‘ಬೈಬಲ್‌ ವಚನಗಳ ಅತ್ಯಾರಂಭದ ಜ್ಞಾತ ಉದ್ಧರಣೆಗಳು’

ಇಪ್ಪತ್ತೈದು ವರ್ಷಗಳಿಗೆ ಹಿಂದೆ, ಇಸ್ರೇಲಿ ಪ್ರಾಕ್ತನಶಾಸ್ತ್ರಜ್ಞರು ಬೆರಗುಗೊಳಿಸುವಂಥ ಒಂದು ಆವಿಷ್ಕಾರವನ್ನು ಮಾಡಿದರು. ಯೆರೂಸಲೇಮಿನ ಹಿನ್ನೋಮ್‌ ಕಣಿವೆಯ ಇಳುಕಲಿನ ಸಮಾಧಿ ಗುಹೆಯೊಂದರಲ್ಲಿ, ಬೈಬಲ್‌ ವಚನಗಳು ಬರೆಯಲ್ಪಟ್ಟಿದ್ದ ಎರಡು ಚಿಕ್ಕ ಬೆಳ್ಳಿಯ ಸುರುಳಿಗಳನ್ನು ಅವರು ಕಂಡುಹಿಡಿದರು. ಈ ಸುರುಳಿಗಳು ಬಾಬೆಲ್‌ ಯೆರೂಸಲೇಮನ್ನು ನಾಶಮಾಡಿದ ವರುಷವಾದ ಸಾ.ಶ.ಪೂ. 607ಕ್ಕಿಂತ ಹಿಂದಿನ ಕಾಲದವುಗಳಾಗಿದ್ದವು. ಈ ಗ್ರಂಥಪಾಠಗಳಲ್ಲಿ ಅರಣ್ಯಕಾಂಡ 6:​24-26ರಲ್ಲಿರುವ ಆಶೀರ್ವಾದಗಳ ಅಂಶಗಳು ಉಲ್ಲೇಖಿಸಲ್ಪಟ್ಟಿವೆ. ಆ ಎರಡು ಸುರುಳಿಗಳಲ್ಲಿಯೂ “ಯೆಹೋವ” ಎಂಬ ದೇವರ ವೈಯಕ್ತಿಕ ನಾಮವು ಅನೇಕ ಬಾರಿ ಇದೆ. ಈ ಬರಹಗಳನ್ನು, “ಹೀಬ್ರು ಬೈಬಲ್‌ ಭಾಗಗಳು ಬರೆಯಲ್ಪಟ್ಟಿರುವ ಪುರಾತನ ಜಗತ್ತಿನ ಅತ್ಯಾರಂಭದ ಜ್ಞಾತ ಹಸ್ತಕೃತಿಗಳು” ಎಂದು ವರ್ಣಿಸಲಾಗಿದೆ.

ಆದರೆ ಕೆಲವು ಮಂದಿ ವಿದ್ವಾಂಸರು ಅದು ಬರೆಯಲ್ಪಟ್ಟಿದ್ದ ಕಾಲವನ್ನು ಪ್ರಶ್ನಿಸಿ, ಆ ಸುರುಳಿಗಳು ಸಾ.ಶ.ಪೂ. 2ನೆಯ ಶತಮಾನದಲ್ಲಿ ಬರೆಯಲ್ಪಟ್ಟಿದ್ದವೆಂದು ವಾದಿಸಿದರು. ಈ ಅಸಮ್ಮತಿಗಿದ್ದ ಒಂದು ಕಾರಣವು, ಈ ಅತಿ ಚಿಕ್ಕ ಸುರುಳಿಗಳ ಮೂಲ ಫೋಟೋಗಳ ಗುಣಮಟ್ಟದಿಂದಾಗಿ ಅದರ ವಿವರಗಳನ್ನು ಒತ್ತಾಗಿ ಪರೀಕ್ಷಿಸಲು ಸಾಧ್ಯವಾಗದೆ ಇದದ್ದೇ ಆಗಿತ್ತು. ಆದುದರಿಂದ ಈ ಸುರುಳಿಗಳು ಯಾವಾಗ ಬರೆಯಲ್ಪಟ್ಟಿದ್ದವೆಂಬ ವಿವಾದವನ್ನು ಪರಿಹರಿಸಲು, ವಿದ್ವಾಂಸರ ಒಂದು ತಂಡವು ಹೊಸ ಅಧ್ಯಯನವನ್ನು ನಡೆಸಿತು. ಅವರು ಈ ಸುರುಳಿಗಳ ಅಧಿಕ ವೇಗದ ಅಂಕಬಿಂಬಗಳನ್ನು ಉತ್ಪಾದಿಸಲು ಅತ್ಯಾಧುನಿಕವಾದ ಛಾಯಾಚಿತ್ರ ಮತ್ತು ಕಂಪ್ಯೂಟರೀಕೃತ ಬಿಂಬ ಯಂತ್ರಕಲಾಶಾಸ್ತ್ರವನ್ನು ಬಳಸಿದರು. ಈ ಹೊಸ ವಿಶ್ಲೇಷಣೆಗಳ ಫಲಿತಾಂಶಗಳನ್ನು ಇತ್ತೀಚಿಗೆ ಪ್ರಕಟಿಸಲಾಯಿತು. ಈ ವಿದ್ವಾಂಸರ ತಂಡ ಯಾವ ತೀರ್ಮಾನಕ್ಕೆ ಬಂತು?

ಪ್ರಥಮವಾಗಿ, ಪ್ರಾಕ್ತನಶಾಸ್ತ್ರೀಯ ದತ್ತಾಂಶಗಳು ಬಾಬೆಲಿನಲ್ಲಿನ ದೇಶಭ್ರಷ್ಟತೆಗೆ ಮುಂಚಿನ ಕಾಲಕ್ಕೆ ನಿರ್ದೇಶಿಸುತ್ತವೆಂದು ಈ ವಿದ್ವಾಂಸರು ಒತ್ತಿಹೇಳುತ್ತಾರೆ. ಪುರಾತನ ಲಿಪಿಶಾಸ್ತ್ರದ ಅವಲೋಕನಗಳು, ಅಂದರೆ ಅಕ್ಷರಗಳ ಆಕಾರ, ಶೈಲಿ, ಸ್ಥಾನ, ಪ್ರತಿ ಅಕ್ಷರವನ್ನು ಬರೆದಿರುವ ಕ್ರಮ ಮತ್ತು ಅವು ಓಲಿರುವ ದಿಕ್ಕು​—ಇವು ಸಹ ಅದೇ ಕಾಲಾವಧಿಗೆ, ಅಂದರೆ ಸಾ.ಶ.ಪೂ. ಏಳನೆಯ ಶತಮಾನದ ಅಂತ್ಯಕ್ಕೆ ಸೂಚಿಸುತ್ತವೆ. ಮತ್ತು ಕೊನೆಯದಾಗಿ, ಆರ್ತಾಗ್ರಫಿಯನ್ನು ಅಂದರೆ ಅಕ್ಷರ ಜೋಡಣೆಯ ವಿಷಯವನ್ನು ಪರಿಗಣಿಸಿದಾಗ ಆ ತಂಡವು ಈ ತೀರ್ಮಾನಕ್ಕೆ ಬಂತು: “ಆ ಸುರುಳಿಗಳ ಕಾಗುಣಿತ ದತ್ತಾಂಶವು, ಆ ಬರಹಗಳ ಕಾಲಕ್ಕೆ ಸಂಬಂಧಪಟ್ಟ ಪ್ರಾಕ್ತನಶಾಸ್ತ್ರೀಯ ಮತ್ತು ಲಿಪಿಶಾಸ್ತ್ರೀಯ ಸಾಕ್ಷ್ಯಕ್ಕೆ ಹೊಂದಿಕೆಯಲ್ಲಿದೆ.”

ಯಾವುದನ್ನು ಕಟೆಫ್‌ ಹಿನ್ನಮ್‌ ಬರಹಗಳೆಂದೂ ಕರೆಯಲಾಗುತ್ತದೊ ಆ ಬೆಳ್ಳಿಯ ಸುರುಳಿಗಳ ಅಧ್ಯಯನವನ್ನು, ಬುಲೆಟಿನ್‌ ಆಫ್‌ ದಿ ಅಮೆರಿಕನ್‌ ಸ್ಕೂಲ್ಸ್‌ ಆಫ್‌ ಒರಿಯಂಟಲ್‌ ರೀಸರ್ಚ್‌ ಹೀಗೆಂದು ಸಾರಾಂಶಿಸುತ್ತದೆ: “ಈ ಸುರುಳಿಗಳಲ್ಲಿ ಕಂಡುಬರುವ ಬರಹಗಳು ಬೈಬಲ್‌ ವಚನಗಳ ಅತ್ಯಾರಂಭದ ಜ್ಞಾತ ಉದ್ಧರಣೆಗಳಾಗಿವೆ ಎಂಬ ಹೆಚ್ಚಿನ ವಿದ್ವಾಂಸರ ತೀರ್ಮಾನವನ್ನು ನಾವು ಹೀಗೆ ಸ್ಥಿರೀಕರಿಸಬಲ್ಲೆವು.”

[ಪುಟ 32ರಲ್ಲಿರುವ ಚಿತ್ರ ಕೃಪೆ]

ಗುಹೆ: Pictorial Archive (Near Eastern History) Est.; ಬರಹಗಳು: Photograph © Israel Museum, Jerusalem; courtesy of Israel Antiquities Authority