Pulaaqqiinerit pisariitsut sunniuteqarluartullu
1 Aalajangersimasumik pulaaqqiisarpit imaluunniit isumaqarpit taamaaliornissaq nalunartoq qanoq oqarnissat nalusarakku? Isumatsannissamulli pissutissaqanngilaq. Pingasut makku ikiortigisinnaavatit: (1) piareersarluarneq; (2) Biibilimut tunngasunik arlalialunnguanik pisariitsumik oqaloqatiginnissutiginninnissamik ilinniarneq; aamma (3) pulaakkamut tusarnaarusussuseq.
2 Pulaaqqiinissannut piareersaraangavit isumaliutigisinnaavat suna eqqartussallugu naleqqunnerussanersoq. Kingullermik pulaarakku apeqquteqarfigaajuk imaluunniit aalajangersimasumut soqutiginninnermik ersersitsiva? Allattukkatit misissukkit pulaaqqiininnilu atorsinnaasannik ’Ræsonnerebogimi’ ujaasigit. Pulaaqqiigaangavit inussiarnerlutillu ilassiortariaqarputit. Aallarniillutit ilassinninninni ajornanngippat pulaakkavit atia atortaruk.
3 Pulaakkavit Napasuliaq Alapernaarsuiffik aamma Iteritsi! pisimappagit tullianik aggeqqikkuit atuagassianeersunik erseqqissaaffigisinnaavat. Pulaaqqaarninni naqitaaqqamik pisimappat tulliani naqitaaraq atorsinnaavat imaluunniit atuagassiami atuagassiaaqqamiluunniit eqqarsaammik naleqquttumik saqqummiillutit soqutiginninnera ilaartorsinnaavat.
4 Pulaakkavit „Jehovas Vidner i det tyvende århundrede“ pisimappagu ima oqaannarsinnaavutit:
◼ „Kingullermik pulaarakkit silarsuaq nutaaq Guutip neriorsuutaa pillugu allassimasumik takutippakkit. [Qupp. 16 aamma 17 takutikkit.] Eqqaamaviuk? [Pulaakkavit peqqusiileqissutigisinnaasaanik aperinaveersaarit, taamaakkaluartorli oqaaseqarnissaanut periarfissiguk.] Tamanna siunissamut neriorsuutaagaluarpoq. Kisianni ullumikkut Biibili malillugu inuussalluni iluaqutaassasoraajuk? [Pulaakkat akili. Angiinnarpat naaggaaginnarpalluunniit qanorpiaq isumaqarnersoq aperiuk.] Apeqqut tamanna atuagassiaaqqami quppernerni 23-mi 24-milu sammineqarpoq. [Immikkoortoq siulleq atuaruk pulaakkannullu oqaloqatigiissutigiuk. Immikkoortut sinnerinut ingerlaqqigit. Tamaat angumerisinnaanngikkukku isumaqatigiissutigisinnaavat tulliani aggeqqikkuit nangeqqikkumaarlugu.]
5 Pulaakkavit naqitaaraq „Asasatsinnut toqungasunut sumik neriuutissaqarpa?“ pisimappagu ima aallarniisinnaavutit:
◼ „Kingullermik anilerama naqitaaqqamik Asasatsinnut toqungasunut sumik neriuutissaqarpa?-mik tunivakkit. Tassani immikkoortut pingajuanni soqutiginartunik apeqquteqarpoq: ’Sooq inuit toqusarpat? Toqungasut sumiippat? Qanorlu ililluta qularinngissinnaavarput uummaqqikkumaartut?’ Immikkoortup tulliani ’Toqu, inullu toqugaangat qanoq pisoqartartoq’-mik qulequtalimmi apeqqutinut tamakkununnga akissuteqarpoq. Naqitaaqqamik taama ittumik tigummiarpunga. Malugeriaruk immikkoortut sisamaanni qanoq allassimasoqartoq.“ Immikkoortup allassimaffiillu marluk atuarneranni pulaakkat nammineq pimini malinnaatiguk, qanorlu isumaqarnersoq aperiuk. Tusarnaaqqissaaruk akissutaalu tunngavigalugu ingerlaqqigit.
6 Immaqa oqaloqatigiinnerup ingerlanerani pulaakkat isummanik Biibilimut naapertuutinngitsunik saqqummiussissaaq. Pisariaqanngilarli oqaasii tamaasa qisuariarfigissallugit. Oqaloqatigiissutigisarsi qimanngikkussiuk pitsaanerussaaq. Isummat Biibilimut naapertuutinngitsut kingorna pulaaqqittarnermi naqqissorneqariartuaarsinnaapput.
7 Sumi tamaani soqutiginninneq ilaartorniarlugu pisariunngitsumik sunniuteqarluartumillu pulaaqqiisarnitsigut sapinngisatsinnik iliuuseqartariaqarpugut. (kmD 4/93 Enkle og . . .)