Guutip sumik piumaffigineraatigut allat paasitikkit
’Pinnginneq uannut ajornarpoq; uannut eqqanaqqajaqaarluunniit iivanngkiiliu oqaluutiginngikkukku.’ — 1 KORINTUMIUT 9:16.
1, 2. (a) Suliaq marlunnut sammisoq suna peqataaffigissagipput Guutip piumasaraa? (b) Eqqortumik eqqarsartut Guutip naalagaaffiani innuttaalissagunik suna ilinniartariaqarpaat?
JEHOVA nutaarsiassaateqarpoq nuannersumik inuiannut tusartikkusutaminik. Naalagaaffeqarpoq kissaatigaalu tamanna inuit sumi tamaaniittut tusassagaat. Nutaarsiassaq tamanna paasereerutsigu allanut ingerlateqqissagipput Guutip piumasaraa. Suliaavoq marlunnut sammisoq. Pingaarnerpaamik Guutip naalagaaffia pillugu nutaarsiassaq nuannersoq oqaluussissutigisariaqarparput. ’Pissutsit aaqqissuussaanerata naggatissaa’ pillugu Jesus ima siulittuisimavoq: ’Naalagaaffimmillu iivanngkiiliu [nutaarsiassaq nuannersoq] tamanna oqaluussissutigineqassavoq inuit najugaanni tamarsuarmi inuiaqatigiit tamarmik nalujunnaarutissaannik; taavalu naggatissaq nalliussavoq.’ — Matîuse 24:3, 14.
2 Suliap tamatuma illuatungaaniippoq Naalagaaffik pillugu oqaluussinermi ajunngitsumik qisuariartunik ilinniartitsineq. Makinnermi kingorna Jesus ajoqersukkaminut amerlasuunut ima oqarsimavoq: ’Taamaattumik aallaritsi inunnillu inuiannit tamaneersunik ajoqersuganngortitsigitsi, Ataatap Ernerullu anersaallu illernartup aqqanut kuillugit, ajoqersorsigillu ilissinnut peqqusakka tamaasa maleruaqqullugit. Atalu, ullut tamaasa najorpassi pissutsit aaqqissuussaanerata naggatissaanut allaat.’ (Matîuse 28:19, 20, NV) ’Jesusip taakkununnga peqqusai tamarmik’ namminermininit pinngillat; Guutip inatsisaanik maleruaanissamik piumasaatullu iliornissaannik allat ilinniartippai. (Juánase 14:23, 24; 15:10) Taamaattumik ’Jesusip peqqusaanik maleruaanissamik’ allanik ilinniartitsinermut ilaavoq Guutip piumasaanik ilinniartitsineq. Eqqortumik isumallit Guutip naalagaaffiani innuttaalissagunik piumasaqaatai naammassisariaqarpaat.
3. Guutip naalagaaffia sunaava, Naalagaaffillu pillugu tusarliussaq sooq nutaarsiassaava nuannersoq?
3 Guutilli naalagaaffia sorpiaava? ’Nutaarsiassatut nuannersutut’ taaneqarami sunik naammassisaqassava? Guutip naalagaaffia tassaavoq qilammi naalakkersuisut. Naalagaaffik tamanna Jehovap iluareqaa, tamannami ikiortigalugu atini illernarsisissavaa kanngunarsagaaneralu tamaat piiassallugu. Naalagaaffik tamanna ikiortigalugu piumasani nunarsuarmi qilammisut pisissavaa. Taamaattuminguna Guutip naalagaaffiata tikiunnissaa pillugu qinunissatsinnik naalagaaffimmillu tamatuminnga inuunitsinni salliutitsinissatsinnik Jesusip ilinniartissimagaatigut. (Matîuse 6:9, 10, 33) Tamanna pissutigalugu Guutip naalagaaffia pillugu allanut oqaluussinissarput Jehovamut pingaartuuvoq.
Unamminiarnartoq artornanngitsorli
4. Nutaarsiassamik nuannersumik oqaluussinermut akisussaaffitta artornannginnera qanoq assersuusiorneqarsinnaa?
4 Nutaarsiassamik nuannersumik oqaluussissutiginninneq artornarpa? Naamerluinnaq. Assersuuteqariarta. Ilaqutariinni ataataasup ilaquttami timip piisigut pilersornissaat akisussaaffigaa. Taamaaliunngikkuni assigiinnassavaa kristumiutut upperisaq ilumoorfiginngikkaa. Apustili Paulus ima allassimavoq: ’Kialuunniit ilani annerusumillu inoqutini isumaginngikkunigit, taassuma upperneq soraarussimavaa uppinngitsumit ajornerulluni.’ (1 Timûtiuse 5:8) Taassumunnga artornartuuva? Ilaquttani asagunigit naamik taamaakkunimi pilersornissaat kissaatigissavaa.
5. Oqaluussinermut ajoqersuganngortitsinermullu peqataaneq sooq uatsinnut nuannaarnartuusariaqarpa pisussaaffiugaluarluni?
5 Oqaluussineq ajoqersuganngortitsinerlu aamma piumasaqaataavoq imaluunniit pisussaaffiuvoq. Piumasaqaatip tamatuma naammasisimanera inuunitsinnut aalajangiisuuvoq. Paulusip tamanna ima allaatigaa: ’Pinnginneq uannut ajornarpoq; uannut eqqanaqqajaqaarluunniit iivanngkiiliu oqaluutigiinngikkukku.’ (1 Korintumiut 9:16; naleqqiuguk Hesekiel 33:7-9.) Asanninnerput pissutigalugu, pisussaasutut misiginerinnarput pissutiginagu, oqaluussisarpugut. Pingaarnerpaamik Guuti asavarput, aammali tullerput asavarput, nalunngilarpullu inuit nutaarsiassamik nuannersumik tusarnissaat qanoq pingaartigisoq. (Matîuse 22:37-39) Siunissamummi neriuuteqalissutigissavaat, tassa Guutip naalagaaffiata ungasinngitsukkut naapertuilluanngissuseq tamaat aaqqissagaa, naqisimanninneq tamaat piissagaa kiisalu eqqissineq ataasiussuserlu atuutilerseqqissagai — Guutip naalagaaffiata aqutsineranut naalatsigitittunut naassaanngitsumik pilluaqqusaanermik kingunilimmik. Nutaarsiassamik nuannersumik taama ittumik allanut oqaluttuarinninneq ilaa nuanneqaaq, ilaa qiimmattarnaqaaq? — Tussiaat 110:3.
6. Oqaluussineq ajoqersuganngortitsinerlu sooq unamminiarnartuua?
6 Oqaluussinerli ajoqersuganngortitsinerlu aamma unamminiarnartortaqarpoq. Inuit assigiinngitsuupput. Tamarmik assigiimmik soqutigisaqanngillat piginnaaneqaratillu. Ilaat ilinniagaqarluartuupput allalli killilimmik ilinniagaqartuullutik. Siornatigut amerlanerit atuarneq nuannarisaraat ullumikkulli amerlasuut pisariusutut isigaat. Amerliartuinnartut atuarnermik qatsussisimapput, tamanna ima nassuiarneqarsimavoq „atuarsinnaaneq, atornissaanulli soqutiginninnginneq“. Allaat nunani amerlanerusunik atuarsinnaasoqartuni ajornartorsiut annertusiartuinnarpoq. Inuit taama assigiinngitsigisunik tunuliaqutallit taamalu assigiinngitsigisunik soqutigisallit qanoq ililluta Guutip sumik piumaffiginninneranik ilinniartissinnaavavut? — Naleqqiuguk 1 Korintumiut 9:20-23.
Allat ikiornissaannut atortussaqarluarpugut
7. ’Inussiap aalajaallunilu silatuup’ Guutip sumik piumaffigineraatigut allanik ilinniartitsinitsinni piffissap ingerlanerani qanoq ikiorsimavaatigut?
7 Ilungersunartumik suliassaqaraanni sakkut eqqortut piginissaat pingaartuuvoq. Sakku suliamut aalajangersimasumut ullumikkut piukkunnartuusoq, pisariaqartitat allanngorneri pissutigalugit immaqa aqagu allanngortinneqassaaq taarserneqarluniluunniit. Tamatumunnga assinguvoq Guutip naalagaaffia pillugu tusarliussassamik oqaluussineq. Ukiut ingerlaneranni ’inussiap aalajaallunilu silatuup’ sakkunik pisariaqartitatsinnik pilersorsimavaatigut, atuagassiat angerlarsimaffinni Biibilimik atuaqqissaarnermi atugassatut immikkut sanaat. (Matîuse 24:45, NV) ’Inuiaqatigiit immikkullu naggueqatigiissut . . . immikkullu oqaasillit’ Guutip piumasaqaataanik ilinniartinnerini atortussatsinnik pilersorsimavaatigut. (sarĸúmersitat 7:9) Silarsuarmi tamarmi oqaluussinermi pisariaqartitanut allanngorartuartunut naleqqussarsimasunik ilaannikkut sakkunik nutaanik pisarpugut. Ilaat takoriartigik.
8. (a) Atuagaq „Gud Maa Være Sanddru“ Biibilimik atuaqqissaaqateqartarnermi qanoq iluaqutaasimava? (b) 1968-imi Biibilimik atuaqqissaarnermi atuagaq suna pivarput, sunalu siunertarlugu suliarineqarsimava? (c) Atuakkap ’Sallusuissutilersaarutip’ qanoq ililluni ajoqersuganngortitsinermi ikiorsimavaatigut?
8 1946-miit 1968-imut atuagaq „Gud Maa Være Sanddru“ inuit Biibilimik ilinniartinnerini sakkuusimavoq sunniuteqarluartoq, oqaatsini 54-ini 19.246.710-nngorlugu naqiterneqarsimavoq. 1968-imi atuagaq sagdlusuissut inûnigssamut nâgsssáungitsumut sangmissoĸ saqqummerpoq (kalaallisut 1973-imi naqiterneqarpoq), soqutiginnittunik Biibilimik ilinniartitsinermi atussallugu aamma piukkunnartuusimavoq. Siornatigut qaqutigoortuusimanngilaq kuisinnani ukiorpassuarni Jehovap nalunaajaasuinik atuaqqissaaqatigineqartarneq. Atuagarli taanna suliarineqarsimavoq ilinniartup tunniusimalernissaa ilinniakkanilu naapertorlugit inuunerminik aaqqiinissaa siunertaralugu. Sumik kinguneqarpa? Atuakkami Jehovas Vidner — forkyndere af Guds rige-mi ima allassimavoq: „Ukiuni kiffartuussiffiusuni pingasuni 1. septembari 1968-imiit 31. aggusti 1971-mut 434.906-it kuisissimapput — ukiunit kiffartuussiffiusunit pingasunit siuliinit marloriaammik amerlanerusut.“ Atuakkap ukiumit saqqummerfianiilli tupinnaannartumik amerlassusilinnik naqiterneqarsimavoq — oqaatsini 117-ini 107.000.000-nngorlugu.
9. Atuakkami ’Paratiisilersaarummi’ suna pingaartinneqarsimava, oqaluussisartullu amerlassusaannut qanoq sunniuteqarsimava?
9 1982-imi atuagaq paratîsime nuname nâgssaungitsumik inusinauvutit tassaalersimavoq Biibilimik atuaqqissaarnermi pingaarnerpaatut atortaligarput. Sakku taanna 150-it sinnerlugit assiliartaqarpoq torrallataasunik oqaasertalersorsimasunik ajoqersuut assilissap ersersinniagaanik erseqqissaasumik. Naalagaaffimmik Kiffartuussineq-mi novembari 1982-imoortumi ima allassimavoq: „Ukiuni 20-ni atuakkap „Gud Maa Være Sanddru“-p atuaqqissaaqatigiinnermi pingaarnertut atorneqarsimanerani . . . oqaluussisartunik 1 millioninik amerlisimavugut. Atuagaq ’Sallusuissutilersaarut’ tuluttut 1968-imi saqqummersinneqarmat, 1 millioninik amerleqqissimavugut. Atuaqqissaaqatigiinnermi atortagassaq nutaaq pâratîsime nuname nâgssáungitsumik inûsínauvutit oqaluussisartunik taamatut amerliartornermik nassataqassava? Aap, Jehovap piumasarippagu taamaassaaq!“ Ersarippoq Jehovap tamanna piumasarigaa ukiunimi 1982-imiit 1995-imut oqaluussisartut 2.700.000-inik amerleriarput!
10. Sakku nutaaq suna 1995-imi pivarput, aamma sooq Biibilimik ilinniartut pilertortumik anersaakkut siumukartariaqarpat?
10 ’Katersugassat amerlaqaat, sulisussalli ikeqaat,’ Jesus oqarsimavoq. (Matîuse 9:37) Katersugassallu amerlangaarput. Suli suliassaqaqaaq. Nunat ilaanni Biibilimik atuaqqissaaqatigineqarusuttut utaqqisut allattorsimaffiinut allanneqartariaqarput. Taamaattumik Guutimik ilisarsineq sukkanerusumik siaruaannissaa siunertaralugu 1995-imi ’inussiaq aalajaallunilu silatooq’ sakkumik nutaamik pilersitsivoq, tassa atuagaq Ilisarsineq inuunermut naassaanngitsumut sammisoq. Sakku pingaartoq taanna 192-inik qupperneqarpoq upperisarsiornikkullu isumat eqqunngitsut itisilerlugit eqqartorneqanngillat. Atuakkap sallusuissut Biibilimeersoq isumalluarnartumik saqqummiuppaa. Neriuutigaarput Biibilimik ilinniartut pilertortumik anersaakkut siumukarnissaannut ikiussagai. Atuagaq ’Ilisarsineq’ silarsuarmi oqaluussinermi sunniuteqareerpoq, oqaatsinimi 125-ini 45.500.000-nngorlugu naqiterneqarsimavoq. Oqaatsinullu allanut 21-nut aamma nutserneqalerpoq.
11. Atuarsinnaanngitsut atuffarluttulluunniit ikiornissaannut sakku suna pisimavarput, silarsuarmilu tamarmi ilinniartitsinermi qanoq sunniuteqarsimava?
11 ’Inussiap aalajaallunilu silatuup’ ilaannikkut atuartartunut immikkut ittunut sakkuliortarsimavoq. Soorlu inoqarsinnaavoq kulturikkut upperisarsiornikkullu tunuliaquttatik pissutigalugit immikkut ikiortarialinnik. Guutip sumik piumaffigineraatigut taakkua qanoq ililluta ilinniartissinnaavavut? 1982-imi pisariaqartitarput pivarput — atuagassiaaraq 32-inik quppernilit nuname inûneĸ nâgssáungitsumik nuánârutigiuk!-mik atilik. Atuagassiaq taanna assiliartaqarluartoq atuarsinnaanngitsunik atuffarluttunilluunniit ilinniartitsinermi atorluarneqarsimavoq. Biibilip ajoqersuutaanik tunngaviusunik paasiuminartunik nassuiaatitaqarpoq. Oqaatsini 239-ni 105.100.000-nngorlugu naqiterneqarsimavoq, ulloq manna tikillugu Napasuliaq Alapernaarsuiffiup Peqatigiiffiata atuagassiaataanik nutserneqarnerpaajulluni.
12, 13. (a) Tusarnaartut amerlanerusut anguniarlugit ’inussiap aalajaatsup’ ikiuutissaq nutaaq suna 1990-imiilli saqqummersissimavaa? (b) Peqatigiiffiup videofilmiutai oqaluussinitsinni qanoq atorsinnaavavut? (c) Ajoqersuganngortitsinermi ikiortissatut sakku nutaaq qanittukkut suna pisimavarput?
12 ’Inussiap aalajaatsup’ atuagassianik saqqummersitsisarnermi saniatigut 1990 aallarnerfigalugu ilinniartitsinermi atortussatsinnik nutaamik tusarnaartunut amerlasuunut atorsinnaasatsinnik pilersorsimavaatigut, tassa videofilminik. Ukioq taanna oktobarimi Napasuliaq Alapernaarsuiffiup Peqatigiiffia siullerpaamik videofilmimik saqqummersitsivoq — Jehovas Vidner og deres organisation. Oqaatsini 35-ni pissarsiarineqarsinnaavoq takujuminartumillu paasinartumillu takutippaa silarsuaq tamakkerlugu Jehovap peqatigiissortaani nalunaajaasut aallussilluartut qanoq ilillutik Jesusip nunami tamarmi nutaarsiassamik nuannersumik oqaluusseqquneranik naammassinnittut. Videofilmi ajoqersuganngortitsinermi suliatsinnut ikiortissatut eqqarsaatiginerullugu suliarineqarsimavoq, oqaluussisartullu sakku nutaaq taanna oqaluussinerminni ingerlaannaq atulerpaat. Ilaasa filmi taskermiorisarpaat soqutiginnittunut takutissinnaaniarlugu atukkiussinnaaniarluguluunniit. Saqqummersinneqarnerata kingunitsianngua, nakkutilliisoq angalasartoq allappoq: „Videofilmi ukiuni 2000-ikkunni ukiorpassuarni inuit millionillit isumaannik uummataannillu angusisuussaaq. Taamaattumik neriuutigaarput videofilmi taanna Naalagaaffiup silarsuarmi tamarmi suliaanut siuarsaanermi Peqatigiiffiup atorniagaanik amerlasuunik siullersaaginnartoq.“ Tamatuma kingorna videofilminik amerlanerusunik saqqummertoqarpoq, taakkualu ilagaat nangeqattaartoq pingasunik immikkoortortalik Bibelen — sande ord om nutid og fremtid aamma Jehovas vidner står fast trods nazismens terror-mik atilik. Peqatigiiffiup videofilmiutai illit oqaatsinni pigineqarpata, oqaluussinermi atorsimavigit?a
13 Qanittukkut oqaluussinermi atugassamik nutaamik sakkumik pisaarpugut, tassa atuagassiaaraq Guutip sumik piumaffigaatigut? Atuagassiaaqqap tamatuma saqqummersinneqarnera sumik siunertaqarpa? Qanoq atorsinnaavarput?
Atuagassiaaraq nutaaq misissorneroriartigu
14, 15. Atuagassiaaraq Guutip sumik piumaffigaatigut? kikkut eqqarsaatigalugit suliarineqarsimava, sumillu imaqarpa?
14 Atuagassiaaraq nutaaq Guutip sumik piumaffigaatigut? atuartartut Guutimik upperisaqareersut Biibilimillu ataqqinnereersut eqqarsaatigalugit suliarineqarsimavoq. Nakkutilliisut angalasartut ajoqersuiartortitallu Atuarfimmi Gileadimi ilinniarsimasut nunani siuarsagaasuni ukiorpassuarni oqaluussinermi misilittagaqarsimasut atuagassiaaqqap pilersinneqarnerani ikiuutaasimapput. Biibilip ajoqersuutai tunngaviusut eqqartorpai allallu Biibilimik ilinniartissagaanni imaqarluarluni. Oqaatsit tusarnersut, paasiuminartut toqqaannartullu atorpai nalikilliliivallaarnanili. ’Immuk’ kisimi pineqanngilaq, aammattaarli ’nerisassaq mattusooq’ Guutip oqaasianeersoq amerlanersaasa paasisinnaasaattut saqqummiunneqarpoq. — Eprîarit 5:12-14.
15 Ukiuni kingusinnerusuni oqaluussisartut nunani assigiinngitsuni atuagassiamik taamaattumik kissaateqarsimapput. Assersuutigalugu Papua Ny Guineami Napasuliap Alapernaarsuiffiup Peqatigiiffiata immikkoortortaqarfia ima allassimavoq: „Upperisarsiornikkut isumat akerleriittut pissutigalugit inuit paatsiveerusimaarput. Sallusuissut eqqorluartumik oqaatigineqartoq allassimaffinnillu arlalinnik Biibiliminni nammineerlutik quppersinnaasaminnik taperserneqartoq atorfissaqartippaat. Kristumiut ilumoortut Guutip sumik piumaffiginerai pillugu erseqqissumik immikkoortitaartumillu unnersuunneqarnissaq pisariaqartippaat, aamma ileqqut inooriaatsillu suut iluarinnginnerai.“ Atuagassiaaqqap Guutip sumik piumaffigaatigut?-ip taamaattut Guutip piumasaqaataanik ilinniarnissaannik ikiussavai.
16. (a) Ingammik kikkut atuagassiaaqqap nutaap nassuiaatai paasiuminartut iluaqutigisinnaavaat? (b) Oqaluussisarfinni atuagassiaaraq kikkut iluaqutigisinnaavaat?
16 Atuagassiaaraq nutaaq qanoq atorsinnaavarput? Siullermik inuit atuffarippallaanngitsut atuarusussuseqarpallaanngitsulluunniit atuaqqissaaqatiginerini atorsinnaavarput.b Taamaattut qularnanngitsumik atuagassiaaqqap paasiuminartumik nassuiaatai iluaqutigissavaat. Napasuliaq Alapernaarsuiffiup Peqatigiiffiata immikkoortortaqarfii atuagassiaaqqamik nassinneqaramik ima allapput: „Nunap immikkoortortarpassuini atuarpallaanngiffiusuni atuagassiaaraq iluaqutaassaaq.“ (Brasilia) „Nunasisut nammineq oqaatsiminik atuarsinnaanngitsut franskisullu suli atuarluarsinnaanngitsut amerlapput. Atuagassiaaraq taanna taamaattunik atuaqqissaaqateqarnermi iluaqutaassaaq.“ (Frankrig) Oqaluussiffigisartakkanni atuagassiaaraq nutaaq kikkunnut iluaqutaasinnaasoraajuk?
17. Nunani amerlasuuni atuagassiaaraq nutaaq qanoq ililluni iluaqutaassava, aamma sooq?
17 Aappassaanik atuagassiaaraq inunnik Guutimik mianerinnittunik qanorluunniit ilinniagaqarsimasunik atuaqqissaaqatigilernissaannut qularnanngitsumik iluaqutaassaaq. Soorunami atuagaq Ilisarsineq inuunermut naassaanngitsumut sammisoq ikiortigalugu atuaqqissaaqateqarnissarput ilungersuutigissavarput, kisianni ilaannikkut atuagassiaaqqamik atortoqarluni atuaqqissaaqateqalernissaq ajornannginnerusarpoq. Kingorna piffissanngorsorinarpat atuagaq, atuaqqissaaqateqarnermi atortagarput pingaarneq atorusunnerusarpullu, atorneqalersinnaavoq. Atuagassiaaqqap nutaap taamatut atorneqarnera pillugu Napasuliaq Alapernaarsuiffiup Peqatigiiffiata immikkoortortaqarfiisa ilaat ima allassimapput: „Atuaqqissaaqateqalerniartarneq ajornakusoortuuvoq, oqaluussisartulli atuagassiaaqqamik atugaqarlutik aallartikkunik iluatsinnissaa ilimanarneruvoq.“ (Tyskland) „Atuaqqissaaqateqalerniarnermi atuagassiaaraq taamaattoq atorluarneqarsinnaavoq, kingusinnerusukkullu atuaqaq ’Ilisarsineq’ atorlugu ingerlaqqittoqarsinnaalluni.“ (Italia) „Naak Japanimiut ilinniarnertuujugaluarlutik amerlanersaasa Biibilimik ajoqersuutaanillu tunngaviusunik ilisimasaqarnerat killeqarpoq. Atuagassiaaraq atuagaq „Ilisarsineq’-mut atuaqqissaaqateqalernissamut alloriarfiusinnaavoq pitsaasoq.“ — Japan.
18. Guutip uatsinnut sumik piumasaqarneranut tunngatillugu suna eqqaamasariaqarparput?
18 Peqatigiiffiup immikkoortortaqarfii nunarsuarmi sumi tamaaniittut atuagassiaaraq taanna nutserumallugu qinnuteqarsimapput, oqaatsinullu 221-nut nutserneqarnissaa akuerineqarsimavoq. Neriuppugut atuagassiaq nutaaq taanna inuit allat Guutip uagutsinnut sumik piumasaqarneranik ilinniartinneranni sakkuulluassasoq. Eqqaamatigu Guutip piumasaqaataanik, oqaluussinermik ajoqersuganngortitsinermillu peqqussut ilanngullugu, eqqortitsineq Jehovamik qanoq asannitsiginitsinnik ersersitsinissamut periarfissarigatsigu. Guutip uagutsinnut piumasai artornanngillat. Inooriaasiuvoq pitsaanerpaaq. — Tussiaat 19:8-12. (wE 15/1 97)
[Quppernerup ataani ilanngussat]
a Atuakkami Jehovas Vidner — forkyndere af Guds rige-mi allassimavoq: „Videokassettit arlaannaatigulluunniit oqaatsit naqinneqarsimasut oqalunnikkulluunniit nalunaajaaneq taarsersinnaanngilaat. Peqatigiiffiup atuagassiaatai nutaarsiassamik nuannersumik siaruarterinermi suli pingaaruteqarput. Jehovap nalunaajaasuisa illumiit-illumut sulinerat Biibilimit tunngavissaqarluarpoq sulilu oqaluussineranni pingaaruteqartuulluni. Ikiortissatulli tapertatut pingaaruteqartutut maanna videokassettit Jehovap neriorsuutaanik erlinnangaartumik uppernermik ineriartortitsisinnaasumik nalitsinnilu nunami suliaqartitsineranik pingaartitsilersitsisinnaasumik peqalerput.“
b Ilanngutassiami „Guutip piumasaqaataanik ilinniartitsinermi sakku nutaaq“ qupperneq 8 aamma 9-imiittuni nassuiarneqarpoq atuagassiaaraq Guutip sumik piumaffigaatigut? atorlugu qanoq atuaqqissaaqateqarsinnaanersugut.
Apeqqutit uteqqiissutissat
□ Suliaq marlunnut sammisoq suna Jehovap kiffaminut peqataaffigeqquaa?
□ Oqaluussinermut ajoqersuganngortitsinermullu pisussaaffipput sooq artornanngila?
□ Oqaluussinermi ajoqersuganngortitsinermi sulinitsinnut ’inussiaq aalajaallunilu silatooq’ sakkunik sunik saqqumersitsisimava?
□ Atuagassiaaraq Guutip sumik piumaffigaatigut? kikkunnut saaffiginnippa, oqaluussinitsinnilu qanoq atorsinnaavarput?
[Qupp. 22-mi assiliartaq]
Oqaluussinermi ajoqersuganngortitsinermilu suliarput artornanngilaq
[Qupp. 24-mi assiliartat]
„Gud Maa Være Sanddru“ (1946; 1952-imi kukkunersiorneqarpoq): oqaatsini 54-ini 19.250.00-it (uani tuluttut)
sagdlusuíssut inûnigssamut nâgssáungitsumut sangmissoĸ (1968): oqaatisni 117-ini 107.000.000-it (uani franskisut)
pâratîsime nuname nâgssáungitsumik inûsínauvutit (1982): oqaatsini 130-ni 80.900.000-it (uani russisut)
Ilisarsineq inuunermut naassaanngitsumut sammisoq (1995) oqaatsini 125-ni 45.500.000-it (uani tyskisut)