Piffissamik eqqortitsisarneq ileqquliunniarsariuk
1. Jehova piffissamik eqqortitsisarnermut tunngatillugu qanoq maligassaalluarpa?
1 Jehova piffissamik eqqortitsiuaannartarpoq. Assersuutigalugu kiffani “piffissaq eqqorlugu” ikiortarpai. (Hebr 4:16) Aamma “piffissaq eqqorlugu” anersaakkut nerisassanik tunniussisarpoq. (Matt 24:45) Taamaattumik qularutigissanngilarput ulloq kamaffissaa ‘kingusinaarnavianngitsoq’. (Hab 2:3) Ila Jehovap piffissamik eqqortitsisarnera iluaqutigisaqaarput! (Tuss 70:6) Uagulli naammalluinnanngitsuullutalu ulapittuugatta piffissamik eqqortitsinissaq ilaatigut sapernartittarparput. Sooq piffissamik eqqortitsisarneq ileqquliunniarsarissavarput?
2. Sooq piffissamik eqqortitsisarneq Jehovamut ataqqinaataasarpa?
2 Ulluni kingullerni makkunani piffissamik eqqortitsisarneq suusupagineqartarpoq inuppassuit namminissarsiortuullutillu naammatsiuitsuummata. (2 Tim 3:1-3) Kristumiut suliffimminnut, isumaqatigiissuteqarfigisaminnut ataatsimiinnernullu piffissaq eqqorlugu takkukkaangata maluginiarneqartarput, tamannalu Jehovamut ataqqinaataasarpoq. (1 Petr 2:12) Imaappa suliffitsinnut piffissaq eqqorlugu takkuttartugut ilagiinnili ataatsimiittarnitsinnut inortuikulasarluta? Ataatsimiinnerit erinarsuummik qinnummillu aallartinnginneranni takkuttarnitsigut ersersissavarput Ataatarput Jehova, aaqqissugaalluartumik ingerlatsisoq, assigerusullutigu. — 1 Kor 14:33, 40.
3. Sooq piffissamik eqqortitsisarneq allanik eqqarsaatiginninnermut ersiutaava?
3 Piffissamik eqqortitsisarneq aamma allanik eqqarsaatiginninnermut ersiutaavoq. (Fil 2:3, 4) Assersuutigalugu ilagiinni ataatsimiinnernut aamma oqaluussinissamut katersuuttarnernut piffissaq eqqorlugu takkuttarutta pisariaqanngitsumik allanut akornusersuisassanngilagut. Aappaatigulli, inortuisarneq ileqquliussimagutsigu allat ima isumaqalersissavavut uagut piffissarput taakkua piffissaannit pingaarnerusoq. Piffissamik eqqortitsisarneq tatigisassaanermut eqiasuitsuunermullu ersiutaavoq — pissutsillu taakku inunnit allanit pingaartinneqartarput.
4. Inortuikulasarutta qanoq iliorsinnaavugut?
4 Inortuikulasaruit suna pissutaanersoq eqqarsaatigeriaruk. Pisassatit piffissaq eqqorlugu angumerisinnaajumallugit ilinnut maleruaruminartumik pilersaarusiorit. (Oqal 3:1; Fil 1:10) Jehovamut ikioqqugit. (1 Joh 5:14) Piffissamik eqqortitsisarnikkut ersersissinnaavat inatsisit annerpaartaat marluk — tassa Guutimut tullermullu asanninnermik inatsisit — maleruarusukkitit. — Matt 22:37-39.