Atuaqqissaaqateqalernissatsinnut iluaqutaasussamik nutaamik sakkussaqalerpugut
1 USA-mi arnap katuuliusup upperisani pingaartittorujussuuaa. Aalajaalluni oqaluffimmi ajoqersuutaasoq illersortarpaa allaallu Vatikanimut angalasimalluni. Taamaakkaluartorli Jehovap Nalunaajaasuinit pulaarneqarami Biibilimik atuaqqissaaqatigineqarnissamik neqeroorfigineqarnini akueraa. Sooq? Biibilip ajoqersuutai paaserusukkamigit, oqaluffigisaminillu Biibilimik ilinniartinneqarnissaminik neqeroorfigisimannginnami. Tamanna qanoq ilinniarfigisinnaavarput? Kina akeqanngitsumik Biibilimik atuaqqissaaqatigineqarnissamut akuersissanersoq ilisimanngisaannarparput. — Oqal. 11:6.
2 Soqutiginnittoq kinaluunniit Biibilimik atuaqatigilerusullugu inuit oqaluttuutissallugit nangaasarpugut? Oqaluussiffigisartakkatsinniittut tamarmik akeqanngitsumik ikiuineq tamanna neqeroorutigigipput nalunngilaat? Qanoq qulakkeersinnaavarput tamanna nalunngikkaat? Sakkussatta nutaap atorneratigut. Tassa naqitaaraq soqutiginartoq arfinilinnik quppernilik, qulequtalik Biibili pillugu paasisaqarnerorusuppit? Naqitaaraq qanoq imaqarnersoq takoriartigu, immikkoortumiit immikkoortumut.
3 „Sooq Biibili atuarneqartariaqarpa?“ Naqitaaraq pissutissaqarluartitsivoq. Naqitaaqqap nassuiarpaa Biibili „ajoqersuutinik asannittunik Guutimeersumik“ imaqartoq, ikioqqulluta Guutimut qanoq saaffiginnissinnaasugut, qanorlu ililluta inuunermik naassaanngitsumik tunissutaanik pissasisinnaanerput nassuiarlugu. (1 Th. 2:13) ’Sallusuissutsit pingaarutillit Biibilip imai’ arlallit naqitaaqqap allaaserai, soorlu toqup kingorna qanoq pisoqassanersoq, aamma sooq silarsuarmi taama ajornartorsiuteqartiginera. Biibilip najoqqutassiai atorneqarpata, timitsigut iluaqutaasinnaaneri, pillualersillutalu pissutsinik ilalernartunik uagutsinni ineriartortitsisinnaaneri eqqaaneqarput. Biibilimik ilisimasaqarneq aamma neriuuteqalersitsivoq. Naqitaaqqap Biibilip atuarneqarnissaanut pissutaasoq alla sammivaa — siulittuutaasa siunissami qaninnermi qanoq pisoqarumaarnera takutippaat. — Saqq. 21:3, 4.
4 „Biibilip paasinissaanut ikiuineq“: Naqitaaqqap erseqqissarpaa: „Guutip oqaasii paasissallugit tamatta ikiorneqarnissarput pisariaqartipparput.“ Tulliullugu, Biibilimik paasisaqarnerulernissatsinnut qanoq iliorsinnaanerput allaaseraa. „Pitsaanerusarpoq Biibili aaqqissuulluagaasumik misissussallugu ilinniagassallu pingaarnerusut aallarniutigalugit.“ Erseqqissarpaa ’Biibili najoqqutassaasoq pingaarnerpaaq,’ atuagassiaararlu Guutip sumik piumaffigaatigut?, sammisat assigiinngitsut pillugit Biibilimi qanoq allassimasoqarneranik iluaqutissatut immikkut taavaa. Qulequtaq tulliuttoq imminut killisiulersitsisumik apeqquteqarpoq.
5 „Sapaatip-akunneranut ataasiarlutit Biibili misissortarusuppiuk?“ Nassuiarneqarpoq Biibilimik atuaqqissaarneq piffissami sumiiffimmilu atuartup iluarinerusaani pisinnaasoq, angerlarsimaffiani oqarasuaatikkulluunniit. Kikkut peqataasinnaappat? Naqitaaqqap allaatigaa: „Soorunami ilaquttatit ikinngutitillu aamma peqataasinnaapput, kissaatiginerugukkuli kisimiillutit atuqqissaaqatigineqarsinnaavutit.“ Atuaqatigiineq qanoq sivisutigaa? „Amerlasuut sapaatip-akunneranut akunneq ataaseq Biibilip misissornissaanut immikkoortittarpaat. Piffissaq annerusoq minnerusorluunniit atorsinnaasat apeqqutaatinnagu Jehovap Nalunaajaasuisa ikiorumavaatsit.“ Tamanna pingaarnerpaajuvoq. Ataasiakkaat atugaannut naleqqussarniartariaqarpugut.
6 Biibilimik ilikkarnissaanut qaaqqusissut: Immersugassaq naqitaaqqap tunuaniittoq atorlugu atuagassiaaraq Guutip sumik piumaffigaatigut? qinnutigineqarsinnaavoq akeqanngitsumilluunniit Biibilimik atuaqqissaaqatigineqarusulluni. Atuagassiaaqqap saqqaa qalipaateqarpoq. Naqitaaqqap tamatuma ikiuinissamik neqeroorutitsinnut inuit eqqortuliorusuttut ilassinninnissaannik kajumissilersitsinissaa qularnanngilaq. Sakkutaarput qanoq atorluarniarsinnaavarput?
7 Naqitaaraq kikkunnut neqeroorutigisinnaavarput? Naqitaaraq inummut toqqaannartumik tunniunneqarsinnaavoq imaluunniit angerlarsimasoqanngitsunut iliinnarneqarsinnaavoq. Illumiit illumut, aqqusinerni niuertarfinnilu angalaarnerni atorneqarsinnaavoq. Inunnut neqeroorutigiuk, atuagassianik allanik pisimappata itigartitsisimagaluarpataluunniit. Atuagassiat tunniussassavit ikeranut ilisigit. Allakkaangavit ilannugullugu nassiuguk. Oqarasuaatikkut oqaluussiffigisannut neqeroorutigiuk. Pisiniarfiliaraangavit, tamanut atugassani assartuutinut ilaagangavit torrutiinnarluguluunniit oqaluussilissagaluaruit neqeroorutigisinnaasannik nassataqartuarit. Ilissinnukartunut neqeroorutigiuk. Naqitaaraq aamma ilaquttannut, sanilinnut, suleqatinnut, atuaqatinnut allanullu nalunngisannut takutiguk. Attaveqarfigisartakkannut tamanut tunniussigit. Maanna iliuusissaq tulleq tikipparput.
8 Ingerlaannaq qisuariartoqarpat: Ilaasa immaqa ingerlaannaq Biibilimik atuaqqissaaqatigineqarnissaq qujarutissavaat. Taamaattumik oqaluussigaangavit atuagassiaaqqanik Guutip sumik piumaffigaatigut-nik marlunnik nassataqartuarit — soqutiginnittumut ilinnullu. Piumappat, erniinnaq aallartigitsi. Qupperneq 2-miittoq „Atuagassiaaraq qanoq atorneqarsinnaasoq“ atuaruk. Ilinniagassaq 1-miit aallartiinnariannguaritsi, sammisassallu qanoq sammineqarsinnaanera takutiguk. Ajornannginnerusoqarsinnaava?
9 Tigusisup eqqarsaatigeqqaarusuppagu: Sivitsorpallaartinnagu attaveqarfigeqqipallaguk. Atuagassiaaraq Guutip sumik piumaffigaatigut? nassassavat. Imarisai qupperneq 2-miittut takutikkit. Pulaakkavit Ilinniagassaq soqutiginerusani toqqarliuk. Ilinniagassaq qupperuk, aallartiinnaritsi.
10 Atuagassianik pisimappat: Atuagassiap ikeranut ilisisimaguit tulliani ima aallartissinnaavutit: „Kingullermik kasuttorakkit atuagassiat Napasuliaq Alapernaarsuiffik Iteritsi!-lu pivatit. Immaqa malugisimassavat Napasuliap Alapernaarsuiffiup qulequtaa tamakkerlugu tassaasoq Napasuliaq Alarpernaarsuiffik, Jehovap Naalagaaffianik Tusarliussisoq. Naalagaaffik taanna sunaanersoq, aamma ilinnut ilaquttannullu qanoq sunniuteqarsinnaanera pillugu ullumikkut oqaluttuukkusuppakkit“. Taava Ilinniagassaq 6 atuagassiaaqqami Guutip sumik piumaffigaatigut?-mi qupperuk. Immikkoortoq siulleq aallartissiuk, pulaakkavillu piffissaa apeqqutaatillugu sammisiuk. Ilinniagassaq naammassiartorlugu aggeqqinnissannik isumaqatigiuk.
11 Naqitaaqqanik naammattunik tigummiaaqartuarit: Kiffartornermut nakkutilliisup qatanngutillu atuagaateqarfimmiittup, ilagiit, naqitaaqqanik Biibili pillugu paasisaqarnerorusuppit?-nik naammattunik peqarnissaat isumagissavaat. Kaasarfinni pooqattanniluunniit, Biilinni, suliffinni, atuagaasivinni, isaarissap eqqaani allamilu peqartuarit. Aammattaaq oqaluussillutit atortakkanni pooqattanniititaqarit, Biibililu pillugu oqaloqatigisaqaleraangavit atortaruk.
12 Qanortoq Jehovap ilungersornivut pilluaqquligit: Kristumiut tamarmik sallusuissummik ilinniartitaqarnissartik kissaatigisariaqarpaat. (Matt. 28:19, 20) Illit maannakkut Biibilimik atuaqqissaaqateqarpit? Atuaqqissaaqateqaruit, sapaatip-akunneranut pilersaarutinni aamma allamut piffissaqarsinnaavit? Biibilimik atuaqqissaaqateqanngikkuit, atuaqqissaaqateqarnissat kissaatigissagunarpat. Atuaqqissaaqatissannik ilungersorlutit ujaasinerit pilluaqqoqqullugu Jehova qinnuigiuk. Taava qinnutitit naapertorlugit suliniuteqarit. — 1 Joh. 5:14, 15.
13 Biibilimik atuaqqissaaqateqalernissatsinnut iluaqutissaasumik nutaamik Sakkoqarpugut. Ilisimallualeruk. Tukkorlutit tunioraagit. Sapinngisannik iliorit, ajunngitsuliorlutit, ajunngitsulianik pisuussuteqarlutit, tukkorlutit namminerlu Guutip oqaasia pillugu ilikkarsimasannik allat oqaluttuullugit. — 1 Tim. 6:18.
[Qupp. 4-mi ungalusaq]
NAQITAAQQAMIK TUNNISINNAASAVUT
◼ Ulluinnarni oqaloqatigisavut
◼ Atuagassianik tigusisut
◼ Angerlarsimanngitsootitavut
◼ Pulaaqqitavut
◼ Aqqusinermi oqaloqativut
◼ Pisiniarfiit angalaarfigisartakkavut
◼ Torrutiinnarlugu oqaloqativut
◼ Allaffigisavut
◼ Tamanit atorneqartartuni angalaqativut
◼ Angerlarsimaffitsinnukartut
◼ Ilaquttavut, sanilivut, suleqativut, atuaqativut allallu nallunngisavut oqaloqatigivut