‘Ikkunneqarfitsinni Jehovap inerititaqarluar­tittarpaatigut’

Aappariit Kassholmikkut 1979-imi Ilinniarfimmi Gileadimi ilinniar­tuupput, ukiullu ingerlanerini Iranimut, Mauritiusimut Myanmarimut, Tanzaniamut, Ugandamut Zairemullu nuutsin­neqartarsimapput. Nutaamik suliassin­neqaraangamik oqariartaaseq Gileadimi ilinniar­titsisup Jack Redfordip aallaqqaataani eqqaasaa iluaqutigisarsimavaat. Nammineq oqaluttuar­teriartigit.

Qanoq ilillusi sallusuis­summiilersimanersi oqaluttuarilaarsin­naavisiuk?

Mats: Aap, sorsunnersuup kingulliup nalaani Polenimi ataataga ilagiinni katuullini ilumoor­tuusaarnermut isiginnit­tuusimavoq. Taamaattorli ima oqartarpoq: “Eqqortumik upperisarsior­toqarsimassaaq!” Piffissap ingerlanerani tamanna uanga uppernarsivara. Atuakkanik atornikunik pisisarpunga. Taakkua ilagaat atuagaq tungujortoq qulequtalik sagdlusuíssut inûnigssamut nâgssáungitsumut sangmisoĸ. Qulequtaa soqutiginar­tillugu unnuaannaq naallugu atuarpara. Paasivaralu upperisaq ilumoortoq nassaaralugu!

1972-imi apriili aallarnerfigalugu Jehovap Nalunaajaasuisa Biibililersaarutaaterpassui atuartalerpakka apeqqutikkalu akissutis­sarsillugit. Jiisusip assersuusiaani niuertutut sapanngamik nalilerujus­suarmik nassaartutut misigaanga. Nakorsan­ngorniar­nerigaluara taamaatiin­narlugu sallusuissut sapanngatut nalilerujus­suartut ittoq ‘pisiaraara’. (Mat 13:45, 46) 1972-imi decembarip qulinganni imermut morsutsitaavunga.

Ukiup ataatsip iluani angajoqqaakka nukaralu aamma Nalunaajaasun­ngorput. 1973-imi juulimi pioneritut kiffartulerpunga. Ilagiitsinni pionerit aallussil­luartut ilaat, Ann-Catrinimik atilik, maluginialerpara. Asannilersoorpugut 1975-imilu katilluta. Ukiut sisamat tulliuttut Sverigemi Strömsundimi alianaatsorsuarmi najugaqarpugut. Inuppaaluit tassaniittut Biibilimik ilinniarusupput.

Ann-Catrin: Ataatama Stockholmimi universitetimi ilinniar­tilluni sallusuissut paasivaa. Taamani uanga pingasuinnarnik qaammateqarpunga. Ataatamali ataatsimiigiarnermut oqaluus­siartor­nermullu nassartuaan­narpaanga. Anaanama tamanna nuannarinngilaa Nalunaajaasullu upperisaat eqqunngitsuunerarlugu uppernarsar­niartarlugu. Killormulli sunniuteqarpoq namminerlu Nalunaajaasun­ngorluni. 13-inik ukioqarlunga imermut morsutsitaavunga 16-inillu ukioqarlunga pionerin­ngorlunga. Umeåmi oqaluus­sisartunik pisariaqar­titsiffiungaartumi kiffartor­tillunga specialpionerin­ngorpunga.

Matsilu katereerluta sallusuissummik ilinniar­titagut arlallit Nalunaajaasun­ngorput. Taakkua ilagaat arnaq inuusut­tunnguaq Maivorimik atilik. Inuutis­sarsiutigalugu timersor­tarunnaarluni nukara pioneritut kiffartoqatigilerpaa. 1984-imi marluullutik Gileadimi ilinniar­tunngorput maannalu Ecuadorimi oqaluus­sisartutut aallartitatut kiffartorlutik.

Oqaluus­sisartutut kiffartornermi nooqattaar­nissinni siunnersuut “ikkunneqarfissinni inerititaqarluaritsi” qanoq maleruarpisiuk?

Mats: Arlaleriarluta nutaamik suliassin­neqartarpugut. Jiisusili ‘sorlaqarfigalugu’ sapinngisatsinnik ilaarniar­tarparput, pingaartumik maniguunnikkut. (Kol 2:6, 7) Assersuutigalugu Nalunaajaasoqatigut tikitagut uagutsitut suleriaaseqar­tinniarsarinagit sooq taakku taamatut suleriaaseqarnersut paasiniar­niartarparput. Eqqarsar­taasiat kulturiallu paasiniarusut­tarpagut. Jiisusitut pissuseqar­nerujar­tortilluta sumiluunniit suliassin­neqarnermi ‘kuunnguup killinganut ikkunneqarsimasutut’ misigaluta nuannaar­tuarsin­naavugut. – Tuss 1:2, 3.

Ann-Catrin: Nutaamik suliassin­neqaraangatta orpittut ikkuterlaatut naajatoq­qinnissamut seqinermik pisariaqar­titsisutut ittarpugut. Jehova uagutsinnut tassaajuaannarpoq seqinertut ittoq. (Tuss 84:12) Asannit­tunimmi qanilaar­tunillu anersaakkut ilaqutaqar­tippaatigut. Assersuutigalugu Teheranimi Iranimiittumi ilagiinni qatanngutit inoroorsaarlutillu tukkortuupput. Inoroorsaarnerat Biibilimi atuartak­katsinnut eqqaanar­tittarparput. Iranimiigin­narusuk­kaluarpugut, 1980-imili juulimi Jehovap Nalunaajaasuisa tassani sulinerat inerteq­qutaalerpoq. Qimannissaanut 48 tiimiinnarnik periarfis­sinneqarpugut. Taava Zairemut (ullumikkut Congomik ilisimaneqartoq) Afrikamiittumut nooqquneqarpugut.

Paasigakku Afrikamut nuuttus­sanngorluta qissaserpunga pulateriaarsuit nappaatillu tusaamajuar­takkakka ersigigakkit. Aappariilli ikinngutigil­luakkatta ukiorpassuarni Afrikami kiffartorsimasut oqarfigaatigut: “Suli Afrikamiinikuun­ngilasi. Annilaangas­sanngilasi! Misileriarsiuk, takussavarsi, ungagilis­savarsi.” Sunaaffalimi! Qatanngutit asannit­tuullutillu qanilaar­tuupput. Ukiut arfinillit qaangiummata suliatta inerteq­qutaalernera pissutigalugu Zaire qimattus­sanngorparput. Imminut quiagalunga Jehovamut qinuvunga Afrikamiigin­narsinnaan­nginnerluta.

Ukiut ingerlaneranni nuannersunik qanoq misigisaqar­nikuuisi?

Mats: Kiffartor­nitsinni oqaluus­sisartutut aallartitat allat nunanit allaneersut qanimut ikinngutigilerpagut. Aamma suliassin­neqarnitta ilaanni nuannaarutigisatsinnik marluulluta immikkut 20-t pallillugit atuaqqis­saaqateqar­tarnikuuvugut. Qatanngutitta Afrikamiut inoroorsaarnerat asannin­nerallu puiunngisaan­nassavakka! Tanzaniami ilagiinnut tikeraaraangatta ikinnguterpassuatta ajunngisarfigisarpaatigut ilaatigut biiligut sinittarfigisar­takkagut illumik killingani inissisimatillugit. Piitsuugaluarlutik pisariaqar­titatsinnik tamanik isumagisarpaatigut. (Kor 2. 8:3) Immikkut nuannarisarparput oqaluttuarfimmik taasartagarput. Tassani ullup naanerani Ann-Catrinilu ullormi pisimasut eqqartor­tarpagut Jehovallu najorsimam­matigut qujamasuutigisarlugu.

Ann-Catrin: Qatanngutit nunanit assigiin­ngitsuneersut ilisarisimalikkakka nuannaarutigeqaakka. Oqaatsit allat ilikkaratsigit – ilaatigut persiamiutut, franskisut, luganda, swahilisullu – kulturit assigiin­ngitsorpassuit ilisimasaqarfigilerpagut. Qatanngutit nutaat arnat angutillu ikiorlugit ilinniar­tittarpagut. Ikinngutigil­lualertarpagut Jehovamullu kiffartornermi suleqatigiler­tarlugit. – Sef 3:9.

Jehovap pinngor­titarsuani alutornar­torpassuit aamma takuagut. Jehovamut kiffartornermi suliassin­neqarnerit tamaasa misigisarpugut Jehovap nutaamik misigisas­sarsior­tikkaatigut. Nammineq ilikkagas­sarinngisaraluatsinnik Jehovap ilinniar­tippaatigut.

Ajornar­torsiutit suut nalaassimavisigit, qanorlu naammagalugit atorpisigit?

Mats: Ukiut ingerlaneranni nappaatinik assigiin­ngitsunik eqqugaavugut, ilaatigut malaria. Aamma naatsorsuutigin­ngisamik Ann-Catrin arlaleriarluni suliaritit­tariaqartarpoq. Angajoq­qaagullu utoqqalisut isumakuluutigisar­nikuuagut, qujanar­tumilli qatanngutitta naammagit­tarlutik, nuannaarlutik asannil­lutillu isumagiuar­tarnikuuaat. (Tim 1. 5:4) Sapinngisatsinnik ungasianiit ikiuuttaraluarluta ilaannikkut misigis­sutsitsigut nuanniil­liortarpugut, kissaatigigaluaratsigumi angajoqqaagut tikillugit ikiuunnerusin­naanissarput.

Ann-Catrin: 1983-imi Zairemi kiffartor­tilluta koleramik napparsimarujus­sualerpunga. Nakorsap Mats oqarfigaa: “Massakkorluinnaq nuliat maanngaanniit aallaruguk!” Aqaguani aallartus­satuamut assartuummut ilaalluta Sverigemut aallarpugut.

Mats: Isumalioratta oqaluus­sisartutut aallartitatut kiffartoq­qissanata qiavugut. Nakorsaq isumaqaraluarpoq Ann-Catrinip napparsimanini anigussan­ngikkaa, anigorpaali. Ukioq ataaseq qaangiuttorlu Zairemut uterpugut. Tamatumuuna Lubumbashimi ilagiinni amerlaval­laanngitsunik oqaluus­sisartulimmi swahilisut oqaluttuni kiffartulerpugut.

Ann-Catrin: Lubumbashimiitilluta naartuleraluarama katatsivunga. Naak meerartaar­niarluta eqqarsaateqan­ngikkaluarluta annaagakku aliasoqaanga. Aliasunnerma nalaani naatsorsuutigin­ngisatsinnik Jehovap pilluaq­quaatigut. Biibilimik atuaqqis­saaqatigut aatsaat taama amerlatigilerput. Ukiup ataatsip iluani ilagiinni oqaluus­sisartut 35-usut 70-inut amerlipput, ataatsimiin­nermilu najuuttartut 40-usut 220-nut amerlipput. Oqaluus­sinermi ilungersornerput Jehovap pilluaq­qummagu misigis­sutsikkut pitsanngoriar­tulerpunga. Taamaak­kaluartoq katatannguara puiorneq ajorparput. Pissanganarpoq misigis­sallugu Jehovap paratiisissami misigis­sutsikkut qanorpiaq tamakkiisumik peqqissiteq­qissaneraatigut.

Mats: Piffissap ilaani Ann-Catrin qasorujus­suarnermik nalaanneqarpoq. Tamatumalu nalaani uanga inaluarsuakkut kræftimik eqqugaavunga suliariterujus­suartariaqalerlungalu. Ullumikkulli ajunngilanga Ann-Catrinillu sapinngisan­nguaminik Jehovamut kiffartornini aallutiinnarpaa.

Paasilerparput uagut kisitta atugarliornata. 1994-imi Rwandami inuiannik toqoraanersuup kingorna ikinnguterpassuagut qimaasut inissiarsuiniittut tikeraarpagut. Uppernerat, pinertusaarnerat pissakik­kaluarlutillu tukkortuujuaan­narnerat takullugu paasivarput Jehova innuttaminik atugarliortunik ikiuisartoq. – Tuss 55:23.

Ann-Catrin: 2007-imi Ugandami immikkoor­tortaqarfiup atoqqaarfis­siornerani najuutereernitta kingorna alianartumik pisoqarpoq. Nalliut­torsioreerluta oqaluus­sisartutut aallartitat Betelimilu kiffartortut 25-t missaan­niilluta Nairobimut Kenyamiittumut busserluta aallarpugut. Kenyami killeqarfik suli tikinngikkipput biilit lastillit aqquserngup illuatungaaniittoq tungitsin­nuinnaq aallarpoq aporlutalu. Aquttorput ikinngutigullu tallimat toqutaapput, kingusin­nerusukkullu qatannguterput arnaq ataaseq napparsim­mavimmi toquvoq. Makititaaf­fissami ikinngutitta takoqqin­nissaannut qilanaaqaagut! – Job 14:13-15.

Piffissap ingerlanerani timikkut peqqissiar­toqqippunga, kisianni uagut bussinullu ilaaqatigut arlallit annilaangarujus­suarnermik (PTSD-mik) eqqugaavugut. Uannut eqqaassaguma unnuakkut annilaangarujus­suarlunga uummatiga kassuttorujussuusoq itertarpunga. Ajortaqaaq, kisianni Jehovamut qamannga pisumik qinuneq allassimaffiillu nuannaril­luakkagut eqqissis­sutigisarpagut. Aamma annilaangarujus­suarnermik immikkut ilisimasalinnut ikiortis­sarsiornerput iluaqutigeqaarput. Maannakkut ersiutai annikil­linikuupput, Jehovamullu qinnutigisarparput ikioqqulluta allat uagutsitulli eqqugaasimasut tuppallersar­taqqullugit.

Oqarpusi unamminiar­nartunik nalaataqarsimatillusi Jehovap “mannittut uunneqan­ngitsutut paarisaraasi”. Tassa qanoq?

Mats: Swahilisut oqariar­taatsimeersuuvoq “Tumebebwa kama mayai mabichi”. Isumaqarpoq: “Mannittut uunneqan­ngitsutut paarineqarpugut.” Soorlu inuup manniit uunneqan­ngitsut qajassuullugit paarisarai, Jehovap suliassin­neqarnitsinni tamani qajassuulluta asannittumik isumagisarsimavaatigut. Pisariaqar­titatsinnik amigaateqan­ngisaan­narpugut, allaat sinnilinnik tunineqar­tarpugut. Ilaatigut Jehovap asannit­tuunera tapersersuineralu Siulersuisoqatigiit paasinnil­luinnarlutik ikiuisar­nerisigut misigisarparput.

Ann-Catrin: Jehovap asannilluni ikiuisimanerata ilaat eqqaalaarsin­naavara. Ullut ilaanni sianerfigineqarpugut ataataga Sverigemi peruluttut inaannut unitsin­neqarsimasoq. Mats malariamik napparsimareerluni suli sanngiippoq. Sverigemut bilitsisiniutis­saqannginnatta aalajangerpugut biilerput tuniniarlugu. Aalajangereersugullu telefoni marloriarluni sianeqqippoq. Sianertut siulliit aappariiupput atukkatsinnik tusagaqarsimasut, neqeroorfigaatigullu bilitsip aappaa akilerusullugu. Sianertullu aappaa tassaavoq qatanngut arnaq utoqqaq aningaasanik toqqorterisimasoq allagar­talerlugu: “Pisariaqar­titsisunut.” Minutsialunnguit ingerlaneranni Jehovap ikiuinera misigaarput! – Hebr 13:6.

Ukiut 50-it piffissaq tamaat kiffartoreerlusi qanoq ilikkagaqarpisi?

Ann-Catrin: Paasinikuuara ‘utaqqil­luaannarneq tatigin­ninnerlu nakuussutigilersimalugit.’ Jehova tatigalugu iliuuseqaraangatta sorsutassagut Jehovap tigusarpaalusooq sorsuutigalugillu. (Es 30:15, Testamentitoqaq; Nal 2. 20:15, 17) Jehovamut kiffartornermi suliassat immikkut tamaasa sapinngisatsinnik suliarisaratsigit pilluaq­qussutissanik allatigut pisinnaan­ngisatsinnik pilluaq­quneqar­tarpugut.

Mats: Pingaarnertut ilikkarpara Jehovap sutigut tamatigut tatigisarnissaa qularinagulu ikiortuas­sagaanga. (Tuss 37:5) Neriorsuisimanermisut ikiortuaan­narpaanga. Maannakkut Betelimi Myanmarimiittumi kiffartor­nitsinni ikiuisarnera aamma misigisarparput.

Neriuppugut inuusut­torpassuit kiffartor­nerminni iliuuseqar­nerorusuttut uagutsitulli Jehovap ilumoorfigin­nilluni asanninnera misigiumaaraat. Upperil­luinnarparput sumiluunniit ‘ikkunneqaraluarpata Jehovap inerititaqarluar­tikkumaarai’.