ಸುಖೀ ಸಂಸಾರಕ್ಕಾಗಿ ಸೃಷ್ಟಿಕರ್ತನೆಡೆಗೆ ನೋಡಿ

ಮೊಟ್ಟ ಮೊದಲ ಮದುವೆಯನ್ನು ಮಾಡಿದ್ದು ಯೆಹೋವ ದೇವರು.a ಆತನು ಮೊದಲ ಸ್ತ್ರೀಯನ್ನು ಸೃಷ್ಟಿಸಿ ‘ಆಕೆಯನ್ನು ಆದಾಮನ ಬಳಿಗೆ ಕರೆತಂದನು’ ಎಂದು ಬೈಬಲ್‌ ಹೇಳುತ್ತದೆ. ಆಗ ಆದಾಮನಿಗೆ ಎಷ್ಟು ಖುಷಿಯಾಯಿತೆಂದರೆ “ಈಕೆಯು ನನ್ನ ಎಲುಬುಗಳಿಂದ ಬಂದ ಎಲುಬೂ ನನ್ನ ಮಾಂಸದಿಂದ ಬಂದ ಮಾಂಸವೂ ಆಗಿದ್ದಾಳೆ” ಎಂದು ಒಂದು ಗೀತೆಯನ್ನೇ ಹಾಡಿಬಿಟ್ಟನು. (ಆದಿಕಾಂಡ 2:22, 23) ವಿವಾಹಿತರು ಸಂತೋಷದಿಂದಿರಬೇಕೆಂದು ಯೆಹೋವನು ಈಗಲೂ ಬಯಸುತ್ತಾನೆ.

ನೀವು ವೈವಾಹಿಕ ಜೀವನಕ್ಕೆ ಕಾಲಿಡುವಾಗ, ಅದು ಹೂವಿನ ಹಾದಿಯಾಗಿರುತ್ತದೆ ಎಂದೆಣಿಸಬಹುದು. ಆದರೆ ಒಬ್ಬರನ್ನೊಬ್ಬರು ತುಂಬ ಪ್ರೀತಿಸುವ ದಂಪತಿಗಳ ಮಧ್ಯೆ ಸಹ ಸಮಸ್ಯೆಗಳಿರುತ್ತವೆ. (1ಕೊರಿಂಥ 7:28) ಈ ಕಿರುಹೊತ್ತಗೆಯಲ್ಲಿರುವ ಬೈಬಲ್‌ ತತ್ವಗಳನ್ನು ಅನ್ವಯಿಸಿಕೊಳ್ಳುವುದಾದರೆ ನಿಮ್ಮ ಸಂಸಾರ ಸುಖೀ ಸಂಸಾರವಾಗಲು ಸಾಧ್ಯ.—ಕೀರ್ತನೆ 19:8-11.

1 ಯೆಹೋವನು ನಿಮಗೆ ಕೊಟ್ಟಿರುವ ಪಾತ್ರವನ್ನು ನಿರ್ವಹಿಸಿ

ಬೈಬಲಿನ ಹಿತವಚನ: ಗಂಡನು ಕುಟುಂಬಕ್ಕೆ ಶಿರಸ್ಸಾಗಿದ್ದಾನೆ.—ಎಫೆಸ 5:23.

ಗಂಡಂದಿರೇ, ನೀವು ನಿಮ್ಮ ಹೆಂಡತಿಯನ್ನು ಕೋಮಲವಾಗಿ ನೋಡಿಕೊಳ್ಳಬೇಕೆಂದು ಯೆಹೋವನು ನಿರೀಕ್ಷಿಸುತ್ತಾನೆ. (1 ಪೇತ್ರ 3:7) ನಿಮ್ಮ ಪತ್ನಿಯನ್ನು ನಿಮಗೆ ಸಹಕಾರಿಣಿಯಾಗಿರಲು ಆತನು ಸೃಷ್ಟಿಸಿದ್ದಾನೆ. ಆದ್ದರಿಂದ ನೀವು ಆಕೆಯೊಂದಿಗೆ ಗೌರವ ಮತ್ತು ಪ್ರೀತಿಯಿಂದ ನಡೆದುಕೊಳ್ಳಬೇಕೆಂದು ಬಯಸುತ್ತಾನೆ. (ಆದಿಕಾಂಡ 2:18) ನೀವು ನಿಮ್ಮ ಹೆಂಡತಿಯನ್ನು ಎಷ್ಟು ಗಾಢವಾಗಿ ಪ್ರೀತಿಸಬೇಕೆಂದರೆ ನಿಮ್ಮ ಅಭಿರುಚಿಗಳಿಗಿಂತ ಆಕೆಯ ಇಷ್ಟಾನಿಷ್ಟಗಳಿಗೆ ಹೆಚ್ಚು ಪ್ರಾಮುಖ್ಯತೆ ಕೊಡಬೇಕು.—ಎಫೆಸ 5:25-29.

ಹೆಂಡತಿಯರೇ, ನಿಮ್ಮ ಗಂಡನಿಗೆ ಆಳವಾದ ಗೌರವವನ್ನು ತೋರಿಸುತ್ತಾ ಅವರು ತಮ್ಮ ಜವಾಬ್ದಾರಿಗಳನ್ನು ಚೆನ್ನಾಗಿ ನಿರ್ವಹಿಸಲು ನೀವು ನೆರವಾಗಬೇಕೆಂದು ಯೆಹೋವನು ನಿರೀಕ್ಷಿಸುತ್ತಾನೆ. (1 ಕೊರಿಂಥ 11:3; ಎಫೆಸ 5:33) ನಿಮ್ಮ ಪತಿಯ ನಿರ್ಣಯಗಳನ್ನು ಬೆಂಬಲಿಸಿ ಮತ್ತು ಹೃತ್ಪೂರ್ವಕವಾಗಿ ಅವರೊಂದಿಗೆ ಸಹಕರಿಸಿ. (ಕೊಲೊಸ್ಸೆ 3:18) ಹೀಗೆ ಮಾಡಿದರೆ, ನಿಮ್ಮ ಗಂಡನ ದೃಷ್ಟಿಯಲ್ಲಿ ಮುತ್ತಿನಂಥ ಮಡದಿಯಾಗುವಿರಿ, ಯೆಹೋವನ ದೃಷ್ಟಿಯಲ್ಲಿ ಅಮೂಲ್ಯರಾಗುವಿರಿ.—1 ಪೇತ್ರ 3:1-6.

ಹೀಗೆ ಮಾಡಿ:

• ‘ನಾನು ಒಳ್ಳೇ ಗಂಡ ಅಥವಾ ಹೆಂಡತಿಯಾಗಿರಲು ಇನ್ನೂ ಏನ್‌ ಮಾಡಿದ್ರೆ ಚೆನ್ನಾಗಿರುತ್ತೆ?’ ಎಂದು ನಿಮ್ಮ ಸಂಗಾತಿಯನ್ನು ಕೇಳಿ. ಅವರು ಹೇಳುವಾಗ ಕಿವಿಗೊಟ್ಟು ಕೇಳಿ ಮತ್ತು ಆ ವಿಷಯದಲ್ಲಿ ಪ್ರಗತಿ ಮಾಡುತ್ತಾ ಇರಿ

• ಒಬ್ಬರನ್ನೊಬ್ಬರು ಸಂತೋಷಪಡಿಸಲು ಏನು ಮಾಡಬೇಕೆಂದು ತಿಳಿಯಲು ಸಾಕಷ್ಟು ಸಮಯ ಹಿಡಿಯುವುದರಿಂದ, ತಾಳ್ಮೆ ತೋರಿಸಿ

2 ಸಂಗಾತಿಯ ಭಾವನೆಗಳಿಗೆ ಪರಿಗಣನೆ ತೋರಿಸಿ

ಬೈಬಲಿನ ಹಿತವಚನ: ನಿಮ್ಮ ಸಂಗಾತಿಗೆ ಯಾವೆಲ್ಲ ವಿಷಯಗಳು ಅಚ್ಚುಮೆಚ್ಚು ಎಂದು ತಿಳಿದುಕೊಂಡು ಅದನ್ನು ಮಾಡಲು ಪ್ರಯತ್ನಿಸಿ. (ಫಿಲಿಪ್ಪಿ 2:3, 4) ತನ್ನ ಆರಾಧಕರು “ಎಲ್ಲರೊಂದಿಗೆ ಕೋಮಲಭಾವದಿಂದಿರಬೇಕು” ಎಂದು ಯೆಹೋವನು ಬಯಸುತ್ತಾನೆ. ಇದನ್ನು ಮನಸ್ಸಿನಲ್ಲಿಟ್ಟು, ನಿಮ್ಮ ಸಂಗಾತಿಯನ್ನು ಬಹು ಅಮೂಲ್ಯರೆಂದು ಪರಿಗಣಿಸಿ. (2 ತಿಮೊಥೆಯ 2:24) “ಕತ್ತಿತಿವಿದ ಹಾಗೆ ದುಡುಕಿ ಮಾತಾಡುವವರುಂಟು; ಮತಿ ವಂತರ ಮಾತೇ ಮದ್ದು.” ಆದ್ದರಿಂದ, ನೀವಾಡುವ ಮಾತುಗಳ ಮೇಲೆ ನಿಗಾ ಇರಲಿ. (ಜ್ಞಾನೋಕ್ತಿ 12:18) ದಯೆ ಮತ್ತು ಪ್ರೀತಿಯಿಂದ ಮಾತಾಡಲು ಯೆಹೋವನ ಪವಿತ್ರಾತ್ಮ ನಿಮಗೆ ಸಹಾಯಮಾಡುತ್ತದೆ.—ಗಲಾತ್ಯ 5:22, 23; ಕೊಲೊಸ್ಸೆ 4:6.

ಹೀಗೆ ಮಾಡಿ:

• ನಿಮ್ಮ ಸಂಗಾತಿಯೊಂದಿಗೆ ಯಾವುದಾದರೂ ಗಂಭೀರ ವಿಷಯವನ್ನು ಚರ್ಚಿಸುವಾಗ ಸಮಾಧಾನದಿಂದಿರಲು ಮತ್ತು ನಿಮ್ಮ ಯೋಚನೆ ಸರಿಯಿದ್ದರೂ ನಿಮ್ಮ ಸಂಗಾತಿಯ ಮಾತನ್ನು ಬಿಚ್ಚು ಮನಸ್ಸಿನಿಂದ ಕೇಳಿಸಿಕೊಳ್ಳಲು ಸಹಾಯಕ್ಕಾಗಿ ಪ್ರಾರ್ಥಿಸಿ

• ಮಾತಾಡುವ ಮುಂಚೆ ಏನು ಮಾತಾಡಬೇಕು ಮತ್ತು ಹೇಗೆ ಮಾತಾಡಬೇಕು ಎಂದು ಯೋಚಿಸಿ

3 ಒಂದೇ ಆಲೋಚನೆಯುಳ್ಳವರಾಗಿರಿ

ಬೈಬಲಿನ ಹಿತವಚನ: ವಿವಾಹವಾದಾಗ ನೀವು ಮತ್ತು ನಿಮ್ಮ ಸಂಗಾತಿ ‘ಒಂದೇ ಶರೀರವಾಗುವಿರಿ.’ (ಮತ್ತಾಯ 19:5) ಆದರೂ ನಿಮ್ಮಿಬ್ಬರ ವ್ಯಕ್ತಿತ್ವ ಭಿನ್ನವಾಗಿರುವುದರಿಂದ ನಿಮ್ಮ ಅಭಿಪ್ರಾಯಗಳೂ ಭಿನ್ನವಾಗಿರಬಹುದು. ಹಾಗಾಗಿ, ನೀವು ಒಂದೇ ಥರ ಯೋಚಿಸಲು, ಒಂದೇ ರೀತಿಯ ಭಾವನೆಗಳನ್ನು ಬೆಳೆಸಿಕೊಳ್ಳಲು ಕಲಿಯುವ ಅವಶ್ಯಕತೆಯಿದೆ. (ಫಿಲಿಪ್ಪಿ 2:2) ನಿರ್ಣಯಗಳನ್ನು ಮಾಡುವಾಗ ಒಗ್ಗಟ್ಟು ತುಂಬ ಪ್ರಾಮುಖ್ಯ. ‘ಬಹು ಮಂದಿ ಆಲೋಚನಾಪರರಿರುವಲ್ಲಿ ಉದ್ದೇಶಗಳು ಈಡೇರುವವು’ ಎಂದು ಬೈಬಲ್‌ಹೇಳುತ್ತದೆ. (ಜ್ಞಾನೋಕ್ತಿ 15:22) ನೀವು ಜೊತೆಗೂಡಿ ಪ್ರಾಮುಖ್ಯ ನಿರ್ಣಯಗಳನ್ನು ಮಾಡುವಾಗ ಬೈಬಲ್‌ತತ್ವಗಳು ನಿಮ್ಮನ್ನು ಮಾರ್ಗದರ್ಶಿಸಲಿ.—ಜ್ಞಾನೋಕ್ತಿ 8:32, 33.

ಹೀಗೆ ಮಾಡಿ:

• ನಿಮ್ಮ ಸಂಗಾತಿಯೊಂದಿಗೆ ವಿಷಯವನ್ನು ಅಥವಾ ಅಭಿಪ್ರಾಯಗಳನ್ನು ಮಾತ್ರವಲ್ಲದೆ ನಿಮ್ಮ ಭಾವನೆಗಳನ್ನೂ ಹಂಚಿಕೊಳ್ಳಿ

• ಯಾವುದಾದರೂ ವಿಷಯವನ್ನು ಮಾಡಲು ಒಪ್ಪಿಕೊಳ್ಳುವ ಅಥವಾ ಯಾರಿಗಾದರೂ ಮಾತು ಕೊಡುವ ಮುಂಚೆ ನಿಮ್ಮ ಸಂಗಾತಿಯ ಅಭಿಪ್ರಾಯ ಕೇಳಿ