ಬೈಬಲ್‌ ಕೊಡುವ ಉತ್ತರ

ಯೇಸುವಿನ ಮರಣವನ್ನು ನಾವೇಕೆ ನೆನಪಿಸಿಕೊಳ್ಳಬೇಕು?

ಇತಿಹಾಸದಲ್ಲೇ ಅತಿ ಪ್ರಾಮುಖ್ಯವಾದ ಘಟನೆ ಯೇಸುವಿನ ಮರಣ. ಕಾರಣ ಆತನ ಮರಣದಿಂದ ಮನುಷ್ಯರಿಗಾಗಿರುವ ದೇವರ ಉದ್ದೇಶ ನೆರವೇರುತ್ತದೆ. ದೇವರು ಮನುಷ್ಯರನ್ನು ಸೃಷ್ಟಿ ಮಾಡಿದಾಗ ಕೆಟ್ಟದ್ದನ್ನು ಮಾಡುವ ಸ್ವಭಾವ ಅವರಲ್ಲಿ ಇರಲಿಲ್ಲ. ಅವರು ಸಾವು-ನೋವು, ಕಾಯಿಲೆಗಳು ಯಾವುದೂ ಇಲ್ಲದೆ ನೆಮ್ಮದಿಯ ಜೀವನ ಸಾಗಿಸಬೇಕೆನ್ನುವುದು ದೇವರ ಉದ್ದೇಶವಾಗಿತ್ತು. (ಆದಿಕಾಂಡ 1:31) ಆದರೆ ಮೊದಲ ಮನುಷ್ಯನಾದ ಆದಾಮನ ಪಾಪದಿಂದ ನಾವೆಲ್ಲರೂ ಪಾಪಿಗಳಾಗಿದ್ದೇವೆ ಮತ್ತು ಸಾಯುತ್ತಿದ್ದೇವೆ. ಆ ಪಾಪ ಮತ್ತು ಮರಣದಿಂದ ನಮ್ಮನ್ನು ರಕ್ಷಿಸಲು ಯೇಸು ತನ್ನ ಪ್ರಾಣವನ್ನೇ ತ್ಯಾಗ ಮಾಡಿದನು.—ಮತ್ತಾಯ 20:28; ರೋಮನ್ನರಿಗೆ 6:23 ಓದಿ.

ದೇವರಿಗೆ ನಮ್ಮ ಮೇಲೆ ತುಂಬ ಪ್ರೀತಿ. ಹಾಗಾಗಿ ತನ್ನ ಮಗನಾದ ಯೇಸುವನ್ನು ಭೂಮಿಗೆ ಕಳುಹಿಸಿದನು. ನಮಗೋಸ್ಕರ ಯೇಸು ತನ್ನ ಪ್ರಾಣವನ್ನು ಕೊಡುವಂತೆ ಕೂಡ ಅನುಮತಿಸಿದನು. (1 ಯೋಹಾನ 4:9, 10) ತನ್ನನ್ನು ನೆನಪಿಸಿಕೊಳ್ಳಲು ಶಿಷ್ಯರು ದ್ರಾಕ್ಷಾಮದ್ಯ ಮತ್ತು ರೊಟ್ಟಿಯನ್ನು ಉಪಯೋಗಿಸಿ ಒಂದು ಸರಳ ಆಚರಣೆಯನ್ನು ಮಾಡಬೇಕೆಂದು ಯೇಸು ಹೇಳಿದನು. ಪ್ರತಿ ವರ್ಷ ಈ ಆಚರಣೆ ಮಾಡುವ ಮೂಲಕ ದೇವರು ಮತ್ತು ಆತನ ಮಗನಾದ ಕ್ರಿಸ್ತನು ತೋರಿಸಿದ ಪ್ರೀತಿಗೆ ಕೃತಜ್ಞತೆ ವ್ಯಕ್ತಪಡಿಸುತ್ತೇವೆ.—ಲೂಕ 22:19, 20 ಓದಿ.

ದ್ರಾಕ್ಷಾಮದ್ಯ ಮತ್ತು ರೊಟ್ಟಿಯನ್ನು ಯಾರು ಸೇವಿಸಬೇಕು?

ಎಲ್ಲರೂ ಅಲ್ಲ. ಕಾರಣ, ಯೇಸು ಈ ಆಚರಣೆ ಆರಂಭಿಸಿದಾಗ ತನ್ನ ಶಿಷ್ಯರೊಂದಿಗೆ ಒಂದು ಒಪ್ಪಂದ ಅಥವಾ ಒಡಂಬಡಿಕೆಯನ್ನು ಮಾಡಿಕೊಂಡನು. (ಮತ್ತಾಯ 26:26-28) ಈ ಒಡಂಬಡಿಕೆಯಿಂದಾಗಿ ಆತನ ಶಿಷ್ಯರಿಗೆ ಮತ್ತು ಇತರ ನಿರ್ದಿಷ್ಟ ಸಂಖ್ಯೆಯ ಜನರಿಗೆ ಮಾತ್ರ ಸ್ವರ್ಗದಲ್ಲಿ ರಾಜರು ಮತ್ತು ಯಾಜಕರಾಗಿ ಸೇವೆ ಮಾಡುವ ನಿರೀಕ್ಷೆ ಸಿಕ್ಕಿತು. ಲಕ್ಷಾಂತರ ಜನ ಈ ಆಚರಣೆಗೆ ಹಾಜರಾಗುತ್ತಾರಾದರೂ ಕೇವಲ ಸ್ವಲ್ಪ ಜನ ಅಂದರೆ ಯೇಸು ಯಾರ ಜೊತೆ ಒಪ್ಪಂದ ಮಾಡಿಕೊಂಡಿದ್ದಾನೋ ಅವರು ಮಾತ್ರ ದ್ರಾಕ್ಷಾಮದ್ಯ ಮತ್ತು ರೊಟ್ಟಿಯನ್ನು ಸೇವಿಸುತ್ತಾರೆ.—ಪ್ರಕಟನೆ 5:10 ಓದಿ.

ಕಳೆದ 2,000 ವರ್ಷಗಳಿಂದ ಯೆಹೋವ ದೇವರು, ರಾಜರಾಗಿ ಸೇವೆ ಮಾಡಲು ಅರ್ಹರಾಗಿರುವವರನ್ನು ಆಯ್ಕೆ ಮಾಡುತ್ತಿದ್ದಾನೆ. (ಲೂಕ 12:32) ಆದರೆ ಇವರ ಸಂಖ್ಯೆ ಭೂಮಿಯಲ್ಲಿ ಶಾಶ್ವತವಾಗಿ ಜೀವಿಸುವವರ ಸಂಖ್ಯೆಗೆ ಹೋಲಿಸುವಾಗ ತುಂಬ ಚಿಕ್ಕದು.—ಪ್ರಕಟನೆ 7:4, 9, 17 ಓದಿ. (w15-E 03/01)