Naalagaaffimmik oqaluussissutiginninnermit nutaarsiassat

Inuit qanoq ittulluunniit sallusuissummit anguniarneqartut

APUSTILI Paulus Guutip naalagaaffianik oqaluussissartuusimavoq aallussilluartoq. ’Iivanngkiiliumik’ oqaluussissutigeqqusaq naammassiniarlugu akerlilersorneqarnermik unitsinneqanngilaq. (1 Korintumiut 9:16; apustilit suliait 13:50-52) Paulusip allat kajumissaarsimavai maligassiuinini maleqqullugu. — 1 Korintumiut 11:1.

Jehovap nalunaajaasui ilungersorlutik nalunaajaasartutut silarsuaq tamakkerlugu ilisimaneqarput. ’Ajoqersuganngortitsinissamik’ Guutimit suliassiissutigineqartoq naammassiniarlugu ’iluarisaasukkut iluarisaanngitsukkullu’ allat oqaluuttarpaat. (2 Timûtiuse 4:2; Matîuse 28:19, 20) Allaat nunani akerliuffiusuni eqqortumik isumallit Guutip naalagaaffia pillugu tusarliussassamik inuunermut pingaartumik anguneqarput. Tamanna kinguliini oqaluttuarineqartup uppernarsarpaa.

□ Manerassuup kitaani qeqertami Jehovap nalunaajaasuisa sulinerannik inerteqqutaaffiusumi, nukappiaqqap 12-inik ukiullip malugisimavaa atuaqatini ikinngutaasut ajortut. Atuaqatai amerlasuut pujortartarput, kanngunartuliornermik atoqatigiinnermut tunngasunik atuartarput, ilinniartitsisunik erloqisitsisarput paannittarlutillu. Pissutsit ima ajorsisimatigimmata nukappiaqqap angunni aperaa atuarfimmut allamut nuussinnaanerluni. Angutaata isuma taamaattoq ajoralugu erni oqaloqatigaa, isumaqarami atuarfinni qanittuni atuartut pissusaat allaanerungaarnavianngitsut. Erninili qanoq ililluni ikiorpaa?

Angutaata eqqaalerpaa inuusuttunut tunngasumik atuagaateqarlutik. Eqqarliminnik Jehovap nalunaajaasuusumik tunissutisiarisimavaat. Atuagaq ujarpaa, nanigamiullu ernerminut tunniullugu. Atuagaq taaguuteqartoq Unge Spørger — svar der duer.a Nukappiaqqap kapitali ’Ilagisartakkanit tatineqarneq qanoq akiorsinnaavara?’ atorsinnaalluarpaa. Imminut ataqqinerup pigiinnarnissaata pingaaruteqassusianik ilinniartiinnanngilaa, ilinniarpaattaarli ilisimaatsumik ilioqqulluni allanik tatineqaleraangami periaaserilluni qanoq naaggaarsinnaalluni. Biibilip najoqqutassiai atuakkami innersuussutigineqartut iluaqutigalugit inuusuttup tatineqaleraangami qanoq akiornissaa ilikkarpaa.

Angutaata ernermi taamaaliornera allatigullu ajunngitsumik allanngornera malugigamigit nammineq atuagaq atuarniarlugu aalajangerpoq. Atuakkami siunnersuutinik atoriaannaasunik killinneqarpoq, taamaattumillu angerlarsimaffimmi Biibilimik atuaqqissaaqatigineqarusulluni Jehovap nalunaajaasui aperai. Kingusinnerusukkut ilaqutaasa ilaat allat atuaqqissaarnermut ilaasalerput. Qanoq kinguneqarpa? Nukappiaraq, nukaa, angutaa aanaava aataavalu maanna tamarmik Jehovap nalunaajaasuupput.

□ Nunami tassani Jehovap nalunaajaasui marluk Biibilip najoqqutassiaanut akerliusunut akuersiinnarumannginnertik pissutigalugu parnaarussaaqqapput. Guutip naalagaaffia pillugu nakimaallutik oqaluussinerminni pissutsit atukkatik ajoqutaatinngilaat. Parnaarussivimmi qullersaq saaffigaat Naalakkallu unnukkorsiortitsinerata nalliuttorsiutigineqarnissaanut akuerineqarput. Parnaarussat 14-it Biibilimik soqutiginninnermik ersersitsimmata pisussamullu pingaartumut tamatumunnga ilagiumammatik nalunaajaasut nuannaaqaat. Parnaarussat taakkua ilaasa iperagaanermik kingorna Biibilimik atuaqqissaartarneq Jehovap nalunaajaasuinillu ilagisaqartarneq ingerlatiinnarpaat.

Nunani 25-nit amerlanerusuni inerteqqutaaneq akerlerineqarnerilluunniit assigiinngitsut malersugaanerluunniit pissutigalugit Jehovap nalunaajaasui atugarliortarput. Apustili Paulusitulli ’soraanngillat ajoqersuillutik iivanngkiiliulu Jesus Kristusimik oqaluutigalugu’. — apustilit suliait 5:42. (wE 1/2 1997)

[Quppernerup ataani ilanngussaq]