Atuartartut apeqqutaat

Ussatit 30:18, 19-imilu allassimavoq ‘angutip arnami inuusuttumi ingerlavia siunersis­saanngitsoq’. Tamanna qanoq isumaqarpa?

Inuppassuit, ilaatigut Biibilimik ilisimatuut, tamatuma isumaa nalornis­sutigaat. Versini taakkunani ima allassimavoq: “Pingasuupput uanni siunersis­saanngitsut, sisamaapput paasisin­naanngisakka: Nattorallip qilaap ikeragut timmiffia, pulateriaarsuup qaarsukkut ingerlavia, umiarsuup immakkut aqqutaa angutillu arnami inuusuttumi ingerlavia.” – Uss 30:18, 19.

Siornatigut isumaqaraluarpugut ‘angutip arnami inuusuttumi ingerlavia’ ajortumut tunngasoq. Sooq? Versit siulianni “‘naammappoq’-mik oqanngisaannartut” ajortumik allaatigineqarput. (Uss 30:15, 16) Aamma versi 20-mi ‘arnaq allasiortoq’ ajortumik iliorsiman­nginnerartoq eqqaaneqarpoq. Taamaattumik isummersimavugut soorlu nattorallip timmiffigisimasaa, pulateriaarsuup qaarsukkut ingerlavigisimasaa umiarsuullu immakkut aqqutigisimasaa maluginiar­neqarneq ajortut, taamatuttaaq angut arnamik pinnittar­nermini malunnaarsaarluni iliuuseqarsin­naasartoq. Tassa oqaatsit ‘angutip arnami inuusuttumi ingerlavia’ nuanniitsumik imatut isumaqar­tissimavagut: Angutip inuusuttup arnaq inuusuttoq pakasarlugu kanngunar­tuliorfigigaa.

Kisianni pissutis­saqarluarluta isummersin­naavugut ajunngitsoq uani pineqartoq. Tassa allattup versini taakkunani tupigusuutigisani allaatigiinnarpai.

Aamma itsaq hebræerisut oqaatsini uani atorneqartuni paasineqarsinnaavoq ajunngitsoq pineqartoq. Hebræerisut oqaatsinik qinerlerfissiami allassimavoq Ussatit 30:18-imi oqaaseq ‘siunersis­saangitsumik’ nutserneqartoq aamma “immikkuul­larissumik, ajornarpasissumik allaallu nuanningaartumik” isumaqarsinnaasoq. – Ernst Jenni aamma Claus Westermann: Theological Lexicon of the Old Testament.

Harvard Universitymi USA-miittumi professori Crawford H. Toy allappoq versini taakkunani ajortoq pineqan­ngitsoq imalu isummerluni: “Allattup eqqaasani qanoq tupinnnar­tigisut allaatigai.”– A Critical and Exegetical Commentary on the Book of Proverbs.

Taamaattumik pissutis­saqarluarluta oqarsin­naavugut Ussatit 30:18, 19-imilu eqqaaneqartut nuannersuusut allaallu paasisin­naasatsinnit tupinnangaar­nerusut. Biibilimik allattoq assigalugu uaguttaaq tupigusuutigaarput nattoralik qilaap ikeraagut qanoq timmisinnaasoq, pulateriaarsuk nioqanngitsoq qaarsukkut qanoq ingerlasinnaasoq, umiarsuaq immakkut qanoq ingerlasinnaasoq kiisalu angut arnarlu qanoq asannilersoorlutik pilluarlutillu inooqatigiisinnaasut.