Pulaaqqiinermi ’Atuagaq paratiisilersaarut’ atortaruk
1 ’Atuagaq paratiisilersaarut’ 1982-imi saqqummersinneqaramili oqaatsinut 115-inut 65 millionit sinnerlugit naqiterneqarsimavoq. Atuagaq taanna oqaluussinermi assorsuaq iluaqutaasimavoq, ullumikkullu Jehovap nalunaajaasuatut ilumoortutut kiffartortut ilarpassuisa atuagaq taanna ikiortigalugu sallusuissut ilikkarsimavaat. Qaammammi matumani tulliuttumilu ’atuagaq paratiisilersaarut’ illumiit illumut oqaluussinitsinni neqeroorutiginiarparput. Qularnanngitsumik oqaluussiffigisartakkatsinni atuakkamik tamatuminnga peqareersumik naapitsissaagut. Taava qanoq iliuussagut?
2 Atuakkamik peqartut pulaaqqikkit: Pulaagaq atuakkamik peqarneraraangat oqaluussisartut ilaasa aperisarsimavaat atuagaq qanoq igineraa, atuarsimaneraa, imaluunniit atuarnermini apeqqutissaqalersimanersoq, taamaalillutillu ajunngitsunik angusaqarlutik. Taava oqaluussisartut ilaasa atuakkap imaasa allattorsimaffiat quppertarsimavaat aperalutillu sammineqartoq sorleq soqutiginartinnerpaaneraa. Pulaagaq toqqaareerpat oqaluussisartoq siunnersuisarsimavoq kapitali tulliani atuarsinnaagitsik.
3 Ajornanngippat aalajangersimasumik aggertalernissat siunnersuutigisinnaavat. Tulliani aggeqqinnginninni kapitalimi pulaakkavit toqqagaani immikkoortualunnguit oqaloqatigiissutiginissaanut piareersartariaqarputit. Pulaakkat kapitalimik aalajangersimasumik toqqaanngippat kapitali 1 aallarniutigisinnaavarsi. Immikkoortut arlaqanngitsut sammereerussigit immikkoortuni tulliuttuni akineqartussamik apeqquteqarsinnaavutit. Taamaalillutit pulaaqqinnissannut tunngavissaqalissaatit, ’atuakkamillu paratiisilersaarummik’ atuaqqissaarnersi nangeqqissinnaassavarsi.
4 Soorunami pulaakkat apeqqutissaqarpat akeqqaarukkit pitsaanerussaaq. Apeqqutai qularnanngitsumik atuakkami akissutissaqassapput. Atuagaq nalunngilluarukku immikkoortut pulaakkavit apeqqutaanut akissutissallit innersuussutigisinnaavatit taakkulu tunngavigalugit akillugu.
5 Naqitaaqqamik pinikut pulaaqqittakkit: Immaqa pulaakkavit naqitaaraq Silarsuarmi nutaami eqqissisimaarfiusumi inuunissaq pisimavaa. Pulaaqqikkukku naqitaaqqami immikkoortut siulliit oqaloqatigiissutigisinnaavasi.
Immikkoortoq siulleq, Tussiaat 37:29-p innersuussutigineqarfia, sammereerlugu pulaakkat soqutiginninnermik ersersitsippat ima oqarsinnaavutit:
◼ „Allassimaffik taanna atuakkap uuma, paratisime nuname nagssaungitsumik inusinauvutit-ip, imarisaanut tunngaviuvoq. Malugeriaruk kapitalimi siullermi immikkoortumi 3-mi qanoq allassimasoqartoq.“ Taava immikkoortoq 3 atuarsinnaavat, tusarnaartoq apeqquteqarfigalugu taamatullu immikkoortunut 4-mut 5-imullu ingerlaqqillusi. Taava ima aperisinnaavutit: „Soormitaavaana ullumikkut pissutsit Guutip siunertaanut taama naapertuutinngitsigisut? Immikkoortuni tulliuttuni tamanna nassuiarneqarpoq, sapaatip akunnerani tullermi taamaalinerani aggeqqissinnaavunga akissuteqarfigalutillu.“ Pulaakkat soqutiginninnermik ersersitsippat qimannginnerani atuagaq neqeroorutigisinnaavat. Imaluunniit tulliani pulaaqqikkuit taamaaliorsinnaavutit.
6 ’Atuagaq paratiisilersaarut’ neqeroorutigigukku ima oqarsinnaavutit:
◼ „Isumaqarpunga atuagaq nammineq pigissallugu iluaqutigissagit. Taava immikkoortut atuareersinnaassavatit oqaloqatigiinnerpullu pissarsiaqarfiginerussallugu.“
7 Inunnik allanik pulaaqqillugit qanoq ilillutik naassaanngitsumik inuulersinnaanerannik ilinniartitsineq suliatsinnut ilaavoq pingaartoq. Jesusip ajoqersukkani namminneq ilikkakkaminnik inunnik allanik ilinniartitsinissaannik ilinniartissimavai. Jehova qinnuigaarput katersuisussanik amerlanerusunik aallartitseqqullugu. Taamaattumik sapinngisarput tamaat soqutiginnittut ujarniartigik katersuinitsinnilu suleqataalernissaannik ilinniartillugit. — Mat. 9:37; 28:19, 20.