Mea Akwuk lun God ke Fwalu?

1. Mea akwuk lun God ke fwalu?

AKWUK lun God ke fwalu arlana mwo. Jeova el lungse fwalu in nenela ke met puspus su insemwomwo a oasr mano fukoko. Baibel el fwak la “God el eokoala sie imae . . . in Eden” a “el akkapyeak . . . sak nukewa su mwo in liye a mwo in mongo.” Tokin Jeova el orala mokul a mutan se meet, Adam a If, el fulelosi ke an kato inge a el fwak nu selos: “Komwos in kapek a yokelik a nekla fwalu, a kutangla.” (Genesis 1:28; 2:8, 9, 15) Aok akwuk lun God nu sin metu pa elos in oswela tulik puspus, in akyokye imae kato sa in nekla fwalu nufon, a in liaung kosro nukewa.

2. (a) Kut etu fuka la akwuk lun God ke fwalu fwa akpayeyuk? (b) Mea Baibel el fwakak ke moul ma patpat lun metu?

² Ya kom nunku mu akwuk lun Jeova God nu sin metu in moul ke sie paredais fwin fwalu e fwa akpayeyuk? God el fwak: “Nga kaskas tari, . . . Nga fwa ouyepa oru.” (Isaia 46:9-11; 55:11) Aok, Jeova el fwa akpayeye akwuk nukewa lal! El fwak la “el tia orala [fwalu] yen mesis” a “el lumala tu met in muta we.” (Isaia 45:18) Kain in met fuka God el lungse in muta fwin fwalu? A putaka God el lungselos in muta fwin fwalu? Baibel el sang me top: “Met sumwosmwos elos fwa usru fwalu, a muta we ma patpat.”​—Sam 37:29; Fwakyuk 21:3, 4.

3. Ma upa puspus fuka oasr fwin fwalu in pal inge, a kusensiyuk puspus fuka sikyak?

³ Kalem la ma inge soenna sikyak. Met puspus ke pal inge elos sun mas a mise; elos anwuk a uniye sie sin sie. Oasr ma sikyak su tia mwo. Tusruktu, paye la tia akwuk lun God in oasr ma koluk puspus fwin fwalu oana ma kut ku in liye ke pal inge! Mea sikyak? Efu ku akwuk lun God soenna akpayeyuk? Wangin kutena buk su simusyukla sin metu ku in akkalemye nu sesr ke mutaweyen ma upa inge in kosrao.

MUTAWEYEN SIE MET LOKWALOK

4, 5. (a) Su na paye sramsram nu sel If ke inkanek lun serpent soko a? (b) Fuka sie met mwo a sumwos el ku in ekla sie met pusrapasr?

⁴ Buk se meet lun Baibel el fwakak ke sie met lain lun God su sikyak in imae Eden. El akkalemyel oana soko “serpent” tusruktu met lokwalok se inge el tia soko kosro ku serpent mukena. Buk safla lun Baibel el akkalemyel oana “el su pangpang Devil a Setan, su kiapela fwalu nufon.” El pangonyuk pa “serpent matu.” (Genesis 3:1; Fwakyuk 12:9) Lipufan ku se inge, ku ma orekla in ngun se inge su tia ku in liyeyuk, el orekmakin serpent soko in sramsram nu sel If. El lumala mu pusral pa tuku liki serpent sokoa. Wangin alolo ka la ma orekla in ngun se inge el oasr we ke pal se God el akola fwalu nu sin metu.​—Job 38:4, 7.

⁵ Tusruktu, ke sripen ma orekla nukewa lun God elos sumwosmwos, paenang su orala “Devil,” “Setan” se inge? In kalem nu sesr, sie tulik nutin God inge su orekla in ngun el sifwana oralla in ekla Devil. Fuka ma inge ku in sikyak? Aok, ke pal inge sie met mwo a oaru saap el ku in ekla sie met pusrapasr. Fuka sikyak lun ma inge? Saap sie met el lela sie kain in kena koluk in ilyak nu ke nunak lal a nu insiel. El fwin nunku pal nukewa ke ma inge, kena koluk se inge ku in ekla arlana fukoko. Tok, saap el ku in akpayeye kena koluk se su el muta nunku ka inge.​—Jemes 1:13-15.

6. Fuka sie sin lipufan ku nutin God el ekla Setan su Devil?

⁶ Pa inge ma sikyak nu sel Setan su Devil. Arlana kalem la el long ke God el fwak nu sel Adam a If in orek tulik a nekla fwalu nufon ke tulik natulos. (Genesis 1:27, 28) Kalem la Setan el nunku ouinge, ‘Aok, met inge nukewa ku in alu nu sik liki na in alu nu sin God!’ Paenang oasr kena koluk su akkeye nunak a insiel. Ke saflaiye, el oru orekma koluk in kiapella If ke el fwakak nu sel ma kikiap puspus ke God. (Genesis 3:1-5) Ke ma inge el ekla sie “Devil,” kalmekin “Met Kaskas Kikiap.” Ke pal sepana inge, el ekla “Setan,” su kalmekin “Met Lokwalok ku Met Lain.”

7. (a) Efu ku Adam a If elos mise? (b) Efu ku tulik nukewa natul Adam elos kapak matou a mise?

⁷ Ke inkanek lun kas kikiap a kutasrik, Setan su Devil el moklel Adam a If in seakos God. (Genesis 2:17; 3:6) Fwokin ma inge, ke saflaiye elos mise, oana ma God el fwak nu selos fwin elos seakos. (Genesis 3:17-19) Ke sripen Adam el ekla met sesumwos ke pal se el oru ma koluk, paenang tulik natul nukewa elos usrui ma koluk kel. (Rom 5:12) Ma sikyak inge ku in pupulyukkinyuk nu ke sie pan su orekmakinyuk nu ke me manman bred. Fwin pan sa oasr an lopeni ka, mea ku in sikyak nu ke kais sie bred su orekla ke pan lopeni se inge? Kais sie bred ku in oasr lopeni se ka, ku tia fwel. Ke inkanek ouinge, kais sie met el ku in usrui pa sie ma su tia sumwos a oasr “lopeni” ku usrui moul sesumwos su tuku kel Adam. Paenang met nukewa kapak matou a mise.​—Rom 3:23.

8, 9. (a) Kain in kas in lain fuka Setan el oru? (b) Efu ku God el tia sa in uniye met lain nukewa inge?

⁸ Ke Setan el kaifwel Adam a If elos in oru ma koluk lain God, paye la el pa kol orekma in lain sa. El lungse lain inkanek lun Jeova in kol. Ke kas in pupulyuk, Setan el fwak: ‘God el sie met kol koluk. El kaskas ma kikiap a sruokye ma mwo puspus nu sin met su muta ye koko lal. Metu elos tia enenu God in kololos. Elos ku in oru sulela lalos sifwana ke ma mwo a ke ma koluk. A fwa mwo nu selos ye kolyuk luk liki na ye kolyuk lun God.’ Mea God el fwa oru ke kas in akkoluk ku lain inge? Kutu metu elos nunku mu mwo fwin el uniye met lain nukewa inge. Tusruktu ya ma inge ku in sang me top nu ke kas in akkoluk ku lain lal Setan? Ya ma inge sang me akpayeye nu ka la sumwos inkanek in kol lun God?

⁹ Jeova el lungse nununku sumwos paenang el tia sa in uniye met ma lain inge. El sulela in sang pal loes in sang me top nu ke kas in lain lal Setan ke inkanek mwo a in akpayeye la Devil el kikiap. Paenang God el lela nu sin metu in sifwana kololos ke lusen pal loeloes ye koko lun Setan. Efu ku Jeova el oru ouinge a efu ku el lela ke pal loeloes meet liki el fwa aksumwosye kas in lain yok inge su fwa akuteyuki ke Sapta 11 ke buk inge. Fwinne ouinge, arlana mwo in nunku ke ma inge: Ya sumwos Adam a If in lulalfongi Setan, su wangin kutena ma mwo el oru nu selos? Ya sumwos elos in nunku mu Jeova, su sang ma mwo nukewa su oasr yurolos, el ku in kikiap nu selos? Mea kom e oru fwin kom oasr we?

10. Kom ku in sang kasru fuka nu ke kolyuk lun Jeova in sang me top nu ke kas in lain lun Setan?

¹⁰ Arlana mwo in muta nunku ke kusensiyuk puspus inge meyen kais sie sesr ku in sun kain in kusensiyuk puspus inge ke pal inge. Aok, oasr pal mwo lom in sang kasru nu ke kolyuk lun Jeova in sang me top ke kas in lain lal Setan. Kom ku in eis Jeova oana sie Met Kol a in sang me kasru in akkalemye la Setan el sie met kikiap. (Sam 73:28; Soakas 27:11) Sie me asor, meyen oasr met ekasr na inmasrlon billion puspus sin met fwin fwalu elos sulela in oru ouinge. Ma inge paenang in oasr sie kusensiyuk su arlana yok sripe, Ya Baibel el luti na paye la Setan el kol fwal se inge?

SU KOL NA PAYE FWALU?

11, 12. (a) Fuka me sruf nu sin Jisus akkalemye la Setan pa leum lun fwal se inge? (b) Mea pa saye su akkalemye la Setan pa leum lun fwal se inge?

¹¹ Jisus el tia alolo ka la Setan pa kol fwal se inge. Ke kutu inkanek in mwenmwen, sie pal Setan el akkalemye nu sel Jisus “togusrai nukewa fwalu, a mwolana lalos.” Setan el mwolela ka nu sel Jisus: “Nga fwa sot ma inge nukewa nu sum, kom fwin putati a alu nu sik.” (Mattu 4:8, 9; Luk 4:5, 6) Nunku ke ma inge. Ya orekma se inge in akkalemye ma puspus lun fwalu la el sie me sruf nu sin Jisus fwin Setan el tia leum lun togusrai nukewa inge? Jisus el tia lafwekin la guferment nukewa lun fwalu ma lun Setan. Paye, Jisus el fwa lafwekin ma inge fwin guferment nukewa inge wangin ye ku lal Setan.

¹² Paye la, Jeova pa God Fulatlanu, Met Orala kosrao a fwal mwolana se inge. (Fwakyuk 4:11) Tusruktu, Baibel el tia fwak la Jeova ku Jisus Kraist elos pa leum lun fwal se inge. Ke ma paye, Jisus el sramsramkin na paye kel Setan la el pa “leum lun fwal se inge.” (Jon 12:31; 14:30; 16:11) Baibel el akkalemyel Setan su Devil oana “god lun fwal se inge.” (2 Korint 4:3, 4) In fwal nu ke met lain inge, ku Setan, met sap Jon el simusla: “Fwalu nufon on in ku lun met koluk se.”​—1 Jon 5:19, NW.

KE INKANEK FUKA FWAL LAL SETAN FWA WANGINLA

13. Efu ku oasr me enenu nu ke sie fwal sasu?

¹³ Ke kais sie yea somla, fwalu el ekla me sensen yok. El tingtingi ke akwuk lun met meun puspus, akwuk sesumwos lun met puspus ke politic, met kol lun alu puspus su tia akkalemye oiya mwo, a kain in met koluk nukewa. Fwalu nufon tia ku in aksumwosyeyukla. Baibel el akkalemye la apkuran nu ke pal su God el fwa akwanginyela fwal koluk se inge ke pal in meun lal ke Armagedun. Pa inge inkanek su fwa orala sie fwal sumwosmwos a sasu.​—Fwakyuk 16:14-16.

14. Su God el sulela in met kol ke Togusrai lal, a fuka kas palu el fwakak ke ma inge?

¹⁴ Jeova God el sulella Jisus Kraist el an ekla sie met Kol ke Togusrai Lal in kosrao, ku guferment lal. In pal meeta, Baibel el palye: “Tu isusla sie tulik nu sesr, etuku nu sesr sie mwen: a guferment a fwa on fwinpisel: a el a fwa pangpang . . . Fwisrak in Misla. Wangin saflaiyen yokelik lun guferment lal a misla.” (Isaia 9:6, 7) In sramsramkin ke guferment se inge, Jisus el luti met tuma lutlut lal in pre ka: “Togusrai lom in tuku. Ma lungse lom in orek, oana in kosrao, ouinge fwin fwalu.” (Mattu 6:10) In oana ma kut fwa liye tok ke buk se inge, Togusrai lun God el apkuran in kunausla guferment nukewa lun fwal se inge, a el sifwana fwa aolla ma inge nukewa. (Daniel 2:44) Tokin ma inge Togusrai lun God fwa orala sie paredais fwin fwalu.

SIE FWAL SASU APKURAN ME!

15. Mea kalmen “fwalu sasu”?

¹⁵ Baibel el mwolela nu sesr: “Oana mwuleung lal [God], kut sano kosrao sasu a fwal sasu, yen sumwosmwos on we.” (2 Piter 3:13; Isaia 65:17) Kutu pal ke Baibel el sramsramkin “fwalu,” el kalmekin nu ke metu su muta fwin fwalu. (Genesis 11:1) “Fwalu sasu” sumwosmwos inge el kalmekin nu ke un met puspus su eis me insemwomwo lun God.

16. Mea me sang su arlana saok su tuku sin God nu selos su el insemwomwo ka, a mea kut enenu in oru in eis ma inge?

¹⁶ Jisus el mwolela ka la ke fwal sasu su fwa tuku, met nukewa su God el insemwomwo ka fwa eis me sang lun “moul ma patpat.” (Mark 10:30) Nunak munas ikasla Baibel nutum an nu ke Jon 3:16 a 17:3, a ridi la mea Jisus el fwak su kut enenu in oru in eis moul ma patpat. Ingena lela kut in tuni me insemwomwo puspus su tuku ke Baibel su fwa engankinyuk sin met nukewa su fwal nu ke me sang mwolana su tuku sin God ke Paredais fwin fwalu su apkuran in tuku.

17, 18. Fuka kut ku in lulalfongi la e fwa oasr misla a moul mwomwo wangin me sensen fwin fwalu nufon?

¹⁷ Ma koluk, meun, akmas, a orekma sulallel fwa wanginla. “Met koluk fwa wanginla . . . A met fwokpap elos fwa usru fwalu, a fwa sifwana akenganyelos in misla puspus.” (Sam 37:10, 11) Misla fwa orek meyen ‘God el aksafyela meun nu ke saflaiyen fwalu.’ (Sam 46:9; Isaia 2:4) Tok “met sumwosmwos elos fwa kapkapek, a misla lulap nu ke pal se malem wanginla”​—a kalmen ma inge pa on nu tok ma patpat!​—Sam 72:7.

¹⁸ Met nukewa su alu nu sin Jeova elos fwa moul in misla a wangin me sensen. In pal lun Baibel, ke met Israel elos akos God, elos moul in misla. (Livitikus 25:18, 19) Sie me insemwomwo yok in engankin pa misla su fwa oapana ke Paredais!​—Isaia 32:18; Maika 4:4.

19. Kut ku in etu fuka la e fwa oasr kain in mongo puspus ke fwal sasu lun God?

¹⁹ E fwa wanginla sral. “A fwa pus korn fwin fwalu fwin mangon eola,” met sim lun sam el on kin. (Sam 72:16) Jeova God el fwa akinsemwomwoye met sumwosmwos lal, a “fwalu isus fwako lal.”​—Sam 67:6.

20. Efu ku kut ku in lulalfongi na paye la fwalu nufon fwa ekla sie paradais?

²⁰ Fwalu nufon fwa ekla sie paredais. E fwa musaiyukla loom sasu a kato puspus a oasr imae fwin anu ku fwalu su kunausyukla meet sin met sesumwos a met koluk. (Isaia 65:21-24; Fwakyuk 11:18) Ke palu fwafwala na, oasr kutu an fwin fwalu su akkatoyeyukla tari fwa akyokyeyukelik nu fwin fwalu nufon in ekla sie an kato a oasr fwako puspus ka oana imae lun Eden. A God el fwa ‘oalngelik paul a akkupye ma lungse lun ma nukewa su moul pal nukewa.’​—Sam 145:16.

21. Mea akkalemye la e fwa oasr misla inmasrlon met a kosro?

²¹ Oasr misla in masrlon met a kosro. Kosro lemnak a kosro mana elos tukeni mongo. Fwinne tulik srisriku el tia enenu in sangeng ke kosro su arlana sensen ku lemnak ke pal inge.​—Isaia 11:6-9; 65:25.

22. Mea fwa sikyak nu ke mas?

²² Wanginla mas. Oana met Kol ke Togusrai lun God in kosrao, Jisus el fwa oru kutena kain in me akkeye ke inkanek yok liki ke pal se ma el oasr fwin fwalu. (Mattu 9:35; Mark 1:40-42; Jon 5:5-9) “A met su muta we fwa tia fwak: ‘Nga mas.’”​—Isaia 33:24; 35:5, 6.

23. Efu ku sifwil moulyak el me insemwomwo nu sesr?

²³ Met mise su kut lungse fwa sifwil moulyak ke fwinsrak lun tia sifwilpa mise. Nu sin met nukewa su motul in mise su oasr ke me esmakin lun God fwa sifwil moulyak nu ke moul. Ke ma paye, “a fwa oasr sifwil moulyak nu sin met sumwos a met sesumwos.”​—Orekma 24:15; Jon 5:28, 29.

24. Mea pulakin lom ke moul in Paredais fwin fwalu?

²⁴ Fuka mwolana lun pal fwasru su akoeyukla nu sin met nukewa su sulela in eis etauk ke Met Orekutla, Jeova God, a in kulansupal! Paredais fwin fwalu su apkuran in tuku pa Jisus el sramsramkin ke el mwolela nu sin met koluk se su mise siskel: “Kom fwa muta yuruk in Paredais.” (Luk 23:43) Arlana yok sripe kut in lutlut yok kel Jisus Kraist, ke inkanek lal su me insemwomwo puspus inge fwa ku in akpayeyuk.