Allamut saasarteqinak

1-2. Pingaarutillit qanoq allamut saasaatigisoorsin­naavagut?

QANGA allamut saasaataasin­naasumik akornuser­neqarpit? Assersuutigalugu imaassinnaavoq biilertillutit mobiilit sianertoq. Immaqa eqqarsarputit arlaata pisariaqar­tikkaatit. Nalunngilalli maannak­korpiaq biilernerit pingaar­nerpaajusoq. Tassa inuunitsinni massakkorpiaq suna pingaar­nerpaajunersoq naliliisariaqarpugut.

² Tamatta inuunitsinni pingaarutilinnik suliassaqar­tarpugut. Uagulli nalunngilarput anersaakkut sammisar­takkaguta pingaar­nerpaasut. (Mat 6:33) Jehovap innuttaasa biilertartoq mianersortoq assigalugu “ingerlaar­nerminni” allamut saasaataasinnaasut eqqumaf­figisarpaat. – Uss 4:25; Mat 6:22.

3. Allaaserisami suut sammissavagut?

³ Inuunitsinni Jehovamik salliutitsinitsinni allamut saasarneqar­nissarput pilersaarutigineq ajorparput. Tamattali allamut saasaataasinnaasut nalaattarpagut. (Luk 21:34-36) Taamaattumik Jehovamut kiffartornitta aallulluar­nissaanut iluaqutigisin­naasagut uku sammeriartigit: (1) Suut allamut saasaataasin­naappat? (2) Jiisusi allamut saasartik­kumanani qanoq iliortoq aamma (3) uagut qanoq allamut saasartin­naveersaarsin­naasugut.

SUUT ALLAMUT SAASAATAASIN­NAAPPAT?

4-6. Suut allamut saasaataasin­naappat?

⁴ Tamatta inuunitsinni pingaarutilinnik isumagisas­sarpassuaqar­tarpugut. Imaassinnaavoq peqqiil­liortugut immaqaluunniit ilaquttatsinni uagulluunniit nammineq ajornar­torsiutinik iluarsiniagaqartugut. Soorunami pingaarutillit taakku sianigin­ngitsuusaarsin­naanngilagut. Jehovamulli kiffartor­nitsinni allamut saasaataasin­naappat? Aap, eqqarsaatitsinni initual­laaleraangata aamma piffissarput nukigullu tamaasa tassunga atuleraangatsigit allamut saasaataasin­naapput.

⁵ Aamma ilarpassuagut ulluni inuuffigisatsinni ilungersunartunik – assersuutigalugu politikkikkut eqqissiviil­liornermik, aningaasatigut ajornar­torsiornermik, nappaalanersuarnik nakuuser­nernillu – eqqugaasimapput. (Tim 2. 3:1) Tamakku isumakuluutigival­laarutsigit ajornar­torsiutigut kisiisa eqqarsaatigisoorsin­naavagut.

⁶ Immaqa inunnik inuunerminni ajortorujus­suarnik nalaataqarsimasunik nalunngisaqarpugut. Tamakkuninnga misigisaqarsimasut misigis­sutsikkut aalassas­simaarnerat paasinarpoq. Jehovap inuit pinngor­tikkamigit naalliun­nissaat siunertarinngilaa. Inuit ilaat misigisimapput nalaatatik ajortut pissutigalugit allatulli inooriaasis­saraluaminnik periarfis­sinneqarsimanatik. Taamaat­tumillu ilaasa oqinnersiorlutik qasukkarsimaarnartut aliikutassiallu qimaavigisarpaat. Tamanna uagutsinni ilisarigutsigu qanoq iliorsin­naavugut? Jiisusi ilinniarfigil­luarsin­naavarput.

JIISUSI ALLAMUT SAASARNEQARUSUNNANI QANOQ ILIORPA?

7. Jiisusip suut allamut saasaatigisimasin­naagaluarpai?

⁷ Jiisusip assigiin­ngitsorpassuit, assersuutigalugu inuiaqatigiinni politikkikkut ajornar­torsiutit, allamut saasaatigisimasin­naagaluarpai. Jiisusip nalaani inuppassuit piitsuul­lutillu nappaateqarput. (Mat 14:14; Mak 14:7) Romamiunit upperisarsior­nikkullu siuttunit naapertuil­luanngitsumik naalliutsitaapput. Inuit Jiisusi tupinnar­tuliorsinnaasoq takugamikku kunngin­ngortin­nialeraluarpaat. (Joh 6:14, 15) Tamatuma saniatigut Saatanip Jiisusi ingerlaannaq nunarsuarmut tamarmut naalakkersuisun­ngorsin­naaneranik neqeroorfigalugu usserniaraluarpaa. (Mat 4:8, 9) Aamma Jiisusip naalliutsitaasus­saanini eqqartormagu ikinngutiginerpaasaata Petrusip oqarfigaa: “Naalagaq, taamatut oqaloqinak. Taamatut pineqar­navianngilatit.” Petrusip oqaasiisa Jiisusi allatut eqqarsalersis­sinnaagaluarpaa. – Mat 16:21, 22.

8. Jiisusi allamut saasartik­kumanani qanoq iliorpa?

⁸ Jiisusip Jehovamik salliutitsiniar­nermini suna iluaqutigaa? Siullertut, Jehovap eqqarsar­taasiatut eqqarsar­taaseqarpoq. (Joh 8:28; 14:9) Aappaattut, anersaakkut sammisassanik ulapputeqar­tuarpoq. (Mat 9:35) Pingajuattullu, suna pingaar­nerusoq paasilluarsimavaa. (Joh 4:34) Saatanip ussiiniarluni neqeroorutaa itigartil­luinnarpaa. Petrusillu ajunngitsumik isumaqarluni, tulluan­ngitsumilli, oqaasii naalanngilai. (Mat 4:10; 16:23) Jiisusip inuit isumaat, oqaasii iliuusiilu Guutip piumasaatut iliornis­saminut allamut saasaatiginngilai. Uagut ullumikkut Jiisusip misigisimasaanit allaanerusumik allamut saasarneqar­tarpugut. Jiisusilli maligas­saalluarnera ilaarutsigu uaguttaaq Jehovamut kiffartornerput pingaar­nerpaatis­sinnaavarput.

QANOQ ALLAMUT SAASARTIN­NAVEERSAARSIN­NAAVUGUT?

9. Efesossimiut 5:17 naapertorlugu qanoq iliussaagut?

⁹ Jehovatut eqqarsar­tarnissat ilinniaruk. Taamaaliornikkut ‘Jehovap piumasaa suunersoq paasiniar­tuarsinnaavat’. (Efesossimiut 5:17 atuaruk). Jehovap oqaasianik atuarnikkut eqqarsaatigin­neqqissaar­nikkullu iluarisai paasisin­naavagut. Pissutsit atukkagut Biibilimi eqqaaneqan­ngikkaluarpataluunniit taamaaliorsin­naavugut. Qanoq? Jehovap eqqarsar­taasianik paasinnil­luarnikkut taassumanngalu kajumilluta siulersor­neqarnikkut.

10. Jehovap eqqarsartaasia qanoq paasilluar­nerusin­naavarput?

¹⁰ Jehovap eqqarsartaasia paasilluar­nerusin­naavarput Biibilimi oqaluttuarineqartut aamma Jehovap qanoq asannilluni ikiuisarsimanerata eqqarsaatigeq­qissaar­tarnerisigit. (Jer 45:5) Biibilimik atuartilluta apeqqutit uku eqqarsaatigisin­naavagut: “Jehova pillugu suna ilikkarpara? Jehovatut isiginnit­taaseqalerumallunga arlaatigut allannguisariaqarpunga?” Soorunami Jehovap eqqarsaatai uagut eqqarsaatitsinnit qutsinnerujus­suupput. (Es 55:9) Paasilluarumallugit Jehovamit ikiorneqar­tariaqarpugut. (Tuss 143:10) Taamaattumik eqqarsar­taasianik paasinnin­nissatsinnut ikioqqulluta qinnuigisarparput. – Joh 1. 5:14.

11. Jehovap uagutsinnut suna kissaatigaa?

¹¹ Jehovap naggatissamut piareersimaq­quaatigut. Taamaattumik allamut saasarneqan­nginnissarput kissaatigaa. (Mat 24:44) Kissaatiginngilaa isumakulup­pallaarnermik nikallus­sasugut. (Mat 6:31, 32) Taamaattumik peqqissutsitsinnut, suliffitsinnut, angerlarsimaf­fitsinnut inuttul­luunniit atukkatsinnut tunngasunik isumakuluuteqarutta qanoq iliornis­satsinnik pitsaasunik siunnersorsin­naavaatigut. Neriorsorpaatigut ajornar­torsior­nitsinni ilisimas­susermik nukissamillu qinnuigigutsinni ikiussalluta. – Tuss 55:23; Uss 3:5-7.

12. Nunarsuarmi ajortorpas­suarnik pisoqaraluartoq qanoq pilluar­tuarsin­naavugut? (Matiusi 5:3)

¹² Anersaakkut sammisassat aalluttuakkit. Tamatta nunarsuarmi pisartut aqussin­naanngisagut isumakuluutigisarunarpagut. Tamakku isumakuluutigival­laarusunnagit Jehovamut kiffartor­nitsinnik ulapputeqar­tuartarpugut. Anersaakkut pisariaqar­titaqar­tilluta Jehovap pinngor­tippaatigut, taamaattumik pilluassaagut anersaakkut pisariaqar­titagut matussuser­niartarutsigit. (Matiusi 5:3 atuaruk). Tamanna angusin­naavarput Biibilip atuaqqis­saartar­neratigut sapinngisarpullu tamaat Jehovamut kiffartor­nitsinni iliuuseqar­tarnikkut, taava Jehovamut ikinngutaanerput nakussatsis­savarput. Jehovap tamanna maluginiartarpaa, nuannaarutigis­savaalu piffissarput silatusaartumik atortarutsigu. – Uss 23:15.

13. Piffissarput qanoq pitsaanerpaamik atorsin­naavarput?

¹³ Kristumiutut ‘piffissarput pitsaanerpaamik atorusupparput’. (Ef 5:15, 16) Ulluinnarni iliuuserisar­takkatsinnut piffissatta qanoq atornissaa pineqaan­nanngilaq. Aammali kajumis­saarneqarpugut Jehovap pissutsinut ajortunut akuliutin­nginnerani piffissatta qanoq atornissaa eqqarsaatigeq­qissaar­taqqullugu. Taava piffissarput qanoq atorluarsin­naavarput? Nutaarsiassanut nuannin­ngitsunut piffissarujussuaq atorlugu malinnaaniar­tarutta nikallorsin­naavugut Jehovamullu kiffartor­nitsinnut nukissaqarpal­laarunnaarluta. Nutaarsiassat nuannin­ngitsut isiginnaar­takkagut atuartak­kagullu killilersimaarutsigit silatusaar­nerussaaq. Taava ernumaval­laarnata anersaakkut ineriar­tornartunik aallutaqar­nerusin­naassaagut. Aamma pitsaassaaq oqaluus­sinermi, assersuutigalugu pulaaqqiisarnikkut, iliuuseqar­nerusin­naanerluta eqqarsaatigisarutsigu. Inuit ‘ilumoortoq pillugu eqqoqqis­saartumik paasisimasaqaler­nissaannut’ ikiorniarlugit periarfissagut tamaasa atorluarusuppagut. – Tim 1. 2:4.

14. Anersaakkut sammisar­takkatsinnik pingaar­titsinerput qanoq iluaqutigisarparput? (Aamma asseq takuuk).

¹⁴ Anersaakkut sammisar­takkatsinnik pingaar­titsiuarutta pissutsini inuuffigisatsinni isumalluartumik isiginnit­taaseqaan­narsinnaavugut. Politikkikkut eqqissiviil­liornerit, aningaasaqar­niarnikkut ilungersunar­torsiornerit nappaassuillu Biibilimi siulittuutigineqarsimasut nalunngin­natsigu annilaarutigin­ngilagut. Nalunngilarput Jehovap ungasin­ngitsukkut ajornar­torsiutit tamaasa aaqqillugillu pissutsit nuannersut piviusun­ngortissagai. Tamannalu utaqqitillugu eqqissisimaan­narsinnaavugut tatigalugulu Jehovap pinertusaar­nissatsinnik ikiorumaaraatigut. – Tuss 16:8; 112:1, 6-8.

15. Petrusimit allakkat siulliit 4:7 naapertorlugu qanoq iliussaagut, aamma sooq?

¹⁵ Suna pingaar­nerpaajunersoq puioqinagu. Tamatta sukisaarsaarneq eqqissisimaarnerlu nuannarivagut. Ullumikkulli inuppassuit tamakku pingaar­tippallaar­tarpaat. Pissutsit ajortut ungasin­ngitsukkut atuukkun­naarnissaat eqqarsaatigineq ajorpaat. Sunnerneqas­sanngikkutta isumakkut peqqissuunissarput pingaaruteqarpoq. (Petrusimit 1. 4:7 atuaruk). Tamanna qanoq isumaqarpa? Ilaatigut isumaqarpoq eqqortumik isiginnit­taaseqarlutalu silatusaartumik aalajangiisin­naanias­sagatta naliliisin­naassuseqarluar­tariaqartugut. Piffissarput silatusaartumik atorutsigu ersersis­savarput Jehovatut eqqarsar­taaseqarluta sunalu pingaar­nerpaajunersoq paasilluarsimagipput. – Tim 2. 1:7.

16. Jiisusi toqunngitsiarluni qanoq iliorpa?

¹⁶ Jiisusip eqqarsaatigiuarpaa suna pingaar­nerpaajunersoq. Aamma toqunngitsiarluni nalunaaquttap-akunneri kingulliit Jehovamut aalajaat­tuarnissani piumasaatalu naammas­sinissaa ilungersuutigingaarpai. Tamanna nukissaqarfiginiarlugu qamannga pisumik Jehovamut qinusaqat­taarpoq. Ilinniar­titalli Jiisusitut iliornatik sinilerput. Aliasunnermik qasulluinnarput. – Luk 22:39-46; Joh 19:30.

17. Interneti qanoq atorneqartarpa, tamannalu sooq mianersuutigis­savarput? (Aamma asseq takuuk).

¹⁷ Jiisusip ilinniartitai assigalugit ilaannikkut misigis­sutsikkut nanertisimasarpugut. Naggatissap nalaani pisorpassuit nikallus­sutigalugillu isumakuluutigisarsin­naavagut. Ullumikkut inuppassuit internetimut qimaaffis­sarsiortarput. Assersuutigalugu ikinngutiminnut ilaquttaminnullu sumiikkaluar­tunulluunniit attaveqaatitut atortarpaat aamma nutaarsiassanik, assinik allarpas­suarnillu ikkussuisarlutik. Aamma internetikkut naaffeqan­ngiusattumik filmertoqarlunilu spiller­toqarsinnaavoq. Mianersun­ngikkaanni nutaarsiassat kingulliit sorpassuillu malinnaaf­figiniarlugit piffissarujussuaq nukipparujussuillu atulussin­narneqarsin­naapput. Internetimik atuinermut oqimaaqatigiis­saarisumik isiginnit­taaseqar­nissatsinnut imminut ima aperisin­naavugut: ‘Interneter­tarnera ilumut nukissanis­sutigisarpara, imaluunniit allamut saasaatigisarpara pingaar­nerusullu tunulliullugit?’

18. Aliikkutassianik toqqaaniarnermi qanoq naliliil­luarsin­naavugut?

¹⁸ Sukisaarsaarnissaq eqissisimaar­nissarlu pisariaqartarput. Fjernsynikkulli internetik­kulluunniit isiginnaar­takkatsinnik spiller­takkatsinnillu toqqaaniar­nitsinni silatusaar­tariaqarpugut. Assersuutigalugu filmiaraq naagaangat alla nuisaraaq unitsiin­narnissaalu sapernarsin­naasarluni. Narrutuujun­ngikkutta nakuusernermik atoqatigiin­nermilluunniit imallit isiginnaar­talersoorsin­naavagut. Tamanna qatanngutip Asiami najugallip misigisimavaa. Qatanngutip filmit takusas­siarineqartartut naatsunnguit isiginnaarlugit nuannarisarpai. Pilerisaarutinik isiginnaar­nermini atoqatigiinnermut tunngasunik isiginnaagaqalerami naggataatigut pornografiimik isiginnaar­talerpoq. Tamakkuninnga unitsitsinis­saminut qujanartumik utoqqaanertanit ikiorneqarpoq ikinngutiminillu tapersersor­neqarluni. Aalajangerpoq app-it piiarniarlugit mobiiliminillu atuinini killilersimaar­niarlugu. Misigisaanit paasivarput sunngiffimmi piffissarput qanoq atortar­nerlugu eqqumaf­figiuar­tariaqaripput.

19. Qasukkarsimaarpal­laalerneq qanoq kinguneqarsinnaava?

¹⁹ Sunngiffimmut feeriar­nermullu tunngatillugu naliliil­luarsin­naassuseqar­tariaqarpugut. Qasukkarsimaarnissaq eqqissisimaalaar­nissarlu tamatta pisariaqar­tittarpagut, peqqissutsitsinnut tamanna iluaqutigisarparput. Qasukkarsimaarpal­laaleruttali pingaar­nerusut puiortoorsin­naavagut. (Flp 1:10) Qanoq iliorniar­nerluta piffissarpullu qanoq atorniar­nerlugu tamatta immikkut aalajanger­tussaavugut. Imminut aperigit: ‘Qasukkarsimaarnermut feeriamullu tunngatillugu piffissaq qanoq annertutigisoq atussanerlugu naliliil­luartarpunga? Aalajangiininnit ersertarpa pingaar­nerusunik salliutitsisunga suullu tamarmik naggatis­saannut piareersimasunga?’

20. Allamut saasartin­naveersaarutta qanoq iluaqutigis­savarput?

²⁰ Allamut saasaataasinnaasut eqqumaf­figisarutsigit anersaakkullu sammisassat aalluttuar­tarutsigit iluaqutigis­savarput. (Es 48:17) Ajornar­torsiutitta naammagalugit atornis­saannut nukissaqar­nerussaagut. Nunarsuarmi nuanniitsunik pisoqar­tillugu ernumaval­laassan­ngilagut. Aamma aliikkutassiat qasukkarsimaar­nissarlu inuunitsinni pingaar­nerpaatis­sanngilagut. Taamaattumik Jehovatut eqqarsar­tarnissat anersaakkullu sammisassanik aallussiuar­tarnissat aalajangiusimakkit sunalu pingaar­nerpaajunersoq puioqinagu. Taava Jehova inuuninni salliutillugulu ‘inuunivik tigulluar­titaassavat’. – Tim 1. 6:19.