Apeqquteqarfik

◼ Kiffartornissamut katersuunnerni suut eqqartorneqassappat?

Katersuuttarnerit siunertaraat eqqarsaatit oqaluussinermut saatsissallugit. Taamaattumik katersuunnermi aqutsisoq piareersarluarsimasariaqarpoq kajumissinartumik, aalajangersimasumik atoriaannaasumillu saqqummiussaqarluni. Ullormut allassimaffik oqaluussinermut tunngappat atuarlugulu sivikitsumik eqqartorneqarsinnaavoq. Katersuunnermili oqaluussinissaq pingaarnerutillugu eqqartorneqassaaq ullormilu tassani tamarmik piareersimanissaannut ikiorlugit. — 2 Tim. 4:5.

Neqeroorutip suunera qanorlu saqqummiunneqarsinnaanera tamanit ilisimaneqarniassammat, Guutip Naalagaaffianut Kiffartorneq-mi siunnersuut eqqartorneqarsinnaavoq. Ulluni atuagassianik agguaassiffinni atorneqarsinnaavoq ungalusaq ima qulequtaqartartoq: „Atuagassiat qanoq neqeroorutigineqarsinnaasut“. Suliniuteqarnerni allani ’Ræsonnerebogimi’ aallarneeriaaseq ataaseq marlulluunniit saqqummiunneqarsinnaapput. Aamma Biibilip qanoq atorneqarsinnaanera, akerliliisut qanoq akineqarsinnaaneri, Biibilimillu atuaqqissaaqatissarsiorneq pulaaqqiinerluunniit eqqartorneqarsinnaapput takutitsisoqarluniluunniit.

Qinuneq oqaluussisartunillu gruppikkaarinerit angalaarfissanillu agguaasinerit ilanngullugit katersuunnerit 10-15 minutsiinnaassapput. Qinusoqareerpat ingerlaannaq anisinnaaqqullugit tamarmik kikkut suleqatigissanerlugit sumukassanerlutillu ilisimariissavaat. Ataatsimiinnerummat sivikitsunnguaq piffissaq eqqorlugu takkunnissaq pingaaruteqarpoq. Ataatsimiinnerup, soorlu Napasuliaq Alapernaarsuiffimmik atuaqqissaarnerup, kingorna katersuuttoqassappat suli sivikinnerusariaqarpoq. Biibilimut tunngasunik eqqartueqqammerneq eqqarsaatigalugu ullormut allassimaffik oqaloqatigiissutigisariaqanngilaq.

Qatanngutit angutit piukkunaatillit katersuunnerni aqutsisussanik pilersaarusiaq piffissaalluartukkut agguaattariaqarpaat. Ullormi aalajangersimasumi katersuunnermi aqutsisussaqanngippat, utoqqaanertat aalajangereertariaqarpaat qatanngut arnaq kina aqutsisuussanersoq. Qatanngut arnaq issiaannarsinnaavoq ullormullu allassimaffimmik oqaluussinermulluunniit tunngassumik eqqartuilluni. Oqaaseqalaaginnartassaaq nasartaateqassallunilu.

Katersuunnerit kajumissaarutaalluarput oqaluusseqataanissamullu piginnaanngorsaataalluarlutik. Katersuunnermi aqutsisoq piareersarluarsimappat, tamanut iluaqutaangaassaaq.