Ajoqersuutitigut nalornisoorneq

„TARNIP toqusuissusianik ajoqersuut toqusullu makinnissaannik upperisaqarneq . . . marluupput assigiinngilluinnartut, sorlerlu upperissanerlugu qinersisariaqarpoq.“ Philippe Menoud-p oqaasii taakkua ersersitsilluarput naaggaartut katuullillu teologiisa toqungasut pillugit ajoqersuummut atatillugu nalornisoorutaannik. Biibilimi eqqartorneqarpoq ’ullut naggatissaanni’ toqusunik makititsineqarumaartoq. (Juánase 6:39, 40, 44, 54) Teologili Gisbert Greshake naapertussagaanni inuit uppertorpassuit neriuutaannut tunngaviuvoq „tarnip toqusuissusianik ajoqersuut, toqunermi tarnip timi qimattaraa Guutimullu uterluni, makititaanissamilli ajoqersuut annerusutigut tammarsimavoq, immaqaluunniit tammarluinnarsimavoq“.

Tamanna apeqqummik akiuminaatsumik pilersitsivoq, soorlu Bernard Sesboüé aperisoq: „Timi toqugaangat taava ullut naggatissaanni makiffik sioqqullugu toqungasut susarpat?“ Tamanna ukiuni kingulliunerusuni ajoqersuutinut tunngasutigut oqallinnermi qitiusorinarpoq. Apeqqut qanoq ililluni pilersimava? Pingaarnerusumillu: Toqungasut sumik neriuutissaqarpat?

Nalornisoornerup pilerfia ineriartorneralu

Kristumiut siulliit apeqqut tamanna pillugu paasisimannilluarsimapput. Allakkat tunngavigalugit nalunngilaat toqungasut ilisimanngilluinnartut, tassami Allakkani Hebriiarisuuni ima allassimasoqarpoq: „Uumassuseqartummi nalunngilaat toqusussaagamik, toqungasulli sunnguamilluunniit ilisimasaqanngillat. . . . Toqusut inaanni ornikkanni suliassaqanngimmat pilersaarusiorfissaqaraniluunniit, ilisimasassanillu ilisimassummilluunniit pissarsiassaqarani.“ (Nalunaajaasup oqaasii 9:5, 10) Kristumiut taakku makititaaffissamik ’Naalakkap tikiuffissaani’ piumaartussamik neriugisaqarsimapput. (1 Tásalûníkamiut 4:13-17) Naatsorsuutiginngilaat toqugunik makititaaffissap tamatuma tungaanut arlaanni sumi pinerpoq ilisimallutik utaqqiumaarlutik. Joseph Ratzinger, Vatikanip Upperisami Ajoqersuutinut Kongregationiani præfektiusoq, ima oqarsimavoq: „Itsaq ilagiit tarnip toqusuissusianik ajoqersuuteqarsimanngillat.“

Nuovo dizionario di teologia-mili nassuiarneqarpoq ilagiinni ajoqersuisuunerit, soorlu Augustinip Ambrosiusillu ukiunit 300-kkunneersut, allagaat atuaraanni ’Biibilimi ileqqutoqqanut atatillugu nutaamik maluginiagaqarnartartoq — tassa griikerit eskatologiiat, tassa silarsuup naggatissaani pisussanik ajoqersuutaat, kristumiut juutiusut ajoqersuutaannit tunngaviusutigut allaanerusoq’. Ajoqersuutip nutaap tamatuma tunngavigaa „tarnip toqusuissusia, toqunerup kinguninngua inuttut eqqartuunneqarnermik, akissarsisitaaffiusumik pillagaaffiusumilluunniit, ajoqersuut“. Taamaattumik toqup makiffissallu akornat tamanna pillugu apeqqummik pilersoqarpoq. Timip toqunerata kingorna tarneq ingerlaqqittarpat taava ’ullut naggatissaanni’ makititaaffissap tungaanut susarpa? Tamanna tassaavoq teologit paatsiveerussutaat.

Ukiuni 500-kkunni paavip Gregor I-ip saqqummiuppaa tarneq toqunermi ingerlaannaq ornitavimminut pisinneqartartoq. Paavi Johannes XXII-p 1300-kkunni qularinngilluinnarsimavaa toqusut eqqartuutiffissami akissarsiassavitsik pissagaat. Kingoraartaatali, paavip Benedikt XII-p, tamatumani isumaqatiginngilaa. Paavi taanna peqqussutimini allagaasumi Benedictus Deus-imi (1336) aalajangiussivoq „toqusut tarnai toqunerup kingunitsianngua [qilammi] pilluarfissuarmut pinngikkunik, [eqqiarfimmut] pinngikkunik [anniarfimmut] naassaanngitsumik tammartitaasartut, aatsaallu silarsuup naggatissaani timitik makititaasut uterfigeqqissagaat“.

Isumaqatigiinngissutaagaluaqisoq kristumiuunerartut ilagiivini isuma tamanna atuussimavoq, naak naaggaartut ortodoksillu nalinginnaasumik inneq eqqiarfik upperinngikkaluaraat. 1800-kkulli naajartulerneranni ilisimasallit amerliartuinnartut tikkuartalerpaat tarneq toqujuitsoq Biibilimik aallaaveqanngitsoq, tamatumalu kingunerisaanik „teologiip muteerniusup inuk toqunermini ataasiusutut suujunnaarluinnartartutut isiginiartalerpaa“. (The Encyclopedia of Religion) Taamaattumik Biibilimik nassuiaasartut toqup makiffissallu akornanniittoqarnera illersoruminaatsippaat. Biibilimi tamanna eqqartorneqarpa, imaluunniit neriuummik allamik saqqummiussaqarpa?

Paulusip toqup makiffissallu akornanniittoqarnera upperaa?

Catechism of the Catholic Church-imi ima allassimasoqarpoq: „Kristus ilagalugu makititaajumagutta Kristus ilagalugu toqusariaqarpugut; ’timimit qimaguttariaqarpugut Naalakkamilu najugaqalerluta’. [2 Korintumiut 5:8] ’Qimagunnermi’ tamatumani, tassa toqunermi, tarneq timimit avissaartarpoq. [Filípimiut 1:23] Ullormi toqusimasunik makititsiffissami timimut uteqqissaaq.“ Allassimaffinnili ilanngunneqartuni Paulusip eqqartugaa tassaava tarneq timip toqunerata kingorna inooqqittartoq ’ullullu naggatissaannut’ utaqqilertartoq timimut uteqqissinnaajumalluni?

Korintumiunut agdlagkat áipait 5:1-imi Paulusip nammineq toqunissani eqqartorpaa, tassaanerarlugu ’nunami inigisaq ingutserneqartoq’. Tassani timi tarnermit toqujuitsumit qimanneqarsimasoq eqqartorpaa? Naagga. Paulusip upperaa inuk tassaasoq tarneq, tassaanngitsoq tarnilik. (1 Korintumiut 15:45) Paulus tassaasimavoq kristumiu anersaamik tanitaasoq ukiuni hundredelinni siullerni kristumiut allat naligalugit ’qilammi pissamaartitaasumik’ neriugisaqartoq. (Kulorsamiut 1:5; Rûmamiut 8:14-18) Taamaattumik ’kajungerisaa’ tassaavoq piffissami Guutip aalajangersimasaani anersaatut toqujuitsutut qilammut makititaanissani. (2 Korintumiut 5:2-4) Neriuut tamanna Paulusip ima eqqaavaa: ’Tamatta allanngortinneqassaagut . . . qarlortaat kingullissaq pilerpat, qarlortarumaarpormi, toqusullu aserujuitsuullutik makissapput, uagullu allanngortinneqarumaarpugut.’ — 1 Korintumiut 15:51, 52.

Korintumiunut agdlagkat áipait 5:8-mi Paulus ima oqarpoq: ’Isumalluarpugummi iluarinerullugulu timimit qimagusimagallarutta Naalakkamilu najugaqarluta.’ Inuit ilaat isumaqarput oqaatsit taakkua pigaat toqup makiffissallu akornanni piuneq. Taamatut isumaqartut aamma Jesusip ajoqersukkaminut aalajaatsunut inissioriartornissaannik ’imminullu pisinnissaannik’ neriorsuutaa innersuussutigisarpaat. Qaquguli taamaaliussagami? Kristus oqarsimavoq siunissami najuuffissamini ’kingumut tikiukkuni’ tamanna pissasoq. (Juánase 14:1-3) Aamma Korintumiunut agdlagkat áipait 5:1-10-mi Paulus oqarpoq kristumiut tanitaasut neriuutaat tassaasoq qilammi najukkamik kingornussinissaq. Neriuut tamanna piviusunngortinneqassaaq tarnip toqujuitsumik taaneqartup inooqqinneratiguunngitsoq, Kristusilli najuunnerani makititaanikkut. (1 Korintumiut 15:23, 42-44) Biibilimik nassuiaasartoq Charles Masson isummerpoq Korintumiunut agdlagkat áipait 5:1-10 „paasineqarluarsinnaasoq toqup makiffissallu akornanni piunermik isumaliutersuut maleruutiinnarfiginngikkaluarlugu“.

Filípimiunut agdlagkat 1:21, 23-mi Paulus ima oqarpoq: ’Inuunerami tassaavoq Kristus, toqussaralu tassa iluanaarfissara. Taakkua marluk akornanni ninniortutut ikkama: kajungeqigama manna qimakkumallugu Kristusilu najorumallugu, tamanna ajunnginnerungaaqimmat.’ Toqup makiffissallu akornanni piuneq tassani Paulusip pivaa? Inuit ilaat taama isumaqarput. Paulusili oqarpoq periarfissat marluk akornanni — inuunerup toqullu — ninniortutut illuni. ’Kajungeqigama,’ oqaatsini ilavai periarfissat pingajuat taallugu, tassa ’manna qimakkumallugu Kristusilu najorumallugu’. Tassaava ’qimatsineq’ toqup kingunitsiannguagut Kristusimik najuilernermik nassataqartoq? Soorlu eqqaaneqareersoq Paulusip upperaa kristumiut tanitat aalajaatsut Kristusip tikiuteqqilluni najuunnerani makititaajumaartut. Taamaattumik piffissaq tamanna eqqarsaatigisimassavaa.

Tamanna erserpoq Filípimiunut agdlagkat 3:20, 21-mi aamma Tásalûníkamiunut agdlagkat 4:16-imi oqaasiisigut. Jesus Kristusip najuunnerani ’qimatsineq’ Paulusip Guutip imminut pissamaartitaanik akissarsisinnaalerneranik kinguneqassaaq. Tamannarpiaq neriugisarigaa Timoteusimut inuusuttumut oqaasiini takuneqarsinnaavoq: ’Tassa uannut niaqorut iluartuussut pissamaartitaavoq; taassuminnga Naalakkap eqqartuussilluartup ullussami issumani tuniumaarpaanga, uangaannaanngitsungalu, tamaasali erserfissaminut kajungersut.’ — 2 Timûtiuse 4:8.

Toqusut makititaanissaannik ajoqersuut Biibilimik tunngaveqarpoq

Kristumiut siulliit paasisimavaat toqusut makiffissaat Kristusip najuunnerani piumaartoq, Biibilimilu ajoqersuummik nuanningaartumik tamatuminnga nakussatsinneqartarlutillu tuppallersaatissarsisarsimapput. (Matîuse 24:3; Juánase 5:28, 29; 11:24, 25; 1 Korintumiut 15:19, 20; 1 Tásalûníkamiut 4:13) Siunissami pisussaq nuannersoq tamanna aalajaallutik utaqqisimavaat, tarnermillu toqujuitsumik ajoqersuut ilumuunngitsoq tunuartissimallugu. — apustilit suliait 20:28-30; 2 Timûtiuse 4:3, 4; 2 Pîtruse 2:1-3.

Toqusut makititaanissaat soorunami kristumiunut qilammi neriugisaliinnarnut tunnganngilaq. (1 Pîtruse 1:3-5) Ataataanerpaat itsarlu Guutimut kiffaasut allat Jehovap toqusimasunik nunarsuarmi uummartitseqqissinnaanera upperisimavaat. (Job 14:14, 15; Daniel 12:2; Lúkarse 20:37, 38; Eprîarit 11:19, 35) Allaat inuit milliardilikkuutaat ukiut hundredelikkuutaat ingerlaneranni Guutimik nalusuusimasut nunarsuarmi paratiisiusumi uummarteqqinneqarnissamut periarfissaqarput, ’iluartunik iluaatsunillu makititsineqarumaarmat’. (apustilit suliait 24:15; Lúkarse 23:42, 43) Siunissaq nuannerunartoq!

Jehovap kissaatiginngilaa isumaqassasugut naalliuutit toqulu atuuttuaannassasut. Takutippaatigut piffissaq nalliukkumaartoq ’qinngarsuisut nunngutissaata . . . toqup’ naassaanngitsumut atuukkunnaarsinneqarfissaa, inuiaallu aalajaatsut nunarsuarmi paratiisinngorteqqinneqarsimasumi naassaanngitsumik inuusinnaalerumaartut. (1 Korintumiut 15:26; Juánase 3:16; 2 Pîtruse 3:13) Asasavut uummaqqittut takullugit nuannissaqaaq. Neriuut qularnaatsoq tamanna inuup toqujuitsumik tarneqarneranik eqqoriaanerinnarmit, ajoqersuummit Guutip oqaasianiunngitsoq griikerilli isumaliutersuutaannit tunngaveqartumit, pitsaaneroqaaq. Neriugisat Guutip neriorsuutaanut qularnaatsunut tunngaveqartikkukku qularutiginngissinnaavat toqu qanittukkut ’peqarunnaarumaartoq’! — sarĸúmersitat 21:3-5.

[Qupp. 31-mi assiliartaq]

Toqusut makinnissaannik ajoqersuut Biibilimik tunngaveqarpoq