Inuusuttut aperipput:
Sooruna ikinnguteqangaatsiarsinnaanngitsunga?
„Ikinngutigalu arnaq ataatsimut soqutigisarpassuaqarlutalu nuannisartaraluarpugut. Ikinngutigiinnerpulli aseroriartulerpoq. Tamanna isumatsassutigeqaara.“ — Maria
KIISAMI ikinngutitaarputit ilinnik paasinnillunilu nuannarinnittumik. Ikinngutigiinnersili aseroriartulerpoq. Annaanniarsarigaluarpat, iluatsitsinalli.
Ikinngut ilumoorfiginnittoq nalilerujussuuvoq. (Ussatit 18:24) Ikinngutigiinnermik taama ittumik annaasaqarneq annernartorujussuusinnaavoq. Biibilimi oqaluttuarineqarpoq Job ikinngutiminit pakatsisinneqarami ima nimaarsimasoq: „Qaniginerpaasama imminiiginnarpaannga, ilisarisimannitsimalu puiorpaannga.“ (Job 19:14) Qularnanngitsumik taamatut misigaatit ikinngutigiinnermik qanittukkut annaasaqaravit. Angut inuusuttoq Patrickimik atilik oqarpoq ikinngutigiinnerup aserornera „soorlumi tassa asasamik toqusoorneq“. Taavami ikinngutigisarsimasatit tamaasa taamatut misigisaqarfigisarsimagukkit?
Ikinngutigiinnerit aserujasut
Eastwood Atwaterip atuakkiaani Adolescence-mi allassimavoq inuusuttuaraanermi ikinngutigiinnerit allanngoraqqajaasartut, pingaartorsiutaariarlutik soqutigineeruttarlutik, ikinngutigiillu ikinngutigiikkunnaarnerat misigissutsikkut annernartumik kinguneqakulasartoq. Sooq inuusuttut akornanni ikinngutigiinnerit taama aserukulatigippat? Taamaappoq inersimasunngoriartortilluni misigissutsit, isummat, anguniakkat soqutigisallu allanngoriartortarmata. (Naleqqiuguk Korintumiunut agdlagkat sujugdlît 13:11.) Immaqa inuusuttuaqqat ilaasa paasisarpaat kammalaatiminnit siuarsimanerullutik — immaqaluunniit kinguarsimanerullutik.
Ikinngutigiit inersimasunngoriartortillutik avissaariartorsinnaasarput — imaanngitsoq imminnut kamaakkamik, kisianni inuunerminni tamarmik immikkut assigiinngitsunik anguniagaqalerlutillu, soqutigisaqalerlutillu pingaartitaqalersimagamik. Immaqa ilaannikkut ajunnginnerusarpoq ikinngutigiinneq kipitiinnassallugu. Utoqqaanerujartortillutit anersaamullu tunngasut ilumoorunnerujartortillugit immaqa paasilissavat ikinngutivit ilaat ilinnut ajunngitsumik sunniuteqanngitsut. (1 Korintumiut 15:33) Nuannaraatit, ilagisarneralli qangatut nuannaritigiunnaarpaat.
Ikinngutigiinnermut aseruutaasinnaasut
Ikinngutitaaraluaraangavilli iluatsitsinngitsoortuaannarnerit sumik pissuteqarsinnaava? Imaassinnaavoq inuttut pissuseqartutit taamaatittariaqakkannik. Soorlu sinnganeq ikinngutigiinnermut aseruutaasinnaavoq. Takorlooriaruk ikinnguteqartutit ilinnit aningaasaateqarnerullunilu kusanarnerullunilu nuannarineqarnerusumik. Ilinnit allanit sammineqarnerugaangat ilukkut ajorusuutigisarpiuk? „Sinngatuuneq saarnit aseruuttoornerattut ippoq.“ (Ussatit 14:30) „Ikinngutiga nuannarineqarnera uangalu piginngisannik perpassuaqarnera pillugu sinngagilluinnarsimavara,“ Keenon nassuerpoq, „tamannalu ikinngutigiinnitsinnut sunniuteqarpoq.“
Piginnikkusussuseq aamma pissusiuvoq pitsaanngitsoq. Ikinngutivit allat ilaginerujartuinnarpagit illillu ilaginikinnerujartuinnarpatit qanoq qisuariassavit? Niviarsiaraq ima nassuerpoq: „Ikinngutikka allanik oqaloqateqaannaraangataluunniit sinngasarsimavunga.“ Immaqa allaat ikinngutit allanik ilaqaraangat killuussisutut, ilinnik ilumoorfiginninngitsutut, isigisarpat.
Naammalluinnarnissamik ilimasuffiginninneq aamma ikinngutigiinnermut ajoqutaalluinnarsinnaavoq. Assersuutigalugu, paasivat ikinngutivit ingussimagaatit, immaqa allaat allanut oqaatigeqqusaanngitsut oqaatigisimallugit. (Ussatit 20:19) „Tatigiunnaarluinnarpara!“ immaqa kamallutit nillerputit.
Ikinngutigiit tamarmik iliuuseqartariaqarput
Sinnganeq, piginnikkusussuseq naammalluinnarnissamilluunniit ilimasuffiginninneq pissutigalugu allanut attaveqarnerit tamaviaarnartuuppat imminut ima apereriarit: ’Ikinngutigiinneq sumik kissaateqarfigaara?’ Takorloortarpiuk ikinngut tassaasoq ilinnut maleruutiinnartoq, kiffaq peqqussutinnut tamanut naalattoq? Nammineq iluanaarnissat piinnarlugu imaluunniit ataqqineqarnerulernissat nuannarineqarnerulernissaalluunniit piinnarlugu ikinngutitaarusuttarpit? Ikinngutinnit 100 procentimik sammineqartarnissat naatsorsuutigaajuk, taamaalilluni allanik ilaqarnissamut inissaarutingajallugu? Taamaappat ikinngutigiinneq pillugu isummat allanngortittariaqarpat.
Biibilimi oqaatigineqarpoq tunisinissamut, tunisinnissamuinnaanngitsoq, piumassuseqaraanni allanut ajunngitsumik attaveqartoqalersinnaasoq. Matîuse 7:12-imi Jesus Kristus ima oqarpoq: ’Taamaattumik inunnut qanorluunniit iliorfigeqqugussi ilississaaq taamatut iliorfigisigik.’ Ikinngutinut arlaannik ilimasuffiginninneq pissusissamisuuginnarpoq. Atuakkami Understanding Relationships-imi ima allassimasoqarpoq: „Ikinngut takorloorajupparput tassaasoq inuk unneqqarillunilu ammasoq, uagutsinnik asannittoq, isertukkaminik ajornartorsiutiminillu uagutsinnut aniatitsisartoq, pisariaqartikkaangatsigu ikiuisartoq, uagutsinnik tatiginnittoq . . . isumaqatigiinngissutinillu takkuttoqaraangat pissutsit oqaloqatigiissutiginissaannut piareersimasartoq.“ Sulili allaqarpoq. Atuakkami nangilluni allassimavoq: „Tamakkua tassaapput inuit ikinngutimik iliuuserisassaatut ilimagisaat akerlianillu namminneq ikinngutiminnut iliuusererusutaat.’ — Uagut allanneri uingasunngortippavut.
Jesusip qanimut ikinngutini qanoq iliorfigisarsimagai malugeriaruk. Ajoqersukkaminut ima oqarsimavoq: ’Kiffanik taassaarpassi, kiffap naalakkami suliai nalummagit; kisianni ikinngutinnik taavassi.’ Jesusilli ajoqersukkaminik ikinngutiginninnera tamanna taakkua taassumunnga iliuuserisinnaasaannik tunngaveqarpa? Naamik, imali oqarpoq: ’Asanninneq tamanit anneq tassa ikinngutini pillugit inuunini iperaraanni.’ (Juánase 15:13, 15) Ikinngutigiit tamarmik immikkut asanninnermik imminut pilliutigeriaannaassuseqartumik ersersitsisarpata assortuussutit ajornartorsiutillu anigorneqarsinnaasassapput.
Ajornartorsiuteqaleraangat
Takorlooruk ikinngutit ilinnit aningaasaateqarnerullunilu ilinnit piginnaaneqarnerusoq. Tamanna nuannaarutigisinnaassavat namminissarsiunngitsumik asannissuseqaruit. Eqqaamajuk Biibilimi allassimammat ’asannittoq sinnganeq ajortoq’. — 1 Korintumiut 13:4.
Imaluunniit oqarta ikinngutit arlaannik ajuallaatigisannik oqartoq iliuuseqartorluunniit. Tamanna pissutigiinnarlugu ikinngutigiinnersi aserussava? Pinngitsoorani taamaattariaqanngilaq. Apustili Paulus pakatsisorujussuusimavoq ajoqersuiartortitatut angalanermini siullermi Markusip qimaannarmani. Imami pakatsisimatigaaq tullianik ajoqersuiartortitatut angalalerami Markus ilagiumanngivillugu. Allaat tamanna pillugu Markusip illua, Barnabas, oqqateqatigisimavaa. Ukiulli arlallit qaangiuttut Paulusip Markus ajunngitsumik eqqartorpaa, Romamullu qaaqqullugu imminut kiffartoriartoqqullugu. Saqitsaannertik nalunanngitsumik aaqqissimavaat. — apustilit suliait 15:37-39; 2 Timûtiuse 4:11.
Ikinngutigiinnissinni ajornartorsiutinik takkuttoqaraangat taamatut iliorniartarsinnaavutit. Sapinngisamik piaarnerpaamik pissutsit aaqqinniartarsigik. (Evfisumiut 4:26) Inerniliinnginninni kamallutilluunniit pasilliinnginninni ikinngutivit pissutsinut qanoq oqaasissaqarnera tusarnaaqqaartaruk. (Ussatit 18:13; 25:8, 9) Immaqa paatsooqatigiissimavusi. Taavami ikinngutit siuneqassutsimik ersersitsinngitsoorsimappat? Eqqaamassavat ikinngutit aamma inuinnaammat. (Tussiaat 51:7; 1 Juánase 1:10) Tamatta kingorna peqqissimissutigisatsinnik oqartoorlutalu iliuuseqartoortarpugut. — Naleqqiuguk Nalunaajaasup oqaasii 7:21, 22.
Taamaakkaluartorli oqaatigisinnaavat ikinngutivit iliuusia qanoq ajuallaatigisimatigigit. Immaqa ikinngutit ilumoorluni utoqqatsissaaq. Piviusumik asannittoq eqqunngitsumik iliorfigineqarnerminik tamanik naatsorsuisanngimmat immaqa pisimasoq puiuinnarsinnaassavat. (1 Korintumiut 13:5, NV) Keenonip ikinngutigiinnertik aserorsimasoq kingumut eqqarsaatigalugu ima oqaluttuarpoq: „Suut tamaasa uteqqissinnaagaluarukkit ikinngutima kukkujuitsuunissaa ilimagissanngikkaluarpara. Tusarnaarnerussagaluarpara tapersersornerullugulu, kukkunerilu angisoorujussuanngortittassanagit. Maanna paasisimavara ikinngutigiinneq iluatsissappat ajornartorsiutit unamminiarnartullu anigorniarlugit suleqatigiissinnaasariaqartoq.“
Qanoq iliussavit ikinngutivit kissaatigisaraluattut qangatut ilagivallaarunnaarpatit. Imaassinnaava ikinngutinnut sammeqquallaartutit? Tamanna ikinngutigiinnissinnut aseruutaasinnaavoq. Ikinngutigiilluartut piumasaminnik iliorsinnaanissaminnut imminnut kiffaanngissuseqangaatsiartittarput. (Naleqqiuguk Ussatit 25:17.) Allanik peqateqartarnissamut periarfissarpassuupput. Aamma Biibilimi kristumiut kajumissaarneqarput ikinngutit eqqarsaatigalugit ’neruttussasut’. (2 Korintumiut 6:13) Tassa ikinngutaasoq tamatuminnga maleruaappat ilumoorfiginninngitsutut isiginissaanut pissutissaqanngilaq.
Iluamik oqassagaanni, inummut ataasiinnarmut aalajangersimasumut atavallaarnissaq pitsaavallaanngilaq. (Tussiaat 146:3) Peqataannaanngitsunik ikinngusersornissaq silatusaarneruvoq, soorlu angajoqqaanik, utoqqaanertanik inersimasunillu allanik isumassuisunik akisussaaffimminnillu misigisunik. Ana oqaluttuarpoq: „Anaanaga ikinngutiginerpaasaraara. Sunik tamanik oqaloqatigisinnaavara.“
Ataavartumik ikinnguteqarsinnaavutit
Biibilimi ima allassimasoqarpoq: ’Tamassi isumaqatigiigitsi ilasseqatigiillusilu qatanngutigiinnillu asannillusi nallittuillusilu qanilaarlusilu.’ (1 Pîtruse 3:8) Allanut tunniusimasuuguit, misiginneqataasuuguit, ileqqussatigut assuarnaattuaruit piviusumillu isumassuisuuguit ikinnguteqartuaannarsinnaassaatit. Ilumoorpoq ataavartumik ikinngutigiissagaanni iliuuseqartariaqarmat aalajangeriataallaqqissuseqartariaqarlunilu. Ilungersornerli imminut akilerluarsinnaassaaq.
Davidip Jonathanillu qanimut ikinngutigiilluinnarsimanerat Biibilimi oqaluttuarineqarpoq. (1 Samuel 18:1) Taakkua sinngagiilaartarnitik inuttullu ’equngassutitik’ anigorsinnaasimavaat. Tamanna ajornarsimanngilaq Davidip Jonathanillu tamarmik Jehova Guutimik ikinnguteqarneq taassuminngalu ilumoorfiginninneq tamanit pingaarnertut isigimmatigik. Taakkua maligassiaat malinniaruk, taava Guutimik mianerinnittunik ikinnguteqartuaannarnissat sapernavianngilat. (gE 22/5 96)
[Qupp. 26-mi assiliartat]
Inuit ilaasa ikinngutertik allanik ikinnguteqarpat ilumoorfiginninngitsutut isigisarpaat