Politikkikkut eqqissiviil­liorneq Biibilimi siulittuutigineqartoq

Nalitsinni inuppassuit politikkimut tunngasutigut avissaar­tuupput. Inatsisit inuunerminnut sunniuteqartut nuannarin­ngilaat, naammagit­taalliorlutik isummatik sakkortuumik annittarpaat. Aamma naalakkersuisut ilaat – ilaatigut politikerit atorfilittallu – isumaqatigiinneq ajorput allallu isumaat soqutigisarnagit. Isumaqatigiin­nginnerit taamaattut avissaar­tuunnermik kinguneqarsin­naasarmata naalakkersuisut ilaannikkut pisariaqartunik naammas­sisaqarsinnaaneq ajorput.

Nunarsuaq tamakkerlugu politikkikkut eqqissiviil­liortoqarpoq, ingammilli USA-mi Tuluillu Nunaanni eqqissiviil­liornerit maluginiagas­saapput. Sooq? Taamaannissaa Biibilimi siulittuutigineqarmat. Taamaat­toqarneratalu nalaani Guutip kunngeqarfiata akuliulluni nunarsuarmi pissutsit allanngor­tissavai.

“Ullussani kingullissani” politikkikkut eqqissiviil­liornerit

Biibilip atuagartaasa ilaanni, Danielimik allakkani, pissanganartumik siulittuuteqarpoq. Tassani Guuti “ullussani kingullissani piumaar­tussanik” paasititsivoq. Oqaatsit “ullussani kingullissani” qanoq paasisariaqarpat? Pruffiitip Danielip nalimini pisussat pinnagit kingusin­nerujus­suakkut piumaartussat siulittuutigai, pisussallu taakku inunnut tunngatillugu allannguerujus­suarumaarput. – Danieli 2:28.

Guutip Babylonnimi kunngi sinnattor­tillugu siulittuummik tamatuminnga paasitippaa. Kunngip sinnattorluni inuusaliarujussuaq, niaquaniit isigaanut saffiugassanik assigiin­ngitsunik sanaajusoq, takuaa. Pruffiitip Danielip nassuiarpaa inuusaliaq taanna naalagaaf­fissuarnut piffissap ingerlanerani pissaaneqaler­tussanut pissaaneerut­tussanullu assersuutaasoq.a Naggataatigut inuusaliaq ujaqqamik eqqorneqarluni sequmippoq. Ujarallu tamanna Guutip kunngeqarfianut, tassa naalakkersuisunut taassuma toqqagaanut, assersuutaavoq. – Danieli 2:36-45.

Siulittuutigineqarpoq Guutip kunngeqarfiata naalakkersuisut inuit pilersitaat tamaasa taarsissagai. Jiisusip Kunngeqarfik tamanna eqqaavaa Ataatarpuumi ilinniartitani ima qinoqqugamigit: “Kunngeqarfiit tikiulli.” – Matiusi 6:10.

Politik­kikkulli eqqissiviil­liortoqarnissaa sumi siulittuutigineqarpa? Maluginiaruk inuusaliap isigai akuitsuunatik “ilaatigut saviminermit ilaatigullu marrarmit” sanaajusut. (Danieli 2:33) Inuusaliap sinnerani saffiugassat assigiin­ngitsut akuitsuupput. Tassa naalagaaf­fissuit ilaat ataaseq naalagaaf­fissuarnit allanit allaanerussaaq. Qanoq tassa? Danielip siulittuutaani ima nassuiar­neqarpoq:

Siulittuummi inuusaliap isigai naalagaaf­fissuarmut politikkikkut eqqissiviil­liortoqarfiusumut assersuutaapput. Naalagaaf­fissuaq tamanna innuttaminit pissaanikil­lisinneqassaaq.

Danielip siulittuutaa nalitsinni eqquuppoq

Inuusaliap isigai naalagaaf­fissuarmut nalitsinni pissaaneqartumut, tassa USA-p aamma Tuluit Nunaata iligiin­nerannut, assersuutaapput. Taamaan­neranut sunik uppernarsaateqarpugut?

Inuusaliap isigai “ilaatigut saviminermit ilaatigullu marrarmit” sanaajugamik qajannarput. (Danieli 2:42) Nalitsinni USA-mi aamma Tuluit Nunaanni inuiaqatigiinni avissaar­tuunneq pissutigalugu nunat taakku pissaanikillipput. Assersuutigalugu nunani taakkunani inuit nunaqqatigiittut ilaat akerleriittarput. Innuttaasut akerlius­sutsimik takutitsisarput. Politikerit qinikkat aalajangigassat assigiin­ngitsut pillugit isumaqatigiinneq ajorput. Isumaqatigiin­ngittoqangaarmallu naalakkersuisut ilaannikkut iliuusererusutatik naammas­sisinnaasan­ngilaat.

Danielip siulittuutaani eqqaaneqartut ilaat qanorlu eqquunnersut sammeriartigit.

Siulittuut: “Naalagaaffik taanna ataasiujun­naarluni aggorneqarumaarpoq. Taamaattorli ilaatigut saviminertut qajannaatsuussaaq.” – Danieli 2:41.

Isumaa: USA-mi aamma Tuluit Nunaanni politikkikkut avissaar­tuuttoqaraluartoq nunat taakku marluk sakkutooqarnikkut pissaaneqangaarput. Taamaammat savimerngup qajannaatsuuneratut pissaaneqarput nunarsuarmiit­tunullu tamanut sunniuteqarsin­naallutik.

Eqquunnera

2023-mi USA-p aamma Tuluit Nunaata sakkutooqarnermut katillugit aningaasar­tuutaasa qanoq annertutiginerat maluginiarnarpoq. Tassami nunat sakkutooqarnermut aningaasar­tuuteqar­nerpaasut aqqaneq-marluk allat katillugit aningaasar­tuutaat taakkunannga annikin­nerupput. – Stockholm International Peace Research Institute.b

“USA aamma Tuluit Nunaat illersoqatigiin­nissamut tunngatillugu aalajaaf­figeqatigiin­nerpaamik, annertunerpaamik siuarsimanerpaamillu attaveqatigiipput. … Suleqatigiippugut, tapersersoqatigiippugut iligiittullu sorsoqatigiilluta.” – Strategic Command.c

Siulittuut: “Isigaasa inuaasa ilaatigut saviminiunerat ilaatigullu marraanerat isumaqarpoq naalagaaffik taanna ilaatigut qajannaatsuussasoq ilaatigullu qajannar­tuussalluni.” – Danieli 2:42.

Isumaa: USA aamma Tuluit Nunaat sakkutooqarnikkut pissaaneqangaaraluarlutik iliuusererusutamik ilaannaat naammas­sisinnaasarpaat. Tassami naalakkersueriaasiat demokratiiummat pilersaarutinut isumaqataasut amerlanerus­suteqan­ngikkaangata piviusun­ngortin­neqarsin­naasanngillat.

Eqquunnera

“Politikkimut tunngatillugu ilisimatuut ilaat oqarput politikkikkut avissaar­tuunnerit pissutigalugit [USA] nunanut allanut iliuuserisin­naanerak­kamisut iliorsin­naanngitsoq. Assersuutigalugu isumannaal­lisaanermut niuernermullu tunngatillugu taamaappoq.” – The Wall Street Journal.d

“[Tuluit Nunaanni] politikkikkut aatsaat taama eqqissiviil­liortoqar­tigivoq. Politik­kerillu eqqissiviil­liornerit iliuuseqarfigeq­qaartariaqaramikkit innuttaasut pisariaqar­titaattut allanngor­titsinissamut piffissaaruttarput.” – Institute for Government.e

Siulittuut: “Taakku inuit kinguaavinik akusaajumaarput; imminnulli ataqatigiis­sinnaas­sanngillat.” – Danieli 2:43, New World Translation.

Isumaa: Innuttaasut naalakkersuisunut sunniuteqaqataagaluarlutik taakkua naammassisaat naammagineq ajorpaat.

Eqquunnera

“Ullumikkut Amerikamiut politikki politikerillu qinikkat isumalluarfigin­ngilluin­narpaat.” – Pew Research Center.f

“[Tuluit Nunaanni] innuttaasut naalakkersuisunik, politikerinik oqartus­saasunillu maanna ukiuni 50-ini aatsaat taama tatigin­ninngitsigaat.” – National Centre for Social Research.g

Siunissaq pillugu Danieli qanoq siulittuiva?

Danielip siulittuutaa naapertorlugu naalakkersuisut inuit pilersitaasa Guutip kunngeqarfianit taarser­neqanngitsiar­neranni USA-p Tuluillu Nunaata iligiinnerat nunarsuarmi pissaaneqar­nerpaajussaaq. – Danieli 2:44.

Biibilip atuagartaani allami, Saqqummersitani, piffissaq tamanna pillugu aamma siulittuuteqarpoq. Tassani paasivarput “nunarsuarmi tamarmi kunngit” Jehovamuth Guutimut akerliullutik “Guutip Killeqan­ngitsumik Pissaanillip ullussarsuani sorsunnissamut” katersuutissasut. (Saqqummersitat 16:14, 16; 19:19-21) Sorsunneq tamanna Harmagedonnimik taaneqarpoq. Tamatumani Jehovap nunarsuarmi naalagaaffiit tamaasa suujunnaarsissavai. Tamatumalu kingorna naalagaaf­fissuit Danielip siulittuutaani eqqaaneqartut tamarluinnarmik piujunnaavissapput.

Paasisaqar­nerorusukkuit allaaserisaq “Harmagedonimi sorsunneq suua?” takuuk.

Danielip siulittuutaa qanoq iluaqutigisinnaagit

USA-mi aamma Tuluit Nunaanni politikkikkut eqqissiviil­liortoqarnera Biibilimi sukumiisumik siulittuutigineqareersimavoq. Tamannalu pillugu paasisaqar­neruguit maannakkut nunarsuarmi pisut allatorluinnaq isiginnit­taaseqarfigilis­savatit. Ukumi paasissavatit:

• Paasissavat sooq Jiisusip malinnitsini politikkimut akuliuteq­qunnginnerai. (Johannesi 17:16) Aamma paasissavat sooq Jiisusi, Guutip kunngitut toqqagaa, ima oqartoq: “Kunngeqarfiga nunarsuarmeersuunngilaq.” – Johannesi 18:36.

• Guutip kunngeqarfiata qanittukkut akuliulluni Guutip inunnut neriorsuutaanik nuanningaartunik piviusun­ngortitsinissaata upperiler­nissaanut tunngavis­saqarlualissaatit. Taamaalil­lutillu neriuuteqalissaatit. – Saqqummersitat 21:3, 4.

• Nunat akunnerminni akerleriinneri pissutigalugit nunarsuarmik aseruisoqarnissaa ernumas­sutigiun­naassavat siunissarlu isumalluarfigis­sallugu. – Tussiaat 37:11, 29.

Danielip siulittuutaani inuusaliap isigaasa kingulliullugit eqqaaneqar­nerannit erserpoq USA-p aamma Tuluit Nunaata iligiinnerat naalagaaffinni inuit pilersitaanni nunarsuarmi pissaaneqar­nerpaajusuni kingulliussasoq. Naalakkersuisunit pitsaanerpaanit, tassa Guutip kunngeqarfianit, taarser­neqassaaq!

Guutip kunngeqarfiata nunarsuarmi qanoq naammas­sisaqarumaarnera pillugu paasisaqar­nerorusukkuit video Guutip kunngeqarfia suua? takuuk.