Jehova ilisarisimaneruleruk

1. Jehovap ilisimassusia naammas­sisaalu eqqarsaatigigaangakkit qanoq misigisarpit?

JEHOVAP GUUTITTA suut tamaasa nalunngilai, kimilluunniit ilisimas­suseqar­neruvoq tupinnaan­nartunillu naammas­sisaqarsimalluni. Pinngor­titsiserput pissaanilissuaq eqqarsaatigigaangatsigu misigisarunarpugut mikingaaratta suunngitsuulluta. Immaqa apustili Paulusi ima allattoq isumaqatigivat: “Guutip pisuussusiisa, ilisimas­susiata paasisimasaqas­susiatalu itissusii! Eqqartuussineri iliuusiilu tamakkiisumik paasineqarsin­naanngillat!” – Rom 11:33, 34.

2. Qanoq nalunngis­sinnaavarput Jehovap ilisarisimalernissaa ajornan­ngitsoq?

² Jehovap kinaassusia tamakkiisumik paasisin­naanngik­kaluarlutigu ilisarisimalernissaa ajornanngilaq. Kunngip Daavip ernini Saalumuut ima oqarfigaa: “Ataatavit Guutia ilisariniaruk, kiffartorfiginiaruk uummatikkut iluunngarlutit. … Ujarukku naniumaarpat.” (Nal 1. 28:9) Aamma ukiorpassuit tamatuma kingorna apustilip Johannesip kristumioqatini eqqaasippai ‘Guuti ilumoortoq pillugu paasisimasaqalersinnaasut’. (Joh 1. 5:20) Jiisusilu oqarpoq kinaluunniit Jehova pillugu paasisaqarusuttoq taassuminnga ilisarisiman­nilernissaanut ikiussallugu. – Mat 11:27.

3. Allaaserisami matumani suut sammissavagut?

³ Jehovamut kiffartor­tuusugut tamatta taanna ilisarisimal­luareerparput. Jehovali pillugu paasisaqar­nerujuarsin­naavugut. (Joh 17:3) Assersuutigalugu Jehovap suna nuannaarutigisarneraa taassuminngalu qanoq tatigin­ninnerulersin­naasugut paasisaqarfiginerujuarsin­naavagut. Sammissavagut apeqqutit pingasut qanorluunniit sivisutigisumik Jehova kiffartorfigisimagaluarutsigu tamatta eqqarsaatigisassagut: Jehovamik ilisarisimanninneq qanoq paasisariaqarpa? Sooq Jehova ilisarisimaneruler­niarlugu iliuuseqar­tuassaagut? Aamma qanoq ilisarisimanerulersin­naavarput?

JEHOVAMIK ILISARISIMANNINNEQ QANOQ PAASISARIAQARPA?

4. Jehovamik ilisarisimanninneq qanoq paasisariaqarpa?

⁴ Jehovamik ilisarisimanninneq ilaatigut qanoq paasisariaqarnersoq taassuma juutinut Babylonnimi aallarus­saaqqanerminnit utertussanut oqaasiinit paasisaqarfigaarput, neriorsorpaami imminik ilisarisiman­nilernis­saannut uummammit pisumik kissaateqalersis­sallugit. (Jer 24:7) Babylonnimit utertut soorunami Jehova pillugu paasisimasaqareerput. Maannali Jehovamut qanillineruniarlutik iliuuseqar­nissartik aatsaat taama pisariaqar­titsigaat. Qinerlerfissiami ima nassuiar­neqarpoq: “Guutimik ilisarisimanninneq Guuti pillugu ilisimasaqarnermit allaaneruvoq, soorlu asannilersoorneq asanninneq pillugu atuarnermit allaanerusoq.”a Tassa Jehovap ateqarneranik Guutiuneranillu ilisimasaqaannarneq naammanngilaq, aammali kinaassusilittut qanoq ittuunersoq ilisimarusupparput.

5. Jehovamik ilisarisimanninneq pillugu kunngi Josiia qanoq ilinniarfigisin­naavarput?

⁵ Jehova ilisarisimanerujar­tortillugu paasissavarput suut nuannaarutigisarnerai suullu aliasuutigisarnerai. Kunngi Josiia ilinniarfigisin­naavarput. Biibilimi allassimavoq: “Ukiut naalakkersuiffimmi arfineq-pingajussaanni – suli inuusut­tuaraalluni – siuaasami Daavip Guutia ujarnialerpaa.” (Nal 2. 34:3) Guutip oqaasianik atuaannarnani ilikkakkani naapertorlugit iliuuseqartarpoq. Pruffiiti Jeremia aqqutigalugu Jehova oqarpoq Josiia ‘iluartumik naapertuil­luartumillu iliortartoq’ aamma ikiortariallit piitsullu illersortarai. Taamaaliornera pillugu Jehova oqarpoq: “Tassaan­nginnerpa uannik ilisarinninneq?” – Jer 22:15, 16.

6. Tussiaat 9:11-mi ersersin­neqartutut Jehovap ilisarisimanerujar­tornera qanoq sunnerneqaatigis­savarput?

⁶ Tussiaat 9:11 atuaruk. Jehova ilisarisimanerujar­tortillugu tatiginerujar­tussavarput. Apustilip Paulusip tamanna misigaa. Toqunissani qanilliartortoq parnaarus­saaqqatilluni ima allappoq: ‘Guuti upperfigisara ilisarisimagakku kanngusun­ngilanga.’ (Tim 2. 1:12) Tassa Paulusip inuunermini misigisimasani paasisimasanilu pissutigalugit Jehova tatigil­luinnarpaa. Paulusip qularin­ngilluinnarpaa aalajaalluni kiffartorsimasutut Jehovamit eqqaamaneqas­salluni toqusunillu makitin­neqarumaarluni.

SOOQ JEHOVA ILISARISIMANERULER­NIARLUGU ILIUUSEQAR­TUASSAAGUT?

7. Ukiorpassuarni Jehovamik ilisarisiman­nissimasut susoorsin­naappat?

⁷ Jehova pillugu paasisaqaq­qaaratta qularnan­ngitsumik taanna ilisarisimanerulerusupparput. Ukiulli ingerlanerini imaassinnaavoq taanna pillugu nutaanik ilikkagaqar­niarluta iliuusikin­nerulertugut. Nammineerluta ataatsimiin­nitsinniluunniit Biibilimik atuaraangatta imaassinnaavoq atuakkagut nammineq inuunitsinni allanil­luunniit ikiuinermi qanoq atorsin­naanerlugit eqqarsaatiginerusaripput. Taamaaliornerlu ajunngitsuuvoq, Biibilimimi taamaalior­nissatsinnut kajumis­saarneqarpugut. (Tim 2. 3:16, 17) Aammali pingaar­nerusoq, tassa Biibilimik Atuakkiortuusoq pillugu qanoq ilikkagaqar­nersugut, eqqarsaatigisas­savarput.b (Tuss 25:8-10) Biibilimik atuaraangatta nammineq iluaqutigisin­naasagut allallu iluaqutigisin­naasaat Jehova pillugu ilikkak­katsinnit pingaar­nerutin­ngisaan­nassavagut.

8. Jehovap ilisarisimanerunera taassuminnga ikinnguteqar­nitsinnut qanoq sunniuteqassava? (Tussiaat 73:24-28)

⁸ Jehova ilisarisimanerujar­tortillugu ikinngutitut qanitarinerujar­tussavarput. Assersuutigalugu Biibilimik atuarsimagaangavit, broadcasting-imik isiginnaarsimagaangavit ataatsimeersuarsimagaangavil­luunniit qanoq misigisarpit? Qularnan­ngitsumik Jehovamut qaninnerulersimasutut misigisarputit. Sooq? Taanna pillugu ilikkagaqar­nerugavit. Taamaat­tumillu ilimanarpoq unnersiutigerusullugulu qujaffigerusukkit. Tussiaat 73-imik tussiaasiortoq Jehovamit asaneqarnini eqqarsaatigeq­qissaaramiuk ima allappoq: “Guuti tassaajuarumaarpoq uummatima qaarsorisaa, pissarititaasorlu uannut.” (Tussiaat 73:24-28 atuakkit). Qularnan­ngitsumik taassumatut misigivutit. Jehova ilisarisimanerulerumallugu iliuuseqaraangatta taassumunnga ikinngutaasin­naanerput qujamasuutigineruler­tarparput.

9. Jehova eqqarsaatigiuar­tarutsigu qanoq iluaqutigis­savarput? Assersuuteqarit.

⁹ Biibilimi kajumis­saarneqarpugut Jehova ‘eqqarsaatigiuar­tassagipput’. (Uss 3:5, 6) Tassa imaappoq taanna pillugu paasisimasagut iliuutsigullu pillugit isumaa eqqarsaatigisas­sagigut. Taamaalior­tarutta aalajangiil­luartassaagut. Ima assersuuteqarsin­naavugut: Uppeqaterpassuatta aappartik allaffimminni, aningaasivimminni mobilimin­niluunniit assiutigisarpaat. Taamaalior­taramik aappartik asasartik eqqarsaatigikulasarsin­naavaat. Tamannalu aapparmik nuannarisaanik aalajangiinis­saminnut aliasuutigisin­naasaanillu iliuuseqar­naveersaar­nissamut iluaqutigisarpaat. Taamatuttaaq Jehova eqqarsaatigikulasarutsigu taassuma nuannarisaanik aalajangiisar­nissatsinnut iluaqutigis­savarput. – Tuss 19:14, 15.

10. Jehova ilisarisimanerulerutsigu sunissarput ajornan­nginnerutis­savarput?

¹⁰ Jehova assilillugu pinngor­titaagatta ilaarsin­naavarput. (Mos 1. 1:26) Jehovap pissusii ilinniar­nerujar­tortillugit taassuminnga ilaarsinissarput ajornan­nginnerutis­savarput. Jiisusip allakkanik ilisimasut farisiiarillu avoqqaarai Jehovap pissusiinik ersersitsin­ngilluin­narmata. Moorsisip inatsisaani pingaan­nginnerusut maleruar­nissaat pingaar­tikkaluarlugu ‘pingaar­nerusut – tassa naapertuil­luarneq, nallittuineq aalajaannerlu – soqutigin­ngilaat’. (Mat 23:23) Taakkunatut ikkusun­ngilagut. Inatsisinit najoqqutas­sianillu Biibilimeersunit Jehova pillugu qanoq ilikkagaqar­nerluta paasiniarlugu sapinngisatsinnik iliortarpugut. Taamaalioruttami ilaarluar­nerusin­naassavarput. – Joh 1. 4:8, 11.

JEHOVA QANOQ ILISARISIMANERULERSIN­NAAVARPUT?

11. Jehova qanoq ilisarisimalerpiuk?

¹¹ Kia Jehovamut ilisaritippaatit? Immaqa angajoqqaavit? Imaassinnaavoq oqaluttuanik Biibilimeersunik Jehovap pissusiinik ersersitsisunik oqaluttuuk­kaatsit. Aamma ilimanarpoq pinngor­titarsuarmi Jehovap pissusii qanoq paasineqarsinnaasut eqqartorsimassagaat. Aamma imaassinnaavoq Jehovap Nalunaajaasuisa ilaata atuagaatitta ilaat, soorlu Naassaan­ngitsumik pilluarsin­naavutit!, atorlugu Biibilimik ilinniar­tikkaatit. Ilinniar­tinneqarunarputit oqaluttuat Biibilimeersut qanoq eqqarsaatigeq­qissaarsin­naaneritit pinngor­titarsuarmilu Jehovap pissusii nuannersut qanoq paasisin­naaneritit.c (Neh 8:8; ApS 14:17) Maanna sammeriartigu Jehova pillugu qanoq ilinniar­tuarsin­naasugut.

12-13. Biibilimik atuartarnikkut Jehova pillugu qanoq ilikkagaqar­nerusin­naavugut? Assersuuteqarit. (Jeremia 39:15-18) (Aamma asseq takuuk).

¹² Jehova ilisarisimaneruler­niarlugu iliuuserisassarput siulleq tassaavoq Biibilimik atuarneq misissuinerlu. Ilaannikkut Jehovap pissusii toqqaan­nartumik eqqaaneqartarput. (Mos 2. 34:6, 7) Amerlaner­tigulli pissusii toqqaan­nartumik eqqaaneqarnatik inuit taakkualu aalajangiisarneri oqaluttuarineqartarput. Oqaluttuat taamaattut atuaraangakkit eqqarsaatigisaruk Jehova pillugu qanoq paasisaqar­nersutit.

¹³ Assersuuteqariarta. Jeremia 38:6-13 Ebed-Meleki Etiopiamiu, pruffiitimik Jeremiamik aniguisitsisoq, oqaluttuarineqarpoq. Qularnan­ngitsumik Ebed-Meleki imminut pilliutigeriaannaasoq, qunusuitsoq uppeqatiminillu asannittuusoq qanoq ilaarsin­naanerlugu ingerlaannaq eqqarsaatigivat. Aammali oqaluttuamit Jehova pillugu qanoq ilikkagaqarsin­naanerlutit eqqarsaatigiviuk? (Jeremia 39:15-18 atuakkit). Assersuutigalugu qanoq ersersin­neqarpa Jehova ajunngitsuliornernik pingaar­titsisuusoq, eqqortumik aalajangiisartoq kinaassusersior­tuunngitsorlu? Tamakkua saniatigut oqaluttuamit Jehova pillugu aamma suna ilikkarpiuk? Biibilimik atuartillutit eqqarsaatigisaruk Jehovap pissusii pillugit qanoq paasisaqar­nerlutit. Taavalu taakku pillugit qujaffigiuk oqaluttuullugulu qanoq asatiginerlugu.

14. Sooq Jehovap pinngortitai eqqarsaatigeq­qissaas­savagut?

¹⁴ Jehova ilisarisimaneruler­niarlugu iliuuserisassatta aappaat tassaavoq taassuma pinngor­titaasa eqqarsaatigeq­qissaar­nissaat. (Tuss 145:9, 10) Pinngor­titarsuarmiit­tunilli qimerluuineq naammanngilaq. Inuimmi ilaasa inuunertik naallugu pinngortitat ilaannik, soorlu naasumik uumasumil­luunniit, misissuisaraluarlutik Guuteqarnera taassumaluunniit pissusii paasinngilaat. Apustili Paulusi allappoq Guutip ‘pissusii takussaan­ngitsut pinngor­titaasigut paasineqarsinnaasut’. (Rom 1:20) Biibilimik nutsikkami allami allassimaffik tamanna ima nutserneqarsimavoq: “Eqqarsarluarsinnaasup Guutip pissusii takusinnaavai.”d Tassa Pinngor­titsisup pissusii paasissagutsigit pinngortitai eqqarsaatigeq­qissaas­savagut.

15. Jehova ilisarisimaneruler­niarlugu Patrick qanoq iliorsimava, aamma illit qanoq ilaarsin­naaviuk? (Aamma asseq takuuk).

¹⁵ Amerlasuut illoqarfissuarni naasoqarpian­ngitsuni uumasoqarpian­ngitsunilu najugaqarput. Illit taamaattumi najugaqaraluarlutit pinngor­titarsuarmit Jehova pillugu qanoq ilikkagaqarsinnaavit? Patrick, Congo Brazzavillemi illoqarfissuarmi najugaqartoq, ilaarsinnaavat. Ima oqarpoq: “Altaninniit uumasunik takusas­sarsior­tarpunga. Sullerngit mikisuaqqat timmiaaqqallu nerisas­sarsiortut takusarpakka. Ilaanni timmiaaqqat ulluliortut takuakka. Illoqarfimmi nassaarisimasatik assigiin­ngitsorpassuit atorlugit piaqqaminnut tulluaq­qissaar­tussamik ulluliorput.” Patrickili qimerluuiin­nanngilaq, aamma Pinngor­titsisoq eqqarsaatigaa. Ima nangippoq: “Paasivara Jehovap pinngortitani tamaasa, allaat pingaaruteqarpasin­ngitsut, isumagisarai. Tamanna uppernikkut nakussatsis­sutigalugulu upperinerulerpara uangattaaq asagaanga pisariaqar­titannillu isumagisas­sagaanga.”

16. Mariiap suna iluaqutigalugu Jehova ilisarisimanerulerpaa, uagullu qanoq ilaarsin­naavarput? (Aamma asseq takuuk).

¹⁶ Jehova ilisarisimaneruler­niarlugu iliuuserisassatta pingajuat tassaavoq nammineq misigisimasatta eqqarsaatigeq­qissaar­nissaat. Mariia, Jiisusip anaanaa, taamaaliortarpoq. Jehova ilisarisimal­luareerlugulu taassumannga iluarineqareerpoq. (Luk 1:30) Taava pingaarutilerujus­suarmik akisussaaf­filerneqarpoq, tassa Guutip erneranik ernertaar­tussanngorpoq. Inngili Gaabriali eqqarlialu Elizabetti aqqutigalugit Jehovap Mariia nakussatsippaa qularun­naarsillugulu ikiorumaarlugu. Mariiap kingusin­nerusukkut eqqarsaatigeq­qissaarpaa tamatumannga Jehova pillugu qanoq ilikkagaqar­nerluni. Pissaanera, nallittuinera, kinaassusersior­tuunnginnera allanillu nikagineqar­tartunik asanninnera pillugit ilikkagaqarpoq. (Luk 1:46-55) Mariiap Jehovamit annertoq­qusersor­neqarnerminik qujamasuutigin­ninneratut aamma uagut pisariaqar­titsinitsinni Jehovamit ikiorneqar­tarnerput qujamasuutigisarparput. (Hebr 4:16) Jehovamit ikiorneqaraangavit apeqqutit uku eqqarsaatigisakkit: ‘Tamatumani Jehova pillugu qanoq ilikkagaqarpunga? Jehovap pissusii sorliit maluginiarpakka?’

ILIKKAGAQAR­TUASSAAGUT

17-18. Sooq oqarsin­naavugut Jehova pillugu nutaanik ilikkagaqar­tuassasugut?

¹⁷ Paratiisissami Jehova pillugu ilikkagas­sarpassuagut eqqarsaatigikkit. Imusat nutaat taassuma uagutsinnut piumasaqaataanik imallit pissavagut. (Saqq 20:12) Jehovap ilisarisimaneruler­nissaanut pinngor­titarsuaq tamakkiisumik iluaqutigisin­naalissavarput. (Es 11:6-9) Aamma nutaanik misigisaqassaagut, soorlu asasatta toqusimasut makitin­neqarnissaat uagullu naammal­luinnar­tunngoriar­tornissarput. Misigisallu tamakku iluaqutigalugit Jehova pillugu paasisaqar­nerussaagut.

¹⁸ Jehova piujuarsimavoq, taamaattumik “paasisimasaqassusia killisis­saanngilaq”. (Tuss 90:2; 147:5) Biibilimi allassimavoq Guutip pinngortitai ‘inuit paatsiveqar­tinngil­luinnaraat’. (Oqal 3:11) Tassa Ataatarput asasarput pillugu nutaanik killeqan­ngitsumik paasisarpas­suaqarsin­naavugut. Taamaattumik qanorluunniit sivisutigisumik ilisarisimareeraluarutsigu ilisarisimaneruler­nissaanut periarfissagut tamaasa atorluartigit!