtuhl ac pel lal oacna mwe akucl se nuhke fototo laltahl uh.

Ke pacl se ma David el kahingkuhnuhl Saul, Jonathan el som nuh yohrohl ac fahk: ‘Kom in kuh na ac puhlaik. Jeova el sulekomlac in tohkohsrah. Finne pahpah tuhmuhk uh, el etuh pac kac.’ Yac kom luhngse in oasr kawuck wo se lom suc oacna Jonathan?

Pacl puhs, Jonathan el pihlacsraclah moul lal in kahsruh kawuck se lal inge. El etuh lah Tohkohsrah Saul el luhngse in unilyac David, pwacnacng el fahk nuh sin pahpah tuhmwacl: ‘Sie orekma kuluk nuh sum pa in unilyac David; mweyen el soenna oruh ma kuluk nuh sum.’ Saul el arlacna foloyak sel Jonathan. Ke yac ekahsr tohkoh, Saul ac Jonathan tuhkweni misac ke mweun ac.

Tukun Jonathan el misac, David el suk wen se nahtuhl suc pahngpahng Mephibosheth. Ke pacl se David el konwaclwack, el fahk nuh sel Mephibosheth: ‘Ke srihpen pahpah tomom an kawuck na wo se luhk, pwacnacng nga ac karihngihn kom ke lusen moul lom. Kom ac muhta ke lohm sihk ac wi mongo ke tepuh luhk.’ David el tiacna muhlkuhnlah kawuck se lal inge Jonathan.