Allat aalajangigaat ataqqikkit

1-2. Sooq ilaannikkut uppeqatitsinnit allaanerusumik aalajangiisarpugut?

AALAJANGIINERIT pillugu isornar­torsior­neqarnikuuit? Illimmi uppeqativit aalajangiineranik isornar­torsiuinikuuit? Amerlanersagut taamatut aperineqarunik angissan­nguatsiarput.

² Qatanngutitsinnit allaanerusumik ilaannikkut aalajangiisarnerput tupaallaatigis­sanngilarput. Tamattami assigiin­ngitsuuvugut. Aammami eqqarsar­taaserput kulturitsinnit, peroriar­tornitsinnit misigisatsinnillu sunnerneqarsimavoq. Taamaak­kaluartoq tamanna uppeqatigiittut eqqisseqatigiin­nitsinnut ataasius­suseqar­nitsinnullu akornutaatis­sanngilarput. – Ef 4:3.

3. Uppeqatitta aalajangiinera isumaqatigin­ngikkutsigu qanoq iliorusulersin­naavugut?

³ Uppeqaterput isumaqatigin­ngisatsinnik aalajangiippat misigisin­naavugut isumaa allanngor­tittariaqarlugu imaluunniit aalajangiinerlus­soralugu tamanna allanut oqaluttuarisariaqarlugu. Ajunngitsumik siunertaqarluta taamatut eqqarsarsin­naavugut. Qatanngutigummi asagatsigit pitsaanerpaamik kissaappagut. (Uss 17:17) Kissaatigin­ngilarpummi kingusin­nerusukkut peqqissimis­sutigisaminnik Jehovamul­luunniit attaveqar­nerminnut ajoqutigisaminnik aalajangiissasut.

4-5. Uppeqaterput uatsinnit allaanerusumik aalajangiippat qanoq iliussaagut?

⁴ Uppeqaterput aalajangiinerlulersorigutsigu oqaloqatigis­savarput? Oqaloqatiginiarlugu aalajanger­tinnata assigiin­ngitsut eqqarsaatigisariaqarpagut. Assersuutigalugu paasigutsigu Biibilimi inassutinik unioqqutitsilluni iliuuseqalersaartoq asagatsigu Jehovap tamatumunnga isiginnit­taasianik paasitin­niassavarput. (Uss 27:5, 6) Taavami qanoq iliussaagut uppeqaterput uagut isummatsinnit allaanerusumik, Biibilimulli akerliun­ngitsumik, iliuuseqar­niarluni aalajangerpat? Tamanna Biibilimi akineqarpoq, allassimavormi uagutsinnit ‘allaanerusumik isumaqartoq isornar­torsius­sanngikkipput’. – Rom 14:1.

⁵ Ilaannikkulli uppeqatitta aalajangiinera suli akueriuminaatsis­sinnaavarput. Allaaserisami matumani sammissavarput sooq allat aalajangigaannik ataqqin­nissasugut aamma qanoq taamaaliorsin­naasugut. Assersuuteqarlutali sammeqqaariartigu sooq allat aalajangigaannik isornar­torsiuerusulersin­naasugut.

SOOQ ISORNAR­TORSIUERUSULERSIN­NAASUGUT

6-7. Qaqugukkut eqqarsarsin­naavugut uppeqaterput aalajangiinerluttoq?

⁶ Eqqaariik­katsitut peroriar­tornerput misigisimasagul­luunniit pissutigalugit assigiin­ngitsut aalajangersimasumik isummerfigisarpagut. Eqqarsarsin­naavugut allat isumaqatigigaatigut. Taamaat­tariaqan­ngilarli. Assigiin­ngitsunik assersuuteqariarta. Assersuut 1: Angut peroriartorpoq imerajuttumik ataataqarluni. Inersimasun­ngorami Nalunaajaasun­ngorpoq, ilaannilu qatanngutit katerisimaaqatiginerini takuaa imigassartortut. Pakatsis­sutigalugu eqqunngitsulior­nerarpai. Assersuut 2: Qatanngut perulun­nartumik nappaateqareerluni peqqissivoq. Kingusin­nerusukkut paasivaa qatanngut alla nappaatigisimasami asserluinnaanik nappaateqalersimasoq. Ikiorusoqigamiuk kimigiiserfigaa nammineq iluaqutigisimasani atorlugit katsorsar­tissasoq. Immaqa oqarfigaa aalajangersimasunik nerisaqassasoq imaluunniit aalajangersimasumik nakorsaatitussasoq. Assersuut 3: Qatanngutip oqaluffik ilaasor­taaffigisimasani maanna atassuteqarfigerusun­ngivippaa. Uppeqatini oqaluffimmi ilisinermut peqataasimasoq paasigamiuk ajuallappoq.a

⁷ Allanik assersuuteqariarta. Assersuut 4: Qatanngutip peroriar­tornerani qatanngutit angutit umeqarnissaat arnallu ataatsimiinnerni oqaluus­sinermilu qarleqar­nissaat naleqqutin­ngitsutut amerlanernit isigineqarpoq. Tamakkununnga tunngatillugu ilitsersuutit nutaat nalunngik­kaluarlugit uteriilluni qatanngutit angutit umeqarsin­naanngin­nerarpai arnallu kjoleqar­tussaanerarlugit. Assersuut 5: Utoqqaanertaq qatanngummik universitetimi ilinniarsimasumik kingornalu Jehovamut kiffartorun­naarsimasumik nalunngisaqarpoq. Maanna qatanngut inuusuttoq ilageeqataa qaffasin­nerusumik ilinniagaqar­niarluni aalajangerpoq. Utoqqaanertaq ernumavoq ilungersorlunilu inuusuttoq angajoq­qaavilu allatut aalajangiitin­niarsarai.

8. (a) Suna pissutigalugu angajoqqaaq angajoqqaanik allanik isornar­torsiuilersinnaava? (b) Uppeqatit iliuusaannik isornar­torsiueq­qajaasarneq ilagiinnut qanoq sunniuteqarsinnaava?

⁸ Angajoqqaat nalaassin­naasaannik assersuuteqariarta. Assersuut 6: Angajoq­qaajuguit meeqqatit ‘Jehovap iluarisaatut’ ilungersorlutit ‘perorsarlugillu siunnersorpatit’. (Ef 6:4) Angajoqqaalli allat ilinniit akuersaar­nerusumik perorsaarpasipput. Assersuutigalugu meeqqamik unnukkut kingusin­nerusukkut angerlar­tarfeqar­nissaat, nakuuser­nertaqan­ngitsunik spiller­tarnissaat ukiukik­kaluarlutillu mobiileqar­nissaat ajorinngilaat. Tamanna pissutigalugu illit qitornavit sukannerpal­laarsoraatit. Aperivoq: “Soormi kammalaatima angajoq­qaavisut ikkuit?” Taamatut pisoqarpat imaassinnaavoq angajoq­qaaqatitit nuanniitsumik eqqarsaatigilersooritit. Aammali uppeqatitta aalajangiineri suulluunniit isumaqatigiin­ngissutaasin­naapput. Assersuutigalugu imaassinnaavoq kristumioqatitta aningaasanik atuinera, qanoq akulikitsigisumik feeriarluni aallartarnera aliikkutarisar­tagaalu pillugit isumaqatigin­ngikkipput. Kisianni isumarput misigis­sutsigullu ilagiinni ataasius­suseqar­nitsinnit pingaar­nerutis­sanngilagut.

9. Tamatta suna anguniagaraarput, qanorlu iliornaveersaassaagut? (Aamma asseq takuuk).

⁹ Uppeqatitsinnit allaanerusumik aalajangiisin­naasarpugut. Imaattariaqan­ngilarli arlarput kukkulluni aalajangiisoq. (Rom 14:5) Biibilimi ‘isumaqatigiit­tuaqquneqarnerput’ isumaqarpoq tamatta Jehovap piumasaatut iliussasugut. Imaanngilarli suut tamaasa pillugit assigeeq­qissaamik isumaqas­sasugut. (Kor 2. 13:11) Nammineq aalajangigas­satsinnik aalajangiisarnerput angalanermut assersuus­sinnaavarput. Angalanermi ornitaq aqqutit assigiin­ngitsut aqqutigalugit amerlanertigut tikinneqarsin­naasarpoq. Aqqut iluarinerusarput pitsaanerutitarpullu toqqartarparput. Tamatumunnga assingusumik kristumiutut nammineq aalajangiinigut assigiinneq ajorput, tamattali Jehovamik nuannaar­titsinissaq anguniagaraarput. Taamaattumik allat aalajangigaannik isornar­torsiuisan­ngilagut. – Mat 7:1; Tes 1. 4:11.

SOOQ ALLAT AALAJANGIINERI ATAQQIS­SAGIGUT

10. Jaaku 4:12 naapertorlugu qanoq iliorsin­naatitaan­ngilagut, aamma sooq?

¹⁰ Allat aalajangiinerinik ataqqin­nittussaanitsinnut pissutaasut arlallit Biibilimi eqqaaneqarput. Taakkua ilaat sammeriartigit. Inuup nammineq aalajangigassaanut tunngatillugu isornar­torsiuisin­naatitaan­ngilagut. (Jaaku 4:12 atuaruk). Jehova Inatsisilior­tuullunilu Eqqartuus­sisuugami suup eqqortuuneranik suullu eqqunngitsuuneranik kisimi aalajangiisinnaavoq. Uppeqatigut aalajangikkatik pillugit Jehovamut, uagutsin­nuunngitsoq, akisussaapput. (Rom 14:10) Allat isumatsinnit allaanerusumik aalajangiigaangata isornar­torsiuisin­naatitaan­ngilagut.b

11. Qanoq ilagiinni ataasius­suseqarnermik siuarsaaqataasin­naavugut? (Aamma asseq takuuk).

¹¹ Jehovap piumasaraa kiffani ataasius­suseqassasut, assigeeq­qissaar­nissaat pinnagu. Jehovap assigiin­ngitsuunerput nuannaraa. Tamanna pinngor­titaani ersaril­luinnarpoq. Assersuutigalugu nittaallat tamarmik assigiin­ngillat. Inuillu eqqarsaatigeriakkit. Nunarsuarput 8 milliardit sinnerlugit inoqaraluartoq inunnik isikkumikkut, eqqarsar­taatsimikkut pissusilersor­nermikkullu assigeeq­qissaar­toqanngilaq. Jehovap assigiin­ngitsuusussatut pinngor­tippaatigut. Assigeeq­qissaar­nissarput kissaatiginagu ataasius­suseqar­nissarput kissaatigaa. Taamaattumik assigiin­ngissutigut avissaar­tuutiginagit eqqisseqatigiin­nissarput anguniagarisarparput. Ilagiinni ataasius­suseqarneq nammineq isumatsinniit pingaar­nerutippagut. – Rom 14:19.

ALLAT AALAJANGIGAANNIK QANOQ ATAQQIN­NISSINNAASUGUT

12-13. Uppeqaterput ‘kukkusumik toraagaqalersorigutsigu’ suna eqqarsaatigis­savarput? (Galaatiamiut 6:1; aamma ungalusaq “Uppeqatit aalajangiinerlus­sorigukku” takuuk).

¹² Nammineq aalajangigassanik aalajangiisoqaraangat. (Galaatiamiut 6:1 atuaruk). Imminut aperigit: “Qatanngut Biibilimi peqqussummik unioqqutitsilluni ‘kukkusumik toraagaqalerpa’, imaluunniit taamaallaat isummannit allaanerusumik iliuuseqarpa?” Biibilimi peqqussutinik unioqqutitsilluni kukkusumik toraagaqalerpat imminut aperigit: “Uanga oqaloqatigin­nittuunissannut piukkun­narpunga, imaluunniit utoqqaanertaq piukkun­narnerua?” Ikiuinissamut piukkunnaruit uppeqatit inussiar­nersumik oqaloqatigiuk. Amerlanertigut paasinarsisarpoq qatanngut ajortumik iliuuseqarani illit isummannit allaanerusumik iliuuseqaannartoq. Taamaappat pissutiginiagaa apeqquseqinagu aalajangiineralu allanut eqqartor­nerloqinagu. Nammineq aalajangiisin­naatitaanera ataqqiuk isornar­torsioqinagulu. – Rom 14:2-4.

¹³ Assersuut una eqqarsaatigeriaruk: Ikinngutit neriniar­tarfimmukaqatigigukku nerisassavit assinginik innimin­neeqqullugu kimigiiserfigissaviuk? Ilaa naamik. Nammineq mamarisaminik toqqaasin­naatitaanera ataqqissavat. Illit mamarin­ngisannik nererusussappat soqutiginavianngilat, nerisaami illit nerinavian­ngilatit. Aamma akerlianik pisoqaraluarpat ikinngutit illit nerisassannik toqqaatik­kusunnavianngilat. Tamatumunnga assingusumik allat namminneq aalajangiisin­naatikkaangatsigit isumarpullu maleqqullugu kimigiiserfigin­ngikkaangatsigit ataqqin­ninnerput takutit­tarparput.

14. Aalajangiigaangavit uppeqatitit eqqisseqatigiuarumallugit qanoq iliorsinnaavit? (Korintimiunut 1. 8:12, 13)

¹⁴ Ilinnut tunngasunik aalajangiigaangavit. Sapinngisannik allanik ajuallatsitsinaveersaaraangavit ilagiit ataasius­suseqar­nerannik siuarsaaqataasarputit. (Korintimiunut 1. 8:12, 13 atuakkit). Imaassinnaavoq ilaannikkut naluneq ajorit ‘inerteq­qutaanngitsumik’ aalajangiinialerlutit. Aalajangiinerilli uppeqativit ajuallaatigis­sappagu ‘iluaqutaassava’?c (Kor 1. 10:23, 24) Taamaat­toqartillugu pitsaaneruvoq illit iluarisattut iliorsin­naanerit eqqarsaatigiin­narnagu allat qanoq misiginersut eqqarsaatigis­sallugu. (Rom 15:1) Paaseriik­katsitut allat aalajangigaannik ataqqin­nittussaanitsitulli taakkuattaaq aalajangikkagut ataqqisus­saavaat. Aammali Biibilimi siunnersuut Romamiut 12:18-imiittoq eqqaamasariaqarparput: “Sapinngisassinnik inuit tamaasa eqqisseqatiginiar­tarsigit.” Tassa immikkut tamatta taamaalior­nissarput akisussaaf­figaarput – allat ajuallaatigisin­naasaannik iliuuseqar­naveersaar­tassaagut.

15. Utoqqaanertat ilagiinni ataasius­susermik qanoq siuarsaaqataasin­naappat? (Korintimiunut 1. 4:6)

¹⁵ Utoqqaanertat allat aalajangigaannik ataqqin­nittarput. Utoqqaanertat inuup nammineq aalajangigassai pillugit malittarisas­saliunngin­nermikkut Biibilimilu ‘allassimasut kisiisa maleruar­nerisigut’ ilagiinni ataasius­susermik siuarsaaqataasarput. (Korintimiunut 1. 4:6 atuaruk). Aamma Biibili tunngavigalugu siunnersuutit Biibililersaarutitsin­niittut malillugit siunnersuisarput. Taamatuttaaq qatanngut ikiortis­sarsioraangat namminneq pitsaanerusorisartik tunngaviginagu Guutilli oqaasia tunngavigisarpaat. – Es 48:17, 18.

16. Utoqqaaner­taqatigiit aalajangigaat ataqqillugu utoqqaanertap qanoq takutis­sinnaavaa?

¹⁶ Aamma utoqqaaner­taqatigiit aalajangiineri utoqqaanertap ataqqisarpai. Utoqqaaner­taqatigiit anersaaq illernartoq qinnutigereeraangamikku Biibilimilu allassimasunik misissueq­qissaareeraangamik aalajangiisarput. Utoqqaaner­taqatigiit amerlanerus­suteqarlutik aalajangiinerat utoqqaanertap kialuunniit tapersersor­tariaqarpaa, nammineq allatut isumaqaraluaruniluunniit. (Ef 5:17) Utoqqaanertat Biibilimi Biibililersaarutitsinnilu allassimasut maleruaq­qissaar­tarpaat, namminnerlu isummaminnut tulluarsar­niarneq ajorlugit. Assersuutigalugu utoqqaanertap allaaserisami oqariartuut tamaat eqqarsaatigin­ngivillugu oqaaseqatigiit aalajangersimasut isummaminut naapertuuttut kisiisa atornavianngilai.

17. Allat aalajangigaannik ataqqin­ninnerput qanoq iluaqutigisarparput?

¹⁷ Paaseriik­katsitut tamatta assigiin­ngitsuuvugut. Assigiin­ngitsunik isummer­tarlutalu nuannarisaqar­tarpugut. Taamaan­nerpulli nuanniinnarpoq! Assigiin­ngitsunik tunuliaqutaqarnerput kinaassuseqar­nerpullu nuannequtaaginnarmat ilagiinni nuannaarlutalu toqqissisimasin­naavugut. Assigiin­ngitsuunerput avissaar­tuussutiginagulu allat aalajangigaat ataqqisaratsigit ilagiitsinni eqqisseqatigiillutalu ataasius­suseqar­tuarpugut. – Tuss 133:1; Mat 5:9.