សំបុត្រទី១របស់យ៉ូហាន
១ យើងកំពុងសរសេរមកកាន់អ្នករាល់គ្នា អំពីលោកដែលមាននៅកាលពីដើមដំបូង ជាអ្នកដែលយើងបានឮនិងឃើញដោយផ្ទាល់ភ្នែក ថែមទាំងបានសង្កេតមើល ហើយក៏បានពាល់ដោយដៃយើងផ្ទាល់ផង លោកជាអ្នកនាំពាក្យដែលផ្ដល់ជីវិត+ ២ (ជីវិតនោះបានត្រូវបង្ហាញឲ្យឃើញពិតមែន។ យើងបានឃើញ និងជាសាក្សីអំពីរឿងនេះ+ ហើយកំពុងប្រាប់អ្នករាល់គ្នាអំពីជីវិតដែលគ្មានទីបញ្ចប់+ ដែលបានមកពីបិតានៅស្ថានសួគ៌ និងដែលបានត្រូវបើកបង្ហាញឲ្យយើងឃើញ)។ ៣ យើងកំពុងប្រាប់អ្នករាល់គ្នាអំពីអ្វីដែលយើងបានឃើញនិងឮ ដើម្បីឲ្យអ្នកអាចរួមចំណែកជាមួយនឹងយើងដែរ។+ ដោយធ្វើដូច្នេះ យើងទាំងអស់គ្នាក៏រួមចំណែកជាមួយនឹងលោកយេស៊ូគ្រិស្តនិងបិតារបស់លោក។+ ៤ នេះជាមូលហេតុដែលយើងសរសេររឿងទាំងនេះ ដើម្បីឲ្យអំណររបស់យើងទាំងអស់គ្នាបានពេញលេញ។
៥ នេះជាបណ្ដាំដែលយើងបានឮពីលោកយេស៊ូ ហើយកំពុងប្រកាសប្រាប់អ្នករាល់គ្នាថា ព្រះគឺជាពន្លឺ+ ហើយគ្មានភាពងងឹតនៅក្នុងព្រះឡើយ។ ៦ ប្រសិនបើយើងនិយាយថា«យើងកំពុងរួមចំណែកជាមួយនឹងព្រះ» ប៉ុន្តែយើងនៅតែដើរក្នុងភាពងងឹត នោះមានន័យថាយើងជាអ្នកភូតភរ ហើយក៏មិនប្រព្រឹត្តតាមសេចក្ដីពិតដែរ។+ ៧ ក៏ប៉ុន្តែ ប្រសិនបើយើងដើរក្នុងពន្លឺ ដូចព្រះនៅក្នុងពន្លឺ នោះយើងកំពុងរួមចំណែកជាមួយគ្នាមែន ហើយឈាមរបស់លោកយេស៊ូជាបុត្ររបស់ព្រះ ក៏សម្អាតយើងពីភាពខុសឆ្គងទាំងអស់។+
៨ ប្រសិនបើយើងនិយាយថា«យើងគ្មានភាពខុសឆ្គងទេ» នោះយើងកំពុងបញ្ឆោតខ្លួន+ ឯសេចក្ដីពិតក៏មិននៅក្នុងយើងដែរ។ ៩ ក៏ប៉ុន្តែ បើយើងសារភាពការខុសឆ្គងរបស់យើង នោះព្រះនឹងអភ័យទោសចំពោះការខុសឆ្គងទាំងនោះ ហើយនឹងសម្អាតយើងឲ្យអស់លក្ខណៈមិនសុចរិត ពីព្រោះលោកស្មោះត្រង់និងសុចរិត។+ ១០ ប្រសិនបើយើងនិយាយថា«យើងមិនធ្លាប់ធ្វើខុសទេ» នោះដូចជាយើងចោទថា ព្រះជាអ្នកកុហក ហើយបណ្ដាំរបស់ព្រះមិននៅក្នុងយើងឡើយ។
២ កូនៗអើយ! ខ្ញុំសរសេររឿងទាំងនេះមកអ្នករាល់គ្នា ដើម្បីកុំឲ្យអ្នកធ្វើខុសអ្វីមួយឡើយ។ ក៏ប៉ុន្តែ ប្រសិនបើមានអ្នកណាភ្លាត់ធ្វើខុសអ្វីមួយ នោះលោកយេស៊ូគ្រិស្ត+ដែលនៅជាមួយនឹងបិតានៅស្ថានសួគ៌និងជាអ្នកសុចរិត+ នឹងជួយយើង។ ២ លោកបានធ្វើជាគ្រឿងបូជាសម្រាប់ផ្សះផ្សាចំណងមិត្តភាពរវាងយើងនិងព្រះ+ ហើយលោះយើងពីការខុសឆ្គង+ មិនគ្រាន់តែការខុសឆ្គងរបស់យើងប៉ុណ្ណោះទេ តែការខុសឆ្គងរបស់មនុស្សក្នុងពិភពលោកទាំងមូលដែរ។+ ៣ បន្ថែមទៅទៀត ប្រសិនបើយើងប្រព្រឹត្តតាមបញ្ញត្ដិរបស់លោកជានិច្ច នោះយើងដឹងថាយើងស្គាល់លោកមែន។ ៤ អ្នកណាដែលនិយាយថា«ខ្ញុំស្គាល់លោក» តែអ្នកនោះមិនប្រព្រឹត្តតាមបញ្ញត្ដិរបស់លោក អ្នកនោះជាអ្នកភូតភរ ហើយសេចក្ដីពិតមិននៅក្នុងអ្នកនោះទេ។ ៥ ក៏ប៉ុន្តែ អ្នកណាដែលប្រព្រឹត្តតាមពាក្យរបស់លោក អ្នកនោះពិតជាមានសេចក្ដីស្រឡាញ់ដ៏ពេញលក្ខណៈចំពោះព្រះ។+ នេះបង្ហាញឲ្យយើងដឹងថា យើងរួបរួមជាមួយនឹងលោក។+ ៦ អ្នកណាដែលនិយាយថាខ្លួនរួបរួមជាមួយនឹងលោក អ្នកនោះក៏មានកាតព្វកិច្ចរក្សារបៀបរស់នៅ ដូចលោកយេស៊ូធ្លាប់មានដែរ។+
៧ បងប្អូនជាទីស្រឡាញ់អើយ! ខ្ញុំមិនមែនសរសេរបញ្ញត្ដិថ្មីមកឲ្យអ្នករាល់គ្នាទេ តែគឺជាបញ្ញត្ដិចាស់ដែលអ្នករាល់គ្នាបានទទួលពីដើមដំបូង។+ បញ្ញត្ដិចាស់នេះគឺជាពាក្យដែលអ្នកធ្លាប់ឮ។ ៨ ទោះបីជាដូច្នេះក៏ដោយ អ្វីដែលខ្ញុំកំពុងសរសេរមកអ្នករាល់គ្នានេះ ប្រៀបដូចជាបញ្ញត្ដិថ្មី គឺជាបញ្ញត្ដិដែលលោកនិងអ្នករាល់គ្នាបានកាន់តាម ពីព្រោះភាពងងឹតកំពុងបាត់សូន្យទៅ ហើយពន្លឺដ៏ពិតកំពុងភ្លឺឡើង។+
៩ អ្នកណាដែលនិយាយថា ខ្លួននៅក្នុងពន្លឺ តែស្អប់+បងប្អូនខ្លួន អ្នកនោះជាអ្នកនៅក្នុងភាពងងឹតរហូតមកដល់ឥឡូវនេះ។+ ១០ អ្នកណាដែលស្រឡាញ់បងប្អូនខ្លួន អ្នកនោះស្ថិតនៅក្នុងពន្លឺ+ ហើយគ្មានហេតុដែលបណ្ដាលឲ្យអ្នកនោះជំពប់ដួលឡើយ។ ១១ ប៉ុន្តែ អ្នកណាដែលស្អប់បងប្អូនខ្លួន អ្នកនោះនៅក្នុងភាពងងឹត ហើយកំពុងដើរក្នុងភាពងងឹត។+ អ្នកនោះថែមទាំងមិនដឹងថាខ្លួនកំពុងទៅឯណាផង+ ពីព្រោះភាពងងឹតបានធ្វើឲ្យគាត់មើលមិនឃើញ។
១២ កូនៗអើយ! ខ្ញុំកំពុងសរសេរមកកាន់អ្នករាល់គ្នា ពីព្រោះការខុសឆ្គងរបស់អ្នកបានត្រូវអភ័យទោសឲ្យ ដោយសារនាមរបស់លោក។*+ ១៣ ឪពុកទាំងឡាយអើយ! ខ្ញុំសរសេរទៅកាន់អ្នករាល់គ្នា ពីព្រោះអ្នករាល់គ្នាស្គាល់លោកដែលមាននៅកាលពីដើមដំបូង។ យុវជនទាំងឡាយអើយ! ខ្ញុំសរសេរទៅកាន់អ្នករាល់គ្នា ពីព្រោះអ្នករាល់គ្នាបានឈ្នះមេកំណាច។*+ កូនទាំងឡាយអើយ! ខ្ញុំសរសេរទៅកាន់អ្នករាល់គ្នា ពីព្រោះអ្នករាល់គ្នាស្គាល់បិតាដែលស្ថិតនៅស្ថានសួគ៌។+ ១៤ ឪពុកទាំងឡាយអើយ! ខ្ញុំសរសេរទៅកាន់អ្នករាល់គ្នា ពីព្រោះអ្នករាល់គ្នាស្គាល់លោកដែលមាននៅកាលពីដើមដំបូង។ យុវជនទាំងឡាយអើយ! ខ្ញុំសរសេរទៅកាន់អ្នករាល់គ្នា ពីព្រោះអ្នករាល់គ្នារឹងមាំ+ ថែមទាំងបានឈ្នះមេកំណាច+ ហើយបណ្ដាំរបស់ព្រះក៏នៅជាប់ក្នុងចិត្តរបស់អ្នករាល់គ្នាដែរ។+
១៥ កុំស្រឡាញ់ពិភពលោកនេះ ឬអ្វីៗក្នុងពិភពលោកនេះឡើយ។+ ប្រសិនបើអ្នកណាស្រឡាញ់ពិភពលោកនេះ អ្នកនោះមិនស្រឡាញ់បិតានៅស្ថានសួគ៌ទេ។+ ១៦ ពីព្រោះអ្វីៗក្នុងពិភពលោកនេះ ពោលគឺសេចក្ដីប៉ងប្រាថ្នាខុសឆ្គង+ ការចង់បានអ្វីដែលទាក់ទាញភ្នែក+ និងការអួតសម្ញែងភាពមានបានរបស់ខ្លួន នោះមិនមែនមកពីបិតាដែលស្ថិតនៅស្ថានសួគ៌ឡើយ តែមកពីពិភពលោកនេះវិញ។ ១៧ ម្យ៉ាងទៀត ពិភពលោកនេះនិងសេចក្ដីប៉ងប្រាថ្នារបស់វា កំពុងឈានទៅរកការសាបសូន្យ+ ប៉ុន្តែអ្នកណាដែលធ្វើតាមបំណងប្រាថ្នារបស់ព្រះ អ្នកនោះនឹងនៅជាប់ជារៀងរហូតវិញ។+
១៨ កូនៗអើយ! នេះគឺជាពេលវេលាចុងក្រោយ។ អ្នកបានឮថាសត្រូវរបស់គ្រិស្តកំពុងមក+ ហើយសូម្បីតែឥឡូវនេះ សត្រូវជាច្រើនរបស់គ្រិស្តបានលេចមក។+ ហេតុដូច្នេះ យើងដឹងថានេះជាពេលវេលាចុងក្រោយ។ ១៩ ពួកគេបានចេញពីចំណោមយើងទៅ តែពួកគេមិនមែនជាគ្នាយើងទេ+ ពីព្រោះបើជាគ្នាយើងមែន នោះពួកគេនឹងនៅជាប់ជាមួយនឹងយើង។ ប៉ុន្តែ ពួកគេបានចេញពីចំណោមយើងទៅ។ នេះបង្ហាញឲ្យឃើញច្បាស់ថា មិនមែនអស់អ្នកដែលនៅក្នុងចំណោមយើង សុទ្ធតែជាគ្នាយើងទេ។+ ២០ បន្ថែមទៅទៀត ព្រះដ៏បរិសុទ្ធបានរើសតាំងអ្នករាល់គ្នា+ ហើយអ្នកទាំងអស់គ្នាក៏មានចំណេះ។ ២១ ខ្ញុំសរសេរមកអ្នករាល់គ្នា មិនមែនដោយសារអ្នករាល់គ្នាមិនស្គាល់សេចក្ដីពិតនោះទេ។+ ប៉ុន្តែ ខ្ញុំសរសេរពីព្រោះអ្នករាល់គ្នាស្គាល់សេចក្ដីពិត ហើយពីព្រោះគ្មានសេចក្ដីភូតភរណាអាចកើតពីសេចក្ដីពិតបានឡើយ។+
២២ តើអ្នកណាជាអ្នកកុហក បើមិនមែនអ្នកដែលមិនព្រមទទួលស្គាល់លោកយេស៊ូថាជាគ្រិស្ត?+ អ្នកណាដែលមិនព្រមទទួលស្គាល់បិតាដែលស្ថិតនៅស្ថានសួគ៌និងបុត្ររបស់លោក អ្នកនោះគឺជាសត្រូវរបស់គ្រិស្ត។+ ២៣ អ្នកណាដែលមិនព្រមទទួលស្គាល់បុត្ររបស់ព្រះ បិតានៅស្ថានសួគ៌ក៏មិនទទួលស្គាល់អ្នកនោះដែរ។+ ប៉ុន្តែ អ្នកណាដែលទទួលស្គាល់បុត្ររបស់ព្រះ+ បិតានៅស្ថានសួគ៌ក៏ទទួលស្គាល់អ្នកនោះដែរ។+ ២៤ ចំណែកអ្នករាល់គ្នា ចូររក្សាអ្វីៗដែលអ្នកបានឮពីដើមដំបូងឲ្យនៅជាប់ក្នុងចិត្តចុះ!+ ប្រសិនបើអ្វីៗដែលអ្នករាល់គ្នាបានឮពីដើមដំបូងនៅជាប់ក្នុងចិត្ត នោះអ្នកក៏នឹងរួបរួមជាមួយនឹងបិតានៅស្ថានសួគ៌និងបុត្ររបស់លោកដែរ។ ២៥ ម្យ៉ាងទៀត នេះជាសេចក្ដីសន្យារបស់ព្រះ*ថា យើងនឹងរស់ជារៀងរហូត។+
២៦ ខ្ញុំសរសេររឿងទាំងនេះអំពីពួកអ្នកដែលខំបំភាន់អ្នករាល់គ្នា។ ២៧ ចំណែកអ្នករាល់គ្នាវិញ ព្រះបានរើសតាំងអ្នកដោយឫទ្ធានុភាពរបស់លោក+ ហើយឫទ្ធានុភាពនោះនៅក្នុងអ្នក។ ដូច្នេះ អ្នកមិនត្រូវការអ្នកណាបង្រៀនអ្នកឡើយ។ ប៉ុន្តែ ព្រះប្រើឫទ្ធានុភាពនោះដើម្បីបង្រៀនអ្នកអំពីអ្វីៗទាំងអស់+ ហើយការរើសតាំងដោយឫទ្ធានុភាពរបស់លោកគឺជាសេចក្ដីពិត មិនមែនជាសេចក្ដីភូតភរទេ។ ចូររួបរួមជាមួយនឹងលោកជារៀងរហូតតទៅ ដូចឫទ្ធានុភាពរបស់លោកបានបង្រៀនអ្នក។+ ២៨ ឥឡូវ កូនៗអើយ! ចូររួបរួមជាមួយនឹងលោកជារៀងរហូតតទៅ។ យ៉ាងនោះ ពេលដែលលោកលេចមក យើងអាចនិយាយដោយក្លាហាន+ ហើយយើងមិនគេចចេញពីមុខលោកដោយក្ដីអៀនខ្មាសឡើយ។ ២៩ ប្រសិនបើអ្នករាល់គ្នាដឹងថាលោកសុចរិត អ្នកក៏ដឹងដែរថា អស់អ្នកដែលប្រព្រឹត្តអំពើសុចរិត នោះកើតមកពីលោក។+
៣ ចូរគិតអំពីសេចក្ដីស្រឡាញ់ដ៏ជ្រាលជ្រៅដែលបិតានៅស្ថានសួគ៌មានចំពោះយើង+ ដោយចាត់ទុកយើងជាកូន!+ យើងជាកូនរបស់ព្រះមែន។ នេះជាមូលហេតុដែលពិភពលោកនេះមិនស្គាល់យើង+ ពីព្រោះពួកគេមិនស្គាល់ព្រះ។+ ២ បងប្អូនជាទីស្រឡាញ់អើយ! យើងជាកូនព្រះ+ តែព្រះមិនទាន់បង្ហាញឲ្យយើងដឹងថា យើងនឹងទៅជាយ៉ាងណាឡើយ។+ អ្វីដែលយើងដឹងគឺ យើងនឹងបានដូចព្រះ ពេលដែលព្រះបង្ហាញឲ្យយើងឃើញលោក ពីព្រោះព្រះគឺយ៉ាងណា យើងនឹងឃើញលោកយ៉ាងនោះ។ ៣ អស់អ្នកណាដែលមានសេចក្ដីសង្ឃឹមនេះលើលោក អ្នកនោះសម្អាតខ្លួនឲ្យបរិសុទ្ធ+ ដូចលោកបរិសុទ្ធដែរ។
៤ អ្នកណាដែលប្រព្រឹត្ត*អំពើខុសឆ្គង មានន័យថាប្រព្រឹត្តអំពើប្រឆាំងច្បាប់។ ដូច្នេះ អំពើខុសឆ្គងគឺជាអំពើប្រឆាំងច្បាប់។ ៥ អ្នករាល់គ្នាក៏ដឹងដែរថា លោកយេស៊ូបានមកដើម្បីដកយកការខុសឆ្គងរបស់យើង+ ហើយលោកគ្មានភាពខុសឆ្គងសោះឡើយ។ ៦ អ្នកណាដែលរួបរួមជាមួយនឹងលោក អ្នកនោះមិនប្រព្រឹត្តអំពើខុសឆ្គងទេ។+ អ្នកណាដែលប្រព្រឹត្តអំពើខុសឆ្គង អ្នកនោះមិនធ្លាប់ឃើញលោកឡើយ ហើយក៏មិនស្គាល់លោកដែរ។ ៧ កូនៗអើយ! កុំឲ្យអ្នកណាបំភាន់អ្នកឡើយ។ អ្នកណាដែលប្រព្រឹត្តអំពើសុចរិត អ្នកនោះក៏សុចរិតដូចលោកយេស៊ូដែរ។ ៨ អ្នកណាដែលប្រព្រឹត្តអំពើខុសឆ្គង អ្នកនោះមកពីមេកំណាច* ពីព្រោះមេកំណាចបានប្រព្រឹត្តអំពើខុសឆ្គងតាំងពីដើមដំបូង។+ នេះជាមូលហេតុដែលបុត្ររបស់ព្រះបានមក ពោលគឺដើម្បីបំផ្លាញស្នាដៃរបស់មេកំណាច។+
៩ អ្នកណាដែលកើតមកពីព្រះ អ្នកនោះមិនប្រព្រឹត្តអំពើខុសឆ្គងឡើយ+ ពីព្រោះពូជ*របស់ព្រះនៅជាប់ក្នុងអ្នកនោះ ហើយអ្នកនោះមិនអាចប្រព្រឹត្តអំពើខុសឆ្គងបានឡើយ ពីព្រោះអ្នកនោះបានកើតមកពីព្រះ។+ ១០ យើងអាចសម្គាល់កូនរបស់ព្រះ និងកូនរបស់មេកំណាចបាន ដោយសេចក្ដីនេះឯង គឺអ្នកណាដែលមិនប្រព្រឹត្តអំពើសុចរិត ឬមិនស្រឡាញ់បងប្អូនខ្លួន អ្នកនោះមិនកើតមកពីព្រះទេ។+ ១១ ព្រោះនេះជាបណ្ដាំដែលអ្នករាល់គ្នាបានឮពីដើមដំបូងថា យើងត្រូវស្រឡាញ់គ្នាទៅវិញទៅមក។+ ១២ យើងមិនត្រូវប្រព្រឹត្តដូចកាអ៊ីនដែលកើតមកពីមេកំណាច ហើយបានសម្លាប់ប្អូនខ្លួនយ៉ាងសាហាវនោះឡើយ។+ ហេតុអ្វីបានជាគាត់សម្លាប់ប្អូនដូច្នេះ? ពីព្រោះអំពើដែលគាត់បានធ្វើសុទ្ធតែទុច្ចរិត+ ប៉ុន្តែអំពើដែលប្អូនរបស់គាត់បានធ្វើសុទ្ធតែសុចរិត។+
១៣ បងប្អូនអើយ! សូមកុំភ្ញាក់ផ្អើលឡើយ ពេលដែលពិភពលោកនេះស្អប់អ្នករាល់គ្នា។+ ១៤ យើងដឹងថាយើងបានឆ្លងផុតពីសេចក្ដីស្លាប់មកកាន់ជីវិតហើយ+ ដោយសារយើងស្រឡាញ់បងប្អូន។+ អ្នកណាដែលមិនស្រឡាញ់បងប្អូន អ្នកនោះស្ថិតនៅក្នុងសេចក្ដីស្លាប់នៅឡើយ។+ ១៥ អ្នកណាដែលស្អប់បងប្អូនខ្លួន អ្នកនោះជាឃាតករ+ ហើយអ្នករាល់គ្នាដឹងថាគ្មានឃាតករណានឹងបានជីវិតជារៀងរហូតឡើយ។+ ១៦ យើងស្គាល់សេចក្ដីស្រឡាញ់ ដោយសារសេចក្ដីនេះឯង គឺពីព្រោះលោកបានលះបង់ជីវិត*ដើម្បីយើង។+ ម្ល៉ោះហើយ យើងក៏មានកាតព្វកិច្ចលះបង់ជីវិតដើម្បីបងប្អូនយើងដែរ។+ ១៧ ប្រសិនបើអ្នកណាមានធនធានសម្រាប់ចិញ្ចឹមជីវិត ហើយសង្កេតឃើញបងប្អូនខ្លួនខ្វះខាត តែបែរជាមិនបង្ហាញចិត្តអាណិតមេត្តា តើអ្នកនោះអាចមានសេចក្ដីស្រឡាញ់ចំពោះព្រះដូចម្ដេចបាន?+ ១៨ កូនៗអើយ! យើងមិនត្រូវស្រឡាញ់តែមាត់ ឬដោយពាក្យសម្ដីប៉ុណ្ណោះទេ+ តែត្រូវស្រឡាញ់ដោយការប្រព្រឹត្ត+ និងដោយសេចក្ដីពិតវិញ។+
១៩ គឺសេចក្ដីនោះឯងដែលឲ្យយើងដឹងថាយើងកើតមកពីសេចក្ដីពិត ហើយយើងនឹងជឿជាក់ថាព្រះស្រឡាញ់យើង។ ២០ ទោះជាក្នុងរឿងអ្វីក៏ដោយដែលចិត្តរបស់យើងផ្ដន្ទាទោសយើង សូមចាំថាព្រះធំជាងចិត្តរបស់យើង ហើយក៏ជ្រាបគ្រប់ទាំងអស់។+ ២១ បងប្អូនជាទីស្រឡាញ់អើយ! បើចិត្តរបស់យើងមិនផ្ដន្ទាទោសយើងទេ នោះយើងអាចនិយាយទៅព្រះដោយចិត្តក្លាហាន+ ២២ ហើយអ្វីក៏ដោយដែលយើងសុំពីព្រះ យើងនឹងទទួល+ ពីព្រោះយើងកាន់តាមបញ្ញត្ដិរបស់លោក ថែមទាំងកំពុងធ្វើអ្វីៗដែលលោកពេញចិត្តផង។ ២៣ ឯបញ្ញត្ដិរបស់ព្រះគឺ ឲ្យយើងមានជំនឿលើនាមរបស់លោកយេស៊ូគ្រិស្ត ជាបុត្ររបស់លោក+ ព្រមទាំងឲ្យយើងស្រឡាញ់គ្នាទៅវិញទៅមក+ ដូចលោកបានបង្គាប់យើង។ ២៤ ម្យ៉ាងទៀត អ្នកណាដែលកាន់តាមបញ្ញត្ដិរបស់លោក អ្នកនោះរួបរួមជាមួយនឹងលោក ហើយលោកក៏រួបរួមជាមួយនឹងអ្នកនោះដែរ។+ ម្ល៉ោះហើយ យើងដឹងថាលោករួបរួមជាមួយនឹងយើងជារៀងរហូត ដោយសារឫទ្ធានុភាពដែលលោកបានផ្ដល់ឲ្យយើង។+
៤ បងប្អូនជាទីស្រឡាញ់អើយ! កុំជឿគ្រប់ទាំងបណ្ដាំដែលហាក់ដូចជាមកពីព្រះឡើយ។+ ប៉ុន្តែ ចូរពិនិត្យពិចារណាមើលថា បណ្ដាំនោះមកពីព្រះឬមិនមែន+ ពីព្រោះក្នុងពិភពលោកនេះ មានអ្នកប្រកាសទំនាយមិនពិតជាច្រើននាក់បានលេចមក។+
២ អ្នកអាចសម្គាល់បណ្ដាំដែលមកពីព្រះដោយសេចក្ដីនេះគឺ បណ្ដាំណាដែលបញ្ជាក់ថាលោកយេស៊ូគ្រិស្តធ្លាប់កើតមកជាមនុស្ស បណ្ដាំនោះមកពីព្រះ។+ ៣ ប៉ុន្តែ បណ្ដាំណាដែលមិនបញ្ជាក់ដូច្នេះអំពីលោកយេស៊ូ បណ្ដាំនោះមិនមែនមកពីព្រះទេ+ តែមកពីសត្រូវរបស់គ្រិស្តវិញ ក៏ជាបណ្ដាំដែលអ្នកបានឮថាកំពុងមកដល់។+ ឥឡូវនេះ បណ្ដាំនោះនៅក្នុងពិភពលោកហើយ។+
៤ កូនៗអើយ! អ្នករាល់គ្នាមកពីព្រះ ហើយអ្នករាល់គ្នាបានឈ្នះពួកគេ*+ ពីព្រោះព្រះដែលគាំទ្រអ្នករាល់គ្នា+ គឺធំជាងមេកំណាចដែលគាំទ្រពិភពលោកនេះ។+ ៥ ពួកគេមកពីពិភពលោកនេះ។+ ដូច្នេះ អ្វីដែលពួកគេនិយាយក៏មកពីពិភពលោកនេះដែរ ហើយពិភពលោកនេះស្ដាប់ពួកគេ។+ ៦ យើងមកពីព្រះ។ អ្នកណាដែលស្គាល់ព្រះ អ្នកនោះស្ដាប់យើង។+ អ្នកណាដែលមិនមកពីព្រះ អ្នកនោះមិនស្ដាប់យើងទេ។+ តាមរបៀបនេះហើយ យើងអាចសម្គាល់បណ្ដាំពិតនិងបណ្ដាំបោកបញ្ឆោត។+
៧ បងប្អូនជាទីស្រឡាញ់អើយ! ចូរយើងបន្តស្រឡាញ់គ្នាទៅវិញទៅមកជានិច្ច+ ពីព្រោះសេចក្ដីស្រឡាញ់គឺមកពីព្រះ ហើយអ្នកណាដែលបង្ហាញសេចក្ដីស្រឡាញ់ អ្នកនោះកើតមកពីព្រះ ថែមទាំងស្គាល់ព្រះទៀតផង។+ ៨ អ្នកណាដែលគ្មានសេចក្ដីស្រឡាញ់ អ្នកនោះមិនស្គាល់ព្រះទេ ពីព្រោះព្រះគឺជាសេចក្ដីស្រឡាញ់។+ ៩ សេចក្ដីស្រឡាញ់របស់ព្រះបានត្រូវបង្ហាញចំពោះយើង ពីព្រោះព្រះបានចាត់បុត្រតែមួយ*របស់លោកឲ្យមក+ក្នុងពិភពលោកនេះ ដើម្បីឲ្យយើងអាចបានជីវិតតាមរយៈបុត្រនោះ។+ ១០ ព្រះបានចាត់បុត្ររបស់លោកឲ្យធ្វើជាគ្រឿងបូជាលោះការខុសឆ្គងរបស់យើង ដើម្បីផ្សះផ្សាចំណងមិត្តភាពរវាងយើងនិងលោក។+ ព្រះបានធ្វើដូច្នេះ ដោយសារលោកស្រឡាញ់យើង មិនមែនដោយសារយើងស្រឡាញ់លោកទេ។
១១ បងប្អូនជាទីស្រឡាញ់អើយ! ប្រសិនបើព្រះបានស្រឡាញ់យើងយ៉ាងនេះ យើងក៏មានកាតព្វកិច្ចស្រឡាញ់គ្នាទៅវិញទៅមកដែរ។+ ១២ គ្មានអ្នកណាធ្លាប់ឃើញព្រះឡើយ។+ ប្រសិនបើយើងបន្តស្រឡាញ់គ្នាទៅវិញទៅមកជានិច្ច នោះព្រះនៅជាមួយនឹងយើង ហើយសេចក្ដីស្រឡាញ់របស់លោកបានទៅជាពេញលក្ខណៈនៅក្នុងយើង។+ ១៣ យើងដឹងថាយើងកំពុងរួបរួមជាមួយនឹងលោក ហើយលោករួបរួមជាមួយនឹងយើង គឺដោយហេតុថា លោកបានឲ្យឫទ្ធានុភាពរបស់លោកដល់យើង។ ១៤ បន្ថែមទៅទៀត យើងបានឃើញដោយផ្ទាល់ ហើយកំពុងបញ្ជាក់ថា បិតាដែលនៅស្ថានសួគ៌បានចាត់បុត្ររបស់លោកឲ្យមកសង្គ្រោះពិភពលោក។+ ១៥ អ្នកណាដែលទទួលស្គាល់លោកយេស៊ូគ្រិស្តជាបុត្ររបស់ព្រះ+ អ្នកនោះរួបរួមជាមួយនឹងព្រះ ហើយព្រះក៏រួបរួមជាមួយនឹងអ្នកនោះដែរ។+ ១៦ ម្យ៉ាងទៀត យើងបានស្គាល់ ហើយបានជឿថាព្រះស្រឡាញ់យើង។+
ព្រះគឺជាសេចក្ដីស្រឡាញ់។+ អ្នកណាដែលនៅជាប់នឹងសេចក្ដីស្រឡាញ់ អ្នកនោះនៅរួបរួមជាមួយនឹងព្រះ ហើយព្រះនៅរួបរួមជាមួយនឹងអ្នកនោះ។+ ១៧ គឺយ៉ាងនេះហើយដែលយើងមានសេចក្ដីស្រឡាញ់ដែលពេញលក្ខណៈ ដើម្បីឲ្យយើងអាចនិយាយដោយក្លាហាន*+នៅថ្ងៃវិនិច្ឆ័យសេចក្ដី ពីព្រោះនៅក្នុងពិភពលោកនេះ លោកយេស៊ូគ្រិស្តគឺយ៉ាងណា យើងក៏ដូចលោកយ៉ាងនោះដែរ។ ១៨ អ្នកដែលមានសេចក្ដីស្រឡាញ់ដែលពេញលក្ខណៈ មិនភ័យខ្លាចឡើយ។+ សេចក្ដីស្រឡាញ់ដែលពេញលក្ខណៈបំបាត់ការភ័យខ្លាច ពីព្រោះការភ័យខ្លាចតែងតែរារាំងយើង។ អ្នកណាដែលភ័យខ្លាច អ្នកនោះមិនទាន់មានសេចក្ដីស្រឡាញ់ដែលពេញលក្ខណៈឡើយ។+ ១៩ ប៉ុន្តែ យើងបង្ហាញសេចក្ដីស្រឡាញ់ ពីព្រោះព្រះបានស្រឡាញ់យើងជាមុន។+
២០ បើអ្នកណានិយាយថា«ខ្ញុំស្រឡាញ់ព្រះ» តែស្អប់បងប្អូនខ្លួន អ្នកនោះនិយាយកុហក+ ព្រោះថាអ្នកណាដែលមិនស្រឡាញ់បងប្អូន+ដែលខ្លួនមើលឃើញ អ្នកនោះមិនអាចស្រឡាញ់ព្រះដែលខ្លួនមើលមិនឃើញឡើយ។+ ២១ នេះជាបញ្ញត្ដិដែលយើងបានទទួលពីលោកគឺ អ្នកណាដែលស្រឡាញ់ព្រះ អ្នកនោះក៏ត្រូវស្រឡាញ់បងប្អូនខ្លួនដែរ។+
៥ អ្នកណាដែលជឿថាលោកយេស៊ូជាគ្រិស្ត អ្នកនោះបានកើតមកពីព្រះ+ ហើយអ្នកណាដែលស្រឡាញ់ព្រះជាបិតានៅស្ថានសួគ៌ អ្នកនោះក៏ស្រឡាញ់កូនព្រះដែរ។ ២ យើងដឹងថាយើងស្រឡាញ់កូនព្រះ ដោយសេចក្ដីនេះឯង+ គឺយើងស្រឡាញ់ព្រះ និងកាន់តាមបញ្ញត្ដិរបស់លោក។ ៣ ពីព្រោះការស្រឡាញ់ព្រះមានន័យថា យើងកាន់តាមបញ្ញត្ដិរបស់លោក+ ហើយបញ្ញត្ដិរបស់លោកមិនមែនជាបន្ទុកធ្ងន់ទេ។+ ៤ ពីព្រោះអ្នកណា*ដែលកើតមកពីព្រះ អ្នកនោះឈ្នះពិភពលោកនេះ។+ យើងបានឈ្នះពិភពលោកនេះ គឺដោយសារជំនឿរបស់យើង។+
៥ តើអ្នកណាជាអ្នកដែលបានឈ្នះពិភពលោកនេះ?+ គឺអ្នកដែលមានជំនឿថាលោកយេស៊ូជាបុត្ររបស់ព្រះ មែនទេ?+ ៦ គឺលោកយេស៊ូគ្រិស្តហើយ ដែលបានមកតាមរយៈទឹកនិងឈាម។ មិនគ្រាន់តែទឹកប៉ុណ្ណោះទេ+ តែដោយទឹកនិងឈាម។+ ម្យ៉ាងទៀត ឫទ្ធានុភាពរបស់ព្រះកំពុងតែធ្វើជាសាក្សីអំពីរឿងនោះ+ ពីព្រោះឫទ្ធានុភាពរបស់ព្រះជាសេចក្ដីពិត។ ៧ មានអ្វីបីយ៉ាងដែលជាសាក្សីបញ្ជាក់អំពីលោកយេស៊ូគឺ៖ ៨ ឫទ្ធានុភាពរបស់ព្រះ+ ទឹក+ និងឈាម+ ហើយសេចក្ដីបញ្ជាក់នៃសាក្សីទាំងបីនេះគឺស្របគ្នា។
៩ ប្រសិនបើយើងព្រមទទួលស្គាល់សេចក្ដីបញ្ជាក់របស់សាក្សីជាមនុស្ស នោះយើងប្រាកដជាព្រមទទួលស្គាល់សេចក្ដីបញ្ជាក់របស់ព្រះជាងនោះទៅទៀត ពីព្រោះព្រះធ្វើជាសាក្សីបញ្ជាក់អំពីបុត្ររបស់លោក។ ១០ អ្នកណាដែលមានជំនឿលើបុត្ររបស់ព្រះ អ្នកនោះបានទទួលសេចក្ដីបញ្ជាក់របស់ព្រះដោយផ្ទាល់។ អ្នកណាដែលគ្មានជំនឿលើព្រះ អ្នកនោះហាក់ដូចជាចោទព្រះថាជាអ្នកកុហក+ ពីព្រោះអ្នកនោះមិនជឿសេចក្ដីបញ្ជាក់របស់ព្រះអំពីបុត្រលោកទេ។ ១១ អ្វីដែលបានត្រូវបញ្ជាក់គឺថា ព្រះបានផ្ដល់ជីវិតដែលគ្មានទីបញ្ចប់ឲ្យយើង+ ហើយយើងបានជីវិតនោះដោយសារបុត្ររបស់លោក។+ ១២ អ្នកណាដែលទទួលស្គាល់បុត្ររបស់ព្រះ អ្នកនោះមានជីវិតដែលគ្មានទីបញ្ចប់ តែអ្នកណាដែលមិនទទួលស្គាល់បុត្ររបស់ព្រះ អ្នកនោះមិនមានជីវិតដែលគ្មានទីបញ្ចប់ទេ។+
១៣ ខ្ញុំសរសេរសេចក្ដីទាំងនេះដល់អ្នករាល់គ្នាដែលមានជំនឿលើនាមបុត្ររបស់ព្រះ+ ដើម្បីឲ្យអ្នករាល់គ្នាដឹងថាខ្លួនមានជីវិតដែលគ្មានទីបញ្ចប់។+ ១៤ ហេតុនេះ យើងមានទំនុកចិត្តថា+ អ្វីក៏ដោយដែលយើងអធិដ្ឋានសុំ ដែលសមស្របតាមបំណងប្រាថ្នារបស់ព្រះ នោះព្រះនឹងស្ដាប់យើង។+ ១៥ ម្ល៉ោះហើយ បើយើងដឹងថា ព្រះនឹងស្ដាប់យើងទោះជាយើងសុំអ្វីក៏ដោយ នោះយើងដឹងថាយើងនឹងទទួល ពីព្រោះយើងបានសុំពីលោក។+
១៦ ប្រសិនបើអ្នកណាម្នាក់ប្រទះឃើញបងប្អូនខ្លួនធ្វើខុសអ្វីមួយ ដែលមិននាំឲ្យមានទោសដល់ស្លាប់ទេ អ្នកនោះត្រូវអធិដ្ឋានឲ្យគាត់ ហើយព្រះនឹងឲ្យជីវិតដល់គាត់។+ នេះសម្រាប់បងប្អូនដែលបានធ្វើខុសអ្វីមួយដែលមិននាំឲ្យមានទោសដល់ស្លាប់ទេ។ ប៉ុន្តែ មានការខុសឆ្គងមួយដែលនាំឲ្យមានទោសដល់ស្លាប់មែន+ តែខ្ញុំមិនប្រាប់ឲ្យអធិដ្ឋានដើម្បីអ្នកដែលធ្វើខុសបែបនោះឡើយ។ ១៧ ការមិនសុចរិតទាំងអស់ ជាការខុសឆ្គង។+ ទោះជាយ៉ាងនោះក៏ដោយ មានការខុសឆ្គងមួយដែលមិនមានទោសដល់ស្លាប់ឡើយ។
១៨ យើងដឹងថាអ្នកណាដែលកើតមកពីព្រះ អ្នកនោះមិនប្រព្រឹត្ត*អំពើខុសឆ្គងឡើយ ហើយលោក*ដែលបានកើតមកពីព្រះ មើលថែរក្សាអ្នកនោះ។ ម្យ៉ាងទៀត មេកំណាចមិនអាចប៉ះពាល់អ្នកនោះបានឡើយ។+ ១៩ យើងដឹងថាយើងមកពីព្រះ តែពិភពលោកទាំងមូលនៅក្រោមអំណាចរបស់មេកំណាច។+ ២០ ប៉ុន្តែ យើងដឹងថាបុត្ររបស់ព្រះបានមក+ ហើយបានផ្ដល់ឲ្យយើងមានការយល់ធ្លុះជ្រៅ ដើម្បីឲ្យយើងអាចទទួលចំណេះអំពីព្រះពិត។ បន្ថែមទៅទៀត យើងកំពុងរួបរួមជាមួយនឹងព្រះពិត+ តាមរយៈយេស៊ូគ្រិស្តជាបុត្ររបស់លោក។ លោកជាព្រះពិត និងជាជីវិតដែលគ្មានទីបញ្ចប់។+ ២១ កូនៗអើយ! ចូរជៀសចេញពីរូបព្រះ។+
នេះសំដៅលើលោកយេស៊ូ
ន័យត្រង់«បុគ្គលទុច្ចរិត»
ន័យត្រង់«លោក»
សំដៅលើការប្រព្រឹត្តជាទម្លាប់
ភាសាក្រិច«ឌីអាបូឡូស»មានន័យថា«អ្នកបង្កាច់បង្ខូច»
សំដៅលើពូជដែលអាចបង្កើតផលបាន
មើលនិយមន័យពាក្យ«ជីវិត»
សំដៅលើអ្នកប្រកាសទំនាយមិនពិត
ន័យត្រង់«បុត្រតែមួយដែលព្រះបានបង្កើតដោយផ្ទាល់»
ឬ«ដោយមានទំនុកចិត្ត»
ន័យត្រង់«អ្វីៗ»
នេះសំដៅលើការប្រព្រឹត្តជាទម្លាប់
នេះសំដៅលើលោកយេស៊ូ