សំបុត្រទី១ជូនចំពោះគ្រិស្តសាសនិកនៅក្រុងកូរិនថូស
១ ពីខ្ញុំ ប៉ូល ដែលបានត្រូវហៅឲ្យធ្វើជាសាវ័ក*+របស់គ្រិស្តយេស៊ូតាមបំណងប្រាថ្នារបស់ព្រះ និងពីសូស្តែនជាបងប្រុសរបស់យើង ២ ជូនចំពោះក្រុមជំនុំរបស់ព្រះនៅក្រុងកូរិនថូស+ គឺអ្នករាល់គ្នាដែលបានត្រូវញែកចេញជាបរិសុទ្ធក្នុងនាមជាអ្នកកាន់តាមគ្រិស្តយេស៊ូ+ ក៏បានត្រូវហៅដើម្បីឲ្យធ្វើជាអ្នកបរិសុទ្ធ ហើយជូនចំពោះមនុស្សនៅគ្រប់ទីកន្លែងដែលកំពុងហៅរកនាមលោកម្ចាស់យេស៊ូគ្រិស្ត+ ដែលជាម្ចាស់របស់ពួកគេនិងរបស់យើងដែរ៖
៣ សូមឲ្យអ្នករាល់គ្នាបានប្រកបដោយគុណដ៏វិសេសលើសលប់និងសេចក្ដីសុខសាន្តពីព្រះដែលជាបិតារបស់យើង និងពីលោកម្ចាស់យេស៊ូគ្រិស្ត។
៤ ខ្ញុំតែងតែអរគុណព្រះអំពីអ្នករាល់គ្នា ដោយគិតពីគុណដ៏វិសេសលើសលប់របស់ព្រះដែលបានត្រូវផ្ដល់ឲ្យអ្នករាល់គ្នាតាមរយៈគ្រិស្តយេស៊ូ។ ៥ ដោយសារអ្នករាល់គ្នារួបរួមជាមួយនឹងគ្រិស្ត អ្នករាល់គ្នាបានទទួលអ្វីៗជាបរិបូរ ដែលរួមបញ្ចូលសមត្ថភាពពេញលេញក្នុងការប្រកាសបណ្ដាំរបស់ព្រះ និងមានចំណេះសព្វគ្រប់+ ៦ ពីព្រោះសក្ខីភាពអំពីគ្រិស្ត+បានត្រូវចាក់ឫសយ៉ាងរឹងមាំក្នុងចំណោមអ្នករាល់គ្នា ៧ ដើម្បីកុំឲ្យអ្នករាល់គ្នាខ្វះអំណោយណាមួយឡើយ កាលដែលអ្នករាល់គ្នាទន្ទឹងរង់ចាំលោកយេស៊ូគ្រិស្តជាម្ចាស់របស់យើងបង្ហាញឫទ្ធានុភាពរបស់លោក។+ ៨ ព្រះក៏នឹងធ្វើឲ្យអ្នករាល់គ្នារឹងមាំរហូតដល់ទីបញ្ចប់ ដើម្បីកុំឲ្យអ្នករាល់គ្នាមានកន្លែងចាប់កំហុសបាននៅថ្ងៃរបស់លោកយេស៊ូគ្រិស្តជាម្ចាស់របស់យើង។+ ៩ ព្រះគឺស្មោះត្រង់+ លោកហើយដែលបានហៅអ្នករាល់គ្នាឲ្យមករួមចំណែកជាមួយនឹងបុត្ររបស់លោក គឺលោកយេស៊ូគ្រិស្តជាម្ចាស់របស់យើង។
១០ បងប្អូនអើយ តាមរយៈនាមរបស់លោកយេស៊ូគ្រិស្តជាម្ចាស់របស់យើង ខ្ញុំសូមបំផុសទឹកចិត្តអ្នកទាំងអស់គ្នាឲ្យនិយាយដូចគ្នា ហើយមិនត្រូវមានការបែកបាក់ក្នុងចំណោមអ្នករាល់គ្នាឡើយ+ តែត្រូវមានគំនិតឯកភាព និងមានរបៀបគិតគូរតែមួយ។+ ១១ បងប្អូនខ្ញុំអើយ មនុស្សខ្លះពីក្រុមគ្រួសារខ្លូអេបានមកប្រាប់ខ្ញុំអំពីអ្នករាល់គ្នាថា មានការទាស់ទែងក្នុងចំណោមអ្នករាល់គ្នា។ ១២ ខ្ញុំចង់និយាយអំពីការដែលអ្នករាល់គ្នាម្នាក់ៗពោលថា៖ «ខ្ញុំកាន់តាមប៉ូល» «តែខ្ញុំកាន់តាមអាប៉ូឡុស»+ «ឯខ្ញុំកាន់តាមកេផាស»* «តែខ្ញុំកាន់តាមគ្រិស្ត»។ ១៣ តើគ្រិស្តបែកសាមគ្គីហើយឬ? តើប៉ូលឬដែលបានត្រូវគេប្រហារជីវិតលើបង្គោលដើម្បីអ្នករាល់គ្នា? ឬក៏តើអ្នករាល់គ្នាបានទទួលការជ្រមុជទឹកក្នុងនាមប៉ូល? ១៤ ខ្ញុំអរគុណព្រះដែលខ្ញុំមិនបានជ្រមុជទឹកឲ្យអ្នកណាម្នាក់ក្នុងចំណោមអ្នករាល់គ្នា ក្រៅពីគ្រីស្ពូស+និងកៃយុស+ ១៥ ដើម្បីកុំឲ្យអ្នកណានិយាយថាអ្នករាល់គ្នាបានទទួលការជ្រមុជទឹកក្នុងនាមខ្ញុំ។ ១៦ មែនហើយ ខ្ញុំក៏បានជ្រមុជទឹកឲ្យពួកអ្នកផ្ទះស្ទេផាណាសដែរ។+ ក្រៅពីនោះ ខ្ញុំមិនដឹងថាខ្ញុំបានជ្រមុជទឹកឲ្យអ្នកណាទៀតទេ។ ១៧ ព្រោះគ្រិស្តមិនបានចាត់ខ្ញុំឲ្យទៅជ្រមុជទឹកឲ្យគេឡើយ តែបានចាត់ខ្ញុំឲ្យទៅប្រកាសដំណឹងល្អវិញ+ មិនមែនដោយប្រើសម្ដីតាមបែបអ្នកប្រាជ្ញទេ ព្រោះបើធ្វើដូច្នេះនាំឲ្យបង្គោលទារុណកម្ម*របស់គ្រិស្តទៅជាឥតប្រយោជន៍។
១៨ ព្រោះអស់អ្នកដែលកំពុងវិនាសចាត់ទុកការនិយាយអំពីបង្គោលទារុណកម្ម*ថាជារឿងផ្ដេសផ្ដាស+ តែយើងដែលកំពុងទទួលសេចក្ដីសង្គ្រោះចាត់ទុកការនោះថាជាឫទ្ធានុភាពរបស់ព្រះ។+ ១៩ ព្រោះបទគម្ពីរចែងថា៖ «ខ្ញុំនឹងធ្វើឲ្យប្រាជ្ញារបស់ពួកអ្នកប្រាជ្ញសាបសូន្យទៅ ហើយខ្ញុំនឹងច្រានចោលចំណេះរបស់ពួកអ្នកចេះដឹង»។+ ២០ តើអ្នកប្រាជ្ញ អ្នកជំនាញខាងច្បាប់ និងអ្នកជជែកវែកញែកនៃរបៀបរបបពិភពលោក*នេះនៅឯណា? ព្រះបានបង្ហាញឲ្យឃើញថាប្រាជ្ញារបស់ពិភពលោកនេះ ជាអ្វីដែលផ្ដេសផ្ដាស។ ២១ ព្រោះប្រាជ្ញារបស់មនុស្សក្នុងពិភពលោកនេះ+មិនបានធ្វើឲ្យពួកគេស្គាល់ព្រះទេ+ ហើយពួកគេចាត់ទុកដំណឹងដែលយើងផ្សព្វផ្សាយថាជារឿងផ្ដេសផ្ដាស។+ ប៉ុន្តែ ព្រះពេញចិត្តការនោះ ដើម្បីសង្គ្រោះពួកអ្នកដែលកំពុងជឿ។ នេះបង្ហាញឲ្យឃើញប្រាជ្ញារបស់ព្រះ។
២២ ព្រោះជនជាតិយូដាសុំសញ្ញាសម្គាល់+ ឯជនជាតិក្រិចស្វែងរកប្រាជ្ញា។ ២៣ ប៉ុន្តែ យើងផ្សព្វផ្សាយអំពីគ្រិស្តដែលត្រូវគេប្រហារជីវិតលើបង្គោល ជាអ្វីដែលធ្វើឲ្យជនជាតិយូដាជំពប់ដួល តែជនជាតិដទៃចាត់ទុកថាជាការនិយាយផ្ដេសផ្ដាស។+ ២៤ ក៏ប៉ុន្តែ ចំពោះជនជាតិយូដានិងជនជាតិក្រិចដែលបានត្រូវហៅ ពួកគេចាត់ទុកគ្រិស្តជាឫទ្ធានុភាពរបស់ព្រះ និងជាប្រាជ្ញារបស់ព្រះ។+ ២៥ ពីព្រោះការរបស់ព្រះដែលគេចាត់ទុកថាផ្ដេសផ្ដាស គឺមានប្រាជ្ញាជាងមនុស្ស ហើយការរបស់ព្រះដែលគេចាត់ទុកថាខ្សោយ គឺខ្លាំងជាងមនុស្ស។+
២៦ ព្រោះបងប្អូនអើយ អ្នករាល់គ្នាឃើញហើយថាក្នុងករណីរបស់អ្នករាល់គ្នា ព្រះមិនបានហៅមនុស្សជាច្រើនដែលជាអ្នកប្រាជ្ញតាមទស្សនៈមនុស្ស+ ឬជាអ្នកមានអំណាច ឬក៏ជាអ្នកដែលបានកើតក្នុងវង្សត្រកូលខ្ពង់ខ្ពស់នោះឡើយ+ ២៧ តែព្រះបានជ្រើសរើសមនុស្សដែលពិភពលោកចាត់ទុកថាល្ងង់ខ្លៅ ដើម្បីលោកអាចធ្វើឲ្យអ្នកប្រាជ្ញអាម៉ាស់មុខ ហើយព្រះក៏បានជ្រើសរើសមនុស្សដែលពិភពលោកចាត់ទុកថាទន់ខ្សោយ ដើម្បីលោកអាចធ្វើឲ្យអ្នកខ្លាំងពូកែអាម៉ាស់មុខ។+ ២៨ ព្រះបានជ្រើសរើសអ្វីដែលពិភពលោកចាត់ទុកថាអាប់ឱន អ្វីដែលគេមើលងាយ និងអ្វីដែលគេចាត់ទុកថាគ្មានតម្លៃសោះ ដើម្បីលោកអាចធ្វើឲ្យអ្វីដែលគេចាត់ទុកថាសំខាន់ទៅជាអសារឥតការវិញ។+ ២៩ យ៉ាងនោះ គ្មានមនុស្សណាម្នាក់មានហេតុអួតខ្លួននៅចំពោះមុខព្រះឡើយ។ ៣០ ប៉ុន្តែ គឺដោយសារព្រះហើយដែលអ្នករាល់គ្នាបានទៅជាអ្នកកាន់តាមគ្រិស្តយេស៊ូ។ លោកបានបង្ហាញប្រាជ្ញារបស់ព្រះ និងបង្ហាញសេចក្ដីសុចរិតរបស់ព្រះ។+ តាមរយៈលោកយេស៊ូ មនុស្សអាចទៅជាបរិសុទ្ធ+ ហើយតាមរយៈថ្លៃលោះ ពួកគេអាចមានសេរីភាព+ ៣១ ដើម្បីឲ្យបានដូចបទគម្ពីរដែលចែងថា៖ «អ្នកណាដែលអួត ចូរឲ្យអ្នកនោះអួតអំពីព្រះយេហូវ៉ា»។*+
២ ដូច្នេះ បងប្អូនអើយ ពេលដែលខ្ញុំមកឯអ្នករាល់គ្នាដើម្បីប្រកាសប្រាប់អំពីអាថ៌កំបាំងដ៏ពិសិដ្ឋរបស់ព្រះ+ ខ្ញុំមិនបានប្រើពាក្យខ្ពង់ខ្ពស់+ ឬសម្ញែងប្រាជ្ញានោះឡើយ។ ២ ព្រោះខ្ញុំបានសម្រេចចិត្តបញ្ជាក់ប្រាប់អ្នករាល់គ្នាអំពីលោកយេស៊ូគ្រិស្តតែប៉ុណ្ណោះ ជាពិសេសបញ្ជាក់ថាលោកបានត្រូវប្រហារជីវិតលើបង្គោល។+ ៣ ខ្ញុំបានមកឯអ្នករាល់គ្នាទាំងទន់ខ្សោយ ទាំងភ័យខ្លាច និងទាំងញាប់ញ័រជាខ្លាំង។ ៤ ពាក្យសម្ដីរបស់ខ្ញុំ និងអ្វីដែលខ្ញុំផ្សព្វផ្សាយ មិនមែនជាពាក្យបញ្ចុះបញ្ចូលដែលជាប្រាជ្ញារបស់មនុស្សទេ តែជាពាក្យដែលបង្ហាញនូវឫទ្ធានុភាព និងអំណាចរបស់ព្រះវិញ+ ៥ ដើម្បីឲ្យអ្នករាល់គ្នាមានជំនឿលើឫទ្ធានុភាពរបស់ព្រះ មិនមែនលើប្រាជ្ញារបស់មនុស្សឡើយ។
៦ យើងនិយាយអំពីប្រាជ្ញាក្នុងចំណោមអ្នកដែលមានចិត្តគំនិតចាស់ទុំក្នុងការគោរពប្រណិប័តន៍ព្រះ+ តែមិនមែនអំពីប្រាជ្ញានៃរបៀបរបបពិភពលោក*នេះទេ ក៏មិនមែនអំពីប្រាជ្ញារបស់ពួកអ្នកគ្រប់គ្រងនៃពិភពលោកនេះដែលនឹងវិនាសសាបសូន្យទៅនោះដែរ។+ ៧ ប៉ុន្តែ យើងនិយាយអំពីប្រាជ្ញារបស់ព្រះដែលបានត្រូវសឲ្យឃើញក្នុងអាថ៌កំបាំងដ៏ពិសិដ្ឋ+ គឺប្រាជ្ញាដែលបានត្រូវលាក់ទុក ដែលព្រះបានកំណត់ទុកជាមុន តាំងពីមិនទាន់មានរបៀបរបបពិភពលោកនៅឡើយ ដើម្បីឲ្យយើងទទួលសិរីរុងរឿង។ ៨ គ្មានអ្នកគ្រប់គ្រងណាម្នាក់នៃពិភពលោកនេះបានស្គាល់ប្រាជ្ញានោះទេ+ ព្រោះប្រសិនបើពួកគេបានស្គាល់មែន នោះពួកគេមិនបានប្រហារជីវិតលោកម្ចាស់*ដែលប្រកបទៅដោយសិរីរុងរឿងនោះឡើយ។ ៩ ប៉ុន្តែ ដូចបទគម្ពីរចែងថា៖ «ភ្នែកមិនធ្លាប់ឃើញ ត្រចៀកមិនធ្លាប់ឮ ហើយចិត្តរបស់មនុស្សមិនដែលនឹកស្មានដល់អ្វីដែលព្រះបានរៀបចំទុកសម្រាប់អ្នកដែលស្រឡាញ់លោកឡើយ»។+ ១០ ពីព្រោះព្រះបានបើកបង្ហាញការទាំងនោះដល់យើង+តាមរយៈឫទ្ធានុភាពរបស់លោក+ ព្រោះឫទ្ធានុភាពរបស់លោកស្ទង់មើលអ្វីៗទាំងអស់ សូម្បីតែសេចក្ដីជ្រាលជ្រៅរបស់ព្រះ។+
១១ ព្រោះគ្មានមនុស្សណាម្នាក់ដឹងគំនិតរបស់មនុស្សម្នាក់ទៀតឡើយ មានតែចិត្តរបស់មនុស្សម្នាក់នោះប៉ុណ្ណោះដែលដឹង មែនទេ? ដូចគ្នាដែរ គ្មានអ្នកណាដឹងអំពីគំនិតរបស់ព្រះទេ មានតែឫទ្ធានុភាពរបស់លោកប៉ុណ្ណោះដែលដឹង។ ១២ ឯយើងមិនបានទទួលចិត្តគំនិតរបស់ពិភពលោកនេះទេ តែបានទទួលឫទ្ធានុភាពពីព្រះ+ ដើម្បីឲ្យយើងដឹងអ្វីៗដែលព្រះបានមេត្តាផ្ដល់ឲ្យយើង។ ១៣ យើងក៏និយាយការទាំងនេះដែរ មិនមែនដោយប្រើពាក្យដែលយើងបានរៀនពីប្រាជ្ញារបស់មនុស្សទេ+ តែដោយប្រើពាក្យដែលយើងបានរៀនពីឫទ្ធានុភាពរបស់ព្រះវិញ+ គឺពាក្យដែលយើងទទួលតាមរយៈឫទ្ធានុភាពរបស់ព្រះ ដើម្បីពន្យល់អំពីរឿងដែលទាក់ទងនឹងព្រះ។
១៤ ប៉ុន្តែ មនុស្សដែលឲ្យសេចក្ដីប៉ងប្រាថ្នារបស់ខ្លួនដឹកនាំគំនិត មិនព្រមទទួលអ្វីៗពីឫទ្ធានុភាពរបស់ព្រះទេ ព្រោះគេចាត់ទុកអ្វីៗទាំងនោះថាជារឿងផ្ដេសផ្ដាស ហើយគេមិនអាចស្គាល់អ្វីៗទាំងនោះបានឡើយ លុះត្រាតែគេមានឫទ្ធានុភាពរបស់ព្រះទើបអាចយល់អ្វីៗទាំងនោះបាន។ ១៥ ក៏ប៉ុន្តែ មនុស្សដែលឲ្យឫទ្ធានុភាពរបស់ព្រះដឹកនាំគំនិត អាចយល់ត្រឹមត្រូវអំពីអ្វីៗទាំងអស់+ តែគ្មានមនុស្សណាម្នាក់អាចយល់ត្រឹមត្រូវអំពីអ្នកនោះបានឡើយ។ ១៦ ព្រោះ«តើអ្នកណាស្គាល់គំនិតរបស់ព្រះយេហូវ៉ា* ដើម្បីអាចណែនាំលោកបាន?»។+ ប៉ុន្តែ យើងមានចិត្តគំនិតរបស់គ្រិស្តវិញ។+
៣ ដូច្នេះ បងប្អូនអើយ ខ្ញុំមិនអាចនិយាយទៅកាន់បងប្អូន ដូចនិយាយទៅកាន់មនុស្សដែលឲ្យឫទ្ធានុភាពរបស់ព្រះដឹកនាំគំនិតទេ+ តែខ្ញុំត្រូវនិយាយទៅកាន់បងប្អូនដូចនិយាយទៅកាន់មនុស្សដែលមានគំនិតដូចពិភពលោកនេះ គឺអ្នកដែលជាកូនខ្ចី+ក្នុងគ្រិស្ត។ ២ ខ្ញុំបានឲ្យទឹកដោះដល់អ្នករាល់គ្នា មិនបានឲ្យអាហាររឹងទេ ព្រោះអ្នករាល់គ្នាទទួលមិនទាន់បាន។ តាមការពិត ឥឡូវនេះ អ្នករាល់គ្នានៅតែទទួលមិនបាន+ ៣ ព្រោះអ្នករាល់គ្នានៅតែមានគំនិតដូចពិភពលោកនេះ។+ ក្នុងចំណោមអ្នករាល់គ្នាមានសេចក្ដីច្រណែននិងការឈ្លោះប្រកែកគ្នា ដូច្នេះអ្នករាល់គ្នាមានគំនិតដូចពិភពលោកនេះ+ ហើយកំពុងប្រព្រឹត្តដូចមនុស្សខាងពិភពលោកនេះដែរ មែនទេ? ៤ ព្រោះពេលអ្នកណានិយាយថា៖ «ខ្ញុំកាន់តាមប៉ូល» តែម្នាក់ទៀតនិយាយថា៖ «ខ្ញុំកាន់តាមអាប៉ូឡុស»+ នោះអ្នករាល់គ្នាគឺដូចមនុស្សខាងពិភពលោក មែនទេ?
៥ ដូច្នេះ តើអាប៉ូឡុសជាអ្វី? ហើយតើប៉ូលជាអ្វី? យើងត្រឹមតែជាអ្នកបម្រើ+ដែលជួយអ្នករាល់គ្នាឲ្យទៅជាអ្នកជឿ តាមដែលលោកម្ចាស់បានឲ្យយើងធ្វើ។ ៦ ខ្ញុំជាអ្នកដាំ+ អាប៉ូឡុសជាអ្នកស្រោច+ តែព្រះបានធ្វើឲ្យដុះលូតលាស់ ៧ ដូច្នេះ អ្នកដាំនិងអ្នកស្រោចមិនមែនជាអ្នកដែលសំខាន់ទេ តែគឺព្រះដែលសំខាន់ ព្រោះលោកជាអ្នកដែលធ្វើឲ្យដុះលូតលាស់ឡើង។+ ៨ ឯអ្នកដាំនិងអ្នកស្រោចរួមគ្នាតែមួយ* តែពួកគេម្នាក់ៗនឹងទទួលរង្វាន់តាមការខំប្រឹងរបស់ពួកគេរៀងៗខ្លួន។+ ៩ ពីព្រោះយើងជាអ្នករួមការងារជាមួយនឹងព្រះ។ អ្នករាល់គ្នាជាវាលដែលព្រះកំពុងដាំដុះ និងជាសំណង់របស់ព្រះ។+
១០ ខ្ញុំបានចាក់គ្រឹះ+ដូចជាមេជាងដ៏ជំនាញ* ស្របទៅតាមគុណដ៏វិសេសលើសលប់ដែលព្រះបានផ្ដល់ឲ្យខ្ញុំ តែអ្នកផ្សេងទៀតកំពុងសង់លើគ្រឹះនោះ។ ប៉ុន្តែ ពួកគេម្នាក់ៗត្រូវប្រយ័ត្នអំពីរបៀបដែលពួកគេសង់លើគ្រឹះនោះ។ ១១ ព្រោះគ្មានមនុស្សណាម្នាក់អាចចាក់គ្រឹះមួយផ្សេងទៀត ក្រៅពីគ្រឹះដែលបានត្រូវចាក់រួចហើយនោះទេ ពោលគឺលោកយេស៊ូគ្រិស្ត។+ ១២ ប្រសិនបើអ្នកណាប្រើមាស ប្រាក់ ថ្មប្រណីតៗ ឈើ ចំបើង ឬជញ្ជ្រាំង ដើម្បីសង់លើគ្រឹះនោះ ១៣ ស្នាដៃរបស់ពួកគេម្នាក់ៗនឹងត្រូវសឲ្យឃើញច្បាស់ ព្រោះថ្ងៃនោះនឹងបង្ហាញឲ្យឃើញដោយភ្លើង+ ហើយភ្លើងនោះនឹងបញ្ជាក់គុណភាពនៃស្នាដៃរបស់ពួកគេម្នាក់ៗ។ ១៤ ប្រសិនបើអ្នកណាសង់អ្វីលើគ្រឹះនោះ ហើយស្នាដៃរបស់គាត់ធន់នៅ គាត់នឹងទទួលរង្វាន់។ ១៥ ប្រសិនបើស្នាដៃរបស់អ្នកណាឆេះអស់ទៅ អ្នកនោះនឹងខាត តែខ្លួនអ្នកនោះនឹងទទួលសេចក្ដីសង្គ្រោះ។ ប៉ុន្តែ អ្នកនោះនឹងដូចជាឆ្លងកាត់ភ្លើង។
១៦ តើអ្នករាល់គ្នាមិនដឹងទេឬថា អ្នករាល់គ្នាជាវិហាររបស់ព្រះ+ ហើយថាឫទ្ធានុភាពរបស់ព្រះស្ថិតនៅក្នុងអ្នករាល់គ្នា?+ ១៧ ប្រសិនបើអ្នកណាបំផ្លាញវិហាររបស់ព្រះ ព្រះនឹងបំផ្លាញអ្នកនោះ ព្រោះវិហាររបស់ព្រះគឺបរិសុទ្ធ ហើយអ្នករាល់គ្នាជាវិហាររបស់ព្រះ។+
១៨ កុំបញ្ឆោតខ្លួនឡើយ៖ ប្រសិនបើអ្នកណាក្នុងចំណោមអ្នករាល់គ្នាគិតថា ខ្លួនមានប្រាជ្ញានៅក្នុងរបៀបរបបពិភពលោក*នេះ ចូរឲ្យអ្នកនោះទៅជាអ្នកល្ងង់ខ្លៅ ដើម្បីឲ្យគាត់ទៅជាអ្នកមានប្រាជ្ញាវិញ។ ១៩ ពីព្រោះប្រាជ្ញារបស់ពិភពលោកនេះជាអ្វីដែលផ្ដេសផ្ដាសចំពោះព្រះ ព្រោះបទគម្ពីរចែងថា៖ «លោកបណ្ដាលឲ្យពួកអ្នកប្រាជ្ញជាប់អន្ទាក់របស់ខ្លួន»។+ ២០ បទគម្ពីរមួយទៀតចែងថា៖ «ព្រះយេហូវ៉ា*ជ្រាបច្បាស់ថា ការវែកញែករបស់ពួកអ្នកប្រាជ្ញគឺសុទ្ធតែឥតប្រយោជន៍»។+ ២១ ដូច្នេះ កុំឲ្យអ្នកណាអួតអំពីមនុស្សណាម្នាក់ឡើយ ព្រោះអ្វីៗទាំងអស់ជារបស់អ្នករាល់គ្នា ២២ ទោះជាប៉ូល អាប៉ូឡុស កេផាស*+ ពិភពលោកនេះ ជីវិត សេចក្ដីស្លាប់ អ្វីៗនៅគ្រាឥឡូវនេះ ឬអ្វីៗនៅគ្រាខាងមុខក៏ដោយ អ្វីៗទាំងអស់ជារបស់អ្នករាល់គ្នា។ ២៣ រីឯអ្នករាល់គ្នាជារបស់គ្រិស្ត+ ឯគ្រិស្តជារបស់ព្រះ។
៤ យើងចង់ឲ្យមនុស្សចាត់ទុកយើងជាអ្នកបម្រើរបស់*គ្រិស្ត និងជាអ្នកចាត់ចែងដែលបានទទួលការតែងតាំងឲ្យមើលការខុសត្រូវលើអាថ៌កំបាំងដ៏ពិសិដ្ឋរបស់ព្រះ។+ ២ ក្នុងករណីនេះ អ្នកចាត់ចែងដែលបានទទួលការតែងតាំងឲ្យមើលការខុសត្រូវនោះ ត្រូវតែជាមនុស្សស្មោះត្រង់។ ៣ ចំពោះខ្ញុំ ទោះជាអ្នករាល់គ្នាឬតុលាការរបស់មនុស្ស ចង់វិនិច្ឆ័យខ្ញុំយ៉ាងណា នោះជារឿងតូចតាចទេ។ សូម្បីតែខ្ញុំក៏មិនវិនិច្ឆ័យខ្លួនឯងដែរ។ ៤ ព្រោះខ្ញុំដឹងថាខ្ញុំមិនបានធ្វើអ្វីខុសឡើយ។ ប៉ុន្តែ នេះមិនបញ្ជាក់ថាខ្ញុំជាមនុស្សសុចរិតទេ តែអ្នកដែលវិនិច្ឆ័យខ្ញុំគឺព្រះយេហូវ៉ា។*+ ៥ ដូច្នេះ កុំវិនិច្ឆ័យ+អ្វីសោះមុនពេលកំណត់ ដរាបដល់លោកម្ចាស់មកដល់។ លោកនឹងបំភ្លឺឲ្យឃើញអ្វីដែលនៅកំបាំងក្នុងទីងងឹត ក៏នឹងសឲ្យឃើញបំណងចិត្ត រួចមនុស្សម្នាក់ៗនឹងទទួលការសរសើរពីព្រះ។+
៦ បងប្អូនអើយ ខ្ញុំបាននិយាយសេចក្ដីទាំងនេះដោយយកខ្លួនខ្ញុំនិងអាប៉ូឡុស+ជាឧទាហរណ៍ ព្រោះប្រយោជន៍អ្នករាល់គ្នា ដើម្បីឲ្យអ្នករាល់គ្នារៀនគោលការណ៍ដែលថា៖ «កុំធ្វើលើសពីអ្វីដែលបានត្រូវសរសេរទុក»។ យ៉ាងនោះ កុំឲ្យអ្នកណាម្នាក់មានអំណួត+ ដោយចាត់ទុកអ្នកនេះថាប្រសើរជាងអ្នកនោះ។ ៧ ពីព្រោះតើអ្នកណាបានធ្វើឲ្យអ្នកខុសពីអ្នកឯទៀត? អ្វីៗដែលអ្នកមាន សុទ្ធតែជាអ្វីដែលអ្នកបានទទួល មែនទេ?+ បើអ្វីៗដែលអ្នកមាន ជាអ្វីដែលអ្នកបានទទួលមែន ហេតុអ្វីបានជាអ្នកអួតខ្លួនដូចជាមិនបានទទួលវិញ?
៨ តើអ្នករាល់គ្នាមានអ្វីសព្វគ្រប់*ហើយឬ? តើអ្នករាល់គ្នាជាអ្នកមានហើយឬ? តើអ្នករាល់គ្នាបានចាប់ផ្ដើមគ្រប់គ្រងជាស្ដេច+ ដោយគ្មានយើងឬ? ប៉ុន្តែ បើអ្នករាល់គ្នាបានចាប់ផ្ដើមគ្រប់គ្រងជាស្ដេចមែន ខ្ញុំអរណាស់ ព្រោះបើដូច្នោះ យើងក៏អាចចាប់ផ្ដើមគ្រប់គ្រងជាស្ដេចជាមួយនឹងអ្នករាល់គ្នាដែរ។+ ៩ ព្រោះតាមមើលទៅ ព្រះបាននាំយើងជាពួកសាវ័កចេញមកលើឆាកក្រោយគេបង្អស់ ដូចអ្នកដែលបានត្រូវកាត់ទោសប្រហារជីវិត+ ពីព្រោះយើងបានទៅជាអ្នកសម្ដែងសម្រាប់ឲ្យពិភពលោក+ បណ្ដាទេវតា និងមនុស្សលោកទស្សនា។ ១០ យើងត្រូវគេចាត់ទុកជាមនុស្សល្ងង់ខ្លៅ+ដោយសារគ្រិស្ត តែអ្នករាល់គ្នាចាត់ទុកខ្លួនជាអ្នកដែលចេះពិចារណាដោយសារគ្រិស្ត។ យើងជាអ្នកទន់ខ្សោយ តែអ្នករាល់គ្នាជាអ្នកខ្លាំងក្លា។ អ្នករាល់គ្នាមានកិត្តិយស តែយើងត្រូវគេមើលងាយ។ ១១ រហូតដល់ឥឡូវនេះ យើងនៅតែស្រេកឃ្លាន+ ខ្វះសម្លៀកបំពាក់ ត្រូវគេវាយធ្វើបាប+ គ្មានផ្ទះសម្បែង ១២ ហើយធ្វើការយ៉ាងនឿយហត់ដោយដៃរបស់យើងផ្ទាល់។+ កាលដែលគេជេរប្រមាថយើង យើងជូនពរគេវិញ។+ កាលដែលគេបៀតបៀនយើង យើងស៊ូទ្រាំដោយចិត្តអត់ធ្មត់។+ ១៣ កាលដែលគេបង្កាច់បង្ខូចយើង យើងនិយាយដោយស្លូតបូត។+ យើងបានទៅជាសំរាមរបស់ពិភពលោក និងកម្អែលនៃអ្វីៗទាំងអស់ រហូតដល់ឥឡូវនេះ។
១៤ ខ្ញុំសរសេរអ្វីៗទាំងនេះមកកាន់អ្នករាល់គ្នា មិនមែនដើម្បីធ្វើឲ្យអ្នករាល់គ្នាអៀនខ្មាសទេ តែដើម្បីដាស់តឿនអ្នករាល់គ្នាដែលខ្ញុំចាត់ទុកដូចកូនជាទីស្រឡាញ់។ ១៥ ព្រោះទោះជាអ្នករាល់គ្នាអាចមានអ្នកថែរក្សា*១០.០០០នាក់ក្នុងចំណោមអ្នកកាន់តាមគ្រិស្តក៏ដោយ អ្នករាល់គ្នាប្រាកដជាមិនមានឪពុកជាច្រើនទេ ព្រោះដោយសារគ្រិស្តយេស៊ូ ខ្ញុំបានទៅជាឪពុករបស់អ្នករាល់គ្នាតាមរយៈដំណឹងល្អ។+ ១៦ ដូច្នេះ ខ្ញុំសូមលើកទឹកចិត្តអ្នករាល់គ្នាឲ្យយកតម្រាប់ខ្ញុំ។+ ១៧ ហេតុនេះ ខ្ញុំនឹងចាត់ធីម៉ូថេឲ្យមកឯអ្នករាល់គ្នា ព្រោះគាត់ជាកូនដ៏ស្មោះត្រង់និងជាទីស្រឡាញ់របស់ខ្ញុំក្នុងលោកម្ចាស់។ គាត់នឹងរំលឹកអ្នករាល់គ្នាអំពីវិធីផ្សេងៗដែលខ្ញុំប្រើក្នុងកិច្ចបម្រើគ្រិស្តយេស៊ូ+ ដូចខ្ញុំបង្រៀនក្នុងក្រុមជំនុំទាំងឡាយនៅគ្រប់ទីកន្លែង។
១៨ អ្នកខ្លះអួតខ្លួន ហាក់ដូចជាខ្ញុំនឹងមិនមកឯអ្នករាល់គ្នាទេ។ ១៩ ប៉ុន្តែ ប្រសិនបើស្របតាមបំណងប្រាថ្នារបស់ព្រះយេហូវ៉ា* នោះខ្ញុំនឹងមកឯអ្នករាល់គ្នាក្នុងពេលឆាប់ៗ ហើយពេលនោះខ្ញុំនឹងដឹងច្បាស់ថាពួកអ្នកដែលអួតខ្លួន ពិតជាមានឫទ្ធានុភាពរបស់ព្រះណែនាំឬយ៉ាងណា មិនមែនខ្ញុំចង់ដឹងសម្ដីរបស់ពួកគេទេ។ ២០ ព្រោះអ្វីដែលបញ្ជាក់ថាបុគ្គលម្នាក់នៅក្រោមរាជាណាចក្ររបស់ព្រះ មិនមែនអាស្រ័យលើអ្វីដែលគាត់និយាយទេ តែអាស្រ័យលើអ្វីដែលគាត់ប្រព្រឹត្តដែលបង្ហាញនូវឫទ្ធានុភាពរបស់ព្រះ។ ២១ តើអ្នករាល់គ្នាចង់បានមួយណា? តើចង់ឲ្យខ្ញុំមកឯអ្នករាល់គ្នាដោយមានរំពាត់+ ឬដោយមានសេចក្ដីស្រឡាញ់និងចិត្តស្លូតបូត?
៥ តាមការពិត គេរាយការណ៍ប្រាប់ខ្ញុំថា មានអំពើប្រាសចាកសីលធម៌ខាងផ្លូវភេទ*+ក្នុងចំណោមអ្នករាល់គ្នា ហើយជាអំពើដែលសូម្បីតែអ្នកមិនជឿ* ក៏មិនប្រព្រឹត្តដែរ គឺបុរសម្នាក់បានរួមរស់ជាមួយនឹងប្រពន្ធរបស់ឪពុកគាត់។+ ២ តើអ្នករាល់គ្នាសប្បាយចិត្តអំពីរឿងនេះឬ? តើមិនគួរកើតទុក្ខវិញ+ ហើយដកបុរសដែលបានប្រព្រឹត្តអំពើនេះចេញពីចំណោមអ្នករាល់គ្នាទេឬ?+ ៣ ទោះជាខ្លួនខ្ញុំមិននៅជាមួយនឹងអ្នករាល់គ្នាក៏ដោយ តែចិត្តខ្ញុំនៅជាមួយនឹងអ្នករាល់គ្នា ហើយខ្ញុំបានវិនិច្ឆ័យបុរសដែលបានប្រព្រឹត្តអំពើនេះរួចហើយ ហាក់ដូចជាខ្ញុំនៅជាមួយនឹងអ្នករាល់គ្នាដែរ។ ៤ ពេលដែលអ្នករាល់គ្នាជួបជុំគ្នាក្នុងនាមលោកយេស៊ូដែលជាម្ចាស់របស់យើង ហើយដឹងថាចិត្តខ្ញុំនៅជាមួយនឹងអ្នករាល់គ្នា ក៏ដឹងថាឫទ្ធានុភាពរបស់លោកម្ចាស់យេស៊ូនៅជាមួយនឹងអ្នករាល់គ្នាដែរ ៥ នោះអ្នករាល់គ្នាត្រូវប្រគល់បុរសបែបនេះទៅសាថាន*+ ដើម្បីឲ្យអ្នករាល់គ្នាបំផ្លាញឥទ្ធិពលនៃអំពើខុសឆ្គង*របស់បុរសនេះ ដើម្បីរក្សាការពារចិត្តគំនិតរបស់ក្រុមជំនុំក្នុងអំឡុងថ្ងៃរបស់លោកម្ចាស់។+
៦ ការដែលអ្នករាល់គ្នាអួតខ្លួនគឺមិនសមរម្យសោះ។ តើអ្នករាល់គ្នាមិនដឹងទេឬថា ដំបែតែបន្តិចធ្វើឲ្យដុំម្សៅទាំងមូលដោរឡើង?+ ៧ ចូរជម្រះដំបែចាស់ចេញ ដើម្បីឲ្យអ្នករាល់គ្នាទៅជាដុំម្សៅថ្មី ដោយសារអ្នករាល់គ្នាគ្មានដំបែ។ ព្រោះគ្រិស្តដែលជាកូនចៀមបុណ្យរំលងរបស់យើង+បានត្រូវបូជាហើយ។+ ៨ ហេតុនេះ ចូរយើងធ្វើបុណ្យនោះ+ មិនមែនដោយដំបែចាស់ ឬដោយដំបែជាសេចក្ដីអាក្រក់និងអំពើទុច្ចរិតទេ ប៉ុន្តែដោយនំប៉័ងឥតដំបែជាសេចក្ដីស្មោះអស់ពីចិត្តនិងសេចក្ដីពិត។
៩ ក្នុងសំបុត្ររបស់ខ្ញុំ ខ្ញុំបានសរសេរប្រាប់អ្នករាល់គ្នាថា ឈប់ទាក់ទង*ជាមួយនឹងអ្នកដែលប្រព្រឹត្តអំពើប្រាសចាកសីលធម៌ខាងផ្លូវភេទ។* ១០ នេះមិនមានន័យថា ឈប់ទាក់ទង*ជាមួយនឹងមនុស្សទាំងអស់ក្នុងពិភពលោកនេះ ដែលជាអ្នកប្រព្រឹត្តអំពើប្រាសចាកសីលធម៌ខាងផ្លូវភេទ*+ អ្នកលោភលន់ អ្នកគំរាមយកទ្រព្យ ឬអ្នកគោរពបូជារូបព្រះនោះទេ។ ព្រោះបើធ្វើដូច្នោះ មានន័យថាអ្នករាល់គ្នានឹងត្រូវចេញពីពិភពលោកនេះ។+ ១១ ប៉ុន្តែឥឡូវនេះ ខ្ញុំសរសេរមកអ្នករាល់គ្នាឲ្យឈប់ទាក់ទង*+ជាមួយនឹងអ្នកណាដែលមានឈ្មោះថាជាបងប្អូនរួមជំនឿ ដែលជាអ្នកប្រព្រឹត្តអំពើប្រាសចាកសីលធម៌ខាងផ្លូវភេទ* ជាអ្នកលោភលន់+ អ្នកគោរពបូជារូបព្រះ អ្នកជេរប្រមាថ អ្នកប្រមឹកស្រា+ ឬអ្នកគំរាមយកទ្រព្យ+ សូម្បីតែបរិភោគ ក៏កុំបរិភោគជាមួយនឹងមនុស្សបែបនោះដែរ។ ១២ ព្រោះតើការវិនិច្ឆ័យអ្នកក្រៅទាក់ទងអ្វីនឹងខ្ញុំ? អ្នករាល់គ្នាវិនិច្ឆ័យអ្នកដែលនៅក្នុងក្រុមជំនុំ ១៣ រីឯព្រះវិនិច្ឆ័យអ្នកក្រៅ មែនទេ?+ «ចូរដកមនុស្សទុច្ចរិតចេញពីចំណោមអ្នករាល់គ្នា»។+
៦ ក្នុងចំណោមអ្នករាល់គ្នា ពេលដែលអ្នកណាម្នាក់មានទំនាស់ជាមួយនឹងម្នាក់ទៀត+ ហេតុអ្វីអ្នករាល់គ្នាហ៊ានទៅតុលាការដើម្បីឈរនៅមុខមនុស្សមិនសុចរិត ជាជាងឈរនៅមុខពួកអ្នកបរិសុទ្ធ? ២ ឬតើអ្នករាល់គ្នាមិនដឹងទេឬថា ពួកអ្នកបរិសុទ្ធនឹងវិនិច្ឆ័យពិភពលោក?+ ហើយប្រសិនបើអ្នករាល់គ្នានឹងវិនិច្ឆ័យពិភពលោក តើអ្នករាល់គ្នាមិនអាចជំនុំជម្រះរឿងតូចតាចបានទេឬ? ៣ តើអ្នករាល់គ្នាមិនដឹងទេឬថា យើងនឹងវិនិច្ឆ័យពួកទេវតា?+ បើដូច្នេះ ហេតុអ្វីយើងមិនអាចវិនិច្ឆ័យរឿងរ៉ាវនៃជីវិតនេះបាន? ៤ ម្ល៉ោះហើយ ប្រសិនបើអ្នករាល់គ្នាមានរឿងរ៉ាវនៃជីវិតនេះដែលត្រូវជំនុំជម្រះ+ ហេតុអ្វីបានជាអ្នករាល់គ្នាជ្រើសរើសមនុស្សដែលមិនទទួលការគោរពពីក្រុមជំនុំឲ្យធ្វើជាអ្នកវិនិច្ឆ័យទៅវិញ? ៥ ខ្ញុំនិយាយដូច្នេះដើម្បីធ្វើឲ្យអ្នករាល់គ្នាអៀនខ្មាស។ ក្នុងចំណោមអ្នករាល់គ្នា តើគ្មានអ្នកណាម្នាក់ដែលមានប្រាជ្ញាដើម្បីវិនិច្ឆ័យរឿងរ៉ាវរវាងបងប្អូនខ្លួនទេឬ? ៦ ផ្ទុយទៅវិញ បងប្អូនបែរជាប្ដឹងបងប្អូនទៅតុលាការ ហើយឈរនៅមុខពួកអ្នកមិនជឿថែមទៀត!
៧ ដោយសារអ្នករាល់គ្នាប្ដឹងផ្ដល់គ្នាដូច្នេះ នេះមានន័យថាអ្នករាល់គ្នាបានបរាជ័យទាំងស្រុង។ ហេតុអ្វីអ្នករាល់គ្នាមិនសុខចិត្តទ្រាំអំពើអយុត្ដិធម៌?+ ហេតុអ្វីមិនសុខចិត្តទ្រាំពេលបងប្អូនបោកយកទ្រព្យ? ៨ ផ្ទុយទៅវិញ អ្នករាល់គ្នាប្រព្រឹត្តដោយអយុត្ដិធម៌ ហើយបោកយកទ្រព្យពីបងប្អូនរបស់ខ្លួនទៀត!
៩ ចុះតើអ្នករាល់គ្នាមិនដឹងទេឬថា មនុស្សមិនសុចរិតនឹងមិនទទួលរាជាណាចក្ររបស់ព្រះជាមត៌ក?+ កុំច្រឡំឲ្យសោះ!* អ្នកដែលប្រព្រឹត្តអំពើប្រាសចាកសីលធម៌ខាងផ្លូវភេទ*+ អ្នកដែលគោរពបូជារូបព្រះ+ អ្នកផិតក្បត់+ បុរសដែលសុខចិត្តបម្រើបុរសឯទៀតខាងផ្លូវភេទ+ បុរសដែលរួមដំណេកជាមួយនឹងបុរសឯទៀត+ ១០ ពួកចោរ មនុស្សលោភលន់+ អ្នកប្រមឹកស្រា+ អ្នកជេរប្រមាថ និងអ្នកគំរាមយកទ្រព្យ នឹងមិនទទួលរាជាណាចក្ររបស់ព្រះជាមត៌កឡើយ។+ ១១ ក៏ប៉ុន្តែ អ្នករាល់គ្នាខ្លះធ្លាប់ជាមនុស្សបែបនោះ តែអ្នករាល់គ្នាបានត្រូវលាងសម្អាត+ ក៏បានត្រូវញែកជាបរិសុទ្ធ+ ហើយបានត្រូវប្រកាសថាជាមនុស្សសុចរិត+ ក្នុងនាមលោកម្ចាស់យេស៊ូគ្រិស្ត និងដោយឫទ្ធានុភាពនៃព្រះរបស់យើង។
១២ មានច្បាប់ឲ្យខ្ញុំធ្វើអ្វីៗទាំងអស់ ប៉ុន្តែអ្វីៗទាំងអស់មិនមែនសុទ្ធតែមានប្រយោជន៍ទេ។+ មានច្បាប់ឲ្យខ្ញុំធ្វើអ្វីៗទាំងអស់ ប៉ុន្តែខ្ញុំមិនព្រមបណ្ដោយឲ្យអ្វីសោះមានអំណាចលើខ្ញុំឡើយ។ ១៣ អាហារគឺសម្រាប់ក្រពះ ហើយក្រពះគឺសម្រាប់អាហារ ប៉ុន្តែព្រះនឹងធ្វើឲ្យទាំងក្រពះទាំងអាហារសាបសូន្យ។+ ឯរូបកាយមិនមែនសម្រាប់អំពើប្រាសចាកសីលធម៌ខាងផ្លូវភេទ*ទេ តែរូបកាយគឺសម្រាប់លោកម្ចាស់វិញ+ ហើយលោកម្ចាស់គឺសម្រាប់រូបកាយ។ ១៤ ប៉ុន្តែ ព្រះបានប្រោសលោកម្ចាស់ឲ្យរស់ឡើងវិញ+ ក៏នឹងប្រោសយើងឲ្យរស់ពីស្លាប់ឡើងវិញដែរ+ ដោយឫទ្ធានុភាពរបស់លោក។+
១៥ តើអ្នករាល់គ្នាមិនដឹងទេឬថា រូបកាយរបស់អ្នករាល់គ្នាជាអវយវៈរបស់គ្រិស្ត?+ ដូច្នេះ តើខ្ញុំគួរយកអវយវៈរបស់គ្រិស្តចេញទៅធ្វើជាអវយវៈរបស់ស្រីពេស្យាឬ? មិនអាចទេ! ១៦ ចុះតើអ្នករាល់គ្នាមិនដឹងទេឬថា អ្នកណាដែលរួបរួមជាមួយនឹងស្រីពេស្យាគឺជារូបកាយតែមួយជាមួយនឹងស្រីនោះ? ព្រោះព្រះមានប្រសាសន៍ថា៖ «អ្នកទាំងពីរនឹងទៅជាសាច់ឈាមតែមួយ»។+ ១៧ ប៉ុន្តែ អ្នកណាដែលរួបរួមជាមួយនឹងលោកម្ចាស់ អ្នកនោះរួមចិត្តគំនិតតែមួយជាមួយនឹងលោក។+ ១៨ ចូររត់ចេញពីអំពើប្រាសចាកសីលធម៌ខាងផ្លូវភេទ!*+ អំពើខុសឆ្គងឯទៀតដែលមនុស្សប្រព្រឹត្តគឺនៅខាងក្រៅរូបកាយ តែអ្នកណាដែលប្រព្រឹត្តអំពើប្រាសចាកសីលធម៌ខាងផ្លូវភេទ អ្នកនោះកំពុងធ្វើខុសចំពោះរូបកាយខ្លួន។+ ១៩ ចុះតើមិនដឹងទេឬថា រូបកាយរបស់អ្នករាល់គ្នាជាវិហារ+របស់ឫទ្ធានុភាពបរិសុទ្ធដែលស្ថិតនៅក្នុងអ្នករាល់គ្នា ជាអ្វីដែលអ្នករាល់គ្នាបានទទួលពីព្រះ?+ ម្យ៉ាងទៀត អ្នករាល់គ្នាមិនមែនជាម្ចាស់លើខ្លួនអ្នកទេ+ ២០ ព្រោះអ្នករាល់គ្នាបានត្រូវទិញក្នុងតម្លៃថ្លៃណាស់។+ ដូច្នេះ ចូរប្រើរូបកាយរបស់អ្នករាល់គ្នា+ដើម្បីសរសើរតម្កើងព្រះ។+
៧ ឥឡូវ ខ្ញុំសូមឆ្លើយនឹងអ្វីៗដែលអ្នករាល់គ្នាបានសរសេរមកខ្ញុំ។ ប្រសិនបើបុរសណាម្នាក់មិនពាល់ស្ត្រីណាម្នាក់*សោះ នោះជាការល្អប្រសើរ។ ២ ក៏ប៉ុន្តែ ដោយសារមានអំពើប្រាសចាកសីលធម៌ខាងផ្លូវភេទ*កើតឡើងជារឿយៗ ចូរឲ្យបុរសម្នាក់ៗមានប្រពន្ធរៀងៗខ្លួន+ ហើយឲ្យស្ត្រីម្នាក់ៗមានប្ដីរៀងៗខ្លួនចុះ។+ ៣ ប្ដីត្រូវបំពេញករណីយកិច្ច*ចំពោះប្រពន្ធ ហើយប្រពន្ធក៏ត្រូវបំពេញករណីយកិច្ច*ចំពោះប្ដីនាងដែរ។+ ៤ ប្រពន្ធមិនមែនជាម្ចាស់លើរូបកាយរបស់ខ្លួនទេ តែគឺជាប្ដីវិញ។ ដូចគ្នាដែរ ប្ដីមិនមែនជាម្ចាស់លើរូបកាយរបស់ខ្លួនឡើយ តែគឺជាប្រពន្ធវិញ។ ៥ កុំបង្អត់គ្នាឡើយ លើកលែងតែបានព្រមព្រៀងគ្នា ហើយសម្រាប់តែមួយរយៈពេលប៉ុណ្ណោះ ដើម្បីឲ្យអ្នករាល់គ្នាអាចទុកពេលសម្រាប់អធិដ្ឋាន។ រួចមក អាចរួមគ្នាម្ដងទៀត ដើម្បីកុំឲ្យសាថាន*បន្តល្បួងអ្នករាល់គ្នា ដោយសារអ្នករាល់គ្នាទប់ចិត្តមិនបាន។ ៦ ខ្ញុំនិយាយដូច្នេះដើម្បីបើកសិទ្ធិឲ្យអ្នករាល់គ្នា មិនមែនជាបង្គាប់ទេ។ ៧ ប៉ុន្តែ ខ្ញុំក៏ចង់ឲ្យមនុស្សទាំងអស់ដូចខ្ញុំដែរ។ ទោះជាយ៉ាងនោះក៏ដោយ មនុស្សម្នាក់ៗបានទទួលអំណោយរៀងៗខ្លួន+ពីព្រះ ម្នាក់បានយ៉ាងនេះ ម្នាក់ទៀតបានយ៉ាងនោះ។
៨ ឥឡូវខ្ញុំសូមប្រាប់អ្នកដែលគ្មានគូអាពាហ៍ពិពាហ៍ និងស្ត្រីមេម៉ាយថា ជាការល្អប្រសើរ បើអ្នករាល់គ្នានៅដូចខ្ញុំ។+ ៩ ប៉ុន្តែ ប្រសិនបើទប់ចិត្តមិនបានទេ ចូររៀបការទៅចុះ ព្រោះបើរៀបការ នោះគឺប្រសើរជាងមានតណ្ហារោលរាល។+
១០ ខ្ញុំសូមបង្គាប់អ្នកដែលបានរៀបការហើយ តាមការពិតមិនមែនខ្ញុំទេ គឺជាលោកម្ចាស់ដែលបង្គាប់ថា ប្រពន្ធមិនគួរចាកចោលប្ដីឡើយ។+ ១១ ប៉ុន្តែ ប្រសិនបើនាងចាកចោលប្ដីមែន នាងមិនត្រូវរៀបការទៀតទេ ឬក៏នាងត្រូវរកជានឹងប្ដីវិញ។ ឯប្ដីមិនគួរចាកចោលប្រពន្ធឡើយ។+
១២ ប៉ុន្តែចំពោះអ្នកឯទៀត មិនមែនលោកម្ចាស់ប្រាប់ទេ តែខ្ញុំសូមប្រាប់ថា៖+ ប្រសិនបើបងប្រុសណាម្នាក់មានប្រពន្ធដែលមិនមែនជាអ្នកជឿ តែនាងយល់ព្រមរួមរស់ជាមួយនឹងគាត់ នោះគាត់មិនត្រូវចាកចោលនាងឡើយ ១៣ ហើយប្រសិនបើស្ត្រីណាម្នាក់មានប្ដីដែលមិនមែនជាអ្នកជឿ តែគាត់យល់ព្រមរួមរស់ជាមួយនឹងនាង នោះនាងមិនត្រូវចាកចោលគាត់ឡើយ។ ១៤ ព្រោះប្ដីដែលមិនមែនជាអ្នកជឿបានត្រូវចាត់ទុកជាបរិសុទ្ធដោយសារប្រពន្ធ ឯប្រពន្ធដែលមិនមែនជាអ្នកជឿបានត្រូវចាត់ទុកជាបរិសុទ្ធដោយសារប្ដី។ បើមិនដូច្នេះ កូនរបស់អ្នករាល់គ្នានឹងត្រូវចាត់ទុកជាស្មោកគ្រោក តែឥឡូវកូនរបស់អ្នករាល់គ្នាគឺបរិសុទ្ធ។ ១៥ ប៉ុន្តែ ប្រសិនបើគូដែលមិនមែនជាអ្នកជឿចាកចោល ចូរឲ្យគាត់ទៅចុះ។ ក្នុងករណីនេះ បងប្រុសឬបងស្រីនោះគ្មានកាតព្វកិច្ចចំពោះគូដែលចាកចោលទេ តែព្រះបានផ្ដល់សេចក្ដីសុខសាន្តឲ្យអ្នករាល់គ្នា។+ ១៦ ប្រពន្ធអើយ បើនាងបន្តរស់នៅជាមួយនឹងប្ដី ប្រហែលជានាងអាចនឹងសង្គ្រោះប្ដីបាន។+ ប្ដីអើយ បើអ្នកបន្តរស់នៅជាមួយនឹងប្រពន្ធ ប្រហែលជាអ្នកអាចនឹងសង្គ្រោះប្រពន្ធបាន។
១៧ ទោះជាយ៉ាងណាក៏ដោយ ចូរម្នាក់ៗរក្សាសភាពរបស់ខ្លួន ឲ្យដូចចំណែកដែលព្រះយេហូវ៉ា*បានផ្ដល់ឲ្យពេលដែលលោកបានហៅ។+ ខ្ញុំបង្គាប់ក្រុមជំនុំទាំងឡាយឲ្យធ្វើដូច្នេះ។ ១៨ បើមានបុរសណាដែលព្រះបានហៅ ក្រោយពីបានទទួលការកាត់ចុងស្បែក*រួច+ ចូរឲ្យបុរសនោះបន្តនៅក្នុងសភាពនោះចុះ។ បើមានបុរសណាដែលព្រះបានហៅដោយមិនទាន់ទទួលការកាត់ចុងស្បែកទេ ចូរឲ្យបុរសនោះបន្តស្ថិតក្នុងសភាពនោះចុះ។+ ១៩ ការកាត់ចុងស្បែកគ្មានន័យទេ ឯការមិនកាត់ចុងស្បែកក៏គ្មានន័យដែរ+ តែការធ្វើតាមបញ្ញត្ដិរបស់ព្រះទើបមានន័យ។+ ២០ ចូរគ្រប់គ្នារក្សាសភាពដែលខ្លួនមាន ពេលដែលបានត្រូវហៅ។+ ២១ បើព្រះបានហៅអ្នកពេលដែលអ្នកនៅជាខ្ញុំបម្រើ ចូរកុំខ្វល់ចិត្តអំពីរឿងនោះឡើយ។+ ប៉ុន្តែ បើអ្នកអាចមានសេរីភាពបាន ចូរឆក់យកឱកាសនោះ។ ២២ ព្រោះក្នុងលោកម្ចាស់ អ្នកណាដែលបានត្រូវហៅពេលដែលនៅជាខ្ញុំបម្រើ អ្នកនោះទទួលសេរីភាព ហើយទៅជារបស់លោកម្ចាស់។+ ដូចគ្នាដែរ អ្នកណាដែលបានត្រូវហៅពេលដែលមានសេរីភាព អ្នកនោះជាខ្ញុំបម្រើរបស់គ្រិស្ត។ ២៣ អ្នករាល់គ្នាបានត្រូវទិញក្នុងតម្លៃថ្លៃណាស់។+ ចូរឈប់ធ្វើជាខ្ញុំបម្រើរបស់មនុស្ស។ ២៤ បងប្អូនអើយ ចូរម្នាក់ៗរក្សាសភាពដែលខ្លួនមានពេលដែលព្រះបានហៅ ហើយចូររក្សាចំណងមិត្តភាពជាមួយនឹងព្រះ។
២៥ ចំណែកឯអ្នកដែលនៅលីវ* ខ្ញុំគ្មានបទបញ្ជាណាមួយពីលោកម្ចាស់ទេ។ ប៉ុន្តែ ខ្ញុំសូមជូនយោបល់+ ក្នុងនាមជាអ្នកស្មោះត្រង់ម្នាក់ដែលបានទទួលសេចក្ដីមេត្តាករុណាពីលោកម្ចាស់។ ២៦ ពេលគិតដល់គ្រាលំបាកនេះ ខ្ញុំយល់ឃើញថាគឺជាការល្អបំផុត បើអ្នករក្សាសភាពដែលខ្លួនមាននៅឥឡូវនេះ។ ២៧ បើអ្នកមានប្រពន្ធហើយ ចូរឈប់រកវិធីដោះខ្លួនចេញពីនាង។+ បើអ្នកគ្មានប្រពន្ធ*ទេ ចូរឈប់រកប្រពន្ធ។ ២៨ ប៉ុន្តែ ប្រសិនបើអ្នករៀបការ នោះមិនមែនជាការខុសឆ្គង*ទេ ហើយប្រសិនបើអ្នកដែលនៅលីវ*រៀបការ នោះក៏មិនមែនជាការខុសឆ្គងដែរ។ ប៉ុន្តែ អ្នកដែលរៀបការនឹងមានការលំបាកផ្សេងៗក្នុងជីវិត។* ក៏ប៉ុន្តែ ខ្ញុំកំពុងជួយអ្នករាល់គ្នាឲ្យរួចពីការលំបាកនោះ។
២៩ ម្យ៉ាងទៀត បងប្អូនអើយ ខ្ញុំសូមប្រាប់ថា ពេលវេលានៅសល់តែបន្តិចទេ។+ ចាប់ពីពេលនេះទៅ អ្នកដែលមានប្រពន្ធត្រូវដូចជាអ្នកដែលគ្មានប្រពន្ធវិញ ៣០ ហើយអ្នកដែលយំត្រូវដូចជាអ្នកដែលមិនយំ ឯអ្នកដែលត្រេកអរត្រូវដូចជាអ្នកដែលមិនត្រេកអរ ហើយអ្នកដែលទិញត្រូវដូចជាអ្នកដែលគ្មានអ្វីសោះ ៣១ ឯអ្នកដែលប្រើអ្វីៗរបស់ពិភពលោកនេះត្រូវដូចជាអ្នកដែលមិនប្រើប្រាស់ពេញលេញ ព្រោះស្ថានភាពពិភពលោកនេះកំពុងប្រែប្រួល។ ៣២ ខ្ញុំពិតជាចង់ឲ្យអ្នករាល់គ្នារួចពីកង្វល់។ បុរសដែលមិនរៀបការខ្វល់ខ្វាយអំពីអ្វីៗដែលទាក់ទងនឹងកិច្ចបម្រើលោកម្ចាស់ ពោលគឺរបៀបដែលគាត់អាចធ្វើឲ្យលោកម្ចាស់ពេញចិត្ត។ ៣៣ ប៉ុន្តែ បុរសដែលរៀបការហើយ ខ្វល់ខ្វាយអំពីអ្វីៗដែលទាក់ទងនឹងពិភពលោកនេះ+ ពោលគឺរបៀបដែលគាត់អាចធ្វើឲ្យប្រពន្ធពេញចិត្ត ៣៤ ដូច្នេះ គាត់បានត្រូវបែងចែកជាពីរ។ ម្យ៉ាងទៀត ស្ត្រីដែលមិនរៀបការឬស្ត្រីក្រមុំខ្វល់ខ្វាយអំពីអ្វីៗដែលទាក់ទងនឹងកិច្ចបម្រើលោកម្ចាស់+ ដើម្បីនាងអាចបរិសុទ្ធទាំងចិត្តទាំងកាយ។ ក៏ប៉ុន្តែ ស្ត្រីដែលរៀបការហើយ ខ្វល់ខ្វាយអំពីអ្វីៗដែលទាក់ទងនឹងពិភពលោកនេះ ពោលគឺរបៀបដែលនាងអាចធ្វើឲ្យប្ដីពេញចិត្ត។ ៣៥ ប៉ុន្តែ ខ្ញុំនិយាយដូចនេះដើម្បីជាប្រយោជន៍ដល់អ្នករាល់គ្នា មិនមែនដើម្បីឲ្យអ្នកជាប់ចំណងទេ តែដើម្បីជំរុញចិត្តអ្នកឲ្យធ្វើអ្វីដែលសមរម្យ និងដើម្បីអ្នកអាចបម្រើលោកម្ចាស់អស់ពីចិត្តដោយគ្មានអ្វីបំបែរអារម្មណ៍។
៣៦ ប៉ុន្តែ ប្រសិនបើមានអ្នកណាម្នាក់គិតថាការប្រព្រឹត្តរបស់ខ្លួនគឺមិនសមរម្យព្រោះនៅលីវ* ហើយបើអ្នកនោះមិនក្មេងពេក អ្នកនោះត្រូវធ្វើដូចតទៅនេះ៖ ចូរឲ្យអ្នកនោះរៀបការទៅ បើចង់រៀបការ។ នោះមិនមែនជាការខុសឆ្គងទេ។+ ៣៧ ប៉ុន្តែ ប្រសិនបើអ្នកណាបានតាំងចិត្តរឹងមាំ ហើយគិតថាខ្លួនមិនចាំបាច់រៀបការ តែអាចគ្រប់គ្រងចិត្តខ្លួនឯងបាន ហើយបានសម្រេចចិត្តថានឹងនៅលីវ* នោះគាត់នឹងសម្រេចការបានល្អ។+ ៣៨ ដូច្នេះ អ្នកណាដែលរៀបការ អ្នកនោះក៏សម្រេចការបានល្អដែរ តែអ្នកណាដែលមិនរៀបការ អ្នកនោះនឹងសម្រេចការបានល្អជាង។+
៣៩ ប្រពន្ធត្រូវនៅជាប់នឹងប្ដី ដរាបណាប្ដីនៅរស់។+ ប៉ុន្តែ ប្រសិនបើប្ដីរបស់នាងស្លាប់* នោះនាងមានសេរីភាពអាចរៀបការជាមួយនឹងអ្នកណាក៏បាន ឲ្យតែអ្នកនោះជាអ្នកកាន់តាមលោកម្ចាស់។+ ៤០ ប៉ុន្តែតាមយោបល់ខ្ញុំ នាងនឹងមានសុភមង្គលច្រើនជាង ប្រសិនបើនាងមិនរៀបការម្ដងទៀត។ ខ្ញុំដឹងប្រាកដថាខ្ញុំក៏បានទទួលការណែនាំពីឫទ្ធានុភាពរបស់ព្រះដែរ។
៨ ឥឡូវ ខ្ញុំសូមនិយាយអំពីអាហារដែលគេសែនដល់រូបព្រះ៖+ យើងដឹងថាយើងទាំងអស់គ្នាមានចំណេះ។+ ចំណេះធ្វើឲ្យក្រអឺតក្រអោង តែសេចក្ដីស្រឡាញ់ធ្វើឲ្យមាំមួនឡើង។+ ២ ប្រសិនបើអ្នកណាគិតថាខ្លួនចេះដឹងអំពីរឿងណាមួយ អ្នកនោះមិនទាន់ចេះដឹងអំពីរឿងនោះតាមដែលគួរចេះដឹងទេ។ ៣ ក៏ប៉ុន្តែ ប្រសិនបើអ្នកណាស្រឡាញ់ព្រះ ព្រះស្គាល់អ្នកនោះ។
៤ ឥឡូវ ខ្ញុំសូមនិយាយអំពីការបរិភោគអាហារដែលគេសែនដល់រូបព្រះ។ យើងដឹងថារូបព្រះមិនមែនជាអ្វីសោះ+ ហើយយើងដឹងថាមានព្រះតែមួយប៉ុណ្ណោះ។+ ៥ ព្រោះទោះជាមានអ្វីៗនៅស្ថានសួគ៌ឬនៅផែនដី ដែលគេហៅថាព្រះ+ ដូចជាមាន«ព្រះ»ជាច្រើន និង«ម្ចាស់»ជាច្រើនក៏ដោយ ៦ ចំពោះយើងមានព្រះតែមួយទេ+ គឺជាបិតានៅស្ថានសួគ៌។+ អ្វីៗទាំងអស់កើតមកពីលោក ហើយយើងរស់ដើម្បីលោក។+ មានម្ចាស់តែមួយ គឺលោកយេស៊ូគ្រិស្ត។ អ្វីៗទាំងអស់កើតមកតាមរយៈលោក+ ហើយយើងក៏មានជីវិតដោយសារលោកដែរ។
៧ ទោះជាយ៉ាងនោះក៏ដោយ មិនមែនមនុស្សទាំងអស់មានចំណេះនេះទេ។+ ប៉ុន្តែ ដោយសារអ្នកខ្លះធ្លាប់គោរពបូជារូបព្រះ ដូច្នេះពេលដែលពួកគេបរិភោគអាហារដែលបានត្រូវសែនដល់រូបព្រះ ពួកគេចាត់ទុកអាហារនោះថាជាសំណែន+ ហើយដោយសារពួកគេមានសមត្ថភាពវិនិច្ឆ័យខ្សោយ នោះពួកគេក៏មានចិត្តសៅហ្មង។+ ៨ ប៉ុន្តែ អាហារនឹងមិននាំឲ្យយើងចូលទៅជិតព្រះទេ។+ ប្រសិនបើយើងមិនបរិភោគ យើងមិនខាតបង់អ្វីទេ ហើយប្រសិនបើយើងបរិភោគ យើងក៏គ្មានគុណបំណាច់អ្វីដែរ។+ ៩ ដូច្នេះ ចូរប្រយ័ត្នជានិច្ច កុំឲ្យសិទ្ធិរបស់អ្នករាល់គ្នាទៅជាហេតុដែលនាំឲ្យអ្នកខ្សោយជំពប់ដួល។*+ ១០ ព្រោះប្រសិនបើអ្នកណាឃើញអ្នកដែលមានចំណេះ កំពុងអង្គុយបរិភោគនៅវិហារនៃរូបព្រះ នោះសមត្ថភាពវិនិច្ឆ័យរបស់អ្នកខ្សោយនោះ នឹងនាំឲ្យគាត់ហ៊ានបរិភោគអាហារដែលគេសែនដល់រូបព្រះ មែនទេ? ១១ បើដូច្នេះ ចំណេះរបស់អ្នកកំពុងបំផ្លាញជំនឿរបស់អ្នកខ្សោយនោះ ដែលជាបងប្អូនរបស់អ្នកដែលគ្រិស្តបានស្លាប់ជំនួស។+ ១២ ពេលដែលអ្នករាល់គ្នាធ្វើខុសចំពោះបងប្អូនរបស់អ្នកក្នុងរឿងនេះ ហើយបង្ខូចសមត្ថភាពវិនិច្ឆ័យដ៏ខ្សោយរបស់ពួកគេ+ នោះអ្នកកំពុងធ្វើខុសចំពោះគ្រិស្តហើយ។ ១៣ ដូច្នេះ ប្រសិនបើអាហារធ្វើឲ្យបងប្អូនរបស់ខ្ញុំជំពប់ដួល ខ្ញុំនឹងមិនបរិភោគសាច់ទៀតឡើយ ដើម្បីកុំឲ្យបងប្អូនរបស់ខ្ញុំជំពប់ដួល។+
៩ តើខ្ញុំមិនមានសេរីភាពទេឬ? តើខ្ញុំមិនមែនជាសាវ័កទេឬ? តើខ្ញុំមិនបានឃើញលោកយេស៊ូជាម្ចាស់របស់យើងទេឬ?+ តើអ្នករាល់គ្នាមិនមែនជាផលនៃកិច្ចការដែលខ្ញុំបានធ្វើក្នុងលោកម្ចាស់ទេឬ? ២ ទោះបីខ្ញុំមិនមែនជាសាវ័កចំពោះអ្នកឯទៀត តែខ្ញុំពិតជាសាវ័កចំពោះអ្នករាល់គ្នាមែន! ព្រោះអ្នករាល់គ្នាជាត្រាដែលបញ្ជាក់ថាខ្ញុំជាសាវ័ករបស់លោកម្ចាស់។
៣ ចំពោះអ្នកដែលរិះគន់ខ្ញុំ ខ្ញុំសូមនិយាយការពារខ្លួនដូចតទៅនេះ៖ ៤ យើងមានសិទ្ធិបរិភោគនិងផឹក មែនទេ? ៥ យើងមានសិទ្ធិនាំប្រពន្ធដែលជាអ្នកជឿទៅជាមួយនឹងយើង+ ដូចសាវ័កឯទៀត ដូចបងប្អូនរបស់លោកម្ចាស់+ និងកេផាស*+ដែរ មែនទេ? ៦ ឬក៏មានតែខ្ញុំនិងបាណាបាស+ប៉ុណ្ណោះឬ ដែលត្រូវធ្វើការដើម្បីចិញ្ចឹមជីវិត? ៧ តើអ្នកណាធ្វើជាទាហាន តែចាយប្រាក់ខ្លួនឯង? តើអ្នកណាដាំចម្ការទំពាំងបាយជូរ តែមិនបរិភោគផល?+ ឬតើអ្នកណាឃ្វាលហ្វូងសត្វ តែមិនទទួលចំណែកពីទឹកដោះសត្វនោះ?
៨ ខ្ញុំមិនមែននិយាយអ្វីទាំងនេះ តាមទស្សនៈរបស់មនុស្សប៉ុណ្ណោះទេ តែច្បាប់*ក៏ចែងដូច្នេះដែរ មែនទេ? ៩ ព្រោះច្បាប់ម៉ូសេចែងថា៖ «អ្នករាល់គ្នាមិនត្រូវឃ្លុំមាត់គោឈ្មោលពេលដែលបញ្ជាន់ស្រូវឡើយ»។+ តើព្រះឲ្យច្បាប់នេះដោយសារគិតដល់សត្វគោឬ? ១០ ឬក៏លោកមានប្រសាសន៍ដូច្នេះ ដើម្បីជាប្រយោជន៍ដល់យើងវិញ? តាមពិត សេចក្ដីនោះបានត្រូវសរសេរ ដើម្បីជាប្រយោជន៍ដល់យើង ព្រោះអ្នកដែលភ្ជួរដី គួរភ្ជួរដោយចិត្តសង្ឃឹម ហើយអ្នកដែលបញ្ជាន់ស្រូវ គួរបញ្ជាន់ដោយសង្ឃឹមថាខ្លួននឹងបានទទួលផល។
១១ យើងបានសាបព្រោះអ្វីៗពីព្រះក្នុងចំណោមអ្នករាល់គ្នា ដូច្នេះតើជាការខុសឬ បើយើងទទួលអ្វីដែលយើងត្រូវការពីអ្នករាល់គ្នា?+ ១២ ប្រសិនបើបុរសឯទៀតមានសិទ្ធិទទួលជំនួយពីអ្នករាល់គ្នា យើងមានសិទ្ធិលើសជាងនោះទៅទៀត មែនទេ? ទោះជាយ៉ាងនោះក៏ដោយ យើងមិនបានប្រើសិទ្ធិនេះទេ+ តែយើងកំពុងស៊ូទ្រាំសព្វបែបយ៉ាង ដើម្បីមិនដាក់ឧបសគ្គចំពោះការផ្សាយដំណឹងល្អអំពីគ្រិស្ត។+ ១៣ តើអ្នករាល់គ្នាមិនដឹងទេឬថា ពួកបុរសដែលបំពេញកិច្ចការដ៏ពិសិដ្ឋបរិភោគអាហារពីវិហារ ហើយពួកអ្នកដែលបម្រើជាទៀងទាត់នៅទីបូជាក៏ទទួលចំណែកពីទីបូជាដែរ?+ ១៤ ដូចគ្នាដែរ លោកម្ចាស់បានបង្គាប់ថា អ្នកដែលប្រកាសដំណឹងល្អ ត្រូវរស់នៅដោយសារដំណឹងល្អនោះ។+
១៥ ប៉ុន្តែ ខ្ញុំមិនបានប្រើសិទ្ធិ*ទាំងនេះឡើយ សូម្បីតែមួយក៏មិនបានប្រើដែរ។+ ខ្ញុំមិនមែនសរសេរសេចក្ដីនេះ ដើម្បីចង់ប្រើសិទ្ធិទាំងនេះឡើយ ព្រោះខ្ញុំស៊ូស្លាប់ល្អជាងឲ្យអ្នកណាដកយកមូលដ្ឋាននៃការអួតអាងនេះចេញពីខ្ញុំ!+ ១៦ ប្រសិនបើខ្ញុំប្រកាសដំណឹងល្អ នោះមិនមែនជាហេតុឲ្យខ្ញុំអួតអាងឡើយ ព្រោះខ្ញុំត្រូវតែប្រកាសដំណឹងល្អ។ តាមការពិត ប្រសិនបើខ្ញុំមិនប្រកាសដំណឹងល្អ នោះខ្ញុំត្រូវវេទនាណាស់!+ ១៧ ប្រសិនបើខ្ញុំធ្វើដូច្នេះដោយស្ម័គ្រពីចិត្ត ខ្ញុំបានរង្វាន់។ ប៉ុន្តែ ប្រសិនបើខ្ញុំធ្វើដោយមិនស្ម័គ្រពីចិត្ត ខ្ញុំនៅតែត្រូវបំពេញភារកិច្ចនេះដែលព្រះបានផ្ញើនឹងខ្ញុំ។+ ១៨ ដូច្នេះ តើរង្វាន់របស់ខ្ញុំជាអ្វី? រង្វាន់របស់ខ្ញុំគឺការប្រកាសដំណឹងល្អដោយមិនយកថ្លៃ។ តាមរបៀបនេះ ខ្ញុំអាចជៀសវាងពីការសុំអ្វីៗដែលខ្ញុំមានសិទ្ធិសុំក្នុងការប្រកាសដំណឹងល្អ។
១៩ ព្រោះទោះជាខ្ញុំគ្មានកាតព្វកិច្ចចំពោះអ្នកណាក៏ដោយ ខ្ញុំបានធ្វើឲ្យខ្លួនទៅជាខ្ញុំបម្រើរបស់មនុស្សទាំងអស់ ដើម្បីឲ្យខ្ញុំបានមនុស្សច្រើនតាមដែលអាចធ្វើបាន។ ២០ ចំពោះជនជាតិយូដា ខ្ញុំបានធ្វើដូចជនជាតិយូដា+ ដើម្បីខ្ញុំអាចបានជនជាតិយូដា។ ចំពោះអ្នកដែលនៅក្រោមច្បាប់ ខ្ញុំបានធ្វើដូចអ្នកដែលនៅក្រោមច្បាប់ ទោះជាខ្ញុំមិននៅក្រោមច្បាប់ក៏ដោយ ដើម្បីខ្ញុំអាចបានអ្នកដែលនៅក្រោមច្បាប់។+ ២១ ចំពោះអ្នកដែលមិននៅក្រោមច្បាប់ ខ្ញុំបានធ្វើដូចអ្នកដែលមិននៅក្រោមច្បាប់ ដើម្បីខ្ញុំអាចបានអ្នកដែលមិននៅក្រោមច្បាប់ តែខ្ញុំធ្វើតាមច្បាប់របស់ព្រះ ហើយនៅក្រោមច្បាប់របស់គ្រិស្ត។+ ២២ ចំពោះអ្នកដែលខ្សោយ ខ្ញុំបានធ្វើដូចអ្នកដែលខ្សោយ ដើម្បីខ្ញុំអាចបានអ្នកដែលខ្សោយ។+ ខ្ញុំបានធ្វើដូចមនុស្សគ្រប់ប្រភេទ ដើម្បីខ្ញុំអាចសង្គ្រោះពួកគេខ្លះតាមគ្រប់មធ្យោបាយទាំងអស់។ ២៣ ប៉ុន្តែ ខ្ញុំធ្វើអ្វីៗទាំងអស់ដោយសារតែដំណឹងល្អ ដើម្បីឲ្យខ្ញុំអាចប្រាប់ដល់អ្នកឯទៀត។+
២៤ តើអ្នករាល់គ្នាមិនដឹងទេថា អ្នកដែលរត់ប្រណាំង រត់ទាំងអស់គ្នា ប៉ុន្តែមានតែម្នាក់ប៉ុណ្ណោះទទួលរង្វាន់? ចូររត់យ៉ាងណាឲ្យបានរង្វាន់។+ ២៥ មនុស្ស*ទាំងអស់ដែលចូលរួមក្នុងការប្រកួត ខំទប់ចិត្តក្នុងរឿងទាំងអស់។ ពួកគេធ្វើដូច្នេះដើម្បីបានមកុដដែលអាចសាបសូន្យទៅ+ តែយើងធ្វើដូច្នេះដើម្បីបានមកុដដែលមិនសាបសូន្យឡើយ។+ ២៦ ហេតុនេះ របៀបដែលខ្ញុំកំពុងរត់ មិនមែនដូចជារត់ដោយគ្មានគោលដៅទេ។+ របៀបដែលខ្ញុំដាល់ ក៏មិនមែនដូចជាដាល់ខ្យល់ដែរ។ ២៧ ប៉ុន្តែ ខ្ញុំវាយដំ*រូបកាយរបស់ខ្ញុំ+ ហើយបង្ខំឲ្យចុះចូលដូចខ្ញុំបម្រើ ដើម្បីកុំឲ្យខ្ញុំទៅជាមនុស្សដែលព្រះលែងពេញចិត្តដោយសារហេតុណាមួយ ក្រោយពីខ្ញុំបានផ្សព្វផ្សាយដល់អ្នកឯទៀត។
១០ បងប្អូនអើយ ខ្ញុំចង់ឲ្យអ្នករាល់គ្នាដឹងថា បុព្វបុរសរបស់យើងបាននៅក្រោមពពក+ ហើយបានដើរកាត់សមុទ្រ។+ ២ ពួកគេទាំងអស់គ្នាបានទទួលការជ្រមុជទឹក ជាអ្នកដើរតាមម៉ូសេ កាលដែលពួកគេដើរកាត់សមុទ្រនៅក្រោមពពកនោះ។ ៣ ពួកគេទាំងអស់គ្នាបានពិសាអាហារដែលព្រះផ្ដល់ឲ្យ+ ៤ ហើយពួកគេទាំងអស់គ្នាបានពិសាទឹកដែលព្រះផ្ដល់ឲ្យ។+ ព្រោះពួកគេធ្លាប់ពិសាទឹកដែលព្រះផ្ដល់ឲ្យពីផ្ទាំងថ្មដែលហាក់ដូចជាទៅតាមពួកគេ ហើយផ្ទាំងថ្មនោះជាតំណាងគ្រិស្ត។+ ៥ ទោះជាយ៉ាងនោះក៏ដោយ ពួកគេភាគច្រើនបានត្រូវសម្លាប់នៅតំបន់ស្ងាត់ជ្រងំ ដោយសារព្រះមិនពេញចិត្តពួកគេ។+
៦ ការទាំងនេះជាគំរូសម្រាប់យើង ដើម្បីកុំឲ្យយើងទៅជាមនុស្សដែលប្រាថ្នាចង់បានអ្វីៗដ៏អាក្រក់ ដូចពួកគេប្រាថ្នាចង់បានឡើយ។+ ៧ កុំឲ្យយើងទៅជាអ្នកគោរពបូជារូបព្រះដូចពួកគេខ្លះ ដូចបទគម្ពីរចែងថា៖ «បណ្ដាជនបានអង្គុយពិសាអាហារពិសាស្រា ហើយក្រោកឡើងនាំគ្នាអរសប្បាយ»។+ ៨ កុំឲ្យយើងប្រព្រឹត្តអំពើប្រាសចាកសីលធម៌ខាងផ្លូវភេទ* ដូចពួកគេខ្លះបានប្រព្រឹត្តអំពើប្រាសចាកសីលធម៌ខាងផ្លូវភេទ រួចស្លាប់អស់២៣.០០០នាក់ក្នុងមួយថ្ងៃ។+ ៩ កុំឲ្យយើងល្បងលព្រះយេហូវ៉ា*+ ដូចពួកគេខ្លះបានល្បងលលោក រួចបាត់បង់ជីវិតដោយសត្វពស់។+ ១០ កុំឲ្យយើងរអ៊ូរទាំ ដូចពួកគេខ្លះបានរអ៊ូរទាំ+ រួចបាត់បង់ជីវិតដោយអ្នកពិឃាត។+ ១១ ការទាំងនេះបានកើតឡើងដល់ពួកគេទុកជាគំរូ ហើយបានត្រូវកត់ទុកជាការព្រមានដល់យើង+ដែលរស់នៅគ្រាចុងបញ្ចប់នៃសម័យនេះ។*
១២ ដូច្នេះ ចូរឲ្យអ្នកដែលគិតថាខ្លួនឈរ ប្រយ័ត្នក្រែងលោដួល។+ ១៣ គ្មានសេចក្ដីល្បួងណាកើតមានដល់អ្នករាល់គ្នាដែលមនុស្សឯទៀតមិនធ្លាប់ជួបនោះឡើយ។+ ប៉ុន្តែ ព្រះគឺស្មោះត្រង់ ហើយលោកនឹងមិនឲ្យអ្នករាល់គ្នារងការល្បួងហួសពីសមត្ថភាពស៊ូទ្រាំរបស់អ្នករាល់គ្នាឡើយ+ តែលោកនឹងរៀបចំផ្លូវចេញ ដើម្បីឲ្យអ្នករាល់គ្នាអាចស៊ូទ្រាំនៅពេលជួបសេចក្ដីល្បួងនោះ។+
១៤ ដូច្នេះ មិត្តជាទីស្រឡាញ់អើយ ចូររត់ចេញពីការគោរពបូជារូបព្រះ។+ ១៥ ខ្ញុំនិយាយជាមួយនឹងអ្នករាល់គ្នា ដូចនិយាយជាមួយនឹងអ្នកដែលមានសមត្ថភាពវែកញែក។ ចូរអ្នករាល់គ្នាពិចារណាសម្ដីរបស់ខ្ញុំចុះ។ ១៦ ពែងនៃអំណរគុណ ដែលយើងអរគុណព្រះ* តើនោះមិនមែនជាការរួមចំណែកក្នុងឈាមរបស់គ្រិស្តទេឬ?+ តើនំប៉័ងមួយដុំដែលយើងកាច់នោះមិនមែនជាការរួមចំណែកក្នុងរូបកាយរបស់គ្រិស្តទេឬ?+ ១៧ ដោយសារមាននំប៉័ងតែមួយដុំ នោះយើងជារូបកាយតែមួយ+ ពីព្រោះយើងបរិភោគពីនំប៉័ងមួយដុំនោះ ទោះជាយើងមានគ្នាច្រើនក៏ដោយ។
១៨ សូមពិចារណាមើលជនជាតិអ៊ីស្រាអែល៖ ពេលពួកគេបរិភោគគ្រឿងបូជានៅឯវិហារ តើពួកគេមិនរួមចំណែកជាមួយនឹងទីបូជាដែរទេឬ?+ ១៩ ការដែលខ្ញុំនិយាយដូច្នេះ តើនេះមានន័យថារូបព្រះនិងអ្វីដែលគេសែនរូបព្រះគឺសំខាន់ឬ? ២០ មិនមែនទេ! ប៉ុន្តែខ្ញុំចង់និយាយថា អ្វីៗដែលប្រជាជាតិនានាសែន ពួកគេសែនដល់ពួកវិញ្ញាណកំណាច* មិនមែនដល់ព្រះទេ+ ហើយខ្ញុំមិនចង់ឲ្យអ្នករាល់គ្នារួមចំណែកជាមួយនឹងពួកវិញ្ញាណកំណាចឡើយ។+ ២១ អ្នករាល់គ្នាមិនអាចផឹកពីពែងរបស់ព្រះយេហូវ៉ា*ផង និងពីពែងរបស់ពួកវិញ្ញាណកំណាចផងបានទេ។ អ្នករាល់គ្នាមិនអាចបរិភោគពី«តុរបស់ព្រះយេហូវ៉ា»*ផង+ និងពីតុរបស់ពួកវិញ្ញាណកំណាចផងបានឡើយ។ ២២ ឬ«តើយើងកំពុងធ្វើឲ្យព្រះយេហូវ៉ា*ទាស់ចិត្តឬ?»*+ យើងមិនមែនខ្លាំងជាងលោកទេ មែនទេ?
២៣ មានច្បាប់ឲ្យធ្វើអ្វីៗទាំងអស់ ប៉ុន្តែអ្វីៗទាំងអស់មិនមែនសុទ្ធតែមានប្រយោជន៍ទេ។ មានច្បាប់ឲ្យធ្វើអ្វីៗទាំងអស់ ប៉ុន្តែអ្វីៗទាំងអស់មិនមែនសុទ្ធតែលើកទឹកចិត្តឡើយ។+ ២៤ ចូរឲ្យគ្រប់គ្នាសុខចិត្តលះបង់ប្រយោជន៍ខ្លួន ដើម្បីប្រយោជន៍អ្នកឯទៀត។+
២៥ ចូរបរិភោគអ្វីៗទាំងអស់ដែលគេលក់នៅឯផ្សារលក់សាច់ ហើយកុំឲ្យសមត្ថភាពវិនិច្ឆ័យរបស់អ្នករាល់គ្នាជំរុញឲ្យសួរឡើយ ២៦ ព្រោះ«ផែនដីនិងអ្វីៗទាំងអស់នៅផែនដីជារបស់ព្រះយេហូវ៉ា»។*+ ២៧ ប្រសិនបើអ្នកដែលមិនជឿអញ្ជើញអ្នកទៅបរិភោគអាហារ ហើយអ្នករាល់គ្នាចង់ទៅ ចូរបរិភោគអ្វីទាំងអស់ដែលអ្នកនោះជូន ហើយកុំឲ្យសមត្ថភាពវិនិច្ឆ័យរបស់អ្នករាល់គ្នាជំរុញឲ្យសួរឡើយ។ ២៨ ប៉ុន្តែ ប្រសិនបើអ្នកណាប្រាប់អ្នករាល់គ្នាថា«នេះជារបស់គេសែន» ចូរកុំបរិភោគឡើយ ដោយយល់ដល់អ្នកដែលបានប្រាប់នោះ និងដោយយល់ដល់សមត្ថភាពវិនិច្ឆ័យរបស់អ្នកឯទៀត។+ ២៩ ខ្ញុំមិនមែននិយាយអំពីសមត្ថភាពវិនិច្ឆ័យរបស់អ្នកទេ តែរបស់អ្នកឯទៀតវិញ។ ព្រោះទោះជាខ្ញុំមានសេរីភាពធ្វើតាមចិត្ត តែខ្ញុំមិនចង់ធ្វើដូច្នេះទេ ដើម្បីកុំឲ្យសមត្ថភាពវិនិច្ឆ័យរបស់អ្នកឯទៀតវិនិច្ឆ័យខ្ញុំ។+ ៣០ ប្រសិនបើខ្ញុំបរិភោគដោយអរគុណព្រះ ហេតុអ្វីគេនិយាយប្រមាថខ្ញុំអំពីអ្វីដែលខ្ញុំបានអរគុណព្រះហើយ?+
៣១ ដូច្នេះ ទោះជាអ្នកផឹក បរិភោគ ឬធ្វើអ្វីទៀតក៏ដោយ ចូរធ្វើអ្វីៗទាំងអស់ដើម្បីឲ្យព្រះទទួលការសរសើរតម្កើង។+ ៣២ កុំបង្កហេតុឲ្យជនជាតិយូដា ជនជាតិក្រិច និងក្រុមជំនុំរបស់ព្រះជំពប់ដួលឡើយ។+ ៣៣ ប៉ុន្តែ ចូរធ្វើដូចខ្ញុំដែលកំពុងព្យាយាមបំពេញចិត្តមនុស្សទាំងឡាយក្នុងគ្រប់ការទាំងអស់ ដោយលះបង់ប្រយោជន៍ខ្លួន+ ជាប្រយោជន៍ដល់មនុស្សជាច្រើន ដើម្បីឲ្យពួកគេបានទទួលសេចក្ដីសង្គ្រោះ។+
១១ ចូរយកតម្រាប់ខ្ញុំ ដូចខ្ញុំយកតម្រាប់គ្រិស្ត។+
២ ខ្ញុំសូមសរសើរអ្នករាល់គ្នា ពីព្រោះអ្នករាល់គ្នាគិតអំពីខ្ញុំជានិច្ច ហើយកំពុងកាន់ខ្ជាប់តាមសេចក្ដីដែលខ្ញុំបានប្រាប់អ្នករាល់គ្នា។ ៣ ប៉ុន្តែ ខ្ញុំចង់ឲ្យអ្នករាល់គ្នាដឹងថា ប្រមុខរបស់បុរសទាំងឡាយគឺគ្រិស្ត+ ឯប្រមុខរបស់ស្ត្រីគឺបុរស+ ឯប្រមុខរបស់គ្រិស្តគឺព្រះ។+ ៤ បុរសណាដែលអធិដ្ឋានឬប្រកាសទំនាយដោយពាក់អ្វីលើក្បាល នោះធ្វើឲ្យក្បាល*ខ្លួនអាប់ឱនកិត្តិយស។ ៥ ប៉ុន្តែ ស្ត្រីណាដែលអធិដ្ឋានឬប្រកាសទំនាយ+ដោយមិនពាក់អ្វីលើក្បាល នោះធ្វើឲ្យក្បាល*ខ្លួនអាប់ឱនកិត្តិយស គឺនាងដូចជាស្ត្រីដែលត្រូវគេកោរសក់។* ៦ ព្រោះប្រសិនបើស្ត្រីណាមិនពាក់អ្វីលើក្បាល នោះនាងត្រូវកាត់សក់ឲ្យខ្លី។ ប៉ុន្តែ ប្រសិនបើការកាត់សក់ឲ្យខ្លីឬកោរសក់នាំឲ្យនាងអាប់ឱនកិត្តិយស នោះជាការល្អជាងបើនាងពាក់អ្វីលើក្បាល។
៧ រីឯបុរសមិនគួរពាក់អ្វីលើក្បាលទេ ដោយសារបុរសមានភាពដូចព្រះ+ ហើយនាំឲ្យព្រះទទួលកិត្តិយស តែស្ត្រីនាំឲ្យបុរសទទួលកិត្តិយស។ ៨ ព្រោះបុរសមិនមកពីស្ត្រីទេ តែស្ត្រីមកពីបុរស។+ ៩ ម្យ៉ាងទៀត ព្រះមិនបានបង្កើតបុរសសម្រាប់ស្ត្រីទេ តែលោកបានបង្កើតស្ត្រីសម្រាប់បុរស។+ ១០ ហេតុនេះហើយបានជាស្ត្រីត្រូវមានអ្វីលើក្បាល ដើម្បីបញ្ជាក់អំពីការចុះចូល និងដោយសារបណ្ដាទេវតា។+
១១ ក៏ប៉ុន្តែ ក្នុងចំណោមអ្នកកាន់តាមលោកម្ចាស់ មិនអាចមានស្ត្រីដោយគ្មានបុរស ហើយមិនអាចមានបុរសដោយគ្មានស្ត្រីទេ។ ១២ ព្រោះដូចស្ត្រីមកពីបុរស+ បុរសកើតចេញពីស្ត្រី តែអ្វីៗទាំងអស់មកពីព្រះ។+ ១៣ សូមពិចារណាដោយខ្លួនអ្នកចុះ៖ តើជាការសមរម្យទេ ប្រសិនបើស្ត្រីអធិដ្ឋានទៅព្រះដោយមិនពាក់អ្វីលើក្បាល? ១៤ តើធម្មជាតិមិនបង្ហាញទេថា បុរសត្រូវអាប់ឱនកិត្តិយសប្រសិនបើមានសក់វែង? ១៥ ប៉ុន្តែ ប្រសិនបើស្ត្រីមានសក់វែង នោះជាកិត្តិយសដល់នាងវិញ មែនទេ? ពីព្រោះនាងបានសក់ជំនួសអ្វីដែលពាក់លើក្បាល។ ១៦ ក៏ប៉ុន្តែ ប្រសិនបើមានអ្នកណាចង់ប្រកែកតវ៉ាដើម្បីធ្វើតាមទម្លាប់ណាផ្សេងទៀត យើងគ្មានទម្លាប់ណាផ្សេងទៀតទេ ហើយក្រុមជំនុំទាំងឡាយរបស់ព្រះក៏គ្មានដែរ។
១៧ ប៉ុន្តែ ពេលដែលខ្ញុំឲ្យការណែនាំនេះ ខ្ញុំមិនសរសើរអ្នករាល់គ្នាទេ ពីព្រោះការជួបជុំរបស់អ្នករាល់គ្នា មិនបានផ្ដល់ប្រយោជន៍ឲ្យអ្នករាល់គ្នាឡើយ តែនាំឲ្យបង់ប្រយោជន៍វិញ។ ១៨ ព្រោះទី១ ខ្ញុំបានឮថាមានការបែកបាក់ក្នុងចំណោមអ្នករាល់គ្នាពេលដែលជួបជុំជាក្រុមជំនុំ ហើយខ្ញុំក៏ជឿខ្លះដែរ។ ១៩ ព្រោះប្រាកដជានឹងមាននិកាយផ្សេងៗក្នុងចំណោមអ្នករាល់គ្នា+ ហើយការនេះនឹងបង្ហាញឲ្យឃើញថាអ្នកណាខ្លះជាមនុស្សដែលព្រះពេញចិត្ត។
២០ ពេលដែលអ្នករាល់គ្នាមកជួបជុំនៅកន្លែងមួយ អ្នករាល់គ្នាមិនមែនមកដើម្បីបរិភោគអាហារល្ងាចរបស់លោកម្ចាស់ទេ។+ ២១ ព្រោះពេលដល់ម៉ោងបរិភោគអាហារល្ងាចរបស់លោកម្ចាស់ អ្នករាល់គ្នាខ្លះបានបរិភោគអាហារល្ងាចផ្ទាល់ខ្លួនរួចហើយ។ ហេតុនេះ អ្នកខ្លះឃ្លាន ឯអ្នកខ្លះទៀតស្រវឹងស្រា។ ២២ តើអ្នករាល់គ្នាគ្មានផ្ទះដើម្បីផឹកនិងបរិភោគទេឬ? ឬតើអ្នករាល់គ្នាមើលងាយក្រុមជំនុំរបស់ព្រះ ហើយធ្វើឲ្យអ្នកដែលគ្មានអ្វីសោះមានអារម្មណ៍អៀនខ្មាសឬ? តើខ្ញុំអាចនិយាយអ្វីទៅអ្នករាល់គ្នា? តើខ្ញុំត្រូវសរសើរអ្នករាល់គ្នាឬ? ក្នុងរឿងនេះ ខ្ញុំមិនសរសើរអ្នករាល់គ្នាទេ។
២៣ ព្រោះសេចក្ដីដែលខ្ញុំបានទទួលពីលោកម្ចាស់ ខ្ញុំបានប្រាប់អ្នករាល់គ្នាថា នៅយប់+ដែលលោកម្ចាស់យេស៊ូត្រូវគេក្បត់ លោកបានយកនំប៉័ងមួយដុំ ២៤ ហើយអរគុណព្រះ រួចកាច់នំប៉័ងនោះ ហើយមានប្រសាសន៍ថា៖ «នេះជាតំណាងរូបកាយរបស់ខ្ញុំ+ដែលនឹងត្រូវប្រគល់ឲ្យដើម្បីអ្នករាល់គ្នា។ ចូរបន្តធ្វើដូច្នេះ ដើម្បីរំលឹកអំពីខ្ញុំ»។+ ២៥ បន្ទាប់ពីបានពិសាអាហារល្ងាចហើយ លោកក៏យកពែងនោះ+ធ្វើបែបដូច្នោះដែរ ដោយមានប្រសាសន៍ថា៖ «ពែងនេះជាតំណាងកិច្ចព្រមព្រៀងថ្មី+ដែលមានមូលដ្ឋានលើឈាមរបស់ខ្ញុំ។+ រាល់ដងដែលអ្នករាល់គ្នាផឹកពីពែងនេះ ចូរបន្តធ្វើដូច្នេះ ដើម្បីរំលឹកអំពីខ្ញុំ»។+ ២៦ ព្រោះរាល់ដងដែលអ្នករាល់គ្នាបរិភោគនំប៉័ងនោះ និងផឹកពីពែងនោះ អ្នករាល់គ្នាកំពុងប្រកាសមរណភាពរបស់លោកម្ចាស់ រហូតដល់លោកមកដល់។
២៧ ដូច្នេះ អ្នកណាដែលបរិភោគនំប៉័ង ឬផឹកពីពែងរបស់លោកម្ចាស់ដោយខ្លួនមិនសមនឹងទទួល អ្នកនោះកំពុងធ្វើខុសចំពោះរូបកាយនិងឈាមរបស់លោកម្ចាស់។ ២៨ ចូរអ្នករាល់គ្នាម្នាក់ៗគិតពិចារណាឲ្យបានដិតដល់+ ដើម្បីដឹងប្រាកដថាខ្លួនសមឬមិនសមនឹងទទួល រួចសឹមបរិភោគនំប៉័ងនោះនិងផឹកពីពែងនោះចុះ។ ២៩ ព្រោះអ្នកណាដែលបរិភោគនិងផឹកដោយមិនទទួលស្គាល់សារៈសំខាន់នៃរូបកាយ អ្នកនោះបរិភោគនិងផឹកទាំងនាំឲ្យខ្លួនទទួលការវិនិច្ឆ័យ។ ៣០ ហេតុនោះហើយបានជាមានអ្នកខ្សោយនិងអ្នកឈឺជាច្រើននាក់ក្នុងចំណោមអ្នករាល់គ្នា ហើយមួយចំនួនបានស្លាប់*ទៅហើយ។+ ៣១ ប៉ុន្តែ ប្រសិនបើយើងពិចារណាឲ្យដឹងថាខ្លួនជាមនុស្សបែបណា នោះយើងនឹងមិនទទួលការវិនិច្ឆ័យឡើយ។ ៣២ ក៏ប៉ុន្តែ ពេលដែលព្រះយេហូវ៉ា*វិនិច្ឆ័យយើង លោកប្រដៅយើង+ ដើម្បីកុំឲ្យយើងទទួលការផ្ដន្ទាទោសជាមួយនឹងពិភពលោក។+ ៣៣ ដូច្នេះ បងប្អូនខ្ញុំអើយ នៅពេលដែលអ្នករាល់គ្នាជួបជុំដើម្បីបរិភោគអាហារនេះ ចូរចាំគ្នា។ ៣៤ ប្រសិនបើមានអ្នកណាឃ្លាន អ្នកនោះត្រូវបរិភោគនៅផ្ទះ ដើម្បីកុំឲ្យអ្នករាល់គ្នាទទួលការវិនិច្ឆ័យ ពេលដែលមកជួបជុំគ្នា។+ ចំណែករឿងទាំងប៉ុន្មានទៀត ខ្ញុំនឹងដោះស្រាយពេលដែលខ្ញុំមក។
១២ បងប្អូនអើយ ខ្ញុំចង់ឲ្យអ្នករាល់គ្នាដឹងច្បាស់អំពីអំណោយផ្សេងៗដែលមកពីឫទ្ធានុភាពរបស់ព្រះ។+ ២ អ្នករាល់គ្នាដឹងថា កាលដែលនៅជាជនជាតិដទៃ*នៅឡើយ អ្នករាល់គ្នាបានកាន់តាមរូបព្រះឥតសំឡេងទាំងនោះ+ ហើយធ្វើអ្វីៗតាមតែរូបព្រះទាំងនោះ។ ៣ ដូច្នេះ ខ្ញុំចង់ឲ្យអ្នករាល់គ្នាដឹងថា អ្នកណាដែលនៅក្រោមឥទ្ធិពលនៃឫទ្ធានុភាពរបស់ព្រះ អ្នកនោះនឹងមិនពោលថា៖ «លោកយេស៊ូត្រូវបណ្ដាសា!»ទេ ហើយអ្នកណាដែលមិននៅក្រោមឥទ្ធិពលនៃឫទ្ធានុភាពបរិសុទ្ធ អ្នកនោះមិនអាចពោលថា៖ «លោកយេស៊ូជាម្ចាស់!»ឡើយ។+
៤ ឯអំណោយ នោះមានផ្សេងៗពីគ្នា ប៉ុន្តែមានឫទ្ធានុភាពតែមួយទេ+ ៥ ហើយមានកិច្ចបម្រើផ្សេងៗពីគ្នា+ ប៉ុន្តែមានម្ចាស់តែមួយទេ ៦ ឯសកម្មភាព នោះមានផ្សេងៗពីគ្នា ប៉ុន្តែគឺព្រះតែមួយទេដែលធ្វើសកម្មភាពទាំងអស់ក្នុងមនុស្សគ្រប់គ្នា។+ ៧ ប៉ុន្តែ ឫទ្ធានុភាពរបស់ព្រះបានត្រូវបង្ហាញឲ្យឃើញតាមរយៈមនុស្សម្នាក់ៗ ដើម្បីផ្ដល់ផលប្រយោជន៍។+ ៨ តាមរយៈឫទ្ធានុភាពរបស់ព្រះ មនុស្សម្នាក់អាចនិយាយដោយប្រាជ្ញា ហើយតាមរយៈឫទ្ធានុភាពដដែលនោះ ម្នាក់ទៀតអាចនិយាយដោយចំណេះ ៩ តាមរយៈឫទ្ធានុភាពដដែលនោះ ម្នាក់ទៀតអាចមានជំនឿ+ ហើយម្នាក់ទៀតអាចធ្វើឲ្យគេជាសះស្បើយ+ ១០ តែម្នាក់ទៀតអាចធ្វើការដែលប្រកបដោយឫទ្ធានុភាព+ ម្នាក់ទៀតអាចប្រកាសទំនាយ ម្នាក់ទៀតអាចសម្គាល់ពាក្យណាដែលមកពីព្រះ+ ម្នាក់ទៀតអាចនិយាយភាសាផ្សេងៗ+ ហើយម្នាក់ទៀតអាចបកប្រែភាសាផ្សេងៗ។+ ១១ ប៉ុន្តែ ឫទ្ធានុភាពតែមួយធ្វើសកម្មភាពទាំងនេះ ដោយចែកអំណោយឲ្យម្នាក់ៗ តាមបំណងប្រាថ្នារបស់ព្រះ។*
១២ ព្រោះរូបកាយគឺតែមួយ តែមានអវយវៈជាច្រើន ហើយអវយវៈនៃរូបកាយនោះ រួមគ្នាជារូបកាយតែមួយ ទោះជាមានអវយវៈជាច្រើនក៏ដោយ។+ រូបកាយរបស់គ្រិស្តក៏ដូច្នេះដែរ។ ១៣ ព្រោះយើងទាំងអស់គ្នាបានទទួលការជ្រមុជដោយឫទ្ធានុភាពតែមួយ ដើម្បីទៅជារូបកាយតែមួយ ទោះជាជនជាតិយូដា ឬជនជាតិក្រិច ទោះជាខ្ញុំបម្រើ ឬជាអ្នកមានសេរីភាពក៏ដោយ ហើយយើងទាំងអស់គ្នាបានទទួលឫទ្ធានុភាពតែមួយ។
១៤ ព្រោះរូបកាយមិនមែនមានអវយវៈតែមួយទេ តែមានអវយវៈជាច្រើន។+ ១៥ ទោះបើជើងនិយាយថា៖ «ខ្ញុំមិនមែនជាផ្នែកនៃរូបកាយទេ ព្រោះខ្ញុំមិនមែនជាដៃ» តែជើងនៅតែជាផ្នែកនៃរូបកាយ។ ១៦ ទោះបើត្រចៀកនិយាយថា៖ «ខ្ញុំមិនមែនជាផ្នែកនៃរូបកាយទេ ព្រោះខ្ញុំមិនមែនជាភ្នែក» តែត្រចៀកនៅតែជាផ្នែកនៃរូបកាយ។ ១៧ ប្រសិនបើរូបកាយទាំងមូលជាភ្នែក តើនឹងឮសំឡេងតាមណាវិញ? ប្រសិនបើរូបកាយទាំងមូលសម្រាប់តែឮសំឡេងប៉ុណ្ណោះ តើនឹងដឹងក្លិនតាមណាវិញ? ១៨ ប៉ុន្តែ ព្រះបានកំណត់អវយវៈនីមួយៗនៃរូបកាយ តាមដែលលោកពេញចិត្ត។
១៩ ប្រសិនបើទាំងអស់សុទ្ធតែជាអវយវៈតែមួយ តើរូបកាយនៅឯណា? ២០ មានអវយវៈជាច្រើន តែអវយវៈទាំងអស់រួមគ្នាជារូបកាយតែមួយ។ ២១ ភ្នែកមិនអាចនិយាយទៅដៃថា៖ «ខ្ញុំមិនត្រូវការអ្នកទេ» ហើយក្បាលមិនអាចនិយាយទៅជើងថា៖ «ខ្ញុំមិនត្រូវការអ្នកទេ»។ ២២ ផ្ទុយទៅវិញ អវយវៈណានៃរូបកាយដែលមើលទៅដូចជាខ្សោយជាង អវយវៈទាំងនោះគឺសំខាន់ចាំបាច់ ២៣ ហើយផ្នែកណានៃរូបកាយដែលយើងចាត់ទុកថាមិនសូវមានកិត្តិយស យើងធ្វើឲ្យផ្នែកទាំងនោះមានកិត្តិយសជាងគេ។+ ហេតុនេះ ផ្នែកណាដែលមិនសមសួន ផ្នែកនោះមានភាពសមសួនជាងគេ។ ២៤ រីឯផ្នែកណាដែលសមសួនហើយ ផ្នែកនោះមិនត្រូវការអ្វីសោះ។ ទោះជាយ៉ាងនោះក៏ដោយ ព្រះបានផ្គុំរូបកាយ ដោយធ្វើឲ្យផ្នែកណាដែលខ្វះកិត្តិយស ទៅជាមានកិត្តិយសជាងគេ ២៥ ដើម្បីកុំឲ្យរូបកាយមានការបែកបាក់គ្នា តែដើម្បីឲ្យអវយវៈនីមួយៗយកចិត្តទុកដាក់ចំពោះគ្នាទៅវិញទៅមក។+ ២៦ ប្រសិនបើអវយវៈមួយរងទុក្ខ អវយវៈទាំងប៉ុន្មានទៀតក៏រងទុក្ខជាមួយដែរ+ ឬបើអវយវៈមួយទទួលកិត្តិយស អវយវៈទាំងប៉ុន្មានទៀតក៏អរសប្បាយជាមួយដែរ។+
២៧ អ្នករាល់គ្នារួមគ្នាជារូបកាយរបស់គ្រិស្ត+ ហើយម្នាក់ៗជាអវយវៈមួយ។+ ២៨ ព្រះបានឲ្យអ្នករាល់គ្នាម្នាក់ៗក្នុងក្រុមជំនុំមានតួនាទីដូចតទៅ៖ ទី១ជាសាវ័ក+ ទី២ជាអ្នកប្រកាសទំនាយ+ ទី៣ជាអ្នកបង្រៀន+ បន្ទាប់មកជាអ្នកដែលធ្វើការដែលប្រកបដោយឫទ្ធានុភាព+ ជាបន្តបន្ទាប់មានអ្នកដែលទទួលអំណោយជាសមត្ថភាពធ្វើឲ្យគេជាសះស្បើយ+ អ្នកដែលបំពេញកិច្ចការផ្ដល់ជំនួយ អ្នកដែលមានសមត្ថភាពដឹកនាំ+ អ្នកដែលអាចនិយាយភាសាផ្សេងៗ។+ ២៩ មិនមែនទាំងអស់គ្នាជាសាវ័កទេ មែនទេ? មិនមែនទាំងអស់គ្នាជាអ្នកប្រកាសទំនាយទេ មែនទេ? មិនមែនទាំងអស់គ្នាជាអ្នកបង្រៀនទេ មែនទេ? មិនមែនទាំងអស់គ្នាធ្វើការដែលប្រកបដោយឫទ្ធានុភាពទេ មែនទេ? ៣០ មិនមែនទាំងអស់គ្នាបានទទួលអំណោយជាសមត្ថភាពធ្វើឲ្យគេជាសះស្បើយទេ មែនទេ? មិនមែនទាំងអស់គ្នាអាចនិយាយភាសាផ្សេងៗទេ មែនទេ?+ មិនមែនទាំងអស់គ្នាជាអ្នកបកប្រែទេ មែនទេ?+ ៣១ ទោះជាយ៉ាងនោះក៏ដោយ ចូរបន្តខំព្យាយាមឲ្យបានអំណោយដ៏ប្រសើរជាង។+ ប៉ុន្តែ ខ្ញុំនឹងបង្ហាញផ្លូវដ៏ប្រសើរលើសលប់ដល់អ្នករាល់គ្នា។+
១៣ ប្រសិនបើខ្ញុំនិយាយភាសាមនុស្សនិងភាសាទេវតា តែគ្មានសេចក្ដីស្រឡាញ់ នោះខ្ញុំគឺដូចជាឃ្មោះដែលលាន់ឮខ្ទរខ្ទារ ឬឆាបដែលទង្គិចគ្នា។ ២ ម្យ៉ាងទៀត ប្រសិនបើខ្ញុំបានអំណោយជាសមត្ថភាពប្រកាសទំនាយ ហើយស្គាល់អាថ៌កំបាំងដ៏ពិសិដ្ឋទាំងឡាយនិងចំណេះទាំងអស់+ ហើយបើខ្ញុំមានជំនឿខ្លាំងដល់ម្ល៉េះបានជាខ្ញុំអាចធ្វើឲ្យភ្នំរើចេញបាន តែខ្ញុំគ្មានសេចក្ដីស្រឡាញ់ នោះខ្ញុំមិនជាអ្វីសោះ។*+ ៣ ប្រសិនបើខ្ញុំឲ្យទ្រព្យទាំងអស់របស់ខ្ញុំ ដើម្បីជួយអ្នកឯទៀត+ ហើយប្រសិនបើខ្ញុំលះបង់ជីវិតដើម្បីខ្ញុំអាចអួតអាង តែខ្ញុំគ្មានសេចក្ដីស្រឡាញ់+ នោះគ្មានប្រយោជន៍អ្វីឡើយ។
៤ សេចក្ដីស្រឡាញ់+មានចិត្តអត់ធ្មត់+ ហើយសប្បុរស។+ សេចក្ដីស្រឡាញ់មិនចេះច្រណែន*+ មិនចេះនិយាយអួតអាង មិនចេះក្រអឺតក្រអោង+ ៥ មិនប្រព្រឹត្តឥតសមរម្យ*+ មិនរកប្រយោជន៍ផ្ទាល់ខ្លួន+ មិនឆាប់ខឹង+ និងមិនចាំទុកក្នុងចិត្តនូវអ្វីដែលគេធ្វើឲ្យយើងឈឺចិត្ត។*+ ៦ សេចក្ដីស្រឡាញ់មិនអរសប្បាយអំពីអ្វីដែលមិនសុចរិតឡើយ+ តែអរសប្បាយអំពីសេចក្ដីពិត។ ៧ សេចក្ដីស្រឡាញ់អត់ធន់នឹងអ្វីៗទាំងអស់+ ជឿអ្វីៗទាំងអស់+ សង្ឃឹមលើអ្វីៗទាំងអស់+ ស៊ូទ្រាំនឹងអ្វីៗទាំងអស់។+
៨ សេចក្ដីស្រឡាញ់មិនចេះសាបសូន្យ*ឡើយ។ ប៉ុន្តែ ទោះជាបានទទួលអំណោយជាសមត្ថភាពប្រកាសទំនាយ និយាយភាសាផ្សេងៗ* ឬទទួលចំណេះក៏ដោយ អ្វីៗទាំងនោះនឹងត្រូវធ្វើឲ្យសាបសូន្យទៅ។ ៩ ព្រោះចំណេះរបស់យើងគឺមិនទាន់សព្វគ្រប់+ ហើយទំនាយដែលយើងប្រកាសក៏មិនទាន់សព្វគ្រប់ដែរ ១០ ប៉ុន្តែ កាលណាយើងមានចំណេះសព្វគ្រប់ ហើយប្រកាសទំនាយសព្វគ្រប់ នោះចំណេះដែលមិនទាន់សព្វគ្រប់និងទំនាយដែលមិនទាន់សព្វគ្រប់ នឹងត្រូវធ្វើឲ្យសាបសូន្យទៅ។ ១១ កាលដែលខ្ញុំនៅជាកូនក្មេង ខ្ញុំនិយាយដូចកូនក្មេង គិតដូចកូនក្មេង និងវែកញែកដូចកូនក្មេង តែពេលខ្ញុំជាមនុស្សពេញវ័យ ខ្ញុំក៏បានបំបាត់លក្ខណៈដែលដូចកូនក្មេង។ ១២ ព្រោះនៅឥឡូវនេះ យើងមើលឃើញស្រពិលៗដូចមើលក្នុងដែកឆ្លុះមុខ តែនៅថ្ងៃមុខយើងនឹងឃើញច្បាស់។* នៅឥឡូវនេះ ខ្ញុំមិនទាន់ដឹងសព្វគ្រប់ទេ តែនៅថ្ងៃមុខខ្ញុំនឹងដឹងច្បាស់ ដូចព្រះស្គាល់ខ្ញុំច្បាស់ដែរ។ ១៣ ក៏ប៉ុន្តែឥឡូវនេះ មានបីយ៉ាងដែលនៅគង់វង្សគឺ ជំនឿ សេចក្ដីសង្ឃឹម និងសេចក្ដីស្រឡាញ់ តែក្នុងចំណោមទាំងបីយ៉ាងនេះ សេចក្ដីស្រឡាញ់គឺសំខាន់បំផុត។+
១៤ ចូរខំឲ្យអស់ពីសមត្ថភាពដើម្បីបង្ហាញសេចក្ដីស្រឡាញ់ តែក៏ត្រូវបន្តខំប្រឹងឲ្យបានអំណោយនៃឫទ្ធានុភាពរបស់ព្រះផងដែរ ជាពិសេសអំណោយជាសមត្ថភាពប្រកាសទំនាយ។+ ២ ព្រោះអ្នកណាដែលទទួលអំណោយជាការនិយាយភាសាផ្សេង អ្នកនោះនិយាយទៅព្រះ មិនមែននិយាយទៅមនុស្សទេ+ ពីព្រោះទោះជាអ្នកនោះនិយាយអំពីអាថ៌កំបាំងដ៏ពិសិដ្ឋ+ដោយឫទ្ធានុភាពរបស់ព្រះក៏ដោយ ក៏គ្មានអ្នកណាស្ដាប់បានដែរ។ ៣ រីឯអ្នកដែលប្រកាសទំនាយវិញ គាត់ពោលពាក្យដែលពង្រឹងកម្លាំងចិត្ត លើកទឹកចិត្ត និងសម្រាលទុក្ខមនុស្ស។ ៤ អ្នកដែលនិយាយភាសាផ្សេងពង្រឹងកម្លាំងចិត្តខ្លួនឯង តែអ្នកដែលប្រកាសទំនាយពង្រឹងកម្លាំងចិត្តក្រុមជំនុំ។ ៥ ខ្ញុំចង់ឲ្យអ្នកទាំងអស់គ្នានិយាយភាសាផ្សេងៗ+ តែខ្ញុំចង់ឲ្យអ្នកទាំងអស់គ្នាប្រកាសទំនាយជាង។+ អ្នកដែលប្រកាសទំនាយគឺឧត្ដមជាងអ្នកដែលនិយាយភាសាផ្សេងៗ លុះត្រាតែមានការបកប្រែ យ៉ាងនេះក្រុមជំនុំអាចមានកម្លាំងចិត្តកាន់តែខ្លាំង។ ៦ ក៏ប៉ុន្តែ បងប្អូនអើយ ប្រសិនបើឥឡូវនេះខ្ញុំមកឯអ្នករាល់គ្នាដោយនិយាយភាសាផ្សេងៗ តើនឹងមានប្រយោជន៍អ្វីដល់អ្នករាល់គ្នា? តែប្រសិនបើខ្ញុំនិយាយទៅអ្នករាល់គ្នាអំពីការបើកបង្ហាញពីព្រះ+ អំពីចំណេះ+ អំពីទំនាយ ឬអំពីសេចក្ដីបង្រៀន នោះអ្នករាល់គ្នានឹងទទួលប្រយោជន៍។
៧ នេះដូចគ្នានឹងឧបករណ៍តន្ត្រីដែរ ដូចជាខ្លុយឬពិណជាដើម។ ប្រសិនបើគេមិនប្ដូរសូរវាឲ្យខ្ពស់ទាបទេ តើធ្វើដូចម្ដេចទើបដឹងថាគេកំពុងលេងបទអ្វី? ៨ ព្រោះប្រសិនបើត្រែបញ្ចេញសូរសំឡេងឥតច្បាស់ តើអ្នកណានឹងត្រៀមខ្លួនទៅច្បាំង? ៩ ដូចគ្នាដែរ ប្រសិនបើអ្នករាល់គ្នាមិននិយាយសម្ដីដែលគេស្រួលយល់ តើធ្វើដូចម្ដេចឲ្យគេដឹងថាអ្នករាល់គ្នាកំពុងនិយាយអ្វី? នោះមានន័យថាអ្នករាល់គ្នាកំពុងនិយាយឥតប្រយោជន៍។ ១០ ក្នុងពិភពលោកមានភាសាជាច្រើន ហើយភាសាទាំងអស់សុទ្ធតែមានអត្ថន័យ។ ១១ ដូច្នេះ ប្រសិនបើខ្ញុំមិនយល់ពាក្យរបស់អ្នកដែលនិយាយមកខ្ញុំ អ្នកនោះនឹងចាត់ទុកខ្ញុំជាជនបរទេស ហើយខ្ញុំនឹងចាត់ទុកអ្នកនោះជាជនបរទេស។ ១២ អ្នករាល់គ្នាក៏ដូច្នេះដែរ ដោយសារអ្នករាល់គ្នាចង់បានយ៉ាងខ្លាំងនូវអំណោយនៃឫទ្ធានុភាពរបស់ព្រះ នោះចូរខំព្យាយាមឲ្យបានអំណោយជាបរិបូរដើម្បីពង្រឹងកម្លាំងចិត្តក្រុមជំនុំ។+
១៣ ម្ល៉ោះហើយ ចូរឲ្យអ្នកដែលនិយាយភាសាផ្សេង អធិដ្ឋានសុំឲ្យមានសមត្ថភាពបកប្រែ។+ ១៤ ព្រោះបើខ្ញុំអធិដ្ឋានដោយនិយាយភាសាផ្សេង ខ្ញុំអធិដ្ឋានដោយសារអំណោយនៃឫទ្ធានុភាពរបស់ព្រះ ប៉ុន្តែក្នុងគំនិត ខ្ញុំមិនយល់ទេ។ ១៥ ចុះតើខ្ញុំត្រូវធ្វើយ៉ាងណា? ខ្ញុំនឹងអធិដ្ឋានដោយអំណោយនៃឫទ្ធានុភាពរបស់ព្រះ តែខ្ញុំក៏នឹងអធិដ្ឋានដោយភាសាដែលខ្ញុំយល់ដែរ។ ខ្ញុំនឹងច្រៀងសរសើរតម្កើងដោយឫទ្ធានុភាពរបស់ព្រះ តែខ្ញុំក៏នឹងច្រៀងដោយភាសាដែលខ្ញុំយល់ដែរ។ ១៦ បើមិនដូច្នេះ ពេលដែលអ្នកសរសើរព្រះដោយអំណោយនៃឫទ្ធានុភាពរបស់លោក តើមនុស្សធម្មតាអាចនិយាយថា«អាមេន»ដូចម្ដេចបាន ពេលដែលអ្នកអរគុណព្រះ? ពីព្រោះអ្នកនោះមិនដឹងថាអ្នកកំពុងនិយាយអ្វីទេ។ ១៧ ពិតមែនតែអ្នកអរគុណព្រះយ៉ាងល្អ ប៉ុន្តែមនុស្សម្នាក់ទៀតមិនទទួលការលើកទឹកចិត្តទេ។ ១៨ ខ្ញុំសូមអរគុណព្រះ ដោយសារខ្ញុំនិយាយភាសាផ្សេងៗច្រើនជាងអ្នកទាំងអស់គ្នា។ ១៩ ទោះជាយ៉ាងនោះក៏ដោយ ក្នុងក្រុមជំនុំ ខ្ញុំសុខចិត្តនិយាយប្រាំម៉ាត់ដែលអ្នកឯទៀតអាចយល់បាន ដើម្បីខ្ញុំអាចបង្រៀនពួកគេ ជាជាងនិយាយភាសាផ្សេងមួយម៉ឺនម៉ាត់ដែលពួកគេមិនយល់។+
២០ បងប្អូនអើយ កុំទៅជាអ្នកដែលមានសមត្ថភាពយល់ដឹងដូចកូនក្មេង+ ប៉ុន្តែអ្នករាល់គ្នាត្រូវធ្វើជាកូនក្មេងចំពោះសេចក្ដីអាក្រក់+ តែចំពោះសមត្ថភាពយល់ដឹង ត្រូវធ្វើជាមនុស្សពេញវ័យវិញ។+ ២១ ច្បាប់ចែងថា៖ «ព្រះយេហូវ៉ា*មានប្រសាសន៍ថា៖ ‹ខ្ញុំនឹងនិយាយទៅកាន់បណ្ដាជននេះ ដោយភាសារបស់ជនបរទេស និងដោយពាក្យរបស់ជនចម្លែក ហើយសូម្បីតែពេលនោះ ក៏ពួកគេនឹងមិនព្រមស្ដាប់ខ្ញុំដែរ›»។+ ២២ ម្ល៉ោះហើយ ការនិយាយភាសាផ្សេងៗ ជាសញ្ញាសម្គាល់សម្រាប់អ្នកមិនជឿ មិនមែនសម្រាប់អ្នកជឿទេ+ រីឯការប្រកាសទំនាយ នោះគឺសម្រាប់អ្នកជឿ មិនមែនសម្រាប់អ្នកមិនជឿឡើយ។ ២៣ ដូច្នេះ ប្រសិនបើក្រុមជំនុំទាំងមូលមកជួបជុំគ្នានៅកន្លែងមួយ ហើយទាំងអស់គ្នានិយាយភាសាផ្សេងៗ រួចមានមនុស្សធម្មតាឬអ្នកមិនជឿចូលមក ពួកគេនឹងនិយាយថាអ្នករាល់គ្នាឆ្កួតហើយ មែនទេ? ២៤ ក៏ប៉ុន្តែ ប្រសិនបើអ្នករាល់គ្នាកំពុងប្រកាសទំនាយ ហើយអ្នកមិនជឿឬមនុស្សធម្មតាម្នាក់ចូលមក សម្ដីរបស់អ្នករាល់គ្នានឹងប្រដៅតម្រង់អ្នកនោះ ហើយជំរុញគាត់ឲ្យគិតពិចារណាយ៉ាងដិតដល់អំពីអ្វីដែលគាត់បានឮ។ ២៥ យ៉ាងនេះ រឿងសម្ងាត់ក្នុងចិត្តរបស់គាត់នឹងត្រូវបង្ហាញឲ្យឃើញ រួចគាត់នឹងក្រាបខ្លួនគោរពព្រះ ដោយប្រកាសថា៖ «ព្រះនៅក្នុងចំណោមអ្នករាល់គ្នាមែន»។+
២៦ បងប្អូនអើយ បើដូច្នេះ តើត្រូវធ្វើយ៉ាងណាវិញ? ពេលដែលអ្នករាល់គ្នាមកជួបជុំគ្នា ម្នាក់ច្រៀងសរសើរព្រះ ម្នាក់បង្រៀន ម្នាក់រៀបរាប់អំពីការបើកបង្ហាញពីព្រះ ម្នាក់និយាយភាសាផ្សេង ហើយម្នាក់ទៀតបកប្រែ។+ ចូរធ្វើអ្វីៗទាំងអស់ដើម្បីពង្រឹងកម្លាំងចិត្តគ្នាទៅវិញទៅមក។ ២៧ ម្យ៉ាងទៀត បើមានអ្នកណានិយាយភាសាផ្សេង ត្រូវមានតែពីរនាក់ប៉ុណ្ណោះ ឬច្រើនបំផុតបីនាក់ ហើយពួកគាត់ត្រូវប្ដូរវេនគ្នា ក៏ត្រូវមានអ្នកបកប្រែម្នាក់ដែរ។+ ២៨ ប៉ុន្តែ ប្រសិនបើគ្មានអ្នកបកប្រែទេ ចូរឲ្យគាត់នៅស្ងៀមក្នុងក្រុមជំនុំ ហើយនិយាយក្នុងចិត្តទៅព្រះ។ ២៩ ចូរឲ្យអ្នកប្រកាសទំនាយពីរឬបីនាក់+និយាយ ហើយអ្នកឯទៀតត្រូវពិចារណាឲ្យយល់អត្ថន័យ។ ៣០ ប៉ុន្តែ ប្រសិនបើម្នាក់ទៀតទទួលការបើកបង្ហាញពីព្រះកាលដែលកំពុងអង្គុយនៅទីនោះ ចូរឲ្យអ្នកដែលកំពុងនិយាយនៅស្ងៀមវិញ។ ៣១ ព្រោះអ្នកទាំងអស់គ្នាអាចប្រកាសទំនាយម្នាក់ម្ដងៗ ដើម្បីឲ្យមនុស្សគ្រប់គ្នាអាចរៀនបាននិងទទួលការលើកទឹកចិត្ត។+ ៣២ ពួកអ្នកប្រកាសទំនាយត្រូវតែគ្រប់គ្រងអំណោយដែលពួកគាត់បានទទួលពីឫទ្ធានុភាពរបស់ព្រះ។ ៣៣ ព្រោះព្រះមិនមែនជាព្រះនៃការខ្វះសណ្ដាប់ធ្នាប់ទេ តែជាព្រះនៃសេចក្ដីសុខសាន្ត។+
ដូចក្នុងក្រុមជំនុំទាំងអស់របស់ពួកអ្នកបរិសុទ្ធ ៣៤ ចូរឲ្យពួកស្ត្រីនៅស្ងៀមព្រោះពួកគាត់មិនបានត្រូវអនុញ្ញាតឲ្យនិយាយក្នុងក្រុមជំនុំឡើយ+ តែពួកគាត់ត្រូវចេះចុះចូល+ ដូចចែងក្នុងច្បាប់។ ៣៥ ប្រសិនបើពួកគាត់ចង់រៀនអ្វីមួយ ចូរឲ្យពួកគាត់សួរប្ដីពេលនៅផ្ទះវិញ ព្រោះបើស្ត្រីនិយាយក្នុងក្រុមជំនុំ នោះជាការអាប់ឱនកិត្តិយស។
៣៦ តើប្រសាសន៍របស់ព្រះបានផ្ដើមចេញពីអ្នករាល់គ្នាឬ? ឬក៏មានតែអ្នករាល់គ្នាប៉ុណ្ណោះដែលបានទទួលប្រសាសន៍របស់ព្រះ?
៣៧ ប្រសិនបើមានអ្នកណាគិតថាខ្លួនជាអ្នកប្រកាសទំនាយ ឬបានទទួលអំណោយនៃឫទ្ធានុភាពរបស់ព្រះ អ្នកនោះត្រូវទទួលស្គាល់ថា អ្វីដែលខ្ញុំបានសរសេរមកអ្នករាល់គ្នាជាបញ្ញត្ដិរបស់លោកម្ចាស់។ ៣៨ ប៉ុន្តែ បើអ្នកណាមិនទទួលស្គាល់សេចក្ដីនោះ ព្រះក៏នឹងមិនទទួលស្គាល់អ្នកនោះដែរ។* ៣៩ ដូច្នេះ បងប្អូនអើយ ចូរបន្តព្យាយាមក្នុងការប្រកាសទំនាយ+ តែកុំហាមអ្នកណាដែលនិយាយភាសាផ្សេងៗឡើយ។+ ៤០ ប៉ុន្តែ ចូរឲ្យអ្វីៗទាំងអស់ធ្វើឡើងយ៉ាងត្រឹមត្រូវ និងដោយរបៀបរៀបរយ។+
១៥ បងប្អូនអើយ ខ្ញុំចង់រំលឹកអំពីដំណឹងល្អដែលខ្ញុំបានប្រកាសប្រាប់ដល់អ្នករាល់គ្នា+ ជាដំណឹងដែលអ្នករាល់គ្នាព្រមទទួល ហើយកំពុងកាន់តាមនៅឡើយ។ ២ តាមរយៈដំណឹងល្អនោះ អ្នករាល់គ្នានឹងទទួលសេចក្ដីសង្គ្រោះ ប្រសិនបើអ្នករាល់គ្នានៅកាន់ខ្ជាប់តាមដំណឹងល្អដែលបានឮពីខ្ញុំ។ បើមិនដូច្នេះទេ អ្នករាល់គ្នាបានទៅជាអ្នកជឿដោយឥតប្រយោជន៍។
៣ ព្រោះខ្ញុំបានប្រាប់អ្នករាល់គ្នាអំពីសេចក្ដីដ៏សំខាន់បំផុត ជាសេចក្ដីដែលខ្ញុំក៏បានទទួលដែរ គឺថាគ្រិស្តបានស្លាប់ដើម្បីលោះយើងពីភាពខុសឆ្គង*ស្របទៅតាមបទគម្ពីរ+ ៤ ហើយថាលោកបានត្រូវបញ្ចុះ+ រួចបានត្រូវប្រោសឲ្យរស់ឡើងវិញ+នៅថ្ងៃទី៣+ស្របទៅតាមបទគម្ពីរ+ ៥ ហើយថាលោកបានលេចមកជួបកេផាស*+ រួចជួបសាវ័កទាំង១២នាក់។+ ៦ បន្ទាប់មក លោកលេចមកជួបបងប្អូនជាង៥០០នាក់នៅពេលតែមួយ។+ បងប្អូនភាគច្រើនពីចំណោមបងប្អូនទាំងនោះ នៅរស់រហូតដល់សព្វថ្ងៃនេះ តែពួកគាត់ខ្លះបានស្លាប់ហើយ។ ៧ ក្រោយមកទៀត លោកលេចមកជួបយ៉ាកុប+ រួចជួបសាវ័កទាំងអស់។+ ៨ ប៉ុន្តែក្រោយបង្អស់ លោកលេចមកជួបខ្ញុំ+ ដែលប្រៀបដូចជាកូនកើតមុនពេលកំណត់។
៩ ព្រោះក្នុងចំណោមពួកសាវ័ក ខ្ញុំជាអ្នកតូចជាងគេ ក៏មិនសមនឹងហៅថាសាវ័កដែរ ពីព្រោះខ្ញុំបានបៀតបៀនក្រុមជំនុំរបស់ព្រះ។+ ១០ ប៉ុន្តែ ដោយសារគុណដ៏វិសេសលើសលប់របស់ព្រះ ខ្ញុំមានមុខងារនេះ។ គុណដ៏វិសេសលើសលប់ដែលលោកមានចំពោះខ្ញុំ មិនបានទៅជាអសារឥតការទេ ព្រោះខ្ញុំបានធ្វើការនឿយហត់ជាងពួកគាត់ទាំងអស់ក្នុងកិច្ចបម្រើ។ ក៏ប៉ុន្តែ មិនមែនខ្ញុំទេ តែជាគុណដ៏វិសេសលើសលប់ដែលព្រះមានចំពោះខ្ញុំ។ ១១ ប៉ុន្តែ ទោះជាខ្ញុំឬពួកគាត់ក៏ដោយ យើងបានផ្សព្វផ្សាយតាមរបៀបនេះ ហើយនេះនាំឲ្យអ្នករាល់គ្នាជឿ។
១២ ប្រសិនបើយើងកំពុងផ្សព្វផ្សាយថាគ្រិស្តបានត្រូវប្រោសឲ្យរស់ពីស្លាប់ឡើងវិញ+ ហេតុអ្វីបានជាអ្នករាល់គ្នាខ្លះនិយាយថាមនុស្សស្លាប់នឹងមិនត្រូវប្រោសឲ្យរស់ឡើងវិញ? ១៣ ប្រសិនបើមនុស្សស្លាប់នឹងមិនត្រូវប្រោសឲ្យរស់ឡើងវិញមែន នោះគ្រិស្តក៏មិនបានត្រូវប្រោសឲ្យរស់ឡើងវិញដែរ។ ១៤ ប៉ុន្តែ ប្រសិនបើគ្រិស្តមិនបានត្រូវប្រោសឲ្យរស់ឡើងវិញទេ នោះការផ្សព្វផ្សាយរបស់យើងច្បាស់ជាគ្មានប្រយោជន៍សោះ ហើយជំនឿរបស់អ្នកក៏គ្មានប្រយោជន៍ដែរ។ ១៥ មិនត្រឹមតែប៉ុណ្ណោះ ប្រសិនបើមនុស្សស្លាប់នឹងមិនត្រូវប្រោសឲ្យរស់ឡើងវិញ នោះព្រះក៏មិនបានប្រោសគ្រិស្តឲ្យរស់ឡើងវិញដែរ+ នេះមានន័យថាយើងបានពោលកុហកអំពីព្រះ+ កាលដែលយើងនិយាយថាព្រះបានប្រោសគ្រិស្តឲ្យរស់ឡើងវិញ។ ១៦ ព្រោះប្រសិនបើមនុស្សស្លាប់នឹងមិនត្រូវប្រោសឲ្យរស់ឡើងវិញ គ្រិស្តក៏មិនបានត្រូវប្រោសឲ្យរស់ឡើងវិញដែរ។ ១៧ ម្យ៉ាងទៀត ប្រសិនបើគ្រិស្តមិនបានត្រូវប្រោសឲ្យរស់ឡើងវិញ ជំនឿរបស់អ្នករាល់គ្នាគឺឥតប្រយោជន៍ទទេ ហើយការខុសឆ្គងរបស់អ្នករាល់គ្នាមិនបានត្រូវអភ័យទោសឲ្យឡើយ។+ ១៨ ឯពួកអ្នកកាន់តាមគ្រិស្តដែលស្លាប់ទៅ ក៏បានវិនាសសាបសូន្យរហូតទៅដែរ។+ ១៩ ប្រសិនបើយើងបានសង្ឃឹមលើគ្រិស្តក្នុងជីវិតនេះតែប៉ុណ្ណោះ យើងជាមនុស្សដែលគួរឲ្យអាណិតជាងគេ។
២០ ក៏ប៉ុន្តែ គ្រិស្តបានត្រូវប្រោសឲ្យរស់ពីស្លាប់ឡើងវិញមែន លោកជាផលដំបូងពីចំណោមពួកអ្នកដែលបានស្លាប់។+ ២១ ព្រោះសេចក្ដីស្លាប់គឺតាមរយៈបុរសម្នាក់+ ដូច្នេះការប្រោសឲ្យរស់ពីស្លាប់ឡើងវិញក៏តាមរយៈបុរសម្នាក់ដែរ។+ ២២ ព្រោះដូចទាំងអស់គ្នាកំពុងស្លាប់ដោយសារអាដាម+ នោះទាំងអស់គ្នាក៏នឹងត្រូវប្រោសឲ្យមានជីវិតឡើងវិញដោយសារគ្រិស្តដែរ។+ ២៣ ប៉ុន្តែ ម្នាក់ៗត្រូវប្រោសឲ្យមានជីវិតឡើងវិញតាមលំដាប់របស់ខ្លួនគឺ គ្រិស្តជាផលដំបូង+ បន្ទាប់មកក្នុងអំឡុងវត្តមានរបស់គ្រិស្ត ពួកអ្នកដែលជារបស់លោកនឹងត្រូវប្រោសឲ្យមានជីវិតឡើងវិញ។+ ២៤ បន្ទាប់មក នៅទីបំផុត លោកនឹងប្រគល់រាជាណាចក្រជូនព្រះជាបិតារបស់លោក ក្រោយពីលោកបានបំផ្លាញការគ្រប់គ្រង អំណាច និងឫទ្ធានុភាពទាំងអស់ឲ្យសាបសូន្យ។+ ២៥ ព្រោះលោកត្រូវគ្រប់គ្រងជាស្ដេច រហូតដល់ព្រះដាក់សត្រូវទាំងអស់នៅក្រោមបាតជើងលោក។+ ២៦ សត្រូវចុងក្រោយដែលជាសេចក្ដីស្លាប់នឹងត្រូវបំផ្លាញឲ្យសាបសូន្យ។+ ២៧ ព្រោះព្រះ«បានដាក់អ្វីៗទាំងអស់ឲ្យចុះចូលនៅក្រោមបាតជើងរបស់លោក»។+ ប៉ុន្តែ ពេលដែលគាត់*និយាយថា៖ ‹អ្វីៗទាំងអស់បានត្រូវធ្វើឲ្យចុះចូល›+ គឺជាក់ស្ដែងហើយថា នេះមិនរួមបញ្ចូលព្រះដែលបានធ្វើឲ្យអ្វីៗទាំងអស់ចុះចូលចំពោះលោកទេ។+ ២៨ ប៉ុន្តែ ក្រោយពីព្រះបានធ្វើឲ្យអ្វីៗទាំងអស់ចុះចូលចំពោះបុត្ររបស់លោក បុត្រនោះនឹងចុះចូលចំពោះព្រះដែលបានធ្វើឲ្យអ្វីៗទាំងអស់ចុះចូលចំពោះបុត្រនោះ+ ដើម្បីឲ្យព្រះធ្វើជាអ្វីៗទាំងអស់ដល់បុគ្គលគ្រប់រូប។+
២៩ បើមិនដូច្នោះទេ តើមានប្រយោជន៍អ្វីចំពោះពួកអ្នកដែលទទួលការជ្រមុជដើម្បីនឹងស្លាប់?+ ប្រសិនបើមនុស្សស្លាប់នឹងមិនត្រូវប្រោសឲ្យរស់ឡើងវិញទាល់តែសោះ ម្ដេចបានជាពួកគេទទួលការជ្រមុជដើម្បីនឹងស្លាប់? ៣០ ចុះហេតុអ្វីក៏យើងត្រូវប្រថុយនឹងគ្រោះថ្នាក់គ្រប់ពេលវេលាដែរ?+ ៣១ បងប្អូនអើយ ការដែលខ្ញុំប្រឈមមុខនឹងសេចក្ដីស្លាប់ជារៀងរាល់ថ្ងៃ នោះជារឿងពិត ដូចមោទនភាពដែលខ្ញុំមានចំពោះអ្នករាល់គ្នាក្នុងគ្រិស្តយេស៊ូជាម្ចាស់របស់យើងដែរ។ ៣២ ប្រសិនបើខ្ញុំបានតយុទ្ធជាមួយនឹងសត្វសាហាវនៅក្រុងអេភេសូរដូចអ្នកឯទៀត*+ តើមានប្រយោជន៍អ្វីដល់ខ្ញុំ? ប្រសិនបើមនុស្សស្លាប់នឹងមិនត្រូវប្រោសឲ្យរស់ឡើងវិញទេ «ចូរយើងពិសាអាហារពិសាស្រាទៅ ព្រោះថ្ងៃស្អែកយើងនឹងស្លាប់ហើយ»។+ ៣៣ កុំឲ្យអ្នកណាបំភាន់អ្នកឡើយ។ ការសេពគប់អាក្រក់បង្ខូចការប្រព្រឹត្តល្អ។*+ ៣៤ ចូរភ្ញាក់ខ្លួន ហើយប្រព្រឹត្តអំពើសុចរិត ហើយកុំប្រព្រឹត្តខុសឡើយ ព្រោះអ្នកខ្លះគ្មានចំណេះអំពីព្រះទេ។ ខ្ញុំនិយាយដូច្នេះ ដើម្បីធ្វើឲ្យអ្នករាល់គ្នាអៀនខ្មាស។
៣៥ ទោះជាយ៉ាងនោះក៏ដោយ អ្នកខ្លះនឹងសួរថា៖ «តើមនុស្សស្លាប់នឹងត្រូវប្រោសឲ្យរស់ឡើងវិញយ៉ាងដូចម្ដេច? តើពួកគេនឹងមានរូបកាយបែបណា?»។+ ៣៦ មនុស្សឥតវិចារណញ្ញាណ! អ្វីដែលអ្នកបានសាបព្រោះ ត្រូវតែងាប់សិន ទើបមានជីវិតឡើងវិញបាន។ ៣៧ អ្វីដែលអ្នកសាបព្រោះ គឺជាគ្រាប់ប៉ុណ្ណោះ មិនមែនជារូបរាងនៃដើមដែលនឹងដុះឡើងនោះទេ ទោះជានោះជាគ្រាប់ស្រូវសាលីឬគ្រាប់ពូជផ្សេងទៀតក៏ដោយ។ ៣៨ ប៉ុន្តែ ព្រះធ្វើឲ្យមានរូបរាងតាមដែលលោកពេញចិត្ត ក៏ឲ្យរូបរាងដល់គ្រាប់នីមួយៗតាមពូជវា។ ៣៩ សាច់ទាំងអស់មិនមែនដូចគ្នាទេ មនុស្សជាតិមានសាច់ម្យ៉ាង សត្វជើងបួនមានសាច់ម្យ៉ាងទៀត សត្វស្លាបមានសាច់ម្យ៉ាង ហើយត្រីមានសាច់ម្យ៉ាងទៀត។ ៤០ មានរូបកាយសម្រាប់ស្ថានសួគ៌+ និងមានរូបកាយសម្រាប់ផែនដី+ តែសិរីរុងរឿងរបស់រូបកាយសម្រាប់ស្ថានសួគ៌គឺម្យ៉ាង ហើយសិរីរុងរឿងរបស់រូបកាយសម្រាប់ផែនដីគឺម្យ៉ាងទៀត។ ៤១ រស្មីរុងរឿងរបស់ដួងអាទិត្យគឺម្យ៉ាង ឯរស្មីរុងរឿងរបស់ដួងខែគឺម្យ៉ាងទៀត+ ហើយរស្មីរុងរឿងរបស់ផ្កាយគឺម្យ៉ាងទៀត។ តាមការពិត ផ្កាយនានាមានរស្មីរុងរឿងផ្សេងៗពីគ្នា។
៤២ ការប្រោសមនុស្សស្លាប់ឲ្យរស់ឡើងវិញក៏ដូច្នោះដែរ។ រូបកាយដែលបានត្រូវសាបព្រោះអាចខូចទៅ តែរូបកាយដែលនឹងត្រូវប្រោសឲ្យរស់ឡើងវិញមិនអាចខូចទៅបានទេ។+ ៤៣ រូបកាយដែលបានត្រូវសាបព្រោះដោយអាប់ឱនកិត្តិយស នឹងត្រូវប្រោសឲ្យរស់ឡើងវិញដោយមានសិរីរុងរឿង។+ រូបកាយដែលបានត្រូវសាបព្រោះដោយមានភាពទន់ខ្សោយ នឹងត្រូវប្រោសឲ្យរស់ឡើងវិញដោយមានឫទ្ធានុភាព។+ ៤៤ រូបកាយដែលបានត្រូវសាបព្រោះជាសាច់ឈាម នឹងត្រូវប្រោសឲ្យរស់ឡើងវិញជាវិញ្ញាណ។ ប្រសិនបើមានរូបកាយសាច់ឈាម ក៏មានរូបកាយវិញ្ញាណដែរ។ ៤៥ បទគម្ពីរចែងដូច្នេះថា៖ «អាដាមដែលជាមនុស្សដំបូង ក៏មានជីវិត*ឡើង»។+ ឯអាដាមចុងក្រោយបានទៅជាវិញ្ញាណដែលផ្ដល់ជីវិត។+ ៤៦ ទោះជាយ៉ាងនោះក៏ដោយ រូបកាយដំបូងមិនមែនជាវិញ្ញាណទេ តែជាសាច់ឈាម ហើយរូបកាយក្រោយមក ជាវិញ្ញាណ។ ៤៧ បុរសទី១មកពីផែនដី ហើយបានត្រូវធ្វើពីធូលីដី+ ឯបុរសទី២មកពីស្ថានសួគ៌។+ ៤៨ បុរសដែលបានត្រូវធ្វើពីធូលីដីគឺយ៉ាងណា ពួកអ្នកដែលបានត្រូវធ្វើពីធូលីដីក៏យ៉ាងនោះដែរ។ ឯបុរសដែលបានទៅស្ថានសួគ៌គឺយ៉ាងណា ពួកអ្នកដែលនៅស្ថានសួគ៌ក៏យ៉ាងនោះដែរ។+ ៤៩ ដូចយើងមានលក្ខណៈ*ដូចអ្នកដែលព្រះបានបង្កើតពីធូលីដី+ នោះយើងក៏នឹងមានលក្ខណៈ*ដូចអ្នកដែលបានមកពីស្ថានសួគ៌ដែរ។+
៥០ ក៏ប៉ុន្តែ ខ្ញុំសូមប្រាប់បងប្អូនថា មនុស្សដែលមានរូបកាយជាសាច់ឈាមមិនអាចទទួលរាជាណាចក្ររបស់ព្រះជាមត៌កឡើយ ហើយអ្វីដែលអាចខូចទៅ ក៏មិនអាចទទួលអ្វីដែលមិនអាចខូចជាមត៌កបានដែរ។ ៥១ មើល! ខ្ញុំប្រាប់អាថ៌កំបាំងដ៏ពិសិដ្ឋមួយដល់អ្នករាល់គ្នា៖ មិនមែនយើងទាំងអស់គ្នានឹងស្លាប់ទេ តែយើងទាំងអស់គ្នានឹងត្រូវផ្លាស់ប្រែ+ ៥២ ក្នុងមួយរំពេច គឺក្នុងមួយប៉ប្រិចភ្នែក ក្នុងអំឡុងពេលដែលត្រែចុងក្រោយបន្លឺឡើង។ ពីព្រោះត្រែនឹងបន្លឺឡើង+ រួចមនុស្សស្លាប់នឹងត្រូវប្រោសឲ្យរស់ឡើងវិញដោយមិនអាចខូចទៅបានឡើយ ហើយយើងនឹងត្រូវផ្លាស់ប្រែ។ ៥៣ ព្រោះអ្នកដែលអាចខូចរលួយ ត្រូវទៅជាអ្នកដែលមិនអាចខូចរលួយ+ ហើយអ្នកដែលអាចស្លាប់ ត្រូវទៅជាអមតៈ។+ ៥៤ ប៉ុន្តែ ពេលអ្នកដែលអាចខូចរលួយ ទៅជាអ្នកដែលមិនអាចខូចរលួយ ហើយអ្នកដែលអាចស្លាប់ ទៅជាអមតៈ នោះអ្វីដែលបទគម្ពីរចែងនឹងបានសម្រេច គឺថា៖ «សេចក្ដីស្លាប់បានបាត់ទៅជារៀងរហូត»។+ ៥៥ «សេចក្ដីស្លាប់អើយ តើជ័យជម្នះរបស់អ្នកនៅឯណា? សេចក្ដីស្លាប់អើយ តើទ្រនិចរបស់អ្នកនៅឯណា?»។+ ៥៦ ទ្រនិចដែលបណ្ដាលឲ្យស្លាប់គឺជាភាពខុសឆ្គង+ តែច្បាប់*ផ្ដល់ឲ្យភាពខុសឆ្គងមានអំណាច។+ ៥៧ ក៏ប៉ុន្តែ សូមអរគុណព្រះ ព្រោះលោកផ្ដល់ជ័យជម្នះឲ្យយើងតាមរយៈលោកយេស៊ូគ្រិស្តជាម្ចាស់របស់យើង!+
៥៨ ដូច្នេះ បងប្អូនជាទីស្រឡាញ់អើយ ចូរពង្រឹងជំហរឲ្យមាំមួនឡើង+ និងមិនត្រូវរង្គោះរង្គើឡើយ ហើយចូរជាប់រវល់ជានិច្ចក្នុងកិច្ចការដ៏ច្រើនរបស់លោកម្ចាស់+ ដោយដឹងថាកិច្ចការដែលអ្នករាល់គ្នាខំប្រឹងធ្វើទាំងនឿយហត់ក្នុងលោកម្ចាស់ នោះមិនមែនឥតប្រយោជន៍ទេ។+
១៦ ឥឡូវ ខ្ញុំសូមនិយាយអំពីការប្រមូលវិភាគទានសម្រាប់ពួកអ្នកបរិសុទ្ធ។+ សូមធ្វើដូចដែលខ្ញុំបានណែនាំក្រុមជំនុំទាំងប៉ុន្មាននៅខេត្តកាឡាទី។ ២ រាល់ថ្ងៃដំបូងនៃសប្ដាហ៍ ចូរអ្នករាល់គ្នាម្នាក់ៗទុករបស់ទ្រព្យខ្លះដោយឡែកតាមដែលខ្លួនមាន ដើម្បីកុំឲ្យចាប់ផ្ដើមប្រមូលវិភាគទាននៅពេលដែលខ្ញុំមកដល់។ ៣ ប៉ុន្តែ ពេលខ្ញុំមកដល់ ខ្ញុំនឹងចាត់ពួកបុរសដែលអ្នករាល់គ្នាបានលើកឈ្មោះឡើងក្នុងសំបុត្រ+ ឲ្យយកអំណោយដ៏សប្បុរសរបស់អ្នករាល់គ្នាទៅក្រុងយេរូសាឡិម។ ៤ ក៏ប៉ុន្តែ ប្រសិនបើខ្ញុំទៅគឺសមជាង នោះខ្ញុំនឹងទៅទីនោះជាមួយនឹងពួកគាត់។
៥ ប៉ុន្តែ ខ្ញុំនឹងទៅឯអ្នករាល់គ្នាក្រោយពីខ្ញុំធ្វើដំណើរកាត់តំបន់ម៉ាសេដូន ព្រោះខ្ញុំត្រូវធ្វើដំណើរកាត់តំបន់នោះ។+ ៦ ប្រហែលជាខ្ញុំនឹងនៅជាមួយនឹងអ្នករាល់គ្នាមួយរយៈ ឬក៏ស្នាក់នៅទីនោះរហូតដល់ផុតរដូវត្រជាក់ ដើម្បីក្រោយមកអ្នករាល់គ្នាអាចជូនដំណើរខ្ញុំមួយកំណាត់ផ្លូវ រួចខ្ញុំនឹងទៅកន្លែងដែលខ្ញុំបម្រុងទៅ។ ៧ ព្រោះខ្ញុំមិនចង់ជួបអ្នករាល់គ្នា ដោយគ្រាន់តែឆៀងចូលមួយភ្លែតនោះទេ តែខ្ញុំសង្ឃឹមថាអាចនៅជាមួយនឹងអ្នករាល់គ្នាយូរបន្តិច+ ប្រសិនបើព្រះយេហូវ៉ា*អនុញ្ញាត។ ៨ ប៉ុន្តែ ខ្ញុំនឹងនៅក្រុងអេភេសូរ+រហូតដល់បុណ្យថ្ងៃទី៥០ ៩ ព្រោះមានទ្វារបើកចំហយ៉ាងធំសម្រាប់ឲ្យខ្ញុំបំពេញកិច្ចបម្រើ+ តែមានអ្នកប្រឆាំងជាច្រើន។
១០ ក៏ប៉ុន្តែ ប្រសិនបើធីម៉ូថេ+មកដល់ កុំធ្វើឲ្យគាត់ភ័យខ្លាចក្នុងចំណោមអ្នករាល់គ្នាឡើយ ព្រោះគាត់កំពុងបំពេញកិច្ចការរបស់ព្រះយេហូវ៉ា*+ដូចខ្ញុំដែរ។ ១១ ដូច្នេះ កុំឲ្យអ្នកណាមើលងាយគាត់។ សូមជូនដំណើរគាត់ដោយសុវត្ថិភាព ដើម្បីគាត់អាចមកឯខ្ញុំ ព្រោះខ្ញុំនិងបងប្អូនឯទៀតកំពុងរង់ចាំគាត់។
១២ ចំណែកអាប៉ូឡុស+ ដែលជាបងប្អូនរបស់យើង ខ្ញុំបានលើកទឹកចិត្តគាត់ម្ដងហើយម្ដងទៀតឲ្យមកឯអ្នករាល់គ្នាជាមួយនឹងបងប្អូន ប៉ុន្តែគាត់មិនទាន់ចង់មកទេឥឡូវនេះ តែគាត់នឹងមកពេលដែលគាត់មានឱកាស។
១៣ ចូរដឹងខ្លួនជានិច្ច+ ចូរកាន់ជំហរមាំមួនក្នុងជំនឿ+ ចូរមានចិត្តក្លាហាន*+ ចូរមានកម្លាំងខ្លាំងក្លាឡើង។+ ១៤ ចូរអ្នករាល់គ្នាធ្វើអ្វីៗទាំងអស់ដោយសេចក្ដីស្រឡាញ់។+
១៥ បងប្អូនអើយ ឥឡូវខ្ញុំសូមបំផុសទឹកចិត្តអ្នករាល់គ្នា៖ អ្នករាល់គ្នាដឹងថាពួកអ្នកផ្ទះរបស់ស្ទេផាណាស ជាផលដំបូងនៅខេត្តអាខេយ៉ា ហើយពួកគាត់ប្រុងប្រៀបខ្លួនជានិច្ចដើម្បីបម្រើពួកអ្នកបរិសុទ្ធ។ ១៦ ចូរឲ្យអ្នករាល់គ្នាបន្តចុះចូលចំពោះមនុស្សបែបនោះ និងចំពោះអស់អ្នកដែលរួមសហការ ព្រមទាំងអស់អ្នកដែលខំប្រឹងធ្វើការ។+ ១៧ ប៉ុន្តែ ខ្ញុំអរសប្បាយដោយសារស្ទេផាណាស+ ភ័រទូណាតុស និងអាខេកុសដែលបានមកជួបខ្ញុំ ព្រោះការដែលពួកគាត់មក នោះជំនួសអ្នករាល់គ្នាដែលមិននៅទីនេះ។ ១៨ ពីព្រោះពួកគាត់បានធ្វើឲ្យខ្ញុំនិងអ្នករាល់គ្នាមានកម្លាំងចិត្តឡើងវិញ។ ដូច្នេះ ចូរទទួលស្គាល់ថាបុរសបែបនោះមានតម្លៃ។
១៩ ក្រុមជំនុំទាំងឡាយនៅខេត្តអាស៊ី*ផ្ដាំសួរសុខទុក្ខ។ អាគីឡានិងព្រីស្កា ព្រមទាំងក្រុមជំនុំដែលជួបជុំគ្នានៅផ្ទះរបស់ពួកគាត់+ ផ្ដាំសួរសុខទុក្ខយ៉ាងស្មោះអស់ពីចិត្ត ក្នុងនាមជាអ្នកកាន់តាមលោកម្ចាស់។ ២០ បងប្អូនទាំងឡាយផ្ដាំសួរសុខទុក្ខអ្នករាល់គ្នា។ ចូរសួរសុខទុក្ខគ្នាទៅវិញទៅមកដោយការថើប។*
២១ ខ្ញុំ ប៉ូល សរសេរពាក្យសួរសុខទុក្ខនេះដោយដៃខ្ញុំផ្ទាល់។
២២ ប្រសិនបើអ្នកណាគ្មានសេចក្ដីស្រឡាញ់ចំពោះលោកម្ចាស់ សូមឲ្យអ្នកនោះត្រូវបណ្ដាសា។ ឱលោកម្ចាស់របស់យើងអើយ! សូមអញ្ជើញមក! ២៣ សូមឲ្យគុណដ៏វិសេសលើសលប់របស់លោកម្ចាស់យេស៊ូនៅជាមួយនឹងអ្នករាល់គ្នា។ ២៤ សូមឲ្យសេចក្ដីស្រឡាញ់របស់ខ្ញុំនៅជាមួយនឹងអ្នកទាំងអស់គ្នាដែលជាអ្នកកាន់តាមគ្រិស្តយេស៊ូ។
ភាសាក្រិច«អាប៉ូស្តូឡូស»មានន័យថា«អ្នកដែលត្រូវគេចាត់ឲ្យទៅ»
ក៏មានឈ្មោះថាពេត្រុសដែរ
មើលនិយមន័យពាក្យ«បង្គោលទារុណកម្ម»
មើលនិយមន័យពាក្យ«បង្គោលទារុណកម្ម»
ឬ«យុគសម័យ»។ មើលនិយមន័យពាក្យ«របៀបរបបពិភពលោក»
មើលសេចក្ដីពន្យល់បន្ថែម ផ្នែកក៥
ឬ«យុគសម័យ»។ មើលនិយមន័យពាក្យ«របៀបរបបពិភពលោក»
ឬ«ប្រហារជីវិតលោកម្ចាស់លើបង្គោល»
មើលសេចក្ដីពន្យល់បន្ថែម ផ្នែកក៥
ឬ«មានគោលដៅតែមួយ»
ឬ«ដ៏ឈ្លាសវៃ»
ឬ«យុគសម័យ»។ មើលនិយមន័យពាក្យ«របៀបរបបពិភពលោក»
មើលសេចក្ដីពន្យល់បន្ថែម ផ្នែកក៥
ក៏មានឈ្មោះថាពេត្រុសដែរ
ឬ«អ្នកដែលនៅក្រោមបង្គាប់»
មើលសេចក្ដីពន្យល់បន្ថែម ផ្នែកក៥
ឬ«ស្កប់ចិត្ត»
ឬ«គ្រូ»។ នេះសំដៅលើអ្នកដែលជាអាណាព្យាបាលឬអ្នកការពារកូនក្មេង
មើលសេចក្ដីពន្យល់បន្ថែម ផ្នែកក៥
ភាសាក្រិច«ផូនៀ»។ មើលនិយមន័យពាក្យ«អំពើប្រាសចាកសីលធម៌ខាងផ្លូវភេទ»
ឬ«ជនជាតិដទៃដែលមិនកាន់សាសនាគ្រិស្ត»
ភាសាក្រិច«សាថាណាស»មានន័យថា«អ្នកប្រឆាំង»ឬ«សត្រូវ»
ន័យត្រង់«ដើម្បីបំផ្លាញសាច់ឈាម»
ឬ«សេពគប់»
មើលនិយមន័យពាក្យ«អំពើប្រាសចាកសីលធម៌ខាងផ្លូវភេទ»
ឬ«សេពគប់»
មើលនិយមន័យពាក្យ«អំពើប្រាសចាកសីលធម៌ខាងផ្លូវភេទ»
ឬ«សេពគប់»
មើលនិយមន័យពាក្យ«អំពើប្រាសចាកសីលធម៌ខាងផ្លូវភេទ»
ឬ«កុំចាញ់បោកអ្នកណាឲ្យសោះ»
មើលនិយមន័យពាក្យ«អំពើប្រាសចាកសីលធម៌ខាងផ្លូវភេទ»
ភាសាក្រិច«ផូនៀ»។ មើលនិយមន័យពាក្យ«អំពើប្រាសចាកសីលធម៌ខាងផ្លូវភេទ»
ភាសាក្រិច«ផូនៀ»។ មើលនិយមន័យពាក្យ«អំពើប្រាសចាកសីលធម៌ខាងផ្លូវភេទ»
នេះសំដៅលើការរួមដំណេកជាមួយនឹងស្ត្រីណាម្នាក់
ភាសាក្រិច«ផូនៀ»។ មើលនិយមន័យពាក្យ«អំពើប្រាសចាកសីលធម៌ខាងផ្លូវភេទ»
សំដៅលើការបំពេញសេចក្ដីត្រូវការខាងផ្លូវភេទ
សំដៅលើការបំពេញសេចក្ដីត្រូវការខាងផ្លូវភេទ
ភាសាក្រិច«សាថាណាស»មានន័យថា«អ្នកប្រឆាំង»ឬ«សត្រូវ»
មើលសេចក្ដីពន្យល់បន្ថែម ផ្នែកក៥
មើលនិយមន័យពាក្យ«ការកាត់ចុងស្បែក»
ន័យត្រង់«អ្នកដែលមិនធ្លាប់រួមដំណេក»
នេះអាចសំដៅលើពោះម៉ាយ
សំដៅលើអ្វីក៏ដោយដែលមិនសមស្របតាមបុគ្គលិកលក្ខណៈ ខ្នាតតម្រា ការប្រព្រឹត្ត ឬបំណងប្រាថ្នារបស់ព្រះ ហើយអ្វីក៏ដោយដែលធ្វើឲ្យល្អក់កករដល់ទំនាក់ទំនងជាមួយនឹងព្រះ
ន័យត្រង់«អ្នកដែលមិនធ្លាប់រួមដំណេក»
ន័យត្រង់«មានទុក្ខវេទនាក្នុងសាច់ឈាមខ្លួន»
ន័យត្រង់«អ្នកដែលមិនធ្លាប់រួមដំណេក»
ន័យត្រង់«អ្នកដែលមិនធ្លាប់រួមដំណេក»
ន័យត្រង់«ដេកលក់ក្នុងសេចក្ដីស្លាប់»
សំដៅលើការភ្លាត់ធ្វើខុស ឬការជួបប្រទះឧបសគ្គចំពោះជំនឿ
ក៏មានឈ្មោះថាពេត្រុសដែរ
នេះសំដៅលើច្បាប់ដែលព្រះបានឲ្យជនជាតិអ៊ីស្រាអែលតាមរយៈម៉ូសេ
ឬ«ការរៀបចំ»
ឬ«កីឡាករ»
ឬ«ដាក់ទោស»
មើលនិយមន័យពាក្យ«អំពើប្រាសចាកសីលធម៌ខាងផ្លូវភេទ»
មើលសេចក្ដីពន្យល់បន្ថែម ផ្នែកក៥
ឬ«នៃរបៀបរបបពិភពលោកនេះ»
ន័យត្រង់«ពែងនៃពរ ដែលយើងឲ្យពរ»
ភាសាក្រិច«ដាយម៉ូនីអន»សំដៅលើពួកទេវតាអាក្រក់
មើលសេចក្ដីពន្យល់បន្ថែម ផ្នែកក៥
មើលសេចក្ដីពន្យល់បន្ថែម ផ្នែកក៥
មើលសេចក្ដីពន្យល់បន្ថែម ផ្នែកក៥
ន័យត្រង់«ប្រច័ណ្ឌ» សំដៅលើការធ្វើឲ្យព្រះយេហូវ៉ាទាស់ចិត្ត ដោយមិនគោរពប្រណិប័តន៍លោកផ្ដាច់មុខ
មើលសេចក្ដីពន្យល់បន្ថែម ផ្នែកក៥
ឬ«ប្រមុខ»
ឬ«ប្រមុខ»
ជាទោសដែលទទួលដោយសារបានធ្វើអំពើប្រាសចាកសីលធម៌ខាងផ្លូវភេទ
នេះសំដៅលើការបាត់បង់ចំណងមិត្តភាពជាមួយនឹងព្រះ
មើលសេចក្ដីពន្យល់បន្ថែម ផ្នែកក៥
សំដៅលើអ្នកមិនជឿ
ឬ«ឫទ្ធានុភាពរបស់ព្រះ»
ឬ«ខ្ញុំឥតប្រយោជន៍សោះឡើយ»
ឬ«សេចក្ដីស្រឡាញ់មិនចេះប្រច័ណ្ឌ»
ឬ«មិនឈ្លើយ»
ឬ«នូវកំហុសរបស់គេ»
ឬ«មិនដែលបរាជ័យ»
សំដៅលើការនិយាយភាសាផ្សេងៗបានដោយការអស្ចារ្យ
ន័យត្រង់«នឹងទល់មុខគ្នា»
មើលសេចក្ដីពន្យល់បន្ថែម ផ្នែកក៥
ឬប្រហែលជាមានន័យថា«បើមានអ្នកណាល្ងង់ ចូរឲ្យអ្នកនោះនៅល្ងង់ចុះ»
សំដៅលើអ្វីក៏ដោយដែលមិនសមស្របតាមបុគ្គលិកលក្ខណៈ ខ្នាតតម្រា ការប្រព្រឹត្ត ឬបំណងប្រាថ្នារបស់ព្រះ ហើយអ្វីក៏ដោយដែលធ្វើឲ្យល្អក់កករដល់ទំនាក់ទំនងជាមួយនឹងព្រះ
ក៏មានឈ្មោះថាពេត្រុសដែរ
តាមមើលទៅនេះសំដៅលើដាវីឌ
ឬប្រហែលជាមានន័យថា«តាមទស្សនៈមនុស្ស»
ឬ«បង្ខូចសីលធម៌ល្អ»
មើលនិយមន័យពាក្យ«ជីវិត»
ន័យត្រង់«រូប»
ន័យត្រង់«រូប»
នេះសំដៅលើច្បាប់ដែលព្រះបានឲ្យជនជាតិអ៊ីស្រាអែលតាមរយៈម៉ូសេ
មើលសេចក្ដីពន្យល់បន្ថែម ផ្នែកក៥
មើលសេចក្ដីពន្យល់បន្ថែម ផ្នែកក៥
ឬ«ចូរប្រព្រឹត្តឲ្យដូចបុរស»
មើលនិយមន័យពាក្យ«អាស៊ី»
គ្រិស្តសាសនិកធ្លាប់សួរសុខទុក្ខគ្នាដោយការថើបពេលជួបគ្នា