Qinuneq pillugu inuit isumaat
“Qinugaangama misigisarpunga Guutip tasiortaraanga iliuusissaarukkaangamalu siulersortaraanga.” – MARÍA.
“Nuliara ukiuni 13-ini kræfteqareerluni toquvoq. Eqqaamavara ullut tamaasa Guutimut qinusarlunga misigisarlungalu erloqininni ilumut tusarnaartaraanga. Eqqissiallaatigisarpara.” – RAÚL.
“Qinuneq inunnut Guutimit tunissutaavoq naleqangaartoq.” – ARNE.
Maríamut, Raúlimut, Arnemut allarpassuarnullu qinuneq tunissutaavoq asseqanngilluinnartoq. Misigipput qinunikkut Guuti oqaluussinnaallugu, qutsavigisinnaallugu ikiortissarsiorfigisinnaallugulu. Guutimut qinuneq pillugu Biibilimi allassimasoq una upperilluinnarpaat: “Mannaavorlu taassuma saavani nakimanngissutigisarput: Piumasaminut naapertuuttumik qinnuigigutsinni tusarumaaraatigut.” – 1 Johannesi 5:14.
Inuppassuilli allat qinuneq pillugu Biibilimi allassimasut akueriuminaatsittarpaat. Steve qinuneq pillugu qanoq misigisimanerluni ima oqaluttuarpoq: “17-inik ukioqartunga ikinngutikka pingasut pisuni assigiinngitsuni marlunni ajunaarput. Ataaseq biilinik ajutoorluni toquvoq marlullu imaani ajunaarlutik.” Steve qanoq iliorpa? “Qinunikkut Guuti aperivara sooruna taakku ajunaartut, akineqanngilangali. Taava ima eqqarsarpunga: ‘Taavami sooq qinusassaanga?’” Inuppassuit qinnutitik akineqarsorisannginnamikkit qinunerup pingaaruteqarnera apeqqusertarpaat.
Inuit allanik pissuteqarlutik qinunerup iluaqutaanera pillugu aamma taama aperisarput. Ilaat oqartarput Guutip suut tamaasa nalunngimmagit, tassa pisariaqartitagut ajornartorsiutigulluunniit ilisimareermagit, tamakkuninnga oqaluttuunnissaa pisariaqanngitsoq.
Sulilu allat misigipput siornatigut ajortuliatik pissutigalugit Guutip qinnutitik tusaarusunngikkai. Jenny ima oqaluttuarpoq: “Naleqanngitsutut misiginera ajornartorsiutiginerpaavara. Peqqissimissutigisannik iliuuseqartarnikuugama imminut oqarfigisarpunga Guutimit tusarneqarnissannut naleqqunnanga.”
Illimmi? Qinuneq pillugu qulaani oqaluttuartut misigisaannut assingusumik misigisarpit? Taamaappat akissutit naammaginartut Biibilimeersut tuppallersaatigisinnaavatit. Qinunermut tunngatillugu Biibilimi allassimasut tutsuiginartuupput.a Taakku iluaqutigalugit apeqqutit uku akissutissarsissavatit:
Guutip qinnutigut ilumut tusartarpai?
Sooq qinnutit ilaat akineqarneq ajorpat?
Qinnutitit tusarneqassappata qanoq qinussavit?
Qinuneq qanoq iluaqutigisinnaaviuk?
a Guutip kiffaasa amerlasuut, ilaatigut Jiisusip Kristusip, qinnutaat Biibilimi ilanngunneqarsimapput. Hebræerisut Allakkani Illernartuni, aamma Testamentitoqqamik taaneqartartuni, qinnutit 150-init amerlanerusut allassimapput.