1996-mi Teokratiimik Atuarfik iluaqutissarsiffigiuk — immikkoortut pingajuat
1 Apustilip Paulusip kissaatigaa qatanngutit qinnutissagaanni, taamaalilluni nutaarsiassaq nuannersoq nakimanani nalunaajaatigisinnaaqqullugu. (Evf. 6:18-20) Tamatta pissuseq tamanna ineriartortikkusupparput. Taamaattumik Teokratiimik Atuarfimmi ikiuutissat pisartakkavut pingaartippavut. Piginnaanngorsimasut tamaasa kajumissaarniarpavut atuarfimmut ilannguteqqullugit.
2 Ilinniartutut inuttut siunnersorneqartarpugut oqalussinnaassutsitsigut ilinniartitsisinnaassutsitsigullu pitsanngoriaatigisinnaasatsinnik. (Uss. 9:9) Allat aamma siunnersortikkaangata tusarnaaraangatsigik ilikkarsimasavullu atoraangatsigik iluaqutissarsiffigisarpavut. Pisassinneqaraangatta peqqissaartumik pisassarput piareersartariaqarparput eqqortumillu nassuiarnissaa qulakkeerlugu. Pingaarnersat allassimaffiillu atukkavut qulequtarineqartumut tulluartuusariaqarput. Alla pisassami peqataassappat atuarfimmi saqqummiutsinnagu piareersarluarneqartariaqarpoq. Siumukariartornerput ilutigalugu ilungersuutigisariaqarparput oqaasissat allattoqqissaanngikkaluarlugit imaqarniliornera kisiat malillugu saqqummiussinissaq.
3 Pisassaqaraanni ataatsimiinneq sioqqullugu takkutiaartariaqarpoq, oqalunnissamullu ilitsersuuterput atuarfimmi nakkutilliisumut tunniullugu saarlernullu inissarsereerluta. Qatanngutit arnat atuarfimmi nakkutilliisoq nassuiaattariaqarpaat pisassartik qanoq suliarisimanerlugu, issiassanerlutik nikorfassanerlutilluunniit. Tamakkuninnga suleqatigiilluarutta pilersaarutigineqartut ajunngitsumik ingerlassapput, taamaalillutillu isumaginnittussat oqinnerusumik assigiinngitsunik piareersimatitsiniassapput.
4 Pisassap aappaanik piareersarneq: Biibilimit atuaanerup siunertaraa atuffarissunngornissaq. Tamanna qanoq pitsaanerusumik anguneqarsinnaava? Arlaleriarluni nipituumik atuaqattaarneq pitsaanerusarpoq. Ilinniartup oqaatsinik qinerlerfissiat atortariaqarpai oqaatsit paasinngisani tamaasa takusinnaajumallugit eqqortumillu oqaatigiumallugit. Tamatumunnga aamma ilaasinnaavoq ilisarnaatit qanorlu oqaatigineqarnissaannut ilitsersuutit qinerlerfissiami atorneqartut ilisimalerniarnissaat.
5 Ny Verden-nutsikkap imarai aqqit oqaatsillu Biibilimi atorneqartut qanoq oqaatiginissaannut ikiuut, oqaatsit tamakku naqissuserfissalerneqarsimallutik. (Takuuk „Hele Skriften er inspireret af Gud og gavnlig“, qupperneq 326, immikkoortoq 28.) Tassa utertarneq naqissutaasap siornaniittoq naqissuserlugu taaneqassaaq. Utertarneq ersiummik naaneqarpat ersiut utertarnermiittoq sivitsuuserlugu taaneqassaaq. Utertarneq aappersarissamik naaneqarpat ersiut naatsumik taaneqassaaq. (Assersuutigeriakkit Saʹlu Salʹlu-mik.) Aammattaaq Napasuliaq Alapernaarsuiffiup Peqatigiiffiata Biibilimik immiussaataasa tusarnaartarneri iluaqutaasinnaapput.
6 Angajoqqaat ernitik ikiorsinnaavaat atuffassissutigisassaannik piareersaqatigalugit. Nukappiaqqap pisassaminik sungiusarnerani tusarnaarsinnaapput siunnersuuteqarsinnaallutillu. Piffissarititaasoq periarfissiivoq naatsumik aallarniinissamut pingaarnersallu qanoq atorneqarsinnaanerannik tikkuussisumik naleqquttumik naggasiinissamut. Taamaalilluni atuartup piareersarsimanani oqalussinnaaneq ilikkariartussavaa.
7 Tussiaasiortup manna qinnutigisimavaa: „[Jehova], qarlukka ammakkit qaninnit nersorneqaqqullutit.“ (Tuss. 51:17) Qanortorlu Teokratiimik Atuarfimmut ilaanitta taamatut kissaateqalersilluta ikiorilisigut. (kmD 3/96 Få gavn af Den Teokratiske Skole . . .)