Mwe Kweok Ohnkohsr Tohkoh

Moses ac Aaron eltahl som nuh yohrohl Pharaoh in fahk kahs luhn God inge: ‘Kom fin tiac fuhlwelah mwet luhk uh, nga ac suhpwacoht un loang in nwacklah acn uh. Loang inge yohk ac ngalngucl.’ Un loang na luhlahp inge utyak nuh luun lohm sin mwet Egypt, kewana mwet kahsruhp ac mwet suhkahsruhp. Acn na fohn sac sesseslah ke loang uh. Tuhsruhktuh fin acn Goshen, yen mwet Israel muhta we, wacngihn loang we. Muhtwacwacack ke mwe kweok se ahkahkosr inge, ma inge ahkkweokye mwet Egypt muhkwena. Pharaoh el sifwilpac fahk: ‘Siyuck sin Jeova tuh elan eislah loang inge. Mwet lom uh kuh in som.’ Ke Jeova el ahkwacngihnyelah loang inge, Pharaoh el sifwil pacna ekuhllah nuhnak lal uh. Ngac Pharaoh el ac lotwelah ma el enenuh in oruh uh?

Jeova el fahk: ‘Pharaoh el fin tiac fuhlwelah mwet luhk in som, kosro nuhkewa fin acn Egypt ac fah masack ac misac.’ Lwen se tohkoh, kosro nuhkewa muhtwacwacack in misac. Tuhsruhktuh, kosro nuhtin mwet Israel inge tiac misac. Pharaoh el srackna lihkkeke ac sruhnga in ahkos.

Tukun ma inge, Jeova el fahk nuh sel Moses elan sifwil fohlohk nuh yohrohl Pharaoh ac sisack kuhtuh apact uh nuh lucng. Apact inge nwacklah yen engyeng uh ac puhtati nuh fin mwet Egypt nuhkewa. Ma inge oraclah fahf ma arlacna ngal ac nwacklah monin mwet Egypt ac kosro nuhkewa. Tuhsruhktuh, Pharaoh el srackna sruhnga in fuhlwelah mwet Israel.

Jeova el suhpwacllah Moses elan sifwil fohlohk nuh yohrohl Pharaoh, ac fahk kahs Lal inge: ‘Kom srackna sruhnga in suhpwaclah mwet luhk inge? Lutu, aes tatngal ma puhtat oacna af nuh fin acn uh.’ Ke lwen tok ah, Jeova el oraclah in aes tatngal inge puhtat oacna af, wi puhlahl ac e fihrihr. Pa inge pahkah se ma upac emeet fin acn Egypt. Sahk ac fukun sahk nuhkewa muhsahllah, sahyen ma fin acn Goshen. Pharaoh el fahk: ‘Siyuck Jeova elan tulokihnyac! Na, komtacl nohfohn kuh in som.’ Tuhsruhktuh, ke pacl se ma inge tui, Pharaoh el sifwil pacna ekuhllah nuhnak lal uh.

Na Moses el fahk: ‘Ingena, locust uh ac fah kanglah kuhtwena sahk ma luhlah ke af ma oacna aes tatngal sac.’ Million sin locust inge tuhkuh ac kanglah ma nuhkewa ma luhlah in imac ac ke sahk uh. Pharaoh el sifwil pacna fahk: ‘Siyuck Jeova elan eislah locust inge.’ Tuhsruhktuh, finne Jeova el eislah locust inge, Pharaoh el srackna lihkkeke.

Jeova el fahk nuh sel Moses: ‘Ahsroelah poum nuh lucng.’ Ke kihtin pacl na, lohsr mahtoltollac yen engyeng uh. Ke lusen lwen tolu, mwet Egypt eltahl tiac kuh in liye kuhtwena ma kuh mwet. Lohm sin mwet Israel muhkwena pa kahlwem uh.

Pharaoh el fahk nuh sel Moses: ‘Kom ac mwet lom an kuh in som. Tuhsruhktuh, fihliyac ma orahkrahk nuhkewa lomtacl an.’ Moses el fahk: ‘Kuht enenuh in us kosro nahtuhsr inge tuh kuht in orek mwe kihsac nuh sin God lasr.’ Pharaoh el arlacna kasrkuhsrak. El wowoyak ac fahk: ‘Tiohk liki yuc! Nga fin sifwil liye kom, nga fah unikowi.’