ជូនចំពោះគ្រិស្តសាសនិកនៅក្រុងកូឡុស
១ ពីខ្ញុំ ប៉ូល ដែលជាសាវ័ក*របស់គ្រិស្ត*យេស៊ូស្របតាមបំណងប្រាថ្នារបស់ព្រះ និងពីធីម៉ូថេ+ជាប្អូនប្រុសរបស់យើង ២ ជូនចំពោះពួកអ្នកបរិសុទ្ធនិងបងប្អូនស្មោះត្រង់ទាំងឡាយដែលជាអ្នកកាន់តាមគ្រិស្តនៅក្រុងកូឡុស៖
សូមឲ្យអ្នករាល់គ្នាបានប្រកបដោយគុណដ៏វិសេសលើសលប់និងសេចក្ដីសុខសាន្តពីព្រះដែលជាបិតារបស់យើង។
៣ ពេលដែលយើងអធិដ្ឋានឲ្យអ្នករាល់គ្នា យើងតែងតែអរគុណព្រះជាបិតារបស់លោកយេស៊ូគ្រិស្តជាម្ចាស់របស់យើង ៤ ពីព្រោះយើងបានឮអំពីជំនឿដែលអ្នករាល់គ្នាមានក្នុងគ្រិស្តយេស៊ូ និងសេចក្ដីស្រឡាញ់របស់អ្នករាល់គ្នាចំពោះពួកអ្នកបរិសុទ្ធទាំងអស់ ៥ ដោយសារអ្នករាល់គ្នាមានសេចក្ដីសង្ឃឹមទទួលអ្វីដែលបានត្រូវបម្រុងទុកឲ្យអ្នករាល់គ្នានៅស្ថានសួគ៌។+ អ្នករាល់គ្នាបានឮអំពីសេចក្ដីសង្ឃឹមនេះតាមរយៈការប្រកាសអំពីសេចក្ដីពិត ពោលគឺដំណឹងល្អ ៦ ដែលបានមកដល់អ្នករាល់គ្នា។ ដំណឹងល្អនោះក៏ដុះដាលបង្កើតផលពេញពិភពលោក+ ដូចដែលកំពុងដុះដាលបង្កើតផលក្នុងចំណោមអ្នករាល់គ្នាដែរ ចាប់តាំងពីថ្ងៃដែលអ្នករាល់គ្នាបានឮ និងបានស្គាល់ច្បាស់នូវការពិតអំពីគុណដ៏វិសេសលើសលប់របស់ព្រះ។ ៧ នោះជាអ្វីដែលអ្នករាល់គ្នាបានរៀនពីអេប៉ាប្រាសជាទីស្រឡាញ់របស់យើង+ ដែលជាខ្ញុំបម្រើជាមួយនឹងយើង។ គាត់បម្រើគ្រិស្តយ៉ាងស្មោះត្រង់ ដើម្បីជាប្រយោជន៍ដល់យើង។ ៨ គាត់ក៏បានរៀបរាប់ប្រាប់យើងអំពីសេចក្ដីស្រឡាញ់របស់អ្នករាល់គ្នាដែលមកពីឫទ្ធានុភាពរបស់ព្រះដែរ។
៩ ហេតុនេះ ចាប់តាំងពីថ្ងៃដែលយើងឮរឿងនោះ យើងបានអធិដ្ឋានឲ្យអ្នករាល់គ្នាឥតឈប់ឈរ+ គឺសូមឲ្យអ្នករាល់គ្នាបានពោរពេញទៅដោយចំណេះត្រឹមត្រូវ+អំពីបំណងប្រាថ្នារបស់លោក ដោយមានប្រាជ្ញាសព្វគ្រប់និងការយល់ដឹងដែលឫទ្ធានុភាពរបស់លោកផ្ដល់ឲ្យ+ ១០ ប្រយោជន៍ឲ្យអ្នករាល់គ្នាប្រព្រឹត្តសមជាអ្នកបម្រើរបស់ព្រះយេហូវ៉ា* ដើម្បីធ្វើឲ្យលោកពេញចិត្តទាំងស្រុង។ ដំណាលគ្នានោះ អ្នករាល់គ្នានឹងបន្តបង្កើតផលក្នុងគ្រប់ការល្អទាំងអស់ ព្រមទាំងមានចំណេះត្រឹមត្រូវអំពីព្រះកាន់តែច្រើនឡើងៗ។+ ១១ សូមឲ្យអ្នករាល់គ្នាទទួលកម្លាំងខ្លាំងក្លាពីឫទ្ធានុភាពរុងរឿងរបស់លោក+ ដើម្បីអ្នករាល់គ្នាអាចស៊ូទ្រាំនឹងការទាំងអស់ ដោយចិត្តអត់ធ្មត់និងមានអំណរ ១២ ហើយសូមឲ្យអ្នករាល់គ្នាអរគុណបិតានៅស្ថានសួគ៌ដែលបានធ្វើឲ្យអ្នករាល់គ្នាមានលក្ខណៈគ្រប់គ្រាន់ ដើម្បីមានចំណែកក្នុងមត៌ករបស់ពួកអ្នកបរិសុទ្ធ+ដែលនៅក្នុងពន្លឺ។
១៣ ព្រះបានសង្គ្រោះយើងពីអំណាចនៃភាពងងឹត+ ហើយផ្លាស់យើងទៅក្នុងរាជាណាចក្រនៃបុត្រជាទីស្រឡាញ់របស់លោក។ ១៤ ដោយសារបុត្ររបស់លោកបានរំដោះយើងដោយបង់ថ្លៃលោះ នេះមានន័យថាការខុសឆ្គង*របស់យើងបានត្រូវអភ័យទោស។+ ១៥ លោកនិងព្រះដែលយើងមើលមិនឃើញ មានលក្ខណៈដូចគ្នាទាំងស្រុង។+ លោកជាបុត្រច្បងក្នុងចំណោមអ្វីៗទាំងអស់ដែលព្រះបានបង្កើត+ ១៦ ពីព្រោះអ្វីៗឯទៀតទាំងអស់នៅស្ថានសួគ៌និងនៅផែនដី បានត្រូវបង្កើតមកតាមរយៈលោក គឺអ្វីដែលមនុស្សមើលឃើញនិងអ្វីដែលមនុស្សមើលមិនឃើញ+ ទោះជាបល្ល័ង្ក ការគ្រប់គ្រង រដ្ឋាភិបាល ឬអាជ្ញាធរក្ដី។ អ្វីៗឯទៀតទាំងអស់បានត្រូវបង្កើតមកតាមរយៈលោក+ និងសម្រាប់លោក។ ១៧ ម្យ៉ាងទៀត មានលោកមុនអ្វីៗឯទៀតទាំងអស់+ ហើយតាមរយៈលោក អ្វីៗឯទៀតទាំងអស់បានត្រូវបង្កើតមក ១៨ ហើយលោកជាក្បាលនៃរូបកាយ ពោលគឺជាប្រមុខនៃក្រុមជំនុំ។+ លោកជាទីចាប់ផ្ដើមនៃអ្វីៗទាំងអស់ និងជាបុត្រច្បងដែលបានរស់ពីស្លាប់ឡើងវិញមុនគេ+ ដើម្បីឲ្យលោកអាចធ្វើជាអ្នកមុនគេក្នុងគ្រប់ការទាំងអស់ ១៩ ពីព្រោះព្រះពេញចិត្តឲ្យគ្រិស្តបានពេញខ្នាតក្នុងអ្វីៗទាំងអស់+ ២០ ហើយតាមរយៈគ្រិស្ត ព្រះផ្សះផ្សាអ្វីៗឯទៀតទាំងអស់ឲ្យជានឹងលោកឡើងវិញ+ ទោះជាអ្វីនៅផែនដី ឬនៅស្ថានសួគ៌ក្ដី ដោយធ្វើឲ្យមានសន្តិភាពតាមរយៈឈាម+របស់គ្រិស្តដែលបានត្រូវបង្ហូរលើបង្គោលទារុណកម្ម។*
២១ ពីមុនអ្នករាល់គ្នាធ្លាប់នៅដាច់ឆ្ងាយពីព្រះនិងជាសត្រូវរបស់ព្រះ ព្រោះអ្នករាល់គ្នាមានគំនិតលម្អៀងទៅរកអំពើទុច្ចរិត ២២ តែឥឡូវព្រះបានផ្សះផ្សាឲ្យអ្នករាល់គ្នាបានជានឹងលោកវិញ។ ព្រះបានធ្វើដូច្នេះតាមរយៈរូបកាយរបស់បុត្រលោកដែលបានស្លាប់ ដើម្បីឲ្យអ្នករាល់គ្នាបរិសុទ្ធ ឥតសៅហ្មង និងគ្មានកន្លែងចាប់កំហុសបាន នៅចំពោះមុខលោក។+ ២៣ អ្នករាល់គ្នានឹងមានគុណសម្បត្តិទាំងនោះ ឲ្យតែអ្នករាល់គ្នាបន្តកាន់តាមជំនឿ+ ហើយកាន់ជំហរមាំមួន+លើគ្រឹះ+ ដោយមិនឲ្យអ្នកណាធ្វើឲ្យអ្នករាល់គ្នាចាកចេញពីសេចក្ដីសង្ឃឹមដែលមានមូលដ្ឋានលើដំណឹងល្អដែលអ្នករាល់គ្នាបានឮ និងដែលបានត្រូវប្រកាសក្នុងចំណោមមនុស្សទាំងអស់នៅក្រោមមេឃ។+ ខ្ញុំ ប៉ូល បានត្រូវតែងតាំងឲ្យប្រកាសដំណឹងល្អនេះ។+
២៤ ឥឡូវខ្ញុំអរសប្បាយនឹងអ្វីដែលខ្ញុំរងទុក្ខដើម្បីអ្នករាល់គ្នា+ ហើយខ្ញុំកំពុងរងទុក្ខដូចគ្រិស្ត តែខ្ញុំត្រូវបន្តរងទុក្ខរហូតដល់ពេញកម្រិតដើម្បីរូបកាយរបស់គ្រិស្ត+ ពោលគឺក្រុមជំនុំ។+ ២៥ ខ្ញុំបានបម្រើរាស្ត្ររបស់ព្រះ* ដោយសារព្រះបានតែងតាំងខ្ញុំឲ្យធ្វើកិច្ចការនេះ+ ដើម្បីជាប្រយោជន៍ដល់អ្នករាល់គ្នា។ ហេតុនេះហើយបានជាខ្ញុំព្យាយាមប្រកាសបណ្ដាំរបស់ព្រះអស់ពីសមត្ថភាព ២៦ គឺប្រកាសអាថ៌កំបាំងដ៏ពិសិដ្ឋ+ដែលបានត្រូវលាក់ពីពិភពលោក*+ និងមនុស្សដែលរស់នៅជំនាន់មុនៗ។ ប៉ុន្តែ ឥឡូវអាថ៌កំបាំងដ៏ពិសិដ្ឋនេះបានត្រូវបើកបង្ហាញដល់ពួកអ្នកបរិសុទ្ធរបស់លោក។+ ២៧ ព្រះពេញចិត្តធ្វើឲ្យពួកអ្នកបរិសុទ្ធរបស់លោកដែលនៅក្នុងចំណោមប្រជាជាតិនានា ដឹងអំពីទ្រព្យវិសេសនៃអាថ៌កំបាំងដ៏ពិសិដ្ឋនេះ+ គឺគ្រិស្តកំពុងរួបរួមជាមួយនឹងអ្នករាល់គ្នា ដែលមានន័យថាអ្នករាល់គ្នាមានសេចក្ដីសង្ឃឹមរួមចំណែកក្នុងសិរីរុងរឿងរបស់លោក។+ ២៨ យើងប្រកាសផ្សាយអំពីលោក យើងដាស់តឿននិងបង្រៀនមនុស្សគ្រប់រូបអំពីលោកដោយប្រើប្រាជ្ញាទាំងអស់ ដើម្បីយើងអាចនាំមនុស្សគ្រប់រូបមកនៅចំពោះមុខព្រះ ដោយជួយពួកគេឲ្យធ្វើជាអ្នកកាន់តាមគ្រិស្តដែលមានភាពចាស់ទុំ។+ ២៩ នេះជាមូលហេតុដែលខ្ញុំខំប្រឹងធ្វើការយ៉ាងនឿយហត់ ដោយឫទ្ធានុភាពដែលលោកផ្ដល់ឲ្យខ្ញុំ។+
២ ព្រោះខ្ញុំចង់ឲ្យអ្នករាល់គ្នាដឹងថា ខ្ញុំកំពុងតស៊ូយ៉ាងខ្លាំងដើម្បីអ្នករាល់គ្នា និងដើម្បីអស់អ្នកដែលនៅក្រុងឡៅឌីសេ+ ព្រមទាំងអស់អ្នកដែលមិនទាន់បានឃើញមុខខ្ញុំ។ ២ នេះគឺដើម្បីឲ្យពួកគាត់ទទួលការសម្រាលទុក្ខ+ និងដើម្បីឲ្យពួកគាត់មានសាមគ្គីភាពប្រកបដោយសេចក្ដីស្រឡាញ់។+ យ៉ាងនោះ ពួកគាត់នឹងមានអ្វីដែលមានតម្លៃខ្លាំងណាស់ ពោលគឺការយល់ដឹងច្បាស់និងពិតប្រាកដ ដើម្បីមានចំណេះត្រឹមត្រូវអំពីអាថ៌កំបាំងដ៏ពិសិដ្ឋរបស់ព្រះ គឺគ្រិស្ត។+ ៣ គ្រប់ទាំងប្រាជ្ញានិងចំណេះដ៏ថ្លៃវិសេសបានត្រូវលាក់ទុកក្នុងលោក។+ ៤ ខ្ញុំនិយាយដូច្នេះ ដើម្បីកុំឲ្យអ្នកណាបោកបញ្ឆោតអ្នករាល់គ្នាដោយការវែកញែកដែលស្ដាប់ទៅគួរឲ្យជឿ។ ៥ ទោះជាខ្លួនខ្ញុំមិននៅទីនោះក៏ដោយ ក៏ចិត្តខ្ញុំនៅជាមួយនឹងអ្នករាល់គ្នាដែរ ហើយខ្ញុំអរសប្បាយដែលឃើញអ្នករាល់គ្នាមានសណ្ដាប់ធ្នាប់+ និងមានជំនឿរឹងមាំលើគ្រិស្ត។+
៦ ដូច្នេះ ដោយសារអ្នករាល់គ្នាមានជំនឿលើគ្រិស្តយេស៊ូដែលជាម្ចាស់របស់យើង ចូរបន្តដើរដោយរួបរួមជាមួយនឹងលោកតទៅទៀត។ ៧ ដូចដែលអ្នករាល់គ្នាបានរៀន ចូរចាក់ឫសយ៉ាងជ្រៅក្នុងគ្រិស្ត ហើយបន្តពង្រឹងជំហរក្នុងលោក+ ថែមទាំងធ្វើឲ្យជំនឿរបស់ខ្លួនរឹងមាំឡើង+ ហើយចូរថ្លែងអំណរគុណដល់ព្រះជានិច្ច។+
៨ ចូរប្រយ័ត្ន កុំឲ្យអ្នកណាមកដាក់អន្ទាក់អ្នករាល់គ្នា* តាមរយៈទស្សនវិជ្ជានិងការបោកបញ្ឆោតអសារឥតការ+ ដែលមានមូលដ្ឋានលើទំនៀមទម្លាប់របស់មនុស្ស និងដែលមានមូលដ្ឋានលើទស្សនៈទូទៅ*របស់ពិភពលោកនេះ តែមិនមានមូលដ្ឋានលើគ្រិស្តទេ ៩ ព្រោះគុណសម្បត្តិទាំងអស់របស់ព្រះនៅក្នុងគ្រិស្ត។+ ១០ ដូច្នេះ អ្នករាល់គ្នាមានអ្វីៗសព្វគ្រប់ ដោយសារលោកដែលជាប្រមុខនៃរដ្ឋាភិបាលនិងអំណាចគ្រប់គ្រងទាំងអស់។+ ១១ ដោយសារអ្នករាល់គ្នាមានទំនាក់ទំនងជាមួយនឹងលោក នោះអ្នករាល់គ្នាបានទទួលការកាត់ចុងស្បែក មិនមែនដោយដៃមនុស្សទេ តែដោយបោះបង់ចោលរូបកាយសាច់ឈាមដែលមានភាពខុសឆ្គង+ ព្រោះនោះជារបៀបដែលអ្នកបម្រើនៃគ្រិស្តទទួលការកាត់ចុងស្បែក។+ ១២ ពីព្រោះអ្នករាល់គ្នាបានត្រូវកប់ជាមួយនឹងលោក ដោយទទួលការជ្រមុជទឹកដូចលោក+ ហើយដោយសារទំនាក់ទំនងរបស់អ្នករាល់គ្នាជាមួយនឹងលោក អ្នករាល់គ្នាក៏បានរស់ឡើងវិញ+ជាមួយគ្នា តាមរយៈជំនឿរបស់អ្នករាល់គ្នាលើការដែលប្រកបដោយឫទ្ធានុភាពរបស់ព្រះ គឺព្រះដែលបានប្រោសលោកឲ្យរស់ពីស្លាប់ឡើងវិញ។+
១៣ ម្យ៉ាងទៀត ទោះជាអ្នករាល់គ្នាបានស្លាប់ដោយសារកំហុសរបស់ខ្លួន ហើយមិនបានទទួលការកាត់ចុងស្បែកក៏ដោយ ព្រះបានធ្វើឲ្យអ្នករាល់គ្នាមានជីវិតរស់ឡើងវិញជាមួយនឹងលោក។+ ព្រះបានមេត្តាអភ័យទោសចំពោះកំហុសទាំងអស់របស់យើង+ ១៤ ហើយបានលុបឯកសារសរសេរដោយដៃ+ គឺជាឯកសារដែលមានបទបញ្ញត្ដិ+និងជាឯកសារដែលប្រឆាំងយើង។+ លោកបានបំបាត់ចោលឯកសារនោះតាមរយៈការស្លាប់របស់គ្រិស្តលើបង្គោលឈើ។*+ ១៥ តាមរយៈបង្គោលទារុណកម្ម* លោកបានឈ្នះរដ្ឋាភិបាលនិងអំណាចគ្រប់គ្រងទាំងឡាយ រួចបង្ហាញអ្នកទាំងនោះឲ្យមនុស្សឃើញជាសាធារណៈថា ពួកគេបានចាញ់+ ហើយនាំពួកគេដែលជាអ្នកទោស ឲ្យទៅតាមការហែក្បួនអបអរជ័យជម្នះ។
១៦ ដូច្នេះ កុំឲ្យអ្នកណាវិនិច្ឆ័យអ្នករាល់គ្នាអំពីការផឹកឬការបរិភោគ+ ឬអំពីការធ្វើបុណ្យណាមួយ ឬអំពីពិធីចូលខែថ្មី+ ឬអំពីការកាន់ថ្ងៃឈប់សម្រាក*ឡើយ។+ ១៧ ការទាំងនោះជាស្រមោលនៃអ្វីៗដែលនឹងមក+ តែរូបពិតគឺជាគ្រិស្ត។+ ១៨ កុំឲ្យអ្នកណាធ្វើឲ្យអ្នករាល់គ្នាខកខានទទួលរង្វាន់ឡើយ+ គឺអ្នកដែលចូលចិត្តធ្វើពុតជាបន្ទាបខ្លួន ហើយចូលចិត្តគោរពប្រណិប័តន៍ពួកទេវតា* ក៏«កាន់ជំហរលើ»*អ្វីដែលខ្លួនបានមើលឃើញ។ អ្នកនោះក្រអឺតក្រអោងដោយគ្មានហេតុត្រឹមត្រូវ ដោយសារមានរបៀបគិតគូរដូចមនុស្សដែលមានភាពខុសឆ្គង ១៩ ហើយអ្នកនោះមិនកាន់តាមលោកដែលជាក្បាល*ឡើយ+ គឺលោកដែលធ្វើឲ្យរូបកាយទាំងមូលធំលូតលាស់ជានិច្ចតាមតែព្រះឲ្យលូតលាស់ ដោយផ្ដល់នូវអ្វីៗដែលគ្រប់អវយវៈត្រូវការ ហើយក៏ធ្វើឲ្យជាប់គ្នាយ៉ាងល្អដោយសារសរសៃនិងសន្លាក់ឆ្អឹងផ្សេងៗ។+
២០ ប្រសិនបើអ្នករាល់គ្នាបានស្លាប់ជាមួយនឹងគ្រិស្តដើម្បីឲ្យរួចពីទស្សនៈទូទៅ*របស់ពិភពលោកនេះ+ ហេតុអ្វីបានជាអ្នករាល់គ្នាហាក់ដូចជានៅតែរួមចំណែកក្នុងពិភពលោក ដោយចុះចូលធ្វើតាមបញ្ញត្ដិ ដែលថា៖+ ២១ «កុំយក កុំភ្លក់ កុំពាល់»? ២២ ព្រោះបទបញ្ញត្តិទាំងនោះនឹងត្រូវបំផ្លាញចោលពេលដែលប្រើប្រាស់រួច ហើយបទបញ្ញត្ដិទាំងនោះជាសេចក្ដីបង្គាប់និងសេចក្ដីបង្រៀនរបស់មនុស្ស។+ ២៣ ទោះជាបញ្ញត្ដិទាំងនោះមើលទៅដូចជាបង្ហាញពីប្រាជ្ញាក៏ដោយ តែនោះជារបៀបគោរពប្រណិប័តន៍តាមការគិតរបស់មនុស្សវិញ ហើយអ្នកដែលកាន់តាមអ្វីៗទាំងនោះគ្រាន់តែធ្វើពុតជាបន្ទាបខ្លួន ថែមទាំងប្រព្រឹត្តតឹងរ៉ឹងពេកចំពោះរូបកាយខ្លួនឯង+ តែតាមការពិតអ្វីៗដែលអ្នកនោះកាន់តាមគឺគ្មានប្រយោជន៍សោះ ក្នុងការជួយឲ្យយកឈ្នះសេចក្ដីប៉ងប្រាថ្នានៃរូបកាយ។
៣ ក៏ប៉ុន្តែ ប្រសិនបើអ្នករាល់គ្នាបានរស់ឡើងវិញជាមួយនឹងគ្រិស្ត+ ចូរបន្តស្វែងរកអ្វីដែលនៅស្ថានលើ ជាកន្លែងដែលគ្រិស្តអង្គុយនៅខាងស្ដាំព្រះ។+ ២ ចូរផ្ចង់ចិត្តទៅលើអ្វីដែលនៅស្ថានលើ+ មិនមែនទៅលើអ្វីដែលនៅផែនដីឡើយ។+ ៣ ព្រោះអ្នករាល់គ្នាបានស្លាប់ ហើយជីវិតរបស់អ្នករាល់គ្នាបានត្រូវផ្ញើទុកនឹងគ្រិស្ត ស្របតាមបំណងប្រាថ្នារបស់ព្រះ។ ៤ ពេលគ្រិស្តដែលជាអ្នកផ្ដល់ជីវិត*+លេចមក នោះអ្នករាល់គ្នាក៏នឹងលេចមកជាមួយនឹងលោកក្នុងសិរីរុងរឿងរបស់លោកដែរ។+
៥ ដូច្នេះ ចូររម្ងាប់ភាពទោរទន់ដែលមាននៅក្នុងអវយវៈរូបកាយរបស់អ្នករាល់គ្នា*+ គឺភាពទោរទន់ទៅរកអំពើប្រាសចាកសីលធម៌ខាងផ្លូវភេទ* អំពើស្មោកគ្រោក ការមិនគ្រប់គ្រងលើចំណង់ផ្លូវភេទ+ សេចក្ដីប៉ងប្រាថ្នាអាក្រក់ និងការលោភលន់ដែលប្រៀបដូចជាការគោរពបូជារូបព្រះ។ ៦ ព្រះនឹងបញ្ចេញកំហឹងទៅលើអស់អ្នកដែលប្រព្រឹត្តអំពើទាំងនោះ។ ៧ ពីមុនអ្នករាល់គ្នាក៏ធ្លាប់ប្រព្រឹត្តអំពើទាំងនោះដែរ+ ៨ តែឥឡូវ ចូរអ្នករាល់គ្នាលះចោលកំហឹង ចិត្តក្ដៅក្រហាយ អំពើអាក្រក់+ ពាក្យប្រមាថមើលងាយ+ ហើយកុំឲ្យពាក្យអាសអាភាស+ចេញពីមាត់អ្នករាល់គ្នាឲ្យសោះ។ ៩ កុំកុហកគ្នាឡើយ។+ ចូរដោះបុគ្គលិកលក្ខណៈចាស់ចេញ+ រួមទាំងការប្រព្រឹត្តពីមុនរបស់អ្នកផង។ ១០ រួចចូរបំពាក់ខ្លួនដោយបុគ្គលិកលក្ខណៈថ្មី+ ដែលកំពុងត្រូវកែប្រែឲ្យថ្មីតាមរយៈចំណេះត្រឹមត្រូវ ស្របតាមលក្ខណៈរបស់លោកដែលបានបង្កើតបុគ្គលិកលក្ខណៈថ្មីនោះ។+ ១១ ក្នុងបុគ្គលិកលក្ខណៈថ្មីនោះ គ្មានជនជាតិក្រិចឬជនជាតិយូដា គ្មានការកាត់ចុងស្បែក*ឬមិនកាត់ចុងស្បែក គ្មានជនបរទេស ជនជាតិស៊ិទា* ខ្ញុំបម្រើឬអ្នកមានសេរីភាពឡើយ។ ប៉ុន្តែ គ្រិស្តគឺជាអ្វីៗទាំងអស់ ហើយនៅក្នុងអ្វីៗទាំងអស់។+
១២ ដូច្នេះ ក្នុងនាមជាអ្នកដែលព្រះស្រឡាញ់ ជាអ្នកដែលព្រះបានជ្រើសរើស+ និងជាអ្នកបរិសុទ្ធ ចូរបំពាក់ខ្លួនដោយសេចក្ដីមេត្តាករុណាដ៏ជ្រាលជ្រៅ+ សេចក្ដីសប្បុរស ចិត្តរាបទាប+ ចិត្តស្លូតបូត+ និងចិត្តអត់ធ្មត់។+ ១៣ ទោះជាអ្នកណាមានហេតុត្អូញត្អែរអំពីអ្នកណាម្នាក់ក៏ដោយ+ ចូរទ្រាំទ្រគ្នាទៅវិញទៅមក ហើយអភ័យទោសឲ្យគ្នាទៅវិញទៅមកដោយគ្មានល័ក្ខខ័ណ្ឌ។+ ព្រះយេហូវ៉ា*បានអភ័យទោសឲ្យអ្នករាល់គ្នាដោយគ្មានល័ក្ខខ័ណ្ឌ។ ម្ល៉ោះហើយ អ្នករាល់គ្នាត្រូវធ្វើដូច្នោះដែរ។+ ១៤ ប៉ុន្តែ ក្រៅពីការទាំងនេះ ចូរបំពាក់ខ្លួនដោយសេចក្ដីស្រឡាញ់+ ព្រោះនេះជាចំណងដែលធ្វើឲ្យមានសាមគ្គីភាពល្អឥតខ្ចោះ។+
១៥ ម្យ៉ាងទៀត ចូរឲ្យសេចក្ដីសុខសាន្តរបស់គ្រិស្តគ្រប់គ្រងចិត្តរបស់អ្នករាល់គ្នា+ ព្រោះអ្នករាល់គ្នាបានត្រូវហៅមកឲ្យមានសេចក្ដីសុខសាន្តបែបនេះ ដើម្បីធ្វើជារូបកាយតែមួយ។ ចូរអ្នករាល់គ្នាបង្ហាញអំណរគុណ។ ១៦ ចូរឲ្យសេចក្ដីបង្រៀនរបស់គ្រិស្តមាននៅក្នុងចិត្តរបស់អ្នករាល់គ្នាយ៉ាងពេញលេញ។ យ៉ាងនោះ អ្នករាល់គ្នានឹងមានប្រាជ្ញាសព្វគ្រប់។ ចូរបន្តបង្រៀននិងលើកទឹកចិត្ត*គ្នាទៅវិញទៅមក ដោយច្រៀងសរសើរព្រះ+ ដោយច្រៀងចម្រៀងគោរពប្រណិប័តន៍ទាំងមានអំណរគុណ* និងដោយច្រៀងចេញពីចិត្តជូនព្រះយេហូវ៉ា។*+ ១៧ ទោះជាអ្នករាល់គ្នាប្រព្រឹត្តឬនិយាយអ្វីក៏ដោយ ចូរធ្វើអ្វីៗទាំងអស់ក្នុងនាមលោកម្ចាស់យេស៊ូ ទាំងអរគុណព្រះជាបិតាតាមរយៈលោក។*+
១៨ ប្រពន្ធទាំងឡាយអើយ ចូរចុះចូលនឹងប្ដី+ ព្រោះនេះជាអ្វីដែលអ្នកកាន់តាមលោកម្ចាស់គួរធ្វើ។ ១៩ ប្ដីទាំងឡាយអើយ ចូរបន្តស្រឡាញ់ប្រពន្ធជានិច្ច+ ហើយកុំក្រេវក្រោធ*នឹងនាងឡើយ។+ ២០ កូនទាំងឡាយអើយ ចូរស្ដាប់បង្គាប់ឪពុកម្ដាយក្នុងគ្រប់ការទាំងអស់+ ព្រោះធ្វើដូច្នេះនាំឲ្យលោកម្ចាស់ពេញចិត្ត។ ២១ ឪពុកទាំងឡាយអើយ កុំធ្វើឲ្យកូនខឹង*+ ព្រោះធ្វើដូច្នេះនាំឲ្យកូនធ្លាក់ទឹកចិត្ត។ ២២ ខ្ញុំបម្រើទាំងឡាយអើយ ចូរស្ដាប់បង្គាប់ពួកអ្នកដែលជាម្ចាស់*របស់អ្នកក្នុងគ្រប់ការទាំងអស់+ មិនគ្រាន់តែចង់ផ្គាប់ចិត្តម្ចាស់ពេលដែលម្ចាស់មើលឃើញប៉ុណ្ណោះទេ តែចូរធ្វើដោយស្មោះពីចិត្ត និងដោយកោតខ្លាចព្រះយេហូវ៉ា។* ២៣ ទោះជាអ្នករាល់គ្នាធ្វើអ្វីក៏ដោយ ចូរធ្វើអស់ពីកម្លាំងកាយកម្លាំងចិត្ត ទុកដូចជាធ្វើដើម្បីព្រះយេហូវ៉ា*+ មិនមែនដើម្បីមនុស្សទេ ២៤ ព្រោះអ្នករាល់គ្នាដឹងថា អ្នករាល់គ្នានឹងទទួលរង្វាន់ជាមត៌កពីព្រះយេហូវ៉ា។*+ ចូរខំប្រឹងធ្វើការដូចជាខ្ញុំបម្រើដើម្បីគ្រិស្តជាម្ចាស់។ ២៥ អ្នកណាដែលធ្វើខុស អ្នកនោះនឹងទទួលផលតាមកំហុសរបស់ខ្លួន+ ព្រោះព្រះមិនលម្អៀងឡើយ។+
៤ ម្ចាស់ទាំងឡាយអើយ ចូរប្រព្រឹត្តទៅលើខ្ញុំបម្រើរបស់អ្នកដោយសុចរិតយុត្តិធម៌ ព្រោះអ្នកដឹងថាអ្នកក៏មានម្ចាស់នៅស្ថានសួគ៌ដែរ។+
២ ចូរតស៊ូអធិដ្ឋាន+ ដោយដឹងខ្លួនជានិច្ច ហើយអរគុណព្រះ។+ ៣ នៅដំណាលគ្នានោះ ចូរអធិដ្ឋានឲ្យយើងដែរ+ ដើម្បីឲ្យព្រះបើកឱកាសឲ្យយើងប្រកាសបណ្ដាំរបស់លោក និងប្រាប់អាថ៌កំបាំងដ៏ពិសិដ្ឋអំពីគ្រិស្ត ព្រោះនោះជាមូលហេតុដែលខ្ញុំជាប់ចំណង។+ ៤ យ៉ាងនេះ ខ្ញុំអាចប្រកាសសេចក្ដីនោះយ៉ាងច្បាស់លាស់ ដូចដែលខ្ញុំគួរធ្វើ។
៥ ចូរបន្តប្រព្រឹត្តទៅលើពួកអ្នកក្រៅដោយប្រាជ្ញា និងចូរប្រើគ្រប់ឱកាសឲ្យកើតប្រយោជន៍ច្រើនបំផុត។*+ ៦ ចូរឲ្យសម្ដីរបស់អ្នករាល់គ្នាប្រកបដោយភាពសប្បុរសជានិច្ច ដែលប្រៀបដូចជាបានត្រូវបង់អំបិល។+ ធ្វើដូច្នេះ អ្នកនឹងដឹងថាគួរតបឆ្លើយយ៉ាងណាចំពោះមនុស្សម្នាក់ៗ។+
៧ ទីឃីកុស+ដែលជាបងប្អូនជាទីស្រឡាញ់របស់ខ្ញុំ ជាអ្នកបម្រើស្មោះត្រង់ និងជាខ្ញុំបម្រើរបស់លោកម្ចាស់ដូចខ្ញុំដែរ គាត់នឹងប្រាប់អ្នករាល់គ្នាអំពីរឿងទាំងអស់របស់ខ្ញុំ។ ៨ ខ្ញុំនឹងចាត់គាត់ឲ្យទៅឯអ្នករាល់គ្នា ដើម្បីអ្នករាល់គ្នាអាចដឹងសុខទុក្ខអំពីយើង និងដើម្បីឲ្យគាត់អាចសម្រាលទុក្ខអ្នករាល់គ្នា។ ៩ ទីឃីកុសនឹងទៅជាមួយនឹងអូណេស៊ីម+ ដែលជាបងប្អូនស្មោះត្រង់និងជាទីស្រឡាញ់របស់ខ្ញុំ។ គាត់ធ្លាប់នៅក្នុងចំណោមអ្នករាល់គ្នា។ ពួកគាត់ទាំងពីរនឹងប្រាប់អ្នករាល់គ្នាអំពីការទាំងអស់ដែលបានកើតឡើងនៅទីនេះ។
១០ អារីស្ដាក+ដែលជាប់គុកជាមួយនឹងខ្ញុំ គាត់ផ្ដាំសួរសុខទុក្ខអ្នករាល់គ្នា ហើយម៉ាកុស+ជាប្អូនជីដូនមួយរបស់បាណាបាស ក៏ផ្ដាំសួរសុខទុក្ខដែរ (អ្នករាល់គ្នាបានត្រូវបង្គាប់ឲ្យទទួលស្វាគមន៍គាត់+ ប្រសិនបើគាត់ទៅឯអ្នករាល់គ្នា) ១១ ហើយយេស៊ូដែលហៅថាយូស្ទុស ក៏ផ្ដាំសួរសុខទុក្ខអ្នករាល់គ្នាដែរ។ គាត់មកពីចំណោមពួកអ្នកដែលបានទទួលការកាត់ចុងស្បែក។* មានតែពួកគាត់ប៉ុណ្ណោះដែលរួមការងារជាមួយនឹងខ្ញុំដើម្បីរាជាណាចក្រព្រះ ហើយពួកគាត់បានទៅជាប្រភពនៃការសម្រាលទុក្ខដ៏ធំ*ដល់ខ្ញុំ។ ១២ អេប៉ាប្រាស+ដែលមកពីចំណោមអ្នករាល់គ្នា និងជាខ្ញុំបម្រើរបស់គ្រិស្តយេស៊ូ គាត់ផ្ដាំសួរសុខទុក្ខអ្នករាល់គ្នា។ គាត់តែងតែខំព្យាយាមអធិដ្ឋានឲ្យអ្នករាល់គ្នា ដើម្បីឲ្យអ្នករាល់គ្នាបន្តមានភាពចាស់ទុំ និងបន្តមានជំនឿរឹងមាំទៅលើអ្វីគ្រប់យ៉ាងដែលព្រះនឹងធ្វើ។ ១៣ ព្រោះខ្ញុំបានឃើញផ្ទាល់ភ្នែកថា គាត់ខំប្រឹងខ្លាំងណាស់ដើម្បីអ្នករាល់គ្នា ដើម្បីពួកអ្នកនៅក្រុងឡៅឌីសេ និងដើម្បីពួកអ្នកនៅក្រុងហេរ៉ាពើលិស។
១៤ លូកា+ដែលជាគ្រូពេទ្យជាទីស្រឡាញ់ និងដេម៉ាស ផ្ដាំសួរសុខទុក្ខអ្នករាល់គ្នា។+ ១៥ ខ្ញុំសូមផ្ដាំសួរសុខទុក្ខបងប្អូននៅក្រុងឡៅឌីសេ ហើយផ្ដាំសួរសុខទុក្ខនីមផា និងបងប្អូនក្រុមជំនុំដែលប្រជុំគ្នានៅផ្ទះរបស់នាង។+ ១៦ ក្រោយពីអ្នករាល់គ្នាអានសំបុត្រនេះហើយ ចូររៀបចំឲ្យក្រុមជំនុំនៅក្រុងឡៅឌីសេអានសំបុត្រនេះផង+ ហើយអ្នករាល់គ្នាក៏ត្រូវអានសំបុត្រពីក្រុងឡៅឌីសេដែរ។ ១៧ ម្យ៉ាងទៀត ចូរប្រាប់អាឃីប៉ុសថា៖+«ចូរយកចិត្តទុកដាក់បំពេញកិច្ចបម្រើឲ្យបានត្រឹមត្រូវ ជាកិច្ចបម្រើដែលអ្នកបានទទួលក្នុងនាមជាអ្នកកាន់តាមលោកម្ចាស់»។
១៨ ខ្ញុំប៉ូល ខ្ញុំបានសរសេរពាក្យសួរសុខទុក្ខនេះដោយផ្ទាល់ដៃ។+ សូមបងប្អូនចាំជានិច្ចអំពីការដែលខ្ញុំជាប់ចំណង។+ សូមឲ្យគុណដ៏វិសេសលើសលប់របស់ព្រះនៅជាមួយនឹងអ្នករាល់គ្នា។
ភាសាក្រិច«អាប៉ូស្តូឡូស»មានន័យថា«អ្នកដែលត្រូវគេចាត់ឲ្យទៅ»
មើលនិយមន័យពាក្យ«គ្រិស្ត»
មើលសេចក្ដីពន្យល់បន្ថែម ផ្នែកក៥
សំដៅលើអ្វីក៏ដោយដែលមិនសមស្របតាមបុគ្គលិកលក្ខណៈ ខ្នាតតម្រា ការប្រព្រឹត្ត ឬបំណងប្រាថ្នារបស់ព្រះ ហើយអ្វីក៏ដោយដែលធ្វើឲ្យល្អក់កករដល់ទំនាក់ទំនងជាមួយនឹងព្រះ
មើលនិយមន័យពាក្យ«បង្គោលទារុណកម្ម»
ឬ«បម្រើក្រុមជំនុំនេះ»
មើលនិយមន័យពាក្យ«របៀបរបបពិភពលោក»
ឬ«មកចាប់អ្នករាល់គ្នាធ្វើជាចំណី»
ន័យត្រង់«បឋមសេចក្ដី»
ឬ«លោកបានយកឯកសារនោះទៅបោះដែកគោលភ្ជាប់នឹងបង្គោលទារុណកម្ម»។ មើលនិយមន័យពាក្យ«បង្គោលទារុណកម្ម»
ឬប្រហែលជាមានន័យថា«តាមរយៈលោក»
មើលនិយមន័យពាក្យ«ថ្ងៃឈប់សម្រាក»
ឬ«ចូលចិត្តរបៀបគោរពប្រណិប័តន៍ដូចពួកទេវតា»
នេះដកស្រង់ពីក្បួនអាថ៌កំបាំងនៃសាសនាមិនពិត
ឬ«ប្រមុខ»
ន័យត្រង់«បឋមសេចក្ដី»
ន័យត្រង់«គ្រិស្តដែលជាជីវិតរបស់យើង»
ន័យត្រង់«អវយវៈរូបកាយរបស់អ្នករាល់គ្នានៅផែនដី»
ភាសាក្រិច«ផូនៀ»។ មើលនិយមន័យពាក្យ«អំពើប្រាសចាកសីលធម៌ខាងផ្លូវភេទ»
មើលនិយមន័យពាក្យ«ការកាត់ចុងស្បែក»
«ជនជាតិស៊ិទា»សំដៅលើមនុស្សព្រៃ
មើលសេចក្ដីពន្យល់បន្ថែម ផ្នែកក៥
ឬ«ដាស់តឿន»
ឬ«ទាំងមានការគោរព»
មើលសេចក្ដីពន្យល់បន្ថែម ផ្នែកក៥
នេះសំដៅលើលោកយេស៊ូ
ឬ«កុំប្រព្រឹត្តយ៉ាងឃោរឃៅ»
ឬ«មួម៉ៅ»
ឬ«ម្ចាស់ដែលនៅផែនដី»
មើលសេចក្ដីពន្យល់បន្ថែម ផ្នែកក៥
មើលសេចក្ដីពន្យល់បន្ថែម ផ្នែកក៥
មើលសេចក្ដីពន្យល់បន្ថែម ផ្នែកក៥
ន័យត្រង់«ទិញពេលវេលាដែលបានកំណត់»
មើលនិយមន័យពាក្យ«ការកាត់ចុងស្បែក»
ឬ«ប្រភពនៃការពង្រឹងកម្លាំង»