Nutaarsiassaq nuannersoq ’naapertorluarlugu’ inuugit
1 Jehovap nalunaajaasuisut kissaatigaarput Jehovap aqqata ataqqinartinnissaa. Nalunngilarput pissuserput, oqaloriaaserput, atisalersoriaaserput, aap, allanut takkorliuttarnerput tamarmi, taakkua pallorfiginninnermut ilumoortumut isiginninnerannut sunniuteqartartoq. Minnerunngitsumik ataatsimiinnitsinni taamaappoq. Kissaatigaarput ataatsimiinnerni oqaatigineqartut iliuuserineqartullu tamarmik nutaarsiassamut nuannersumut naapertuunnissaat, Jehovamut ataqqinaataallutik. — Fil. 2:4.
2 Silamiut atisalersoriaasiat isikkuallu amerlasuutigut kristumiunut akuerineqarsinnaasanngillat. Vagttårnet-imi 1. juuni 1989-imoortumi quppernermi 20-mi ima allassimasoqarpoq: „Atisavut akisuujusariaqanngillat, ipiitsuusariaqarpulli, torersuullutik pilimaniarpasissuunatillu. Aamma kamippavut ipiitsuusariaqarput pussorsimanatillu. Ataatsimiinnernilu tamani, aamma ilagiit atuakkamik atuaqqissaarneranni, ipiittariaqarpugut, torerluta naleqquttunillu atisaqarluta.“
3 Piffissamik eqqorluaaneq asannittumik isumassuissutsimut ersiutaavoq. Ilaannikkut piffissaq eqqorlugu ataatsimiigiarnissatsinnut akornutissarsisoorsinnaasarpugut. Ataatsimiinnernulli inortuisarneq ileqquliutiinnarsimagutsigu imaannginnerpa ataatsimiinnernik siunertaasoq illernartoq ataqqinngikkipput, allanillu akornusersuigaluarutta soqutiginngikkipput? Ilaat inortuillutik takkuttunit allamut saasarneqartarput, saqqummiussallu tamakkiisumik pissarsiffiginngitsoortarpaat. Piffissaq sioqqullugu takkunnikkut najuuttunik allanik ataqqinninneq isumassuinerlu ersersinneqartarput.
4 Tullermik asanninnitsigut ataatsimiinnerni allat allamut saasarnaveersaartariaqarpavut. Ataatsimiinnerni isussuuteqattaartarutta, mamakujuttutortarutta, tamorasaartarutta (tikikummitortarutta), pappialanik nipiliortitsisarutta pisariaqanngitsumilluunniit anartarfimmukaqattaartarutta allanik akornusersuissaagut Jehovamillu pallorfiginnittarfiup ataqqineqartussaanera sumiginnarlugu. Naleqqutinngilartaaq ataatsimiinnerup nalaani ilagiinnut tunngasunik suliaqassalluni, allanik oqaloqateqassalluni pisariaqanngitsumillu issiavigisamit qimaguteqattaassalluni. Tamarmik issiavimminniiginnartariaqarput saqqummiussanillu tusarnaarlutik. Ileqqut kusanaatsut naalagaaffilersaarfimmiittussaanngillat, ’asannittormi ippinnartumik iliortarinngilaq’. — 1 Kor. 13:4, 5; Gal. 6:10.
5 Aamma meeqqatta ataatsimiinnerni pissuserissaarnerat Jehovap aqqanut nersornaataavoq. Angajoqqaat meeqqaminnik nakkutiginninnissaat pingaartorujussuuvoq. Meeqqat tusarnaarnissartik ataatsimiinnermilu peqataanissartik ilinniartariaqarpaat. Angajoqqaarpassuit mikisunik meerallit meeqqaminnik annisseriaannaallutik ingittarput.
6 Paulus kajumissaarisimavoq: ’Iivangkiiliu naapertorluarlugu inuuniaritsi.’ (Fil. 1:27) Taamaattumik ataatsimiinnerni ileqqunik pitsaasunik ineriartortitsiniarta allanillu eqqarsaatiginnittuulluta. Tamatumani tamatta suleqatigiikkutta ’uppeqatigiissutsitsigut kajumissaaqatigiissinnaassaagut’. — Rûm. 1:12. (kmD 95/11 Lev et liv . . .)