Iperaq qamilersoq qamikkumassaviuk?
JESUS KRISTUS inunnut assigiinngitsunut tamanut Guutip naalagaaffia pillugu nutaarsiassamik nuannersumik oqaluussissutiginnittarsimavoq. Oqaluussiffigisaasa ilarpassui naqisimaneqarlutillu sapiissuseeruteqqasuupput. Jesusilli qiimmaallannartumik tusarlertarpai. Naalliuttut misiginneqatigisarpai.
Iivangkiiliumik allattup Mattæusip Jesusip misiginneqataassusia erseqqissarsimavaa siulittuut Esajasip allagaaniittoq Kristusimut eqquuttoq ikiortigalugu: ’Sullortooq naffalik nalloqqissanngilaa, iperarlu qamilersoq qamivissanngilaa, eqqartuussisissaq naammassitserlugu ajugaanikkut.’ (Matîuse 12:20; Jesaja 42:3) Oqaatsit taakku qanoq paasisariaqarpat, siulittuullu tamanna Jesusip qanoq ililluni eqquutitippaa?
Siulittuummik sukumiinerusumik misissuineq
Sullortuut masarsunni naagajupput, ninngusuujunngillallu. ’Sullortooq naffalik’ qajannartorujussuuvoq. Taamaattumik inunnut naqisimaneqartunut naalliuttunulluunniit assersuutaasorinarpoq, soorlu angummut toqungasumik assalimmut Jesusip sabbatimi ajorunnaarsitaanut. (Matîuse 12:10-14) Taavami qulliup iperaata siulittuutaasumik eqqartorneqarnera qanoq paasissavarput?
Qulliit ukiuni hundredelinni siullerni illumi pisattanut nalinginnaasunut ilaasut ilagisimavaat ermusiusannguaq marrarmik sanaaq orsertut ilusilimmik tigummivilik. Olivenip uuliaa orsorineqarajuppoq, ipaqqallu ilupaassiaminiusup uulia ikummataasoq milluartarpaa. ’Iperaq qamilerpat’ soorunami isumaqarpoq qulleq qamilersoq.
Inuit assersuutaasumik sullortuutut naffalittut ittut, nikallungasut naalliutsitaasullu, Jesusip tuppallernartumik tusarlertarsimavai. Inuit taakku ipaqqatut ilupaassiaminiusutut qamiliivissutut ipput. Jesusilli sullortooq naffalik napivittanngilaa iperarlu qamilersoq qamivissanagu. Asanningaarluni oqaluffigisarpai nikallunganerulersinnagit. Qiimmaallaatigisaannik oqaaseqarlunilu iliuuseqartarpoq. — Matîuse 11:28-30.
Ullumikkuttaaq inuppassuit ajornartorsiulertarput tamannalu pissutigalugu misiginneqatigineqarnissaminnik qiimmassarneqarnissaminnillu atorfissaqartitsisarlutik. Aamma Jehovap kiffai taamaattarput. Ilaat ilaannikkut ipaqqatut qamilersutut issinnaasarput. Taamaattumik kristumiut qiimmassaqatigiillutillu nakussassaqatigiittariaqarput, aap, ’ikummarissaqatigiittariaqarput’. — Lúkarse 22:32; apustilit suliait 11:23.
Kristumiutut kissaatigaarput ineriartornartuunissarput soorunamilu piaaraluta anersaakkut ikioqqusunik sanngiillisitsiniaajumassanata. Akerlianilli Jesusip maligassiaa malinniartariaqarparput allanik nakussatsitsisarnitsigut. (Eprîarit 12:1-3; 1 Pîtruse 2:21) Qiimmassarneqarnissaminnik pisariaqartitsisut ilaannikkooriarluta ’napisooriataarsinnaagatsigik’ allanut qanoq pissuseqarnerput isumaliutigeqqissaartariaqarparput. ’Ipaqqap qamilersup qamivinnissaa’ kissaatiginngeqaarput. Tamatumani Biibilimi siunnersuutit suut iluaqutigisinnaavavut?
Isornartorsiuinerup sunniutai
Kristumiu arlaatigut kukkuluttorpat ’anersaamut atasut [anersaakkut piginnaassuseqartut] iluarsisinniassavaat anersaamik qanilaartumik’. (Galâsiamiut 6:1) Tamanna isumaqarpa allat naammalluinnanngissusii marseqqissaartariaqartut suulluunniillu naveersinissamut periarfissatut atorneqartariaqartut? Eqqortuliornerussava allat iliuusii naammannginnerarlugit tusangiasaarnerisigut iliuuseqarnerunissaannik kajumissaarniassallugit, immaqalu taamaalilluni imminnut ajorilersillugit? Jesusip taamaaliortarsimaneranut takussutissaqanngilaq. Naak allat eqqortumik periaaseqarluta kajumissaarnissaat siunertarigaluarlugu imaassinnaavoq isornartorsiuinerput sanngiillissutigiinnaraat, nakussatsissutiginagu. Allaat ajunngitsumik isornartorsiuineq ingasaanneqaruni nikallornarsinnaavoq. Kristumiu suliniarluartoq assuarineqartuaannaruni immaqa ima eqqarsalersinnaavoq: ’Ilungersornikka sumut iluaqutaappat?’ Allaat imaassinnaavoq unilluaannartoq.
Naak Biibilimit unnersuussinissaq pingaartuugaluartoq unnersuussiniaannarneq utoqqaanertat allallu ilagiinnut ilaasut tusaamasaassutigisariaqanngilaat. Kristumiut ataatsimiinneri pingaarnerpaamik unnersuussinissaq unnersuunneqarnissarlu pillugit ingerlanneqarneq ajorput. Ataatsimiittarpugut kajumissaqatigiinniarluta qiimmassaqatigiinniarlutalu, katisimaqatigiinnerput kiffartuuterpullu illernartoq Guutimit pisimasarput nuannaarutiginiarlugit. (Rûmamiut 1:11, 12; Eprîarit 10:24, 25) Pingaartorujussuuvoq kukkuluttornerup annertuup aamma naammalluinnanngissutsip, silatusaarluni asannillunilu isiginngitsuusaaginnarneqartariaqartup, assigiinngissutaat takusinnaassallugu! — Nalunaajaasup oqaasii 3:1, 7; Kulorsamiut 3:13.
Inuit qiimmassarneqarneq isornartorsiorneqarnermit qisuariarfiginasuarnerusarpaat. Ingasattumik isornartorsiorneqartut allaat isornartorsiorneqassutigisartik attatiinnarsinnaasarpaat. Akerlianilli naleqquttumik nersualaarneqarunik isumagissinerusarput siumukarnissaminnullu kajuminnerulersarlutik. (Ussatit 12:18) Taamaattumik Jesus malillugu ’iperaq qamilersoq qamivinngisaannartigu’, taarsiulluguli allanik qiimmassaasarniarta.
Naleqqiusseqattaartariaqarpa?
Misigisimasat nuannersut tusarlugit isumassarsinarsinnaasorujussuuvoq. Jesusip ajoqersukkami Naalagaaffik pillugu tusarliussamik oqaluussissutiginnikkiartornerminni misigisimasaat tusarnaassallugit assut nuannarisarsimavaa. (Lúkarse 10:17-21) Uaguttaaq uppeqatitta assuarnaassusiat, maligassiuilluarnerat angusaalluunniit pitsaasut tusaraangatsigik qiimmaallallutalu kristumiutut inuuniarluta aalajangiusimanninnitsinni nakussatsinneqartarpugut.
Qanorli sunniuteqassava misigisimasaq imatut nipilimmik saqqummiunneqarpat: ’Illit kristumiutulli taakkunatut kakkatsiginngilatit, sulilu annerujussuarmik iliuuseqartariaqaraluarputit’? Tamanna tusarnaartup siumukarnissaminut kajumississutiginaviarunanngilaa. Akerlianilli nikalluinnassaaq immaqalu uniinnarluni, ingammik taamatut tusangiasaarinerit naleqqiussinerilluunniit akulikitsumik tusartareersimagunigit. Assigiinnassavaa ataataq anaanarluunniit meeqqaminut ima aperisoq: ’Sooq qatanngutittut iliunngilatit?’ Taamatut oqarneq akaarinninngitsitsilerlunilu nikallortsitsisinnaavoq, meeqqamillu naalannerorusulersitsinaviarani. Naleqqiussinerit inersimasunut assingusumik sunniuteqarsinnaapput, taamaalillutik naleqqiunneqarfimminnut akaarinnikkunnaarlutik.
Ilimagisinnaanngilarput Jehovamut kiffartornermi kikkut tamarmik naligiimmik iliuuseqarsinnaasut. Jesusip assersuusiaanut ilaavoq angut kiffaminik talentimik ataatsimik, marlunnik tallimanillu tunisisoq. Tamaasa immikkut ’piginnaassusiat naapertorlugu’ tunivai. Kiffat marluk niuerluarsimasut talentiutiminnillu amerlanerulersitsisimasut nersualaarneqarput aalajaannertik pissutigalugu, naak aappaa aapparminit amerlanerusunik iluanaaruteqarsimagaluartoq. — Matîuse 25:14-30.
Apustili Paulus naleqqulluartumik ima allassimavoq: ’Kialuunniit nammineq suliani misililliuk, taava imminuinnaq usorsitsaatissaqassavoq aapparminullu pinnani.’ (Galâsiamiut 6:4) Allanik qiimmassaaniassagutta naleqqiussinerit nuanniitsut pinaveersaartariaqarpavut.
Qanoq ililluta ineriartuutaasinnaasugut
’Iperaq qamilersoq qamivinnagu’ qanoq iliorluta nikallungasut qiimmassarsinnaavavut? Qanoq ililluni qiimmassaasinnaanermut aalajangersimasumik malittarisassaqanngilaq. Qularnanngitsumilli ineriartornartuussaaq allat oqaloqatigigaangatsigik Biibilimi najoqqutassiat atortarutsigik. Najoqqutassiat suut?
Maniguuttuugit. Filípimiunut agdlagkat 2:3-mi Paulusip kajumissaarpaatigut ’saqitsaagajunnermit piunngitsumillu ataqqineqarumanermit pissanngitsugut’. Akerlianilli oqaatsitsigut pissutsitsigullu maniguuttuusariaqarpugut. ’Ilavut immitsinnit annerutittariaqarpavut.’ Paulus oqanngilaq immitsinnut nikanartutut nalilissasugut. Akuerisariaqarparpulli allat arlaatigut uagutsinnit ’annerusut’. Griikerit oqaasiat uani ’annerusumik’ nutserneqarsimasoq aamma isumaqarsinnaavoq „pitsaanerussutini pingaartorsiutiginngilai allallu imminit piginnaaneqarneruffii maluginiaqqissaarpai“. (New Testament Word Studies, John Albert Bengelimit, atuagaq 2, qupperneq 432) Taamatut allat immitsinnit annerutikkutsigik maniguuttumik pissuseqarfigissavavut.
Ataqqinninnermik ersersitsigit. Kristumioqativut aalajaatsut ilumoorluta oqarfigisinnaavavut tatigalugit nalunngikkippullu Guutip iluarisaanik iliorniartut. Anersaakkulli ikiorneqarnissartik atorfissaqartippassuk qanoq iliorsinnaavugut? Taava ataqqinnittumik pissuseqarluta ikiorniartariaqarpavut. Paulus ima unnersuussisimavoq: ’Ataqqeqatigiigitsi ingiaqattaallusi.’ — Rûmamiut 12:10.
Tusarnaarluartarit. Aap, ajornartorsiortut qiimmassarsinnaassagutsigik tusarnaaqqissaartariaqarpavut, oqalugiarfiginagit. Qarsupittumik siunnersuinissamut taarsiullugu pisariaqartumik Biibilimit unnersuussinermut piffissaq atortariaqarparput. Qanoq oqassalluta nalugutsigu eqqarsaatinik Biibilimeersunik tuppallernartunik qiimmaallannartunillu anitsisinnaavugut.
Asannittuugit. Ikiorusutavut asasariaqarpavut. Kiffaqatitsinnullu asanninnitta taakkua soqutigisaannut pitsaanerpaamik iliornissatsinnuinnaq killittariaqanngilaatigut, asannittumilli misigissuseqarluta taamaaliortariaqarpugut. Jehovap kiffaanut tamanut taamatut asannissuseqarutta oqaaserisavut taakkununnga assut qiimmassaataassapput. Aamma pisariaqarsinnaavoq qatannguterput qanoq ililluni siumukarsinnaaneranik siunnersussallugu. Isumarpulli saqqummiunniaannarnagu asannittumik ikiuigutta qularnanngitsumik ajoqusiinavianngilagut paatsoorneqarnaviarnataluunniit. Soorlumi Paulus eqqorluartumik oqarsimasoq: ’Asanninneq ineriartuutaasarpoq.’ — 1 Korintumiut 8:1; Filípimiut 2:4; 1 Pîtruse 1:22.
Ineriartornartuujuaannarit
’Ulluni kingullerni’ ajornakusoortuni makkunani Jehovap kiffai amerlasuutigut misilinneqartarput. (2 Timûtiuse 3:1-5) Taamaattumik tupaallassanngilagut ilavut nikallujuissutsimikkut ilaannikkut sakkortuumik misilinneqarsorinaraangata. Jehovalli kiffaasut kiffaqatitsinnik ipaqqatut qamiliivissutut misigilersitsisinnaasumik oqaaseqarumanngilluinnarpugut iliuuseqarumanngilluinnarlutaluunniit.
Taamaattumik qiimmassaqatigiinnissarput pingaartorujussuuvoq! Kiffaqativut nikallungasut ineriartortinniarlugit sapinngisarput tamaat iliorniarta taakkununnga maniguunnitsigut ataqqinninnitsigullu. Uummammiuminnik aniatitsiffigigaangatigut tusarnaaqqissaartarniarta, Guutillu oqaasianut, Biibilimut, innersuunnerisigut ikiornissaat ilungersuutigiuartigu. Iliuuserisinnaasarput pingaarnerpaaq tassa asanninnermik ersersitsineq, Jehovammi anersaavata inerititaata tamatuma nakussatseqatigiinnissatsinnik ikiussavaatigut. ’Ipaqqamik qamilersumik qamitsisinnaasumik’ oqarnaveersaarlutalu iliornaveersaarniarta. (wE 15/11 95)