Ajornar­torsiutinut eqqortumik isiginnit­taaseqartuarit

1-2. Ajornar­torsior­nitsinni pinertusaarumalluta susariaqarpugut? (Aamma asseq takuuk).

NAAPERTUIL­LUANNGITSUMIK pineqarpit? Ilaquttannit allanil­luunniit malersugaavit? Peqqiil­liorpit? Utoqqalinerup nassataanik ajornar­torsiuteqarpit? Imaluunniit alianartumik nalaataqarpit, soorlu asasannik toqusoorlutit? Nalunngilarput Jehovap innuttani erligingaarai, taamaak­kaluartoq ‘naalliun­nartunik ajunaar­nernillu’ eqqugaasarpugut. – Tuss 90:10.

² Ajornar­torsiutigut iluatsittumik iliuuseqarfigis­sagutsigit eqqortumik isiginnit­taaseqarfigisariaqarpagut. Sooq? Ajornar­torsiutinut eqqortumik isiginnit­taaseqan­ngikkutta, tassa Jehovap eqqarsar­taasiatut eqqarsar­taaseqan­ngikkutta, nalussavarput qanoq pitsaanerpaamik iliuuseqarsin­naanerluta. Tamanna biilernermut assersuun­neqarsinnaavoq. Biilit igalaavi ipertuppata aqqusiner­niittut iluamik takusin­naanngilagut. Ipeqanngippatali nalussan­ngilarput isumannaatsumik ingerlanerluta. Allaaserisami matumani sammissavagut (1) ajornar­torsiutinut eqqortumik isiginnit­taaseqarneq, (2) eqqunngitsumik isiginnit­taaseqarnerup ajoqutaanera aamma (3) ajornar­torsiutinut eqqortumik isiginnit­taaseqarumalluta iliuuserisin­naasagut.

AJORNAR­TORSIUTINUT EQQORTUMIK ISIGINNIT­TAASEQARNEQ

3. Sooq inuit tamarmik ajornar­torsiortarpat?

³ Inuit tamarmik ajornar­torsiortarput. Naammal­luinnan­ngitsuugatta Saatanillu silarsuaani inuugatta ajornar­torsior­tarpugut. Naggatissaq qanilliar­tortillugu ilimanarpoq amerlanerusunik ajornar­torsiuteqalis­sasugut. Pinngortitami ajunaar­nersuit imaluunniit inuit ajortut iliuusii pissutigalugit atugarliorsin­naavugut. (Mat 24:8; Tim 2. 3:13) Jehovap ajornar­torsiutit tamaasa ingerlaannaq aaqqittaraluarpagit isumaqar­toqarsinnaavoq Saatanip aqutsinera tapersersoraa. Saatanili silarsuarmi ajortumi aqutsisuutillugu ‘ajunaarnerit’ pinngitsoorsin­naanngilagut. – Oqal 9:12.

4. Sooq kristumiut allatigut aamma atugarliortarpat?

⁴ Kristumiuunerput pissutigalugu atugarlior­tarpugut. Jiisusip ilinniartitani oqarfigisarpai uppernertik pissutigalugu malersugaasarumaartut. (Mat 24:9; Joh 16:2) Taamaattumik malersor­neqaleraangatta tupanneq ajorpugut. Nalunngilarput Jiisusi naalallutigu, aalajaat­tuarnis­sarpullu aalajangiusimavarput. (Tes 1. 3:3, 4) Aamma atugarlior­tilluta aalajaat­tuarutta nalussan­ngilarput eqqortuliorluta aamma Jehovap Jiisusillu akissarsisik­kumaaraatigut. Aammattaaq Jehovap Saatanillu akerleriis­sutaanni pingaarutilimmi kina tapersersor­nerlugu ersersis­sinnaavarput. Jehovap aqqa isornar­torsioramiuk aamma oqamisaarpoq kristumiut ilumoortut namminis­sarsiornertik kajumis­sissutigiin­narlugu Guutimut kiffartortuusut. Taamaattumik Saatanip malersugaatittarpai uppernarsar­niaraluarlugu atugarliulerunik aalajaak­kunnaarumaartut. (Job 1:9-11) Jehovamilli asanninneq kajumis­sissutigalugu aalajaat­tuarutta uummataa nuannaar­tissavarput. – Uss 27:11.

5. Oqaluus­sisartup oqaasii 7:13, 14 qanoq ilinniarfigisin­naavagut? (Aamma assit takukkit).

⁵ Jehovap ajornar­torsior­tarnissarput akueraa. Jehova ajortumik iliuuseqarneq ajorpoq aamma uagut ajortunik misilinneq ajorpaatigut. (Jaak 1:13) Taavami sooq kunngi Saalumuut allappa ‘ulloq atugarliorfiusoq Guutip pinngor­tissimagaa’? (Oqaluus­sisartup oqaasii 7:13, 14 atuakkit). Tamanna isumaqanngilaq Jehova ajortumik pisoqar­neranut pisuusoq, isumaqaan­narporli taamatut pisoqarnissaa akuerigaa. Saalumuut siunnersuuteqarpoq ajornar­torsiutitsinnut eqqortumik isiginnit­taaseqar­nissatsinnut iluaqutigisin­naasatsinnik. Siullertut, eqqaamasariaqarparput Saatanip silarsuaani inuugatta ulloris­saarsin­naallutalu ullulus­sinnaasugut. ‘Ulloq atugaris­saarfiugaangat’ Guutip ajunngisaar­neranut qujamasunnerput ersersis­sinnaavarput ullorlu taanna Guutimit tunissutaasutut isigalugu. Aappaattut, Saalumuup eqqaasip­paatigut ‘siunissami piumaartut ilisiman­ngikkigut’, tassa aqagu ulloris­saassanerluta ullulus­sanerlutaluunniit naluarput. Inuit naapertuil­luartut naapertuil­luanngitsullu tamarmik ilimagin­ngisaminnik ajornar­torsiuteqartarput.

6. Sooq Jehovap misilin­neqarnigut ilaannikkut akuerisarpai? (Hebræerit 12:7, 11)

⁶ Misilin­neqaraangatta Jehovap ilinniar­tissinnaavaatigut imminut tatiginata taanna tatigis­sagipput. Misilin­neqarnigut tamaasa maluginiartarpai ikiortuaan­narlutalu. Allaat inuunermi “qooqqukkut toqup taartitaatigut” ingerlagutta siulersus­savaatigut, asanninnermik ersersitsivigis­savaatigut pisariaqar­tumillu nakussatsis­salluta. (Tuss 23:4) Ajornar­torsioraangatta paasisin­naavarput sutigut sanngiif­feqarnerluta, Guutillu ikiuineratigut kinaassutsikkut allannguisin­naavugut. (Hebræerit 12:7, 11 atuakkit). Assersuutigalugu Juubip maniguunnissaq ineriar­tortittariaqarsimavaa. Jehova Juubip ajornar­torsiutaanut pisuunngik­kaluarluni tamakku akuerai taakkulu aqqutigalugit Juubi pingaarutilimmik ilinniartippaa. (Job 42:1-6) Sumilluunniit ajortumik eqqugaagaluarutta eqqaamas­savarput Jehovap ataavartumik ajoquser­neqarnissarput akuerinavian­ngikkaa. Misilin­neqarnitsinni aalajaalluta pinertusaarutta ajornar­torsiutit tamaasa ajugaaf­figilluin­nassavagut. – Rom 8:35-39.

7. Uppernerput pissutigalugu malersugaagaluarut­taluunniit sooq pilluarsin­naavugut?

⁷ Malersugaagaluarluta pilluarsin­naavugut. Uppernerput pissutigalugu malersugaagutta eqqarsas­sanngilagut Jehovap ajunngisaarfigisarun­naarsimagaatigut. Taamatummi pisoqarnerata ersersippaa taassumannga iluarisaasugut. (Mat 5:10-12) Kristumiuunerput pissutigalugu malersugaanitsinnut eqqortumik isiginnit­taaseqarutta tulluusimaarlutalu pilluarsin­naavugut, soorlu apustilit taamatut misigisimasut. (ApS 5:40-42) Pinertusaaruttalu Nalunaajaasuun­ngitsut ilumoortoq Biibilimeersoq ilinniarusulersin­naavaat ‘Guutilu unnersiutigilerlugu’. (Pet 1. 2:12) Juuserfi parnaarus­saaqqatilluni qanoq misigisimasoq eqqarsaatigiuk. Illittaaq allaat ajornar­torsiorninni – imaanngitsoq aatsaat ajornar­torsiorun­naaruit – pilluarsin­naavutit. – Mos 1. 39:3, 23.

8. Misilin­neqarnitsinni pinertusaar­nissamut aamma suna kajumis­sissutigisin­naavarput?

⁸ Misilin­neqartarun­naarfissaq nalliutissaaq. Ajornar­torsiutigut tamarmik aaqqinneqarluin­narumaarput. Juubip tamanna misigaa. Allaammi Jehovap “pilluaqquaa suli siornagornit annerusumik”. (Job 42:12) Taamatuttaaq Jehovap paratiisissami pilluaq­qungaarumaarpaatigut. Taamanik­kussamut naassaan­ngitsumik inuunissamut sanilliullugu maanna ajornar­torsiorluta inuunerput sivikippoq. Siunissaq nuannersoq tamanna misigerusungaaratsigu naggatissamut pinertusaarusuppugut! – Mat 24:13.

EQQUNNGITSUMIK ISIGINNIT­TAASEQARNERUP AJOQUTAANERA

9. Ajornar­torsiutinut eqqunngitsumik isiginnit­taaseqarneq qanoq ajoqutigisin­naavarput?

⁹ Ajornerusumik ajornar­torsiun­nginnias­sagatta ajornar­torsiutinut eqqortumik isiginnit­taaseqar­tariaqarpugut. Isumaqalersin­naavugummi Jehova ajornar­torsiutitsinnut pisuusoq. Juubi kukkulluni isumaqarami Jehovamit naalliutsin­neqarluni Guutimin­ngarnit naapertuil­luartuutin­neruniaraluarpoq. (Job 32:2) Aamma No’omip naalliun­nerminut Jehova pisuutippaa. (Ruth 1:13, 20, 21) Juubi No’omilu taamatut eqqunngitsumik isiginnit­taaseqar­tuaraluarunik Jehovamut attaveqarnertik ajoqusersimas­sagaluarpaat. (Uss 19:3) Jehovalli ajornar­torsiutinut eqqortumik isiginnit­taaseqaler­nissaannut ikiorpai, aalajaat­tuarmatalu pilluaqquai.

10. Misilin­neqarutta suna qularilersin­naavarput?

¹⁰ Jehovap misilin­neqarnitsinnut pisuunnginnera nalunngik­kaluarlugu qularilersin­naavarput suli Jehovamit isumassor­neqarnerluta. Taamatut nikallor­nartumik isiginnit­taaseqalerutta Jehovamut kiffartor­nitsinni aallussil­luarunnaalis­sutigisin­naavarput. (Uss 24:10) Kunngip Daavip pruffiitillu Habakkukip ajornar­torsiungaar­nerminni qularilerpaat Jehovap qinnutitik tusarnaarnerai. (Tuss 10:1; Hab 1:2) Taamaattorli qinujuarput. Jehovap taakkua qinnutaat akivai ikiorlugillu. Aamma illit tusarnaarlutillu ikiussavaatit. – Tuss 10:17.

11. Misilin­neqarnernut eqqortumik isiginnit­taaseqan­ngikkutta qanoq kinguneqarsinnaava?

¹¹ Misilin­neqarnernut eqqortumik isiginnit­taaseqan­ngikkutta isumaqarsin­naavugut ajortumik nalaataqar­navianngitsugut. Taamaattumik misilin­neqarutta tuparujus­suarsin­naavugut. (Pet 1. 4:12) Jiisusip malersor­neqarlunilu toqunneqas­salluni oqarnera ilinniar­titaasa paasiuminaatsippaat. (Luk 18:33, 34) Jiisusi qanoq pineqas­salluni ersarissumik oqaraluartoq apustilip Petrusip oqarfigaa taama ajortigisumik pineqar­navianngitsoq. Jiisusip nalunngilaa Petrusitut eqqarsaleruni Jehovap piumasaatut iliornis­saminut akornutaassasoq, taamaat­tumillu Petrusi naqqippaa. (Mak 8:31-33) Allaat Jiisusip toqunerata kingorna ilinniar­titaasa pisimasut iluamik paasinngilaat. Jiisusilli ikiortuarpai. Makititaanermi kingorna naapikkamigit eqqortumik isiginnit­taaseqar­nissaannut ikiorlugit “Allakkani Illernartuni tamani nammineq pilluni allassimasunik nassuiaappai”. (Luk 24:25-27, 32, 44-48) Jiisusip oqaasii eqqarsaatigeq­qissaaramikkit malersor­neqangajaler­nissaminnut piareersaatigaat. Uaguttaaq malersugaaneq pillugu Biibilimi allassimasut eqqarsaatigeq­qissaar­nerisigut misilin­neqarnis­satsinnut piareersaatigisin­naavagut.

12. Pissutsinut atukkatsinnut eqqunngitsumik isiginnit­taaseqarutta qanoq misigisin­naavugut?

¹² Jehovap isiginnit­taasiatut isiginnit­taaseqan­ngikkutta isumaqarsin­naavugut eqqunngitsumik pineqarsimalluta pissutsil­luunniit atukkagut piviusorsiornata ajornerusorilersin­naallugit. Assersuutigalugu uppeqatitta ilaat misigisimasin­naapput Jehovamut kiffartornermi aalajangersimasumik akisussaaf­filerneqar­tariaqaraluarlutik. Eqqarsaatigiuk Jiisusip viinnequteqarfimmi sulisut pillugit assersuusiaa qanoq ilinniarfigisin­naagipput. Sulisut ilaat isumaqaramik annerusumik akissarsisin­neqartariaqarlutik naammagit­taalliorput. Naalagaatali taakkua ilaat oqarfigaa: “Kammalaat, eqqortumik pivakkit.” (Matt. 20:10-13) Sulisut isumaqarput eqqunngitsumik pineqarlutik, taamaan­ngilarli. Kukkusumik ilimagisaqaramik nikallungapput. Uagut pissutsinut imaannaan­ngitsunut eqqortumik isiginnit­taaseqarumalluta susinnaavugut?

AJORNAR­TORSIUTINUT EQQORTUMIK ISIGINNIT­TAASEQARUMALLUTA ILIUUSERISIN­NAASAGUT

13. Ajornar­torsiuteqaleruit qanoq misigisinnaavit?

¹³ Naalliuutit pillugit Biibilimi allassimasut nalugunan­ngilatit. Immaqa ajornar­torsiuteqartut ikiorniarlugit allassimaffiit taakku takutin­nikuuatit. Illilli nammineq ajornar­torsiuteqaleruit eqqortumik isiginnit­taaseqarnissat ajornakusoor­tissinnaavat. Assersuutigalugu misigisin­naavutit Jehovap qinnutitit tusarnaan­ngikkai pillaraatil­luunniit. Eqqortumik isiginnit­taaseqarumallutit susinnaavit?

14. Naalliuk­kaangavit suut qinnutigisin­naavigit? (Filippimiut 4:13)

¹⁴ Jehovamut ikioqqusarit. Naalliuutitit qanorlu ilinnut sunniuteqarnerat pillugit Jehova oqaluttuuttaruk. Jehovamit qanorpiaq ikiorneqarusunnerit oqaatigisinnaavat. Pinertusaarsin­naaqqullutit ilisimas­susermik nukissamillu tuneqqullutit anersaava illernartoq qinnutigisinnaavat. Eqqaamajulli Jehovap qinnutitit illit ilimagin­ngisattut akisinnaagai. (Ef 3:20) Immaqa inngilit qatanngutitil­luunniit aqqutigalugit ikiussavaatit. (Tuss 34:8) Taamaattumik Jehovap qanoq ikiortaraatit maluginiartaruk qutsavigisarlugulu. Qanorluunniit ajornar­torsioraluaruit Jehovap tukkorluni anersaaminik tunissavaatit ikiorlutillu. – Filippimiut 4:13 atuaruk.

15. Pinertusaarumallutit qanoq iliorsinnaavit? (Aamma asseq takuuk).

¹⁵ Anersaakkut sammisar­takkatit ingerlat­tuakkit. Sapinngisannik iliuuseqartarit, allaat siornatigutut iliuuseqar­tigisin­naanngik­kaluarlutit. Ingammik ‘naalliun­nartunit annikil­liornar­tunillu eqqugaaguit’ Jehovap eqqarsaataatut eqqarsaateqar­niartuarit. (Tuss 119:143) Ullut tamaasa Biibilimi atuartarit atuakkatillu eqqarsaatigisarlugit. Aamma Biibilimik misissuinissannut piffissaqartarit. Pisinnaasatit naapertorlugit oqaluus­seqataasarit. Aamma ataatsimiinnerni najuullutillu peqataasarit. Kisimiin­nerorusut­taraluaruil­luunniit qatanngutitit peqatigisakkit. – Uss 18:1.

16. Suut qularilersin­naavagut, eqqarsar­taaserpullu qanoq allanngor­tissinnaavarput? (Korintimiunut 2. 10:4, 5)

¹⁶ Eqqarsar­taatsit allanngortiguk. Imaannaan­ngitsunik nalaataqaruit imaassinnaavoq eqqarsaatit nikallornartut ‘pallittaalisaliatut qajannaatsutut’ ittut nungutit­tariaqaritit. (Korintimiunut 2. 10:4, 5 atuakkit). Taamaaliorsin­naavutit Biibili Biibililersaarutigullu atorlugit. Assersuuteqariarta. Qularisarpiuk Jehovap suli iluarineraatit? Taamaappat apustilip Paulusip misigisai misissukkit. Aallussil­luarluni oqaluus­sisaraluarluni ajornar­torsiuterpas­suaqarpoq. Tamakkuli Jiisusimit Jehovamillu iluarineqar­nerminut ersiutaasutut isigai. (Kor 2. 11:23-27) Illit qularisarpiuk ajortulior­tarsimanitit ilumut Jehovamit isumakkeer­neqarsimanersut? Taamaappat Jehovap isumakkeerfigin­nittarnera pillugu allassimaffiit allattukkit. (Es 43:25) Allassimaffiit taakku atuartakkit eqqarsaatigeq­qissaarlugillu. (Tuss 119:97) Imaluunniit alianartumik pisoqarpa Jehovap kiffaminik aalajaatsunik illersuinis­saminik neriorsuutaanik qulalis­sutigisannik? Taamaappat misissoruk sooq Guuti naalliut­toqartar­neranik akuerin­ninnersoq sutigullu tamatigut anersaakkut uagutsinnik qanoq illersuisarnersoq. (Tuss 91:9-12) Aamma qatanngutitta ajornar­torsiutiminnik Jehovap ikiuineratigut qaangiisimanertik pillugu misigisalik­kersaarutaat atuarsin­naavatit.a

17. Ajornar­torsioraangatta susariaqarpugut?

¹⁷ “Ulloq atugaris­saarfiusoq” maanna misigigukku Jehova qutsavigiuk ajunngisaarneralu eqqarsaatigeq­qissaarlugu. (Oqal 7:14) Ajornar­torsiuteqaruit ajornar­torsiutinnut eqqortumik isiginnit­taaseqarit Jehovalu tatigil­luinnarlugu. Taamaalioruit Jehovap ‘pinertusaarsin­naaqqullutit ikiussavaatit’. (Kor 1. 10:13) Taavami qatanngutigut asasagut ajornar­torsioraangata qanoq ikiorsin­naavagut? Tamanna allaaserisami tulliuttumi sammissavarput.