Qinnutit akineqarsinnaasut

PISSAANERNUT qutsinnerusunut attaveqarnissamik kissaateqarneq inuttulli pisoqaatigaaq. Assersuutigalugu taaneqarsinnaavoq allakkat Ægyptenitoqqameersut qinnutinik, ilaatigut guutimut illersorneqarnissamik qinnutaasunik aammalu guutimut qinuffigisamut tatiginninnermik ersersitsiniutaasunik, imaqarmata. Ukiut hundredellit arfineq-pingajussaanni Grækerit akornanni qinnutit nalliuttorsiorpalaartut aammalu taallat erinarsuutillu unnersiutiginnissutaasut ikiortigalugit qinnutit nalinginnaasorujussuupput. Guuti sorleq torlorfiginerlugu Romamiutoqqat mianersuutigeqqissaartarsimavaat, tassami guutit assigiinngitsorpassuit pallorfigisarigamikkik.

Aammattaaq ullumikkut silarsuarmi upperisarsiornerit pingaarnerusut qinnutit ilisarnaatigaat. Buddhasiortut, hinduit, juutit, muuamaakkut aammalu kristumiuunerartut guutisiornerminni qinnutinik atuikulanertik ilisimaneqaatigaat. Naak ullumikkut, ukiut hundredellit 20-ssaanni, upperisarsiortuni assigiinngitsorpassuarni qinuneq atugaagaluaqisoq, taamaattoq inuit qinnutimik akineqarnissaannik kissaateqaraluartut qinnutit assigiinngitsorpassuit aammalu qinoriaatsit assigiinngitsorpassuit atorneqarnerat paatsiveerussutigisarpaat.

Qanorluunniit iliorluni qinugaluaraanni ajunngila?

Qinoriaatsit assigiinngitsorpassuummata qinnutit tamarmik assigiimmik sunniuttarnerat apeqqutaalerpoq. Inuppassuit isumaqarput inuup qinusup qinoriaaseq sunaluunniit atoraluaruniuk soqutaanngitsoq kisianni unneqqarissuuguni „uppertuugunilu“ naammattoq. Illit qanoq isumaqarpit? Tamatumunnga tunngasumik assigiinngitsorpassuarnik isumaqartoqarnera eqqarsaatigalugu pisariaqarpoq inuit isumaat pinnagit paasissutissat qutsinnerusumeersut paasiniaaffigissallugit.

Tulliuttuni taamaaliussaagut, tassa Bibeli siunersiussagatsigu. Tassani ersersinneqarpoq qinnutit tusarneqarlutillu akineqassappata qanoq ittumik qinuneq aalajangiisuusoq.

Bibelimi ersersinneqarpoq:

Kimut qinusoqartassasoq

Sooq qinnutit ilaat akineqarneq ajortut

Suut qinnutigineqarsinnaasut

Qinusoq sumik piumasaqarfigineqarpa?

Piumasarineqartoq pingaaruteqartoq tassaavoq uppersuseqarnissaq. Guutip piuneranik aammalu qinnutinik tusarsinnaaneranik upperinninneq kisimi piumasarineqanngilaq. (Eprîarit 11:6) Uppersuseq taama ittoq ersersinneqarsinnaavoq ilungersorluni Guutip najoqqutassiai naapertuilluartut Bibelimi saqqummiunneqartut naapertorlugit inuuniarnikkut. Jesusip qaqqami oqaluutsimini tamanna erseqqissarpaa: ’Uannut oqartut: „Naalagaq, Naalagaq,“ qilammiup naalagaaffianut tamakkeratik isissapput, kisianni Ataatama qilammiusup peqqusaanik iliortut.’ — Matîuse 7:21.

Pruffiitip hebræeriusup, Esajasip, inuit qinnutiminnik tusarneqarnavianngitsut eqqartorpai: ’Pallortarnisi amerlanaaraluarussigilluunniit [uanga, Jehova Guuti] tusassanngilassi, assasi aalissuummata.’ (Isaia 1:15) Tassa inuunerup illernassusianik ataqqinninngitsup qanorluunniit amerlatigisunik ilungersortigisumilluunniit qinugaluaruni ilimagisinnaanngilaa qinnutimi tusarneqarnissaat.

Allaat inuppassuit „uppertut“ qinnutiminnik akineqarneq ajornerannut suna peqqutaava?

Guutimit iluaritissagaanni aammalu qinnutit akineqassappata uppernerinnaq naammanngilaq. Allaat inuit uppernikikkaluartut immaqa oqartarput sakkortuumik uppersuseqarlutik. Upperneq timitaqarlunilu naleqassaguni eqqorluartumik ilisimanermik, Bibelimik atuaqqissaarnikkut aatsaat anguneqarsinnaasumik, tunngaveqartariaqarpoq. Upperneq aammattaaq sulianik ilaqartariaqarpoq, imami allassimammat: ’Soorlumi timi anersaaqanngitsoq toqungasoq, taamattaaq upperneq sulianik ilaqanngitsoq toqungavoq.’ — Jâko 2:26.

Upperluartup aammattaaq ulluinnarni Guuti eqqarsaatigisariaqarpaa, imaanngitsoq aatsaat ajornartoorluinnarfimmini qinunikkut qimaaffiginiartassagaa. Uppernerminut naapertuuttunik suliaqartariaqarpoq, taamaaliussagunilu Guutimut uppernini tatiginninninilu inunnut allanut oqaluuserisariaqarpaa.

Qanoq ittumik qinusariaqarpa?

Qinuniaraanni malittarisaqartariaqanngilaq imaluunniit atuakkamik najoqqutalerluni qinusoqartariaqanngilaq. Oqaatsit tusarneraluarlutik isumaqangaanngitsut uteqattaarinerillu qinunermi atortariaqanngillat — uteqattaarinerimmi qinnut sunniuteqarnerulersinnavianngimmassuk. Aammattaaq inunnit allanit takutinniaannarluni imaluunniit malugitinniaannarluni qinusoqartariaqanngilaq. Jesus pitsaasumik siunnersuivoq qanoq ittumik qinusassasugut suullu pinngitsoorniartariaqarivut: ’Qinusaraangavillu ilumoortuusaarniartutut issanngilatit; taakku qinujumallaaraat naalagiartarfinni illullu akornisa katinnerini qeqarlutik inunnut malugeqqullutik. . . . Qinusaraangassili oqaatsisi Guutimik nalusutut amerlanaassanngilasi, taakku amerlasuunik oqaaseqaraangamik tusarneqassasorisarmata.’ — Matîuse 6:5-7.

Qinnutit tusarneqassappata aalajangersimasumik pissusilersuuteqarnissaq piumasarineqanngilaq. Qinusorli oqaatsimigut inissisimanermigullu maniguuppasillunilu ataqqinnippaluttariaqarpoq.

Kimut qinusariaqarpa?

Eprîarinut agdlagkat-ni oqaluuserineqarpoq ’Guutimut orniguttoqarsinnaasoq’. (Eprîarit 11:6) Kisianni kinaana taanna Guuti? Naak inuit pilersitaannik ilumuunngitsunik guuterpassuaqaraluartoq ataasiinnarmik ajugaqanngitsumik Guuteqarpoq. (1 Korintumiut 8:5, 6) Guuti Ajugaqanngitsoq Bibelimi taaneqarpoq Jehovamik. (Tussiaat 83:18) Taanna tassaavoq tamanik Pinngortitsisoq taamaattumillu taanna kisimi qinunikkut saaffigineqartariaqarpoq. Jesus Kristusip ajoqersukkani qanoq qinunissaannik erseqqilluinnartumik ilitsersuuppai: ’Ataatarput qilammiusutit.’ (Matîuse 6:9) Imminut anaanaminulluunniit, Mariamut, allamulluunniit qinusassasugut Jesusip ilinniartitsissutiginngilaa. Guutilli piumasaraa ernermi inissisimaffia akuerissagipput; tamatuminngalu akuerinninnerput tamatigut Jesusip aqqa tunaaralugu qinusarnitsigut ersersissinnaavarput. Tamannarpiaq peqqutigalugu Jesus ajoqersukkaminut ima oqarsimavoq: ’Allakkut Ataatamut pisoqarsinnaanngilaq, uakkut kisianni.’ — Juánase 14:6.

Qinnutivut Jehova Guutimit akuerineqassappata taassuma ernera, Jesus Kristus, aqqutigalugu taassumunnga qinnutigisariaqarpavut. Taamaattumik Guuti saaffigalugu Jesusip aqqa tunaaralugu qinnutaasariaqarput.

Suut qinnutigineqarsinnaappat?

„Piumasaa naapertorlugu sumilluunniit qinugutta [Guutip] tusarumaarpaatigut.“ Neriorsuut paasineq ajornartutut isigineqarsinnaasoq tamanna Juánasip agdlagai sujugdlît 5:14-imi (NV) allassimavoq. Malugaajulli sumik piumasaqaateqarmat? Qinnut „piumasaa naapertorlugu“ pissasoq. Qinnuterpassuit akineqartannginnerannut peqqutaasut pingaarnerit ilagaat Guutip piumasaa suunersoq qinusup paasiniaqqaarneq ajormagu. — ússatit 3:5-7.

Qinunerminni ikiortissaattut imaluunniit najoqqutassaattut Jesusip ajoqersukkani ilitsersuussimavai ullumikkut „Ataatarpooq“-tut ilisimaneqartumik. (Matîuse 6:9-13) Tamanna alanngaaginnarlugu uteqattaartagassatut tunniunneqanngilaq, kisianni tassani ersersinneqarpoq qinnutitsinni suut pingaarnerutittariaqarivut. Siullermik taaneqartut Guutip aqqanut siunertaanullu tunngapput. Taava tulliullugit qinnutigineqarsinnaapput timip piisigut pisariaqartitat, isumakkeerfigineqarnissaq aammalu ajortup ussernartorsiortitsineranut akiuussinnaanissaq. Oqaatsip ’Ataatarput’-p qinusoq immaqa paasitissinnaavaa ilaquttat qanigisallu kisimiunngitsoq qinnunneqartassasut, aammattaarli inuit allat Pinngortitsisimik iluarisaanik iliorniartut qinnunneqartassasut. — apustilit suliait 17:26, 27.

Qinnutit qanoq takitigisariaqarpat?

Qinnutit qanoq takitigisariaqarnerat Bibelimi immikkut taaneqanngilaq. Naatsunnguusinnaapput, nipeqanngitsumillu qinusoqarsinnaavoq. (Nĩmia 2:4; 1 Sâmuale 1:12, 13) Ilaatigulli aamma qinnutit takingaatsiartorsuusinnaapput. Ilaanni Jesusip ’unnuaq naavaa Guutimut qinulluni’, qularnanngitsumik apustilinik aqqaneq-marlunnik toqqaaniarnermini Ataataminut ikioqqulluni. (Lúkarse 6:12) Tassa qinnutit Guutimit akuerineqarsinnaasut takissusii assigiinngisitaartorujussuupput, pissutsit atugarisat aalajangiisuusarlutik.

Qinnutit akineqartarput

Bibelimi oqaluttuarpassuaqarpoq ’qinnutinik tusartartup’, Jehova Guutip, aammattaaq qinnutinik akisisarsimaneranik eqqartuisunik. (Tussiaat 65:3) kúnginik agdlagkat sujugdlît, kapitali 18-imi, eqqartorneqartoq Elias pruffiitiugallarmat Karmelip qaqqaani qinunermik unammineq tamatumunnga assersuutissaalluarpoq. Ukiuni hundredelinni siullerni ilaanni Jesusip ajoqersugaasa qinnutimik tassuuguinnaq akineqarnerat misigisimavaat: ’Qinoreermata katisimaffiat aalavoq, tamarmillu anersaamik illernartumik ilumioqangaalerput, Guutillu oqaasia siooranatik oqaluutigaat.’ — apustilit suliait 4:23-31.

Atuagassiamik matuminnga saqqummersitsisartut angutinit arnanillu assigiinngitsunik utoqqaassusilinnit, ajornartoorfeqarsimanerminnik oqaluttuartunit, ikinngeqisunik allagarsisarsimapput. Pissutsilli allanngoriartornerisigut qularutigiunnaartarsimavaat qinnutitik tusarneqarsimallutillu akineqarsimasut.

Tamakkua ilaannik taasaqalaassaagut: Angut inuusuttoq Italiap killeqarfiata eqqannguani, Schweizip qaqqartuuisa akornanni qooqqumi avinngarusimasumi najugaqartoq ima oqaluttuarpoq: „Paasivara [inuunermi ajornartorsiutikka] anigorsinnaajunnaarlugit, taamaattumik toqunissara kissaatigiinnalerpara. . . . Iliuuserisinnaasattut eqqaasatuara tassa Guutimut qinunissara, taamaaliorpungalu: ’Guuti ilisarisimanngisara! Piusimassaatit, Guutiusimassaatillu asannittoq. Ikiunnga! Sapilerpunga — sallusuissutip nassaarinissaanik ikiunnga.’“ Ullualunnguit qaangiuttullu inuusuttut aappariit Jehovap Nalunaajaasuisa angut taanna pulaarpaat. Bibelimik atuaqqissaaqatigineqartalerpoq, ullumikkullu Jehovap Nalunaajaasuatut kuisimavoq.

Napparsimasunik paarsisup upperniartorujussuup uimi inuunerluttunngorsimanera tamannalu pillugu averusissamaalernertik aliasuutigisorujussuuai. Ullut ilaanni ilungersorluni qinunikkut Guutimut saaffiginnippoq, inuuneq siunertaqarpat tamatuminnga ersersitsivigeqqulluni. Ulloq taannarpiaq ualikkut Jehovap Nalunaajaasuisa ilaat illumiit illumut angalaartut matuanut kasuttorput. Iseqquai, nuannaarutigaalu apeqquterpassuani Bibeli tunngavigalugu akisinnaammatigik. Kingorna napparsimasunik paarsisoq taanna ’tusagassamik nuannersumik’ oqaluussisartunngorpoq Bibelimillu atuaqqissaaqatiginnittalerluni. — Matîuse 24:14.

Jehovap Nalunaajaasua biilimini issiavoq Napasuliaq Alapernaarsuiffik-llu atuarlugu. Taava tassanngaannaq angummit qungatsimigut tiguneqarpoq. Nalunaajaasoq ilungersorluni Jehova Guutimut qinuvoq. Angutaaserniartoq nukillaartutut ilivoq, tigummisanilu iperarlugu. Nalunaajaasup biilini aallartippaa, angut inuulluaqquaa inuusaliatullu qeratatigaluni aqqusinermi nikorfasoq qimallugu.

Silarsuarmi qularfiullunilu nalorniffiujartuinnartumi Guutimik sallusuissummillu asannittut Jehova Guutimut qinnutit — aqqutikkut eqqortukkut, eqqortumik periaaseqarluni aammalu isumakkut uummatikkullu eqqortumik periaaseqarluni qinnutaasut — tusarneqarsinnaanerannik ilisimanninnertik isumallualissutigaat. Guutilli ajugaqanngitsup qinnutit taama ittut tusaannarnavianngilai, aammattaarli Guutitut piumasani naapertorlugu piffissarlu aalajangersarsimasani eqqorlugu akiumaarpai. (wD 15/3 88)

[Qupp. 4-mi ungalusaq]

Qinoriaatsit assigiinngitsut

Qinoriaatsinik assigiinngitsunik ullumikkut atorneqartunik misissuineq immaqa paasissutissarsiffiusinnaavoq.

Hinduini qinnut tunngaviusoq guutimik aalajangersimasumik imaluunniit guutimik arnamik aalajangersimasumik unnersiutiginnissutaasoq qinnutigineqarajuttarpoq. Missiliuunneqarsimavorlu guutit 330.000.000-it illernartuutini 10.000-it missinginiittuni pallorfigisaasartut. Hinduit qinnutaat paasiuminaatsuugajuttarput marluiusarlutillu — tassa eqqarsaqqissaarnerunngikkunik (dhyana) unnersiutiginnissutaasarlutik (stotra). Nipituumik qinunissaq pingaartinneqarpoq.

Kinamiut Buddhasiortuisa taosiortuisalu mattuffiini ullormut pingasoriarluni (ullaakkut, ullup-qeqqanut unnukkullu) qinnutinik alanngaartakkanik qinusoqartarpoq. Qinnutit tamakku sianeeqqap sianaalaarneranik ingiorneqartarput. Buddhasiortut mattuttuisa qinunerminni ikiortitut ujammit 108-nik sapangartallit tigumiartarpaat. Aammattaaq inuinnarnit ujammit taama ittut atorneqartarput, qinnutit qasseriarluni uteqattaarneqarnersut naatsorsorsinnaajumallugu.

Qinnut ullormut qinnutigineqartartoq (salat) muuamaakkut upperluartut guutisiorneranni pingaarnerpaavoq. Ullormut tallimariarluni Mekkamut Saudi-Arabiamiittumut saalluni qinnut taanna uteqattaarneqartarpoq.

Juutit qinnutigisartagaat qinnutinik Bibelimeersunik, ilaatigut Tussiaatit-neersunik, issuagaapput. Aammattaaq qinnutinik juutini ajoqersuisuullutillu palasiusunit ilanngunneqarsimasunik nassaassaqarpoq.

Qinnuterpassuit qinoriaatsillu assigiinngitsorpassuit kristumiussutsimik nassuerutiginnittunit atorneqartarput, ujamminik qinutilluni atortakkanik ikiorserluni qinnutinit uteqattaartakkanit qinnutinut naqitanut — imaluunniit qinnutit piareersaqqaagaanngitsut ikittuinnarnillu alanngaagaanngitsunik oqaasertallit.

[Qupp. 7-mi assiliartaq]

Jesusip qinnutai akineqartarsimapput. Aamma illit qinnutitit akineqarsinnaapput