Aaqqiagiinngissut aaqqinniapallattaruk!
QATANNGUMMIT ajuallatsinneqarnikuuit allaat ikinngutigiinnersi ajoquserlugu? Ikinngutigiittuarumallusi eqqortumik pissutiginiagaqarlutit iliuuseqapallagit.a
Assersuusioriarta: Saaneq napinikoq eqqortumik mamissappat nakorsiaanneqapallattariaqarpoq. Taamaattoqanngippat annernartuassaaq. Allaallumi saaneq equngalluni mamikkiartulersinnaavoq innarluutinngorsinnaallunilu.
Saarngup napisimaneratulli uppeqammut attaveqarnerput innarlerneqarpat aaqqinniapallattariaqarparput. Taamaaliunngikkutta misigissutsitsigut anniartuassaagut. Kamaqqajuaannarutta ikinngutigiinnerput annaasinnaavarput. Jiisusi ima oqarpoq: “Unnerluussisit isumaqatiginiapallassavat.” (Mat 5:25) Taamaattumik ikinngutit saamasumik saaffigiuk ammasumillu oqaloqatigalugu. Sooq tamanna sapernarsinnaava? Pissutaasinnaasut uku marluk eqqarsaatigikkit.
Siullertut, immaqa ajornartorsiut pillugu oqaloqatigiinnissarsi merserigakku aaqqiagiinngissut iliuuseqarfigerusunngilat.b Kristumiut arnat, Euudia Syntykilu, aaqqiagiinngissuteqartuarsimapput. Taamaannerat sivisusimassaaq, Paulusimmi ungasissumiitilluni Romami tamanna tusaamavaa. Taamaattumik eqqisseqatigiinnissaannik kajumissaarpai. (Flp 4:2) Maniguullutik ammasumillu oqaloqatigiikkunik isumakkeerfigeqatigiikkunillu ikinngutigeeqqilersinnaapput.
Aappaattut, immaqa isumaqarputit isumaqatigiinngissuteqarfigisat pisuusoq kukkussutinilu nassuerutigalugu saaffiginneqqaassasoq. Kinali pisuunersoq pingaartinnagu ikinngutigeeqqilernissarsi soqutiginerussavat. Saarngup napisimasup mamilluarnissaa nakorsaasup anguniartarpaa napisimaneranut pissutaasut pingaartinnagit. Taamatuttaaq ikinngutit oqaloqatigilerukku kina aaqqiagiinngissummut pisuunersoq soqutigissanngilat. Eqqaamajuk ikinngutigiittuarnissarsi qanoq pingaaruteqartigisoq, aaqqinnissaanullu sapinngisannik iliuuseqarit.
Soormi ullumi uppeqatillu ikinngutigeeqqilernissarsi siunertaralugu oqaloqatigiikkussi? “Ulloq naatinnagu kamassimajunnaassaasi.” (Ef 4:26) Aaqqiagiinngissut aaqqinniapallakkukku ‘eqqisseqatigiinnikkut ataasioqatigiinnerput’ illersussavat. – Ef 4:1-3.
a Annikitsunik aaqqiagiinngissuteqartut marluullutik oqaloqatigiinnikkut isumakkeerfigeqatigiissapput. (Mat 5:23, 24) Aaqqiagiinngissut annertuppat Matiusi 18:15, 16 maleruassavaat, isumaqatigiissinnaanngikkunilli utoqqaanertanut ikiortissarsiussapput. – Mat 18:17.
b Qatanngummit ajuallatsinneqarsimagutta ikinngutigiinnerpulli ajoqusinngippat ajuallatsinneqarnerput puiorniarlugu aalajangersinnaavugut. – Uss 26:20.