Ikinngutigiinnersi illersorumallugu iliuuseqartuarit

1. Sumi ilumoortunik ikinngutis­sarsisin­naavugut?

“JEHOVAMUT ikinngutaasut qiimmas­saqatigiillutik tamarmik asaqatigiipput eqqisseqatigiillutik. Asanninnerput ilagiinni sapiissuseqar­titsivoq.” Erinarsuutigeq­qammikkatsinnit oqaatsit taakku ilisaraagit? Qujamasuutigaarput Jehovap innuttaasa akornganni ilumoortunik ikinnguteqaratta. (Tuss 119:63) Anersaakkut qatanngutigiis­suarnut asaqatigiittunut ilaavugut.

2. Sooq uppeqatitsinnik ikinnguteqarnerput immikkuul­larissuua?

² Uppeqatigut qanimut ikinngutigerusul­lugillu ilumoorfigerusuppagut. Ilisarisimalaagin­narnissaat naammagin­ngilarput. Anersaakkut qatanngutigiippugut Jehova Jiisusilu asagatsigit, asanninnerlu tamanna ataasius­suseqalis­sutigaarput. (Joh 13:35) Nalaatsor­nikkulli qanimut ikinnguteqaler­navianngilagut. Iliuuseqar­tariaqarpugut. Naammal­luinnan­ngitsuugattali ikinngutigiin­nitsinnut ajoqutaasumik iliuuseqar­toorsin­naavugut.

3. Ikinngutigiit­tuarnissaq sooq ilaannikkut ajornakusoor­tissinnaavarput?

³ Ikinngutitta ilaat ikinngutitsinnit allanit qanitarinerusarpagut. Sooq? Immaqa soqutigisaqaqatigiikkatta pissusilersor­nikkulluunniit assigiipajaaratta. Imaassin­naavorli uppeqatitta ilaasa ikinngutigiuar­nissaat ajornakusoor­tikkipput. Ilaannikkut isumaqatigiin­ngissuteqarsin­naasarpugut, tamannalu immitsinnut qanikkun­naassutigisin­naavarput. Immaqaluunniit eqqarsar­taatsikkut pissusilersor­nikkullu uatsinnit allaanerusut qanimut ikinngutigerusun­ngilagut. Ilaannikkullu uppeqaterput timikkut misigis­sutsikkul­luunniit naalliuuteqarpat tamanna ikinngutigiuar­nissaanut akornutaasinnaavoq. Taamaat­toqartillugu qanoq iliorsin­naavugut? Jiisusip maligassiaa ilinniarfigisin­naavarput. Siullertulli kristumiutut pissuserineqartussat ikinngutigiit­tuarnissamut iluaqutigisin­naasagut sammeriartigit.

KRISTUMIUTUT PISSUSERINEQARTUSSAT IKINNGUTIGIIT­TUARNIS­SATSINNUT ILUAQUTIGISIN­NAASAGUT

4. Ikinngutigiinnerput qanoq nakussatsis­sinnaavarput?

⁴ Uppeqatigut ikinngutigiuarumallugit taakkua ajunngitsortaat maluginiar­tariaqarpagut. Ilagisarutsigit pissuserinnerat maluginiarsin­naavarput. Apustilip Paulusip qatanngutini ilagerusut­torujus­suusarpai. Tessaluunikamiunut ima allappoq: ‘Takorusoqigassi naapinniarlusi iliuuseqangaarpugut.’ (Tes 1. 2:17) Amerlasuut uppeqatitik oqaloqatigisar­nerisigut qanimut ikinngutigilersimavaat. Ataatsimiinnerni ataatsimeersuar­nernilu najuuttarnikkut oqaluus­seqatigiin­nikkullu taamaalior­nissamut periarfis­saqarluarpugut. Ikinngutigiin­nermili ajornar­torsiuteqarpat ikinngutitta ilagisarnera ajornar­torsiutip aaqqinnissaanut naammanngilaq.

5. Ikinngutigiinnermut ajoqutaasinnaasut qaanger­nissaannut suna iluaqutaasinnaava? Assersuuteqarit. (Kolossimiut 3:12)

⁵ Ikinngutigiinnermut ajoqutaasinnaasut qaanger­nissaannut kristumiutut pissuserineqartussat iluaqutaasin­naapput. (Kolossimiut 3:12 aamma quppernerup ataani ilanngussaq atuakkit). Maniguunneq, kamagittarneq, inussiar­nisaarneq qamanngalu pisumik misigin­neqataaneq ineriar­tortittuarutsigit ikinngutigiinnermi ajoqutaasinnaasut qaangersin­naavagut. Assersuuteqariarta. Motoori ingerlal­luartuassaguni uuliaqar­tariaqarpoq, taamatullu ikinngutigiil­luartuas­sagutta kristumiutut pissuserineqartussat pisariaqar­tippagut. Maannali sammeriartigit uppeqatitsinnik ikinnguteqarnermut ajoqutaasinnaasut pingasut. Taakkua samminerini Jiisusip maniguunnera, kamagit­tarnera, inussiar­nisaarnera qamanngalu pisumik misigin­neqataanera ilaarutsigit ikinngutigiit­tuarnissamut qanoq iluaqutigisin­naanerlugit paasissavarput.

ISUMAQATIGIIN­NGITTOQARAANGAT

6. Isumaqatigiin­nginneq ikinngutigiinnermut qanoq ajoqutaasinnaava?

⁶ Ajoqutaasinnaasoq. Inuit isumaqatigiin­ngissuteqartut marluullutik immikkut isumaqarsin­naapput isumartik eqqortuusoq. Assersuuteqariarta. Oqaluus­sisartoqatigiinni qatanngutit angutit marluk oqaluus­seqatigiinneq qanoq aaqqissor­neqassanersoq isumaqatigiin­ngissutigaat. Marluullutik immikkut isumaqarput nammineq isumartik pitsaanerusoq. Isumaqatigiin­ngissutertik annikik­kaluartoq ikinngutigiin­nerminni annertuumik ajornar­torsiuteqalersin­naapput. Tassami makitallutik isumartik allanngor­tikkusun­ngikkunikku ajuallallutik isumaqatigiin­ngissut puioruminaatsis­sinnaavaat. Pingaaruteqan­ngitsoq pissutigiin­narlugu piffissap ingerlanerani imminnut ungasil­liartulersin­naapput naggataatigullu ikinngutigiik­kunnaarsin­naallutik.

7. Isumaqatigiin­ngissuteqarnermi maniguunnissap pingaaruteqassusia Jiisusip qanoq erseqqissarpaa?

⁷ Jiisusip maniguunnera ilinniarfigiuk. Jiisusip ilinniartitani ilinniartippai isumaqatigiin­ngissutit qaangerumallugit maniguut­tuunissaq pisariaqarluinnartoq. Jiisusip ilinniar­titaasa arlaleriarlutik oqallisigisarpaat kina arlartik annerunersoq. Tamanna pingaar­tippallaarmassuk Jiisusip nassuiaappai allat imminnit pingaar­tinnerussagaat. (Mat 20:25-28) Taama oqarnermigut ilinniartippai qanoq maniguut­tuusinnaasut. Aamma aqagumut toqusus­saalluni Jiisusip maligassippai maniguulluni isigaasa asattor­nerisigut – taamaaliornerlu kiffat suliassarigaluarpaat. (Joh 13:3-5, 12-16) Taamaaliornikkut ersersippaa ikinngutigiinnertik qanoq illersorsin­naagaat. Qatanngutitik imminnit pingaar­nerusutut isigigunikkit isumaqatigiin­ngissuteqaraangamik taakkua isumaat akueriuminar­tinnerussavaat. Aap, maniguukkunik isumaqatigiin­ngissuteqaraluarlutik ikinngutigiit­tuarsin­naapput.

8. Isumaqatigiin­ngissuteqarnermi maniguunneq ikinngutigiit­tuarnissamut qanoq iluaqutaasinnaava? (Kolossimiut 3:13) (Aamma assit takukkit).

⁸ Ikinngutigiinnersi illersor­tuarumallugu qanoq iliorsinnaavit? Maniguut­tuuguit annikitsutigut isumaqatigiin­nginnerit puioriaan­naasinnaas­savatit kajumil­lutillu isumakkeerfigin­nissinnaallutit. (Kolossimiut 3:13 atuaruk). Maniguunneq aamma isumaqatigiin­ngissuteqarnermi kamalin­nginnissamut iluaqutaasinnaavoq, taamaalilluni ikinngutigiigin­nartoqarsinnaavoq. (Tuss 4:5) Inussiar­niitsumik oqartoqaraluarpal­luunniit eqqaamajuk tamatta peqqissimis­sutigisatsinnik oqartoor­tartugut. (Oqal 7:21, 22) Una eqqarsaatigiuk: ‘Uanga isummama malinnissaa ikinngutigiin­nitsinnit pingaarnerua?’ Aalajangersin­naavutit ikinngutivit isumaa maliinnar­niarlugu. Aalajangeruit isumaqatigiin­ngissutersi eqqaaqqin­niarnagu qamuuna eqqissisimasin­naavutit.

9. Isumaqatigiin­ngissut aaqqikkuminaappat maniguunneq qanoq iluaqutaassava? (Ussatit 17:9)

⁹ Aaqqikkuminaatsumik isumaqatigiin­ngissuteqar­toqaraangat maniguunneq iluaqutaasarpoq. Illit isummat illersor­niarlugu uteriin­naveersaarit. (Ussatit 17:9, New World Translation atuaruk;a Kor 1. 6:7) Ikinngutigiit­tuarnissarsi pingaar­neruvoq. Qatannguterpassuit ikinngutertik saaffigalugu isumaqatigiin­ngissutertik pillugu ataqqin­nittumik oqaloqatiginera iluaqutigisimavaat. (Tuss 34:15) Aamma illit taamaaliorsin­naavutit ima oqarlutit: ‘Ikinngutigiinnerput uannut pingaaruteqarmat pisimasoq eqqartulaarsin­naavarput?’ Nassuerutigiuk isumaqatigiin­ngissummut nammineq pisooqataallutit, ikinngutillu ajuallas­simappat utoqqatserfigiuk. Taannalu utoqqatserpat maniguullutit isumakkeerfigiuk. (Luk 17:3, 4) Eqqaamajuk kia isumaa eqqortuunersoq paasissallugu anguniagarin­ngikkit, isumaqatigiin­ngissutissi aaqqinnissaa ikinngutigiit­tuarnis­sarsilu anguniagaris­savatit. – Uss 18:24.

EQQARSAR­TAATSIKKUT PISSUSILERSOR­NIKKULLU ASSIGIIN­NGITTOQARAANGAT

10. Ikinngutigiinnermut suna akornutaasinnaava?

¹⁰ Ajoqutaasinnaasoq. Qatanngutit uagutsinniit allaanerusumik eqqarsar­taasillit pissusillillu qanimut ikinngutiginissaat ajornakusoor­tissinnaavarput. Immaqa ilaat nuannarin­ngisatsinnik pissuseqarput. Allat eqqumiigisatsinnik pissuseqarput, immaqa siornatigut ajortumik pineqar­nikuugamik imaluunniit uagutsinniit allaanerusumik kultureqaramik. Kulturimmi ilaanni inuit misigis­sutsitik pillugit ammasumik oqaluttarput allalli tunuarsimaar­nerullutik. Imaluunniit imaassinnaavoq arlatta inuit akorngan­niinnissartik nuannarigaat allalli ittuutullutik.

11. Jiisusip imminit allaanerusumik pissusillit sooq ikinngutigiuarsinnaavai?

¹¹ Jiisusip kamagit­tartuunera ilinniarfigiuk. Jiisusip imminit allaanerusumik pissusillit ikinngutigiuarpai. Assersuutigalugu apustilit Jaaku Johannesilu allanit pingaar­nerorusukkamik Guutip kunngeqarfiani nuimasumik inissisimaf­feqarumapput. (Mak 10:35-37) Kisianni Jiisusi maniguulluni qilammit inissisimaf­figisimasani nuimasoq kajumilluni qimallugu nunarsuarmukarpoq. (Flp 2:5-8) Tassa Jiisusi taakkunannga allaanerul­luinnartumik isiginnit­taaseqarpoq. Taamaak­kaluartoq Jiisusip Jaaku Johannesilu allallu kamagit­tarfigisarpai.

12. Sooq Jiisusip ikinngutini kamagit­tarfigisinnaavai?

¹² Jiisusip ikinngutimi naammal­luinnar­tuunissaat naatsorsuutiginngilaa. Nalunngilaa Jaaku Johannesilu ilinniar­titatulli allatut nuimanissaq pingaar­tippallaaraat, ukiorpas­suarnimi inuit makitasuut taamatut eqqarsar­taasillit akorngan­niissimapput. (Mak 9:34) Jiisusilu taakkua kulturianni peroriar­torsimavoq. Taamaattumik eqqarsar­taasiat paasisinnaavaa. Kamagit­tarfigisarpai naatsorsuutiginagu ingerlaannaq allannguissasut. – Mak 10:42-45.

13. Kamagittarneq ikinngutigiit­tuarnissamut qanoq iluaqutaasinnaava? (Efesossimiut 4:2)

¹³ Ikinngutigiinnersi illersor­tuarumallugu qanoq iliorsinnaavit? Allat pissusii nuanniigisin­naasatit sapinngisannik akueriniar­tarukkit kamagittarneq ineriar­tortittuarsinnaavat. (Uss 14:29) Tamatta immikkut pissuseqarlutalu ileqqoqarpugut, tamakkulu ajortuunatik kinaassusitsinnut ilaaginnarput. Taamaat­tuunerpulli allat paamitsaatigisin­naavaat. Taamaattumik allat kamagit­tarfigaluta kinaassuserput akuerigaangassuk qujamasut­tarpugut. (Efesossimiut 4:2 atuaruk). Uaguttaaq ikinnguterput allanngor­tinniarsarinagu kinaassusia akueris­savarput. Assersuutigalugu ittoortoq oqaloqatigigaangakku takorloortaruk allanik peqateqar­nissani oqaloqateqar­nissanilu qanoq sapernar­titsigisarneraa. Taamatuttaaq illit ittuutuguit allanik peqateqarnermik nuannarisaqarlunilu oqalukkumatooq oqaloqatigigaangakku kamagit­tarfigisaruk. Soorunami kikkut tamaasa ikinngutiginerpaasin­naanngilagut. Eqqaamas­savarpulli uppeqaterput uagutsinniit allaanerusumik pissuseqaraluarpat Jehovamut kiffartornermi suleqatigil­luarsin­naagipput.

14. Kamagit­tartuugutta inunni allani suut maluginiar­nerusas­savagut?

¹⁴ Kamagit­tartuugutta qatanngutitta pissusii nuannersut maluginiar­nerusas­savagut. Taamaalior­tarutta kinaassutsitsigut assigiin­ngissutigut ikinngutigiin­nitsinnut ajoqutaatis­sanngilagut. Jiisusi tamatumunnga tunngatillugu maligas­saalluarpoq. Assersuutigalugu Jaaku Johannesilu namminis­sarsiorlutik nuimasumik inissisimaf­feqarusupput. Tamatumali aamma ersersippaa Kunngeqarfik piviusutut isigigaat. Jiisusip uppersuseqarluarnerat maluginiarlugulu nuannaarutigaa. Ikinngutitta ajunngitsortaat maluginiar­nerugaangatsigit Jiisusi Jehovalu ilaartarpagut.

15. Uagutsinnit allaanerusumik pissusillit ikinngutigiuarumallugit qanoq iliorsin­naavugut?

¹⁵ Uagutsinnit allaanerusumik pissusillit ikinngutigiuarumallugit Jehovamut ikioqqusin­naavugut. Suut paamitsas­sutigisar­neritit eqqarsaatigiuk, Jehovalu qinnuigiuk paamisulis­sagaluaruit eqqissisimajuar­nissamut ikioqqullutit. Eqqaamajuk Jehovap, Pinngor­titsisitta, assigiin­ngitsuunitta kingunerisaanik ajornar­torsiutaasinnaasut ilisimagai. Taamaattumik qinugaangavit qularis­sanngilat Jehovap nalunngil­luinnaraa kamagit­tartuar­nissamut suna pisariaqartikkit. Kamagit­tarnissarlu sapernar­tikkaangakku qisuariarnerit aqussin­naanias­sagakku anersaamik illernartumik tuneqqullutit Jehova qinnuigisaruk. – Luk 11:13; Gal 5:22, 23.

ARTORSAATEQAR­TOQARAANGAT

16. Uppeqaterput arlaatigut naalliuuteqaraangat sooq uagutsinnut unamminiar­narsinnaasarpa?

¹⁶ Ajoqutaasinnaasoq. Uppeqatigut timikkut misigis­sutsikkul­luunniit naalliuuteqaraangamik uagut nuannarin­ngisatsinnik oqarlutillu iliuuseqarsin­naapput. Assersuutigalugu ilakkuminaas­sinnaapput, kamaqqajaasin­naapput allaalluunniit tupassutigisatsinnik qisuariarsin­naallutik. Immaqalu ajuallaatigisatsinnik oqaaseqarsin­naapput iliuuseqarlutil­luunniit. (Job 6:2, 3) Uppeqatigut ilisiman­ngisatsinnik ajornar­torsiuteqarsin­naammata imaassinnaavoq ilimagisatsinniit annikin­nerusumik iliuuseqarsinnaasut.

17. Jiisusip Bartimiiusimut pissusilersor­neranit suna ilikkarpiuk?

¹⁷ Jiisusip inussiar­nisaarnera qamanngalu pisumik misigin­neqataanera ilinniarfigikkit. Jiisusip artorsaateqartut, allaat aatsaat naapitani, inussiar­nisaarfigisarlugillu qamannga pisumik misigin­neqatigisarpai. Assersuutigalugu angut tappiitsoq Bartimiiusi taama pivaa. Jiisusi saneqquttoq paasigamiuk ikioqqulluni nipituumik suaartarpoq. Najuuttunit nipangersar­neqaraluarluni Jiisusimit ajorunnaarsin­neqarusukkami suli nipitunerusumik suaartalerpoq. Immaqa najuuttut ilaasa Bartimiiusip pissusilersornera paamitsaatigaat. Jiisusilli qamannga pisumik misigin­neqatigigamiuk nalligingaarpaa. (Mat 20:34; Mak 10:46-52) Bartimiiusi inussiar­nersumik oqaluuppaa uppersuseqarneralu pillugu nersualaarlugu. Taava tupinnar­tuliorluni isigisaqaleq­qissinnaan­ngortippaa.

18. Ikinngutitit artorsaateqartut qanoq pisassavigit? (Tessaluunikamiunut 1. 5:14)

¹⁸ Ikinngutigiinnersi illersor­tuarumallugu qanoq iliorsinnaavit? Inussiar­nisaarlutillu qamannga pisumik misigin­neqataasarit. Taamatut pissuseqartaruit uppeqatitit timikkut misigis­sutsikkullu naalliuttut saamaffigalugit tuppallersarsin­naassavatit. (Tessaluunikamiunut 1. 5:14 atuaruk). Eqqaamajuk ikinngut ilumoortoq ikiuinis­saminut piareersimajuartarmat, ingammik annikil­liortumik. (Uss 17:17) Ikinngut taamaattoq misigin­neqataagin­narnani sapinngisaminik misigis­sutsikkut tapersersuisarpoq, qiimmas­saasarpoq suliassatigullu ikiuisarluni.

19. Inussiar­nisaartuulluta misigin­neqatigin­nittuullutalu qanoq ersersis­sinnaavarput? (Aamma assit takukkit).

¹⁹ Qanoq inussiar­nisaartuullutalu misigin­neqatigin­nittuusin­naavugut? Uppeqatit naalliuutaarutsis­sinnaanngilat, sapinngisannilli misigissusii atugaalu paasiniarsin­naavatit. (Mat 7:12; Pet 1. 3:8) Atukkaminik oqaluttuar­tillugu tusarnaaq­qissaaruk. Naleqquppallu tuppallersaatigisin­naasaanik oqaaseqarit. (Uss 12:25) Kukkusumik inerniliinaveersaarit. (Uss 18:13) Sapinngisannik kamagit­tarfiginiaruk pisinnaasaanullu tunngatillugu ilimasuf­figival­laarnaveersaarlugu. – Ef 4:32.

20. Ikinngutitut qanoq ittoorusuppit?

²⁰ Jehovap peqatigiis­sortaani ikinnguteqarnerput qujamasuutigaarput. Tamattali naammal­luinnan­ngitsuuvugut. Ilarpas­suagullu inuunerminni ajortunik nalaataqarsimapput. Taamaattumik ilaannikkut oqaatsikkut iliuutsikkullu allat ajuallatsit­toortarpagut. Taamaattumik qujamasuutigingaarparput uppeqatitta maniguut­tuullutik kamagit­tarfigisarmatigut, inussiar­nisaarfigisarmatigut, misigin­neqatigisarmatigut ikinngutigiuarusum­matigullu. Uagut sapinngisatsinnik taakkunatut ikinngutaal­luarusupugut.