Biibilimi najoqqutassiat atorlugit Jehovap isumaa paasiniartaruk

1-2. (a) Biibili qanoq pisoqaatigaa? (b) Sooq Biibili suli atorluar­neqarsinnaava?

BIIBILI atuagaavoq pisoqaq. Atuagartai siulliit ukiut 3.500-t missaasa matuma siorna allanneqarsimapput atuagartaalu kingulleq ukiut 2.000-t missaasa matuma siorna allanneqarsimalluni. Taama pisoqaatigigaluartoq Guutip oqaasia pissarsivigil­luarneqarsinnaavoq. (Hebr 4:12; Tim 2. 3:16, 17) Ullumikkut inuit millionillit Biibilip siunnersuutaanik maleruaasut tamanna uppernarsarsin­naavaat.

² Qanormi ililluni atuagaq qanganisaagaluaqisoq ullutsinni suli atorneqarsin­naagami? Pissutaasut tunngaviusut marluupput. Siullertut, Biibilip oqariartuutaa Guutimeersuuvoq uumassuseqartumit, Pinngor­titsisitsinnit tamanit silatunerpaasumit. (Tim 1. 4:10; Rom 16:26, 27) Aappaattut, Biibilimi najoqqutas­siaqarpoq atuuttuaan­nartussanik. Taamaat­tuminguna itsarli ulloq manna tikillugu inuit qanorluunniit ajornar­torsiuteqaraluarlutik Biibilimi siunnersuutit iluaqutigisin­naagaat.

3. Apeqqutit suut allaaserisami akineqassappat?

³ Allaaserisami apeqqutit uku akineqassapput: Biibilimi najoqqutassiat suuppat? Sooq uagutsinnut pingaaruteqarpat? Biibilimik atuarnitsinni Jehovap isumaa qanoq paasiniarsin­naavarput? Aamma sammissavarput Jiisusip inuit Jehovap eqqarsar­taasianik paasinnin­nissaannut qanoq ikiornerai.

BIIBILIMI NAJOQQUTASSIAT SUUPPAT?

4. Biibilimi najoqqutassiat suuppat?

⁴ Biibilimi najoqqutassiat tassaapput ilumoortut tunngaviusut, taakkulu tunngavigalugit Guuti inatsisiliorpoq. Ilaannikkut inatsit immini najoqqutas­siaasinnaavoq. (Mat 22:37) Najoqqutassialli inatsisinit pitsaanerusarput. Inatsisit pissutsinut piffissanul­luunniit immikkut ittunut tunngasin­naapput. Biibilimili najoqqutassiat eqqarsar­taasianik paasinnil­luarnissamut iluaqutaapput. Oqartoqarsinnaavoq najoqqutassiat inatsisinut tunngaviusut. Jehovap inatsisiliai tamarmik pissutis­saqarluarput. Najoqqutassialli inatsisit tunngavigisaat piffissami aalajangersimasuin­naanngitsumi pissutsinilu assigiin­ngitsuni atorneqarsin­naapput. (Tuss 119:111) Inatsisit allanngor­tinneqarsin­naasarput, najoqqutassialli pisoqalin­ngisaan­narlutillu atorunnaan­ngisaannarput. – Es 40:8.

5. Inatsisit najoqqutassiallu assigiin­nginnerannik assersuuteqarit. (Aamma assit takukkit).

⁵ Inatsisit najoqqutassiallu assigiin­nginnerat paasilluar­nerujumallugu assersuuteqariarta. Anaanaq meeqqaminut oqarsinnaavoq: “Kissarsuut attoqinagu!” Tamanna naalakkiineruvoq, imaluunniit inatsisaavoq. Kisianni sooq taamaasioq­qusinngila? Najoqqutassiaq inatsisip tunngavigisaa tassaavoq: Uunartoq attorukku uussaatit. Kissarsuum­muunnaan­ngitsoq aammali manissaammut, kiassaammut uunartunullu allanut atuuppoq. Sumiluunniillu, angerlarsimaffiullu avataani, uusoqarsinnaavoq. Soorunami meeraq alliartor­tilluni kissarsuummik atuinerujar­tulissaaq. Mianersor­tuartariaqassaarli. Anaanamimi inatsisaa atuukkun­naaraluartoq inatsisip tunngavigisaa eqqaamajuassavaa.

SOOQ BIIBILIMI NAJOQQUTASSIAT PINGAARUTEQARPAT?

6. (a) Jehovap qanoq siulersor­tarpaatigut? (b) Jehovap uagutsinnik tatigin­ninnini qanoq takutittarpaa?

⁶ Jehovap asangaaramisigut ajortunut ajoqutaasin­naasunullu illersorusulluta inatsisinik tunivaatigut. (Jaak 2:11) Aammami qanoq eqqarsar­taaseqar­nerluni inatsisiminullu pissutaasut pillugit paasitik­kusuppaatigut. Oqaatsini, Biibili, aqqutigalugu siulersor­tarpaatigut, aamma atukkatsinnut inatsiseqan­ngikkaangal­luunniit. Jehovap najoqqutassiani siunnersuutinilu atorlugit aalajangiil­luarnis­satsinnut eqqortulior­nissatsinnullu ikiortarpaatigut. Jehovap tatigaluta nammineq aalajangiisin­naatippaatigut taassumunnga asanninnitta naalannittalu takutin­nissaannut periarfis­silluta. – Gal 5:13.

7. Biibilimi najoqqutassiat pingaaruteqarnerat qanoq assersuusiarineqarsinnaava? (Aamma asseq takuuk).

⁷ Biibilimi najoqqutassiat pingaaruteqarnerat assersuusiorluta nassuiarsin­naavarput. Aqqusinerni nalunaaqutsersuutit eqqarsaatigeriakkit. Taakkua ilaat biilertunut inatsisinik paasititsipput, soorlu sukkanerpaasin­naatitaanerat qaqugulu unissanersut pillugit. Biilertoq unioqqutitsiguni akiliisitaasinnaavoq. Aammali allanik nalunaaqutsersuuteqartarpoq navianartunut mianersoq­qussutinik, assersuutigalugu aqquserngup quasassin­naanera qaartiterisoqarsin­naaneralu pillugu. Tamakku biilillaqqissup takuleraangamigit mianersor­nerulerluni biilertarpoq. Silarluk­kaangallu aamma mianersortarpoq. Taamatuttaaq Biibilimi inatsiseqarpoq Jehovap uumigisaanik iliuuseqaq­qusinnginnermut tunngasunik. Aammali Biibilimi najoqqutassiat eqqumaf­figisariaqarpagut, Jehovammi inatsisaanik unioqqutitsilersin­naasunik eqqarsaateqarusunnatalu iliuuseqarusun­ngilagut. Aalajangiil­luarumalluta Jehovap eqqarsar­tariaasia paasisariaqarparput.

8. Biibilimik atuarnitsinni suna maluginiar­tassavarput, tamannalu qanoq ilinniutigisin­naassavarput? (Romamiut 12:1, 2)

⁸ Sooruna Jehovap sunut tamanut tunngatillugu inatsisilersun­ngikkaatigut? Pingaarutilimmik ilinniar­tikkusuk­kamisigut, assersuutigalugu Jehovap eqqarsartaasia paasilluar­nerulis­sagatsigu. Biibilimik atuarnitsinni ilinniutigisin­naasatta maluginiar­nissaat eqqarsaatigeq­qissaar­nissaallu ilikkar­tarparput. Imminut aperisarpugut sooq Jehovap tamanna oqaatsiminut ilanngutsis­simaneraa ilikkak­kagullu inuunitsinni qanoq atorsin­naanerigut. Taamaalilluta Guutip ‘silatusaarluta kiffartorfiginissaa’ ilikkar­tarparput. ‘Guutip piumasaa akuerisaalu ajunngitsoq naammal­luinnartorlu qulariun­naartarparput’. – Romamiut 12:1, 2 atuakkit.a

9. Biibilimi najoqqutassiat maleruarneri qanoq allatigut iluaqutigisin­naavagut? (Hebræerit 5:13, 14)

⁹ Biibilimi najoqqutassiat maleruar­nissaat ilikkarutsigu kristumiutut inersimal­luarnerulissaagut. Jehovap suut iluarinerai suullu iluarin­nginnerai paasiar­torneruler­tillugit aalajangiil­luarneruler­tarpugut Jehovamullu ikinngutaanerput nakussatsit­tarlugu. (Hebræerit 5:13, 14 atuakkit). Angajoqqaat meeqqaminnut naalakkiis­suterpas­sualiorsin­naapput eqqortulior­nissaannik ikiorniarlugit. Imaassin­naavorlu meeqqat pillagaarusun­ngiinnarlutik naalattut. Jehovalli meeqqatut pinngilaatigut, inersimasutulli pivaatigut. Tatigaatigut piumasaanut naapertuuttumik aalajangiisin­naasugut, taamaalioraangattalu uummataa nuannaar­tittarparput. – Tuss 147:11; Uss 23:15, 26; 27:11.

JEHOVAP ISUMAA QANOQ PAASINIARSIN­NAAVARPUT?

10. Jehovap isumaa qanoq paasiniarsin­naavarput?

¹⁰ Biibili atuartillugu maluginiar­tarutsigu atuakkagut qanoq ilinniutigisin­naagigut Jehovap misigissusii eqqarsar­taasialu paasilluar­nerussavagut. Eqqarsaatigisin­naavarput Jehovap inatsisiliaanut aalajangersimasunut suut pissutaanersut. Pissutaasut paasiar­torneruler­tillugit Jehova paasiar­tornerulis­savarput. Qanoq isumaqarnera paasilluarsin­naajumallugu Jehovamut ikioqqulluta qinusar­nissarput pingaaruteqarpoq. Atuakkatsinnillu eqqarsaatigin­neqqissaarnissaq sungiusar­tuartariaqarparput. (Uss 2:10-12) Imminut aperisin­naavugut: “Sooq Guuti taama ittumik inatsisiliorpa? Jehovap iliuuseq taanna iluarin­ngikkuniuk inatsimmik unioqqutitsin­ngikkaluarlunga assingusumik iliuuseqaruma qanoq isumaqarfigissavaa? Pisimasoq taanna Biibilimi oqaluttuarineqartoq qanoq ilinniutigaara? Tamannalu inuuninni qanoq atorsin­naavara?” Jehovap inatsisaanut pissutaasut paasigutsigit Biibilimilu oqaluttuat ilinniutigigutsigit Jehovap nuannaarutigisin­naasaanik aalajangiil­luarsin­naassaagut.

11. Jiisusip qaqqami oqalugiar­nermini Jehovap qanoq isumaqar­neranik qanoq ilinniar­tippaatigut? (Aamma asseq takuuk).

¹¹ Jiisusip qaqqami oqalugiar­nermini ilinniar­tippaatigut Jehovap eqqarsartaasia qanoq paasisin­naaneripput. Assersuutit pingasut misissoriartigit. Inatsit eqqaariarlugu nassuiaavoq sooq Jehovap inatsisiliarisimaneraa. Najoqqutassiat Jiisusip ilinniar­titsissutigisaasa eqqarsaatigeq­qissaar­nerisigut inuunitsinni aalajangiil­luarnis­satsinnut qanoq iluaqutigisin­naanerlugit paasissavarput.

12. Inatsimmi Matiusi 5:21, 22-miittumi pingaarutilik suna paasivarput? (Aamma asseq takuuk).

¹² Matiusi 5:21, 22 atuakkit. “Inummik toqutsis­sanngilatit.” Inatsimmi tamatumani najoqqutassiaq pingaarutilik suna paasivarput? Jehovap allanik uumissueq­qunngilaatigut – iliuutsikkut, oqaatsikkut eqqarsaatik­kulluunniit. Jiisusi oqarpoq inuk inummik toqutsin­ngikkaluarluniluunniit qatanngumminik uumissuiguni najoqqutassiamik inatsisip tunngavigisaanik unioqqutitsissasoq. “Qatanngumminik kamaassiuartoq” eqqartuinerluttorlu Jehovamit akisussaatin­neqassaaq. Taamatummi isiginnit­taaseqarneq misigis­suseqarnerlu naggataatigut inummik toqutsinermik kinguneqarsinnaavoq. – Joh 1. 3:15.

13. Najoqqutassiaq Matiusi 5:21, 22-miittoq inuunitsinni qanoq atorsin­naavarput? (Aamma asseq takuuk).

¹³ Ullumikkummi najoqqutassiaq Matiusi 5:21, 22-milu allassimasoq qanoq atorsin­naavarput? Puttarsisaqarnatalu kamaassiuar­naveersaassaagut. (Mos 3. 19:18; Job 36:13) Misigis­sutsimmi taamaattut uumissuinermik ajuallan­nartunillu oqaaseqarnermik iliuuseqar­nermilluunniit kinguneqarsin­naapput. (Uss 10:12) Allanik ingutsigutta tamanna ajoqutigissavaat nuannarineqarun­naassutigisin­naallugulu. (Uss 20:19; 25:23) Taamanikkut uumissuineq pillugu Jiisusi eqqartuimmat qarasaasiaqaranilu mobiileqanngilaq. Najoqqutassiarli eqqartugaa ullutsinni internetikkut attaveqaqatigiit­tarfiit atornerisa ulorianar­tuusinnaanerinut tunngatillugu atorluarsin­naavarput. Soorlu inoqammik toqutsinissarput takorloorsin­naanngikkipput, taamatuttaaq inuup tusaamanerlulis­sutigisin­naasaanik oqaatsikkut, allakkatigut iliuutsik­kulluunniit ajoquseerusun­ngilagut.

14. Inatsimmi Matiusi 5:27, 28-miittumi najoqqutassiaq suna paasivarput? (Aamma asseq takuuk).

¹⁴ Matiusi 5:27, 28 atuakkit. “Allasius­sanngilatit.” Inatsimmi tamatumani najoqqutassiaq pingaarutilik suna paasivarput? Jehovap atoqatigiinnikkut eqqunngitsuliorneq eqqarsaatillu taamaaliulersitsisinnaasut uumigai. Jiisusi nassuiaavoq angutip arnaq (katissiman­ngisani) pileritsaallugu isigiuaruniuk ajortulioreersimasoq. Taamaattumik sapinngisarput tamaat tamakkuninnga eqqarsaatipiloqar­naveersaassaagut. Imaassinnaavoq taamaan­naveersaar­niarluta ilungersungaar­tariaqartugut. (Mat 5:29, 30) Soorunami aappaqan­ngitsut aamma taamaalior­naveersaassapput.

15. Ullumikkut najoqqutassiaq Matiusi 5:27, 28-miittoq qanoq atorsin­naavarput? (Aamma asseq takuuk).

¹⁵ Ullumikkut najoqqutassiaq Matiusi 5:27, 28-milu allassimasoq qanoq atorsin­naavarput? Pileris­susipiloqalersitsisut suulluunniit eqqarsaatiginaveersaas­savagut. (Sam 2. 11:2-4; Job 31:1-3) Taamaattumik Jehovamut kiffartortup inersimal­luartup pornografiimut tunngasut tamaasa ingalas­simassavai. Imminut salloqit­tarluni eqqarsar­navianngilaq isiginnaaginnarami nammineq eqqunngitsuliornani. Utoqqatsis­sutissarsior­navianngilaq eqqarsarluni isiginnaakkani ingasat­tajaanngitsuummata ajornavian­ngitsoq. Jiisusip nalaani atortoris­saaruteqanngilaq elektroniskiusunik, filmeqanngilaq assiliiveqaraniluunniit. Taamaak­kaluartoq najoqqutassiamit Jiisusip ilinniar­titsissutigisaanit paasivarput Jehovap assit filmillu pornografiimut tunngasut qanoq isumaqarfiginerai. Paasivarput Jehovap atoqateqarusulersitsisumik allanneq assinillu videunillu pileritsan­nartortalinnik nassiussuineq kiisalu internetikkut atoqatigiinnikkut eqqunngitsulior­tuusaarneq iluarin­ngilluinnarai. Najoqqutassiaq katissimasup aapparminut ilumuun­ngitsuliun­nginnis­saminut iluaqutigissavaa. (Mal 2:15) Tamattalu – katissimagutta kattissiman­ngikkaluarut­taluunniit – atoqatigiinnikkut eqqunngitsuliornermik kinguneqar­titsisinnaasut suulluunniit ingalas­simanis­saannut iluaqutigisin­naavarput. – Uss 5:3-14.

16. Inatsimmi Matiusi 5:43, 44-miittumi najoqqutassiaq suna paasivarput? (Aamma asseq takuuk).

¹⁶ Matiusi 5:43, 44 atuakkit. “Inoqatit asassavat.” Inatsimmi tamatumani najoqqutassiaq pingaarutilik suna paasivarput? Jehovap kissaatigaa inuit tamaasa asassagigut. Jiisusip nalaani ajoraluartumik juutit inatsit taanna kukkusumik paatsoorsimavaat isumaqarlutik juuteqatitik kisiisa asasussaallugit akeqqatillu uumigisin­naallugit. Jiisusilli nalunngilaa inatsit allatut paasineqassasoq. Nalunngil­luinnarpaa Ataatami asannittup piumasarigaa inoqatigut tamaasa, sumiuunerat ammillu qalipaataa apeqqutaatinnagit, asassagigut. – Mat 5:45-48.

17. Najoqqutassiap Matiusi 5:43, 44-miittup maleruarnera qanoq iluaqutigisarparput? (Aamma asseq takuuk).

¹⁷ Ullumikkut najoqqutassiaq Matiusi 5:43, 44-milu allassimasoq qanoq atorsin­naavarput? Inoqatigut tamaasa asagatsigit sorsunnernut eqqissiviil­liornernullu akuliuk­kusunngilagut. (Es 2:4; Mika 4:3) Tamanut – aamma allamiunut uppeqatigin­ngisatsinnullu – inussiar­nersoorusuppugut. (ApS 10:34, 35) Najoqqutassiaq aamma uagutsinnut qanigisatsin­nulluunniit ajuallatsitsisimasunik isumakkeerfigin­nittarnis­satsinnut iluaqutigisarparput. – Mat 18:21, 22; Mak 11:25; Luk 17:3, 4.

BIIBILIMI NAJOQQUTASSIAT MALITTUAKKIT

18. (a) Sunissarput aalajangiusimas­savarput? (b) Allaaserisap tulliani suna sammissavarput?

¹⁸ Qujamasunnaqaaq Jehovap meeqqatut pinnata inersimasutulli nammineq eqqarsarsin­naatilluta pisarmatigut! Kissaatigaa inuunitsinni aalajangiileraangatta Biibilimi najoqqutassiat atortas­sagigut. (Kor 1. 14:20) Taamaattumik ‘Jehovap piumasaa suunersoq paasiniar­tuartariaqarparput’. (Ef 5:17) Pillarneqar­nissamik ersineq peqqutiginagu Jehovamilli asanninnerput kajumis­sissutigalugu aalajangiisarusuppugut taassuma iluarisaanik. Biibilimi najoqqutassiat saniatigut Jehovap aamma allamik aalajangiil­luarnis­satsinnut iluaqutigisin­naasatsinnik tunivaatigut, tassa nalunngeqatigin­nissuterput. Tamannalu allaaserisap tulliani sammissavarput.