O musoso yu ulondekesa se ihi itena kubhita ni jiselevende joso ja Jihova. Mwene utena kuta kituxi mu kusuluka utena kubanza kwila o ima yiyi ya bhiti mu kingoho. Maji se mwene u banza kyambote wanda mona kwila wa bhange ima ya mubhangesa kuta kituxi. O ima yiyi nange o kudilunga ni athu ki jimbangi ja Jihova, o kutonoka ni ima ya ibha nange ku internete mba kuya mu ididi kiyafwama phala o jikidista. Nange o muthu yu kene dingi mu samba, kutanga o Bibidya, kuya mu yonge, mba kuboka. Kala o munzangala a mutumbula ku Jisabhu nange mwene kate kituxi mu kingoho maji mukonda dya ima yavulu yabhange ande dya kuta kituxi. Ihi itwadilongo? Twatokala kulenga o kituxi ni ima itubhangesa kuta kituxi. Yiyi yene yajimbulula Solomá kyoso kyazubha kuzwela yabhiti ni munzangala ni muhatu kidyanzunga

O ujitu yu ihi? O kikalakalu kibhulula o myenyu kya kuboka o njimbu ya Utuminu. (2 Ko. 4:1) Ihi ilombolola o itutu ya mavu? Yene ilombolola o jiselevende ja Nzambi, ene muboka o njimbu yambote ku akwa. Mu izuwa ya Phawulu, o asumbixi exile mukwambata ima ya valolo kala kudya, vinyu ni kitadi, mu itutu ya mavu. Kyene we kimoxi n’etu, Jihova watubhana njimbu yambote yala ni valolo yavulu phala ku itula. Ni kikwatekesu kya Jihova, tutena kukala ni nguzu itwabhindamena phala kuboka o njimbu ni ufiyele woso. Sayi ithangana, tutena kukala ni woma wa athu mba woma wa kwila o athu kanda tuxikina. Kyebhi kitutena kutolola o kibhidi kiki? Phala kutambwijila, tu xinganeke mu phangu ya jipoxolo kyoso kya atendelesa kweha o kuboka. Muveji dya kwehela o woma ku atolola ni kweha o kuboka, ene asambe kwa Nzambi mu kumubhinga phala ku akwatekesa, “n’a suluke kuzwela o maka mé sé wôma.” Ni lusolo-lwoso, Jihova watambwijila o musambu wâ. (Ika. 4:​18, 29, 31) Se ukala ni hele ya kuboka mukonda dya woma wa athu, bhinga kwa Jihova phala ku kukwatekesa kukolesa o henda yé ku athu, phala ki ukale ni woma wa ku atudila o njimbu yambote. w24.04 16 §8-9

O henda yetu kwa Jihova itubhangesa kuzelesa o dijina dyé. Etu twamesena kubhanga mbandu ku kikalakalu kya kuzelesa o dijina dyê ku itatesu ya Satanaji. (Dim. 3:​1-5; Jobe 2:4; Nzw. 8:44) Mu ukunji wetu twamesena kuzokela o kidi kyalungu ni dijina dya Nzambi yetu mu kuzwela o kidi kyalungu ni mwene ku athu amesena kwivwa. Etu twamesena kwila athu oso eza mu kwijiya o kidifwa kyê kya beta dingi kota, o henda, ni ukexilu we, wa kutumina ni kuyuka. O utuminu we wanda zubha o hadi yoso, ni kubheka kutululuka ni kisangusangu ku miji yoso. (Jisá. 37:​10, 11, 29; 1 Nz. 4:8) Kyoso ki tuzokela o kidi mu ukunji twamuzelesa o dijina dya Jihova. Tusanguluka we mu kwijiya kwila twa mubhanga yoso ikingila Jihova kokwetu. w24.05 18 §12