KRISTUMIUTUT INUUNEQ

Ulluinnarni ataatsimiinnerni sammineqartalertussat

2018-imi januaari aallarnerfigalugu ulluinnarni ataatsimiinnerni New World Translation of the Holy Scriptures-imut atuaqqissaarummut (nwtsty) internetikkut takuneqarsinnaasumut ilanngussat sammineqartalissapput, aamma Biibilimik nutsigaq tamanna illit oqaatsinnut nutserneqarsimanngikkaluarpalluunniit. Ataatsimiinnermut piareersarninni paasissutissat taakku iluaqutigingaassagitit qularnanngilaq. Pingaarnerusumillu, qanortoq Jehovamut, Ataatatsinnut asannittumut, qanillissutigikkit!

NASSUIAATIT

Kulturi, geografii oqaatsillu pillugit allassimasut Biibilimi allassimaffinnik paasinarsisitsipput.

Matthæusi 12:20

Iperaq qamilersoq: Angerlarsimaffinni nalinginnaasuni qulleqartarpoq immersakkamik mikisumik marraasumik. Iperaa ilupaassiassaq uuliaqutip uuliaanik ikummateqarpoq. Grækerit oqaasiini ‘iperaq qamilersumik’ nutserneqarsimasuni pineqarsimasinnaavoq ipeqqap qamilerluni qamilluniluunniit sulili aamaarluni pujornera. Esaja 42:3-mi siulittuutigineqarpoq Jiisusi misiginneqataassasoq; inuit maniguuttut naqisimaneqartullu neriuutaat aamaaginnartutut ittoq qaminngisaannassavaa.

Matthæusi 26:13

Ilumut: Oqaaseq grækerisooq amēnʹ hebræerisoorlugu ʼamenʹ isumaqarpoq “taamaalili” imaluunniit “ilumut”. Jiisusip oqaaseq tamanna atortarpaa oqaatigisassami neriorsuutillu siulittuutilluunniit oqaatiginiakkami ilumoorluinnartuunera tutsuiginarluinnartuuneralu erseqqissaraangamigit. Jiisusip “ilumut”-mik, tassa amenimik, taamatut atuisarnera atuakkani upperisarsiornermut tunngasuni immikkuullarissuunerarneqartarpoq. Oqaaseq tulleriissiinnarlugu marloriariarneqarsimagaangat (amēnʹ amēnʹ), soorlu Johannesip iivangkiiliuani taamatut atorneqartartoq, Jiisusip oqaasiisa ilumoorluinnarnerat erseqqissarneqarnerusarpoq. – Joh 1:51.

ASSIT FILMILLU

Assit, assilissat, isiginnaagassiat nipaqanngitsut titartakkallu Biibilimi eqqaaneqartut immikkuualuttortaannik takutitsipput.

Betfage, Uuliap Qaqqaa Jerusalemilu

Filmimi naatsumi kangianiit Jerusalemimut aqqutaa takutinneqarpoq, tassa illoqarfeeqqamiit ullumikkut et-Turimik taaguutilimmiit (tassaasorineqartoq Biibilip nalaani Betfage) Uuliap Qaqqaata qutsinnerpaaffiisa ilaata tungaanut. Betania Betfagep kangianiippoq Uuliap Qaqqaata kangianut sivinganertaani. Jiisusi ajoqersukkanilu Jerusalemimiikkaangamik Betaniami unnuisarsimapput. Ullumikkut illoqarfiup tamatuma Arabiamiutut taaguutigaa el-‛Azariyeh (El ‛Eizariya) ‘Lazarusip inaanik’ isumaqartoq. Qularnanngitsumik Jiisusi Marthap, Mariap Lazarusillu angerlarsimaffianni unnuisarpoq. (Matt 21:17; Mark 11:11; Luk 21:37; Joh 11:1) Taakkunanngaanniit Jiisusi Jerusalemiliaraangami aqqummut filmimi takutinneqartumut assingusukkut ingerlasarsimassagunarpoq. Ukiumi 33-mi nisanip qulingiluaanni Jiisusi Uuliap Qaqqaa itivillugu Jerusalemimut siutituup piaraa qimusserfigigamiuk Betfagemiit Jerusalemimut aqqutaatigoorsimassagunarpoq.

Betaniamiit Betfagemut aqqutaa
Betfage
Uuliap Qaqqaa
Kedronip Qoorua
Qaqqaq naalaffiup inaa

Kimmik saanikuinnaq kikialik

Inuup kimmiata saanikuinnanngorsimasup kikiammik saviminiusumik 11,5 cm-itut takitigisumik kikiattallip assinga. Nassaaq 1968-imi Jerusalemip avannaatungaani itsarnisarsiortut assaallutik nassaavat Romamiut nalaanneersorineqarpoq. (Assilillugu sanaaq assimi takutinneqarpoq). Itsarnisarsiornikkut uppernarsaataavoq inummik qisummut kikiattorlugu toqutsisoqartarsimaneranut. Kikiak tamanna Jiisusi Kristusi nappakkamut nivinngarneqarmat Romamiut sakkutuuisa atugaannut assingusimasinnaavoq. Nassaaq tamanna illerfimmi ujaraasumi, ossuariumimik taaneqartartumi, inuit toqusimasut saanikuinnanngorsimasut ilineqarfigisartagaanni nassaarineqarpoq. Tamanna ersiutaasinnaavoq nappakkamut nivinngarlugit toqutat ilineqartarsimasinnaanerannut. – Matt 27:35.