JUULIP 13-19, 2026
ERINARSUUT 34 Assuarnaallunga inoorusuppunga
Nalunngeqatiginnissutit Biibilimi najoqqutassiat atorlugit ilinniartiguk
“[Kialuunniit] nammagassani nammineq nammassavaa.” – GAL 6:5.
SAMMISAQ
Aalajangiilluarniassagatta Biibilimi najoqqutassiat atorlugit nalunngeqatiginnissuterput qanoq ilinniartissinnaagipput.
1-2. (a) Adami Evalu sumik tunineqarpat? (b) Tunissutisiartik qanoq qujamasuutigisussaagaluarpaat?
UUMASUT eqqarsariaqqaarnatik iliuuseqartarput. Robottit aaqqissuunneqarnertik malillugu ingerlasarput. Kisianni inuit allaanerupput. Pinngortinneqarpugut immikkuullarissumik nuannaarutigisatsinnik tunissuteqarfigineqarluta. Tunissut taanna tassaavoq nammineq aalajangiisinnaatitaanerput, tassa nammineq piumasatsitut iliuuseqarsinnaatitaavugut. Biibilimi paasitinneqarpugut angut siulleq, Adami, Guuti assilillugu pinngortinneqartoq. (Mos 1. 1:26, 27) Adami nulialu, Eva, sianissusilittut pinngortinneqaramik namminneq aalajangiisinnaatitaapput.
2 Jehovap Adami Evalu inatsiserpassuarnik tuninngilai. Nunarsuarmik isumaginneqquai, kinguassioqquai, aamma killiliisinnaatitaanerminik ataqqinneqquai. (Mos 1. 1:28; 2:16, 17) Inuit siulliit taakkua piumasamittut iliorsinnaatitaanerminnik Tunisisumut qujamasunnertik qanoq ersersissinnaagaluarpaat? Jehova asagamikku nuannaartikkusullugulu peqqussutai tunngaviusut taakku kajumillutik maleruartussaagaluarpaat. – Uss 23:15.
3. Adamip Evallu nammineq aalajangiisinnaatitaanertik qanoq atorpaat?
3 Biibilimi oqaluttuarineqartutut Adamip Evallu nammineq aalajangiisinnaatitaanertik silatusaarlutik atunngilaat. Aalajangerput Jehovamut naalannginniarlutik. Namminissarsiornertik tunngavigalugu – Jehovamut asanninnertik qujamasunnertillu tunngaviginagit – aalajangiipput. (Mos 1. 3:1-7) Aalajangiinerlunnerisa kingunipilui ulloq manna tikillugu uagut atugaraagut. – Rom 5:12.
4. (a) Galaatiamiut 6:5 naapertorlugu tamatta qanoq iliortussaavugut? (b) Tunissut alla suna allaaserisami sammissavarput?
4 Maannakkut inuunerput imaannaanngitsuusinnaavoq, ullummi tamaasa aalajangigassarpassuaqartarpugut. (Galaatiamiut 6:5 atuaruk). Aalajangigassat ilaat annikitsuupput ilaalli annertullutik. Jehovap iluarisaatut qanoq aalajangiisinnaavugut? Jehovamit ikiorneqartariaqarnerput nassuerutigeqqaartariaqarparput. (Uss 16:3; Jer 10:23) Allaat inuup naammalluinnartup, Jiisusip, Guutimit ikiorneqartariaqarnini nalunngilaa. (Hebr 5:7) Naammalluinnanngitsuugatta siulersorneqarnissarput Jiisusimit pisariaqartinnerungaarparput. Maanna sammeriartigu tunissut Guutimit pisarput alla aalajangiilluarnissatsinnut iluaqutaalluartoq – tassa nalunngeqatiginnissuterput.
NALUNNGEQATIGINNISSUT SUUA?
5. (a) Nalunngeqatiginnissut suua? (b) Nalunngeqatiginnissuterput qanoq iluaqutigaarput? (Romamiut 2:14, 15)
5 Nalunngeqatiginnissuterput tassaavoq suup eqqortuuneranik suullu eqqunngitsuuneranik qamuuna naliliisinnaassuseq. Allaat inuit Guutip inatsisaanik ilisimanninngitsut nalunngeqatiginnissuteqarput. (Kor 2. 4:2) Nalunngeqatiginnissutitta eqqarsaatigut iliuutsigullu unnerluutigisinnaavai illersorsinnaallugilluunniit. (Romamiut 2:14, 15 atuakkit). Ajortuliunnginnitsinni mianersoqqusinnaavaatigut. (Sam 1. 26:8-11) Ajunngitsuliornissamulluunniit kajumissaarsinnaavaatigut. Ilumoorpoq nammineq aalajangiisinnaanngortitaasugut, imaanngilarli Jehovap aalajangiinigut tamaasa akuerisinnaagai. Nalunngeqatiginnissuterpulli iluaqutigalugu nalilersinnaavarput ajunngitsumik ajortumilluunniit aalajangiinersugut.
6. Sooq nalunngeqatiginnissuterput kukkujuitsuunngila?
6 Naammalluinnaanngitsuugatta nalunngeqatiginnissuterput ajoraluartumik ilaannikkut kukkusarpoq. Perorsarneqarnitsinnit, kulturitsinnit pilerissusipilutsinnillu ajortumik sunnerneqarsinnaasarpoq. Biibilimi allassimavoq inuup nalunngeqatiginnissutaa ‘sanngiitsuusinnaasoq’, ‘mingutsinneqarsinnaasoq’, ‘misigittaatsuusinnaasoq’ allaallu ‘ajortuusinnaasoq’. (Kor 1. 8:12; Tittusi 1:15; Tim 1. 4:2; Hebr 10:22) Nalunngeqatiginnissut taamaattoq inuunermi siulersuisuusinnaanngilaq. Pujorsiummut ajoquteqartumut assersuunneqarsinnaavoq, aatsaallu aaqqinneqarpat atoqqissinnaavarput. Ajunngitsumik nalunngeqatiginnissuteqarumalluta sulissuteqartariaqarpugut. (Pet 1. 3:16) Qanoq taamaaliorsinnaavugut?
NALUNNGEQATIGINNISSUTERPUT QANOQ ILINNIARTISSINNAAGIPPUT
7-8. (a) Nalunngeqatiginnissuterput qanoq ilinniartissinnaavarput? (b) Biibilimi najoqqutassiat qanoq siulersortigisinnaavagut? Assersuuteqarit. (Aamma asseq takuuk).
7 Nalunngeqatiginnissuterput qanoq ilinniartissinnaavarput? Suut eqqortuunerannik suullu eqqunngitsuunerannik Jehovap isumaa paasiniarlugu ullut tamaasa Biibilimi atuartariaqarpugut. Guutip inatsisaanik misissuinitsigut Jehovap eqqarsartaasia paasisinnaavarput. Allaaserisalli siuliani sammisatsitut inatsisit pissutsini aalajangersimasuni taamaallaat atuuttarput. Taamaattumik najoqqutassiat – tassa Jehovap inatsisaanit ilinniarfigisinnaasagut – maluginiartariaqarpagut. Taamaalilluta Jehovap eqqarsaatai misigissusiilu paasilluarnerulissavagut. – Es 55:9.
8 Inuunerput asimi angalanermut assersuunneqarsinnaavoq. Aqqusineqanngilaq, aamma ingerlavissarput allagartalersorneqanngilaq. Apuuffissarput angussagutsigu seqerngup ullorissallu najoqqutarineri iluaqutaasarput. Aammali nunap assinga naleralik sumiissusersiornitsinnut iluaqutaangaarneruvoq. Taannami iluaqutigalugu aqqutikkut eqqortukkut kukkusukkulluunnit ingerlanerluta paasisinnaavarput. ‘Apuuffissarput’ tassaavoq Jehovamik nuannaartitsinissaq. Biibili nunap assinganut apuuffissamut eqqortumut ingerlanitsinnut assersuunneqarsinnaavoq. Biibilimi najoqqutassiat aqqutitsinni naleqqatut ipput. Taakku malikkutsigit apuuffissarput angussavarput.
Biibilimi najoqqutassiat aqqutitsinni naleqqatut ipput. Taakku malikkutsigit apuuffissarput angussavarput. (Immikkoortoq 8 takuuk)
9. Romamiut 9:1 naapertorlugu nalunngeqatiginnissummik ilinniartitsinermi suna aamma iluaqutigisinnaavarput?
9 Nalunngeqatiginnissuterput ilinniartikkumallugu Guutip anersaava illernartoq pisariaqartipparput. (Romamiut 9:1 atuaruk). Anersaaq illernartoq Guutip eqqarsaataanik paasinninnissamut iluaqutigisinnaavarput. Aamma Jehovap piumasaatut iliornissamut piumassuseqalersittarlutalu pissatsittarpaatigut. (Flp 2:13) Anersaaq illernartoq piumallugu susinnaavugut?
10. Anersaaq illernartoq piumallugu susinnaavugut? (Lukkarsi 11:10, 13)
10 Anersaaq illernartoq qinnutigisaruk. (Lukkarsi 11:10, 13 atuakkit). Jehovap kajumilluni anersaaminik illernartumik tuniumaaraatigut upperilluinnarsinnaavarput. (Joh 3:34) Anersaamit illernartumit siulersortittut tukkorluni tunisarpai. (Uss 1:23; Jaak 1:5) Nalunngeqatiginnissuterput ilinniartikkumallugu aamma susinnaavugut?
11. (a) Inuunermi pingaarnertut suna anguniagarisariaqarparput? (b) Sooq nalunngeqatiginnissutitta ilinniartinneqarluarnissaa sulilluarnissaalu qulakkeertariaqarparput?
11 Jehovap iluarisaatut iliortuarit. (Uss 8:34, 35) Tamanna inuunermi pingaarnerpaasariaqarpoq. Sutigut tamatigut Jehovap iluarisaatut iliorusukkutta nalunngeqatiginnissutitta sungiusarnissaanut iluaqutigisinnaavarput. Nalunngeqatiginnissuterput ilinniartinneqarluarpat Jehovap eqqarsartaasiatut eqqarsassaagut misigissusiilu soqutigissallugit. Nalitsinni inuuneq imaannaanngitsuummat paasinarpoq nalunngeqatiginnissut Biibilimit ilinniartinneqartoq qanoq pingaaruteqartigisoq. Assigiinngitsorpassuarnut Biibilimi allaatigineqanngitsunut tunngatillugu aalajangiisariaqartarpugut. Assersuutigalugu suut aliikkutarissanerlugit, sumi suliffeqassanerluta, sumik ilinniagaqassanerluta kikkullu peqatigisassanerlugit aalajangertariaqartarpugut. Qanoq qulakkeersinnaavarput tamatumunnga tunngatillugu aalajangikkagut Jehovap iluarissagai? – Kor 2. 1:12.
12. Nalunngeqatiginnissuterput eqqortumik siulersuisarnersoq paasiumallugu suut iluaqutigisinnaavagut? (Efesossimiut 5:10)
12 Guutip oqaasiani atuakkatit eqqarsaatigeqqissaartakkit. (Tuss 49:4) Biibilimi atuaraangavit najoqqutassiat Jehovap isumaanik paasinninnissannut iluaqutigisinnaasatit maluginiartakkit. (Efesossimiut 5:10 atuaruk). Tamakkumi iluaqutigalugit paasisinnaavarput nalunngeqatiginnissuterput ajornartorsiornitsinni ajunngitsumik aalajangiinissatsinnut siulersuinersoq. (Uss 2:4-9, 11-13) Nalunngeqatiginnissuterput aaqqinneqartariaqarpat Biibilimi najoqqutassiat atorlugit ilinniartissinnaavarput. – Hebr 5:14.
13. Suna eqqumaffigissavarput? Assersuuteqarit.
13 Aalajangiinnginninni Jehovap isumaa paasiniaqqaartaruk. Israalikkut 607-imi kr.in.si. Jerusalemmip aserugaanerata kingorna Juudamiiginnartut assigerusunngilagut. Taakku Jeremiamut ima oqarput: “Naalagaq Guutit qinnuiguuk nalunaarfigeqqulluta sumut ingerlassasugut qanorlu iliussasugut.” (Jer 42:3-6) Aalajangereersimappulli qanoq iliorniarnerlutik. Jehovap iliuusereqqusaa iluarinngikkaangamikku namminneq aalajangereersimasartik malittarpaat. Tamanna ajorluinnartumik kinguneqarpoq. (Jer 42:19-22; 43:1, 2, 4) Taamaattumik uagut aalajangiinnginnitsinni Biibilimi najoqqutassianik Jehovap eqqarsartaasianik ersersitsisunik misissuisariaqarpugut taakkulu malillugit iliuuseqarluta.
14. Sooq aalajangiinialeraangatta Biibilimi najoqqutassiat maleruartariaqarpagut?
14 Biibilimi najoqqutassiat tunngavigalugit aalajangiisarit. (Mat 7:24-29; Jaak 1:23-25) Biibilimi najoqqutassiat naapertorlugit aalajangiigaangatta anersaap illernartup siulersuineranit ikiorneqarnissarput akuerisarparput. Tamatumalu kingunerisaanik Jehovap anersaaminik tunisarpaatigut. (ApS 5:32) Jehovalli anersaani illernartoq aqqutigalugu siulersuinera sumiginnarutsigu ‘aliasutsissinnaavarput’, tassa anersaaq illernartoq akiorsinnaavarput. (Ef 4:30; Es 63:10; ApS 7:51) Allaat Jehovap anersaaminik illernartumik najorunnaarsinnaavaatigut. (Tuss 51:13; Tes 1. 5:19) Tamanna ajorluinnassaaq anersaammi illernartup pissatsitsisarnera pisariaqartilluinnaratsigu. – Ef 3:16.
BIIBILIMI NAJOQQUTASSIAT ILUAQUTIGISINNAASAGUT QANOQ NANISINNAAGIGUT
15-16. (a) Biibilimi najoqqutassiat tulluartut qanoq nanisinnaavagut? (b) Ilinniartitap Biibilimi najoqqutassiat pujortartarunnaarnissaminut qanoq nakussatsissutigisinnaavai?
15 Biibilimik misissueqqissaarutit atortakkit. Biibilimi najoqqutassiat maleruassagutsigit nanisariaqarpagut. Assersuuteqariarta. Immaqa ilinniartitavit pujortartarnerup eqqunngitsuliornerunera akueriuminaatsippaa. Ima eqqarsarsinnaavoq: ‘Biibilimi pujortartarneq eqqaaneqanngilaq, taava qanoq nalunngissinnaavarput eqqunngitsuliornerusoq?’ Biibilimi najoqqutassiat tulluartut pujortartarnerup eqqunngitsuuneranik paasinninnissaanut iluaqutaasinnaasut naninissaannut qanoq ikiorsinnaaviuk? Iluaqutigisinnaasatta ilagaat Jehovap Nalunaajaasuisa ujarliutaat. Qulequtaq “Tupa pujortarnerlu” takutissinnaavat, qulequtaaqqamilu allaaserisaq “Pujortarneq Guutip qanoq isumaqarfigaa?” innersuunneqartoq atuarlugu. (Takuuk Napasuliaq Alapernaarsuiffik, juulip aallaqqaataat, 2014). Allaaserisaq atuaruniuk allassimaffiit najoqqutassiallu suut nanisinnaavai?
16 Allaaserisami najoqqutassiat tallimat eqqaaneqartut ilinniartitap eqqarsaatigisinnaasai ukuupput: (1) Toqussutaasinnaasumut inussianngorusunnavianngilagut. (Rom 6:16) (2) Timitsinnut ajoqutaasinnaasut suulluunniit ingalassimasariaqarpagut. (Kor 2. 7:1) (3) Jehovap tarnerput tamakkerlugu kiffartuutissagitsinni piumasaraa. (Mat 22:37) (4) Allat iliuutsitsigut ajoquserusunngilagut. (Mat 22:39; Kor 1. 10:24) (5) Jehovap eqqortumik iliorniarnitsinni nakussatsissinnaavaatigut. (Flp 4:13) Tassa pujortartarneq Biibilimi eqqaaneqanngikkaluartoq najoqqutassiat ilinniartitavit Jehovap pujortartarnermut tunngatillugu eqqarsartaasianik paasinninnissaminut iluaqutigisinnaavai.
17. Pissiariit katinnissaminnik pilersaarusiortut Biibilimi najoqqutassiat suut aalajangiilluarnissaminnut iluaqutigisinnaavaat?
17 Pissiariit katinnissaminnut pilersaarusiortut Biibilimi najoqqutassiat aalajangiilluarnissaminnut iluaqutigisinnaasatik qanoq nanisinnaavaat? Jehovap Nalunaajaasuisa ujarliutaat aamma iluaqutigisinnaavaat. Qulequtaaqqami “Katinneq katittorsiornerlu”-mi allaaserisat Biibilimi najoqqutassianik imallit allattorsimapput. Najoqqutassiat arfinillit pissiariit eqqarsaatigisinnaavaat: (1) Katinnermi pisut tamarmik Jehovamut ataqqinaataasariaqarput. (Kor 1. 10:31, 32) (2) Atisarineqartut naleqquttuussapput allanullu assuarliutaanatik. (Tim 1. 2:9; Pet 1. 3:3, 4) (3) Nalunaajaasuunngitsut ilaarlugit takoqqusaaginnassanngilagut. (Joh 17:14; Jaak 1:27; Joh 1. 2:15, 16) (4) Katittorsiorneq torersumik aaqqissuulluagaassaaq. (Kor 1. 14:40) (5) Katittorsiortitsineq erngunnermik kinguneqassanngilaq. (Gal 5:21) (6) Katittut pisumut nakkutiginnittussamik toqqaassapput. – Joh 2:8, 9.
18-19. (a) Misissueqqissaarut alla suna iluaqutigisinnaavarput? (b) Misissueqqissaarut taanna iluaqutigalugu nalliuttorsiornernut tunngatillugu aalajangiilluarnissannut najoqqutassiat qanoq nanisinnaavigit? (Takuuk ungalusaq “Jehovap isumaa paasisinnaaviuk?”).
18 Misissueqqissaarut iluaqutigisinnaasat alla tassaavoq Biibili inuuninni iluaqutigiuk. Atuagaq taanna allassimaffinnik assigiinngitsorpassuarnik atoriaannaasunik imaqarpoq. Sammisassaq toqqarukku apeqqutit allassimaffiillu Biibilimi najoqqutassiat paasinissaannut iluaqutigisinnaasatit takusinnaavatit. Assersuutigalugu kristumiup eqqarsaatigisinnaavaa nalliuttorsiorneq aalajangersimasoq najuuffigisinnaanerlugu. Qulequtaq “Nalliuttorsiornerit” tooruniuk qulequtaaraq una nuissaaq: “Nalliuttorsiornerit kristumiut peqataaffigisanngisaat.”
19 Immikkoortumi tamatumani allaatigineqartut ilaat unaavoq: “Sooq nalliuttorsiornernut upperisarsiornermit eqqunngitsumit pilerfeqartunut peqataaneq eqqunngitsuliornerua? (Ko1 10:21; Ko2 6:14-18; Ef 5:10, 11).” Allaaserisami nalliuttorsiornerit eqqunngitsut ilaat eqqaaneqarput. Qulequtaaqqap “Nalliuttorsiornerit inuiaassutsimik pingaartitsiniutit” ataatungaani Biibilimi najoqqutassiat ukununnga tunngatillugit allattorsimapput: Politikkikkut angusat inuiaqatigiilluunniit angusimasaat pillugit nalliuttorsiornerit, sorsunnikkut angusanik nalliuttorsiutiginninneq imaluunniit nalliuttorsiornerit inunnik ataqqinninniutaasut. Misissueqqissaarutit Jehovap peqatigiissortaanit saqqummersinneqartut nalunngeqatiginnissutitsinnik ilinniartitsinissamut iluaqutigisinnaasagut qujamasuutigeqaagut, ilaa?
ILINNIARTINNEQARLUARSIMASUMIK NALUNNGEQATIGINNISSUTEQARNERLUTIT QULAKKEERUK
20. Ilinniartinneqarluarsimasumik nalunngeqatiginnissuteqarluta qanoq nalunngissinnaavarput?
20 Nammineq aalajangiisinnaatitaanermik tunissut qujamasuutigeqaarput. Paasivarpulli nammineq aalajangiisinnaatitaanerput eqqortumik atorniassagatsigu nalunngeqatiginnissuterput ilinniartittariaqaripput. Nalunngeqatiginnissut sungiusarluarsimasoq Jehovamut ataqqinaataasumik taassumalu piumasaanut naapertuuttumik aalajangiisarnissatsinnut iluaqutigisarparput. Taamaaliussaguttali Jehovap anersaava illernartoq pisariaqartipparput. Taamaattumik anersaaq illernartoq qinnutigiuartariaqarparput siulersuineralu naapertorlugu iliuuseqarluta. Aamma Biibilimi najoqqutassiat nalunngeqatiginnissutitsinnik ilinniartitsinermi iluaqutigisinnaavagut. Iluaqutigisinnaasagut taakku qanortoq atorluarisigit, taamaalillutalu Guutip oqaasiata inuunitsinni sunniilluarnera misigiumaarparput. – Tim 2. 3:16, 17; Hebr 4:12.
ERINARSUUT 135 Jehovap asannilluni kajumissaarutaa: “Ernera, ilisimasuuniarit”