Mwe Kweok Tolu Emeet

Mwet Israel ah ahkkweokye in orekma upac oacna mwet kohs. Jeova el suhpwacllah Moses ac Aaron nuh yohrohl Pharaoh in fahk pweng inge nuh sel: ‘Fuhlwelah mwet luhk in som tuh eltahl in kuh in alu nuh sihk in yen mwesis.’ Pharaoh el kohuyak ac fahk: ‘Nga tiac elyah ke ma Jeova el fahk an, ac nga fah tiac lwelah mwet Israel in som.’ Na Pharaoh el sang orekma lalos in upac liki na meet ah. Jeova el sulaclah in lotwel Pharaoh sie ma na yohk srihpac. Kom etuh lah el oruh fuhkah? El suhpwaclah Mwe Kweok Singucul nuh Egypt. Jeova el fahk nuh sel Moses: ‘Pharaoh el tiac lohngyuc. Ke lututacng el ac fah som nuhke Infacl Nile. Som nuh yohrohl ac fahk nuh sel lah ke srihpen el tiac fuhlwelah mwet luhk inge in som, kof ke Infacl Nile uh ac fah eklac nuhke srah.’ Moses el ahkos ac som nuh yohrohl Pharaoh. Pharaoh el liyacl Aaron ke el srihngihlyac infacl soko ah ke sikacl lal ah, ac kof uh eklac nuhke srah. Kof inge muhtwacwacack in pusrohsr, ik kac inge misac ac wacngihnlac kof in nihmnihm ke infacl soko inge. Pharaoh el srackna sruhnga in fuhlwelah mwet Israel in som.

Lwen itkohsr tohkoh, Jeova el sifwilpac suhpwacllah Moses nuh yohrohl Pharaoh elan fahk ma inge: ‘Kom fin tiac lwelah mwet luhk ah in som, acn Egypt ac fah sesseslah ke frog.’ Aaron el ahsroelah sikacl lal ah, ac frog uh afuhnlah acn uh. Mwet we inge konwacack frog luun lohm seltahl uh, fin mwe oan kiyacltahl uh ac luun ahluh in mongo laltahl uh. Oasr frog ke yen nuhkewa! Pharaoh el siyuck sel Moses elan siyuck Jeova elan nuhnak muhnahs tulokihnyac mwe kweok inge. Pharaoh el wuhlelah muh el ac fuhlwelah mwet Israel in som. Pwacnacng, Jeova el tulokihnyac mwe kweok sac ac acn Egypt nwacnwaclah ke frog ma misac. Acn we inge pusrohsrack. Tuhsruhktuh, Pharaoh el srackna sruhnga in fuhlwelah mwet Israel in som.

Tukun ma inge Jeova el fahk nuh sel Moses: ‘Fahk nuh sel Aaron elan puokyac infohk uh ke sikacl lal ah, ac pukun kutkut infohk uh ac eklac nuhke won srihsrihk ngalngucl.’ Ac tiac paht, oasr won srihsrihk ngalngucl yen nuhkewa. Kuhtuh sin mwet lal Pharaoh inge fahk nuh sel: ‘Mwe kweok inge ma tuhkuh sin God me.’ Tuhsruhktuh, Pharaoh el srackna sruhnga in fuhlwelah mwet Israel in som.