Bwaal bwa Salomon buleeleej cidy mwa kufikil muut woos uhaahambidil Yehow. Udy mwa kulong mpeekaat mutam ni ulang ney myand yoos eey i yilongek teng hiinaah. Eecy udy mwa kuleeb ney, “I bilongek mu huuk-huuk.” Ni yiy mulangil ha cidy cilongek, udy mwa kutal misang yikwaabw ney waakady muman kwangat mahangadik mabiih kuuhal kwa kulongey mpeekaat mutam oow. Misang yikwaabw waakady ni balund babiih, eecy usungul mishind ya kuhit kaheeh yibiih, utweel ha sit ya internet yibiih ni uy ha byaab bidy kabiy bikumban bwa biin Krist. Misang yikwaabw kacyaakady usambil, ubal Bibl, utweel mu bisangil eecy kaciy uy mu mudimw a bukajaady. Teng bu sangwiilumw udyobw baleeb mu Tusumw, kaakady mulong mpeekaat teng hiinaah. I diilongweesh kaay dituheehet? Bikaam tweehuk kiish teng mpeekaat kaayend, ki ni myand yifiifikij ku kulong mpeekaat. I cicy cileebel Salomon biin-biin kuunyim kwa yiy muman kuleeb​—Mat. 5:29, 30. w24.07 diib. 16 cik. 10-11

Bihak eeby i bingany? I mudimw a kudiil baat musah a Bukaleng ukuukuuloh baat. (2 Kor. 4:1) Manying ma bulab i biny? Maleeleej biin mudimw ba Mawej badiidiil baat bakwaabw musah mulengel. Mu ciisang cya Pool, bangend-a-mushing baakady bangacil biit bya buseeb bu mudy byaakudy, maal ni makut mu manying. Bya mushind aakaabumw, Yehow i mwiitwaakish musah mulengel a buseeb wiitut kudiil baat. Ku dyambulwiish dya Yehow, tudy mwa kuhet bukash butukaakaam bwiitut kudiil baat musah ni lulamat. Misang yikwaabw, tudy mwa kuciin baat. I mushind kaay utudy mwa kuman lutat oolw? Tukontononaay diisambil dyaakady bapostol balong haakadyobw biibalekesh bwa kudiil baat musah. Hamut a kuciinobw, balombel Yehow bwa iibambulwiish bwa kutungunukobw ni kwambil baat ni mucim mukasakan. Musang aakaabumw, Yehow waalabwiil diisambil dyaababw. (Myil. 4:18, 29, 31) Lomb Yehow bwa akashish lukat luwudy naalw bwa baat. w24.04 diib. 16 cik. 8-9

Lukat lutudy naalw bwa Yehow lwiitusaasak bwiitut kumanyikish diijin dindiy dijilang. Biineeby byumvumvwiij ney, tudy bakat kwambil baat ney myand yaakady Sataan mudingilomw Yehow i ya makos. (Kbwa. 3:1-5; Yoobw 2:4; Jah 8:44) Hatudiidiil baat musah, tudyaakal bakat kwambil baat bady bakat kwiitukun mat cidy Yehow menmen. Tudy bakat bwa muut woos hamanyik ney, ciikadil cindiy citam i lukat, mushind indiy a kulombol i mujaalal ni muwaakan ni Bukaleng bwindiy bwiiyiiy kuman makab ni buhetesh baat diitalal ni musangal mu kalung kakeeh oomw. (Mis. 37:10, 11, 29; 1 Jah 4:8) Hatuleeleeb luumw lwa Yehow mu mudimw a bukaajady, tumaamanyikish diijin dindiy. Tudy cikwaabw ni musangal bwaal tuloolong cidy cikumban bwiitut kulong bu Baatemw ba Yehow. w24.05 diib. 18 cik. 12