Nersoruk Jehova „ullut tamarluinnaasa“
1 Tussiaat 145:2 kunngi Davidip Jehovamut neriorsuutaanik imaqarpoq: „Ullut tamarluinnaasa qutsavigissavakkit, aqqillu erinalimmik unnersiutigissavara naassaanngitsumut.“ Uagut aamma pissutissaqarluarpugut Ataatatsinnik qilammiusumik nersorinnillutalu unnersiutiginninnissatsinnut. Qanorli ililluta Davidip maligassiaa malissinnaavarput „ullut tamarluinnaasa“ Jehovap kisimi oqartussaanera nersorlugu?
2 Jehovamut qujamasunnermik uummatit ulikkaaruk: Aalajangersimasumik Biibilimik atuaqqissaartarnerup Jehovap uatsinnut iliuuserisimasaanik, maannakkut iliuuserisaanik siunissamilu iliuseriumaagaanik pingaartitsineq annertunerulersittarpaa. Pingaartitsinerput annertusippat ’eqqartortualissavarput ajunngingaassusia erinalersuutigalugulu iluassusia’. (Tuss. 145:7) Periarfissat suulluunniit takkukkaangata piumassuseqarluassaagut Jehovamik oqaluussissutiginninnissamut.
3 Ulluinnarni oqaloqatigiinnerni Jehova unnersiutigisaruk: Eqqaamiuvut, atuaqativut, suleqativut imaluunniit ullut tamaasa ilagisartakkavut oqaloqatigigaangatsigik immaqa neriugisatsinnik oqaluttuunnissaannik periarfissarsiorsinnaavugut. Imaassinnaavoq sanilitta pinerlunniarnerup atugaanerujussua ernumassutigigaa; atuaqatittaluunniit ilaata immaqa ikiaroornartutorneq kanngunartuliornerluunniit nalornisoorutigai, immaqaluunniit suleqatitta ilaat arlaannik politikkimut tunngasumik oqaaseqarpoq. Neriorsuutit najoqqutassiallu Guutip oqaasianeersut innersuussutigisinnaavavut, ingerlavissamik sumik maannakkut qinersisariaqarnitsinnik ajornartorsiutinullu suup aaqqiissutissaaneranik takutitsisut. ’Oqaasissat piffissaasigut aninneqartut’ taamaattut pilluaqqusaanermik kinguneqarsinnaapput. — Uss. 15:23.
4 Piffissaq tamaat Jehova eqqartortaruk: Jehovap qanoq ittuussusianik pingaartitsilluinnartut nutaarsiassap nuannersup sapinngisamik amerlasuunut nalunaajaatiginissaa kissaatigisarpaat. (Tuss. 40:9-11) Imminut aperisarisaqarpugut: ’Periarfissakka tamakkiisumik atortarpakka?’ Amerlasuut paasisimavaat arlaatigut allannguilaarnermikkut pioneerisut kiffartortunngorsinnaallutik. Periarfissaq tamanna suli uatsinnut ammanngippat, taava immaqa ikiorti-pioneeriusinnaassaagut? Eqqaaniaalluni nalliuttorsiungajalernermi immikkut suliniuteqartoqartussaavoq, pitsaassaarlu marsimi apriilimilu ikiorti-pioneeriunitsigut oqaluussinerput annertusarutsigu.
5 Nutaat ikiukkit nersorinneqqullugit Jehovamik: Jesusip toquanik eqqaaniaalluni nalliuttorsiornermi Jehovamut qujamasunnissatsinnut aqqanillu erinalimmik unnersiutiginninnissatsinnut pissutissatsinnik eqqaaseqqinneqartuartarpugut. Eqqaaniaanerup nalaa piffissaalluarportaaq atuaqatigisartakkatta kajumissaarnissaannut ilagaluta allanut Jehovap kunngiussusianik oqaluuserinninnissamut. Kajumissaakkit qinunikkut eqqarsaatigeqqullugit atuakkami Ilisarsineq inuunermut naassaanngitsumut sammisoq-mi quppernerni 173-75-mi immikkoortoq 7-9-mi allassisut. Piginnaanngorsimagunik misilittagakinnertik tunuarsimaassutigissanngilaat. Oqaluussisartut pikkorissut qanoq oqaluussisarnissaannik ilitsersuussinnaavaat. Nutaat sapiillillutik nutaarsiassamik nuannersumik oqaluussissutiginnilersimasut tatigisinnaavaat Jehovap ikiussagaatik. — ap. sul. 4:31; 1 Tás. 2:2.
6 Uatsinnut allanullu naassaanngitsumik iluaqutaassaaq ullut tamarluinnaasa Jehova nersorumallugu periarfissarsiortuarutta. (kmD 3/96 Velsign Jehova „dagen lang“)