Jehovami nuannaarneq nakuussutigaarput
„Ulloq manna Naalakkamut illernartitaavoq. Aliasussanngilasi, [Jehovamimi] nuannaarneq ilissi nakuussutigaarsi.“ — NEHEMJA 8:10.
1, 2. (a) Pallittaalisaq sunaava? (b) Davidip Jehovamik qimarraveqarnini qanoq ersersippaa?
JEHOVA nakuussutaavoq asseqanngitsoq. Oqaaseq ’nakuussummik’ nutserneqarsimasoq tassaavoq „pallittaalisaq“. Pallittaalisaq tassaavoq annakkumagaanni qimaaffissaq. Itsaq Israelimi Davidip Guuti pallittaalisamisut isigisimavaa. „[Jehovap] akeqqaminit tamanit Saulillu assaanit aniguisimmani“ Davidip Qutsinnerpaamut erinarsuusiarisimasaa qimerlooriartigu. — Tussiaat 18:1.
2 Davidip erinarsuusiani uppernikkut nakussatsinnartoq ima aallartippaa: „Asangaarpakkit [Jehova], nakuussutiga; [Jehova], qaarsora, pallittaalisara, aniguisitsisiga, Guutiga, qaqqara qimarraviga, eqqortinnaveeqqutiga, nassuk annatsitsisiga navialitsaalisigalu. Nersornangaarit!“ (Tussiaat 18:2, 3) David naapertuilluartoq kunngimit Saulimit naapertuilluanngitsumik eqqissiveerutitaalluni piniarsaarineqalersimagami Jehovamut qimaaffissarsiorpoq, inuk annanniarluni pallittaalisamut qimaasoq assigalugu.
3. Sooq Esrap nalaani juutit annertuumik nuannaarutissaqarsimappat?
3 Nuannaarneq Jehovap tunniussaa aqqutigeqqusaasigut ingerlasunut assuarnaassutsiminnik attassiuaannartunut tassaavoq pallittaalisaq isumannaatsoq. (Ussatit 2:6-8; 10:29) Soorunami inuit nuannaarneq Guutimit pisoq pigiumagunikku taassuma piumasaa malittariaqarpaat. Tamatumunnga atatillugu ukiumi 468-imi u.n.s. Jerusalemimi pisimasoq eqqarsaatigisassaqqissuuvoq. Allakkanik ilisimasup Ezrap allallu Inatsisinik atuaanermikkut nassuiaanermikkullu inuit paasisaqalersissimavaat. Taava inuit ima kajumissaarneqarsimapput: „Maanna angerlarniaritsi, nalliuttorsiutinik nerissaasi tungusunnitsumillu viinnisorlusi! Taakkualu ilaannik pajussigit inuit nerliisissaqanngitsut. Ullormi manna Naalakkamut illernartitaavoq. Aliasussanngilasi, [Jehovamimi] nuannaarneq ilissi nakuussutigaarsi [pallittaalisaraarsi, NV].“ Juutit ilisimassut pissarsiartik tamanna malimmassuk qiimanaqisumillu tupiusaliorfissiormata ’nuannaarnersuaqarpoq’. (Nehemja 8:1-12) ’Jehovami nuannaarnermik pallittaalisaqartut’ taassumunnga pallorfiginninnerminni kiffartornerminnilu nukissaqartinneqartarsimapput. Jehovami nuannaarneq taakku pallittaalisarisimammassuk ilimagisinnaavarput Guutip ullumikkut innuttai aamma nuannaartuusut. Suut ullumikkut nuannaarutissaraavut?
„Nuannaaginnassaasi“
4. Jehovap innuttaasa nuannaarutissaasa ilaat malunnartoq suua?
4 Nuannaarutissat annerit ilaat tassa katerisimaarfissatsitut Jehovap aaqqissuussai. Jehovap nalunaajaasuisa ataatsimeersuartarnitik ataatsimeersuaarartarnitillu ullumikkut assut nuannaarutissarsiffigisarpaat, soorlu itsaq Israelikkut ukiumoortumik nalliuttorsiortarnitik nuannaarutissarsiffigisarsimagaat. Tupiusaliorfissiorneq pillugu Israelikkut ima oqarfigineqarsimapput: „Ulluni arfineq-marlunni nalliuttorsiussaasi [Jehovamut] Guutissinnut najukkami [Jehovap] qinerumaagaani. [Jehovammi] Guutissi pilluaqqussavaasi naatitasi suliarisasilu tamaasa ilanngullugit. Taamaattumik nuannaaginnassaasi.“ (5 Moses 16:13-15) Aap, Guutip kissaatigaa nuannaassasut. Aamma kristumiut taamaattariaqarput, apustilimmi Paulusip uppeqatini ima kajumissaarsimavai: ’Naalakkami tipaatsuttuinnaritsi; aammalu oqarpunga tipaatsugitsi.’ — Filípimiut 4:4.
5. (a) Nuannaarneq sunaava, kristumiullu qanoq ilillutik tamanna pigisarilersinnaavaat? (b) Naak misilinneqaraluarluta qanoq ililluta nuannaarneq pigiuaannarsinnaavarput?
5 Jehovap nuannaarnissarput kissaatigigamiuk anersaap illernartup inerititaanut ilanngullugu nuannaarnermik tunivaatigut. (Galâsiamiut 5:22, 23) Nuannaarneq qanoq paasisariaqarpa? Tassaavoq qamuuna misigissuseq ajunngitsumik ilimasunnermik imaluunniit ajunngitsumik pissarsinermik pissuteqartoq. Nuannaarneq pilluarneruvoq, ilaannikkut qiimmattarnerusarluni. Guutip anersaavata illernartup inerititaa tamanna misilinneqarnitsinni annertoqqutigisarparput. ’Taassuma [Jesusip] tipaatsuutissaq imminut saqqangiussaq pillugu ilalaarluni [nappagaq anniartitsivik, NV] atorpaa, mitaatigineqarnini soqutiginagu, ingissimavorlu Guutip issiavissaarsuata talerpiata tungaanut.’ (Eprîarit 12:2) Ajoqersugaq Jakob ima allassimavoq: ’Qatanngutikka, tamalaanik misilinneqaraangassi tipaatsuutigiinnarsiuk, nalunnginnassi uppersusersi misilinneqaruni nikallujuinnermut sunniutaassasoq.’ Aalajangersimasumilli misilinneqarnitsinni qanoq iliornissarput nalornisigigutsigu? Tatiginnilluta qinusinnaavugut anigornissaanut ilisimassuteqarnissatsinnik. Ilisimassut qilammeersoq naapertorlugu iliuuseqarutta ajornartorsiutit aaqqissinnaassavavut imaluunniit misilinneqarnerit annertuut nikallujuilluta atorsinnaassavavut Jehovami nuannaarneq pigiinnarlugu. — Jâko 1:2-8.
6. Nuannaarneq pallorfiginninnerlu ilumoortoq qanoq imminnut atassuteqarpat?
6 Nuannaarnerup Jehovameersup pallorfiginninnermik ilumoortumik siuarsaanissatsinnut nakussatsissavaatigut. Nehemiasip Esrallu nalaanni taama pisoqarsimavoq. Taamanikkut juutit Jehovami nuannaarnermik pallittaalisaqartut pallorfiginninnerup ilumoortup siuarsarnissaanut nakussatsinneqartarsimapput. Jehovamillu pallorfiginninnermik siuarsaanertik ilutigalugu nuannaarnerat annerujartuinnartarsimavoq. Aamma ullumikkut taamaappoq. Jehovamik pallorfiginnittutut nuannaarutissarpassuaqarpugut. Nuannaarutissarpassuatta ilamininngui maanna sammeriartigik.
Kristus aqqutigalugu Guutimut attaveqarneq
7. Jehovamut attaveqarnerminnik nuannaarutiginninnissaminnut kristumiut sumik pissutissaqarpat?
7 Jehovamik qanimut attaveqarnitta nunarsuarmi pilluarnerpaanngortippaatigut. Kristumiunngunngikkallaratta inuiaqatigiinnut naapertuilluanngitsunut ’taarsiortunut isumamikkullu inuunermit Guutip pianit avissaarsimasunut’ ilaasimagaluarpugut. (Evfisumiut 4:18) Jehovamit avissaarsimajunnaarnerput nuannaarutigeqaarput! Taassumanngali iluarisaajuaannarumagaanni iliuuseqartariaqarpoq. Pisariaqarpoq ’uppernermi uninnganissarput tunngaveqarluta aalajangerlutalu saqinnaveerlutalu neriugisamit iivangkiiliup pianit’. (Kulorsamiut 1:21-23) Nuannaarutigisinnaavarput Jehovap Ernerminut qanillitissimammatigut Jesusip oqaasii uku naapertorlugit: ’Uannut pisinnaasoqanngilaq Ataatap aallartitsisima kajungersinngippani.’ (Juánase 6:44) Kristus aqqutigalugu Guutimut attaveqarnerput erlinnangaartoq ilumut erligigutsigu aseruutigisinnaasaanut tamanut mianersorumassaagut.
8. Nuannaarnitsinnut Jesus qanoq ililluni ilasaataasimava?
8 Jesusip pilliutaanut utertitsissutaasumut uppernikkut ajortinik isumakkeerfigineqarsinnaanerput nuannaarnissamut pissutissaavoq annertooq, uppernerummi tamatuma Guutimut qanillisinnaalersimmatigut. Siuaasatta Adamip piaaraluni ajortuliornermigut inuiaat tamaasa toqumut pisissimavai. Imali apustili Paulus nassuiaavoq: ’Guutilli asannissutsi uatsinnut nalunarunnaarsippaa, suli ajortuliortilluta Kristusip toqussutigimmatigut.’ Paulus aamma ima allappoq: ’Tassa soorlu ataatsip pinerlunneranit pillagassaatitaanissaq inunnut tamanut pisoq, taamattaaq ataatsip iluarneranit iluartuutitaanissaq inuussutaasoq inunnut tamanut pivoq. Soorlumi inuup ataatsip naalannginneragut amerlasuut ajortilinngortut, taamattaaq ataatsip naalanneragut amerlasuut iluartunngussapput.’ (Rûmamiut 5:8, 18, 19) Nuannaarutissarujussuuvoq Adamip kinguaavi aaqqissuussamik asannittumik tamatuminnga ilassinnillutik atuisut Jehova Guutip nuannaarluni utertikkumammagit!
Upperisarsiornikkut kiffaajunnaarsitaaneq qaammarsagaanerlu
9. Upperisarsiorneq eqqarsaatigalugu Jehovap Nalunaajaasui sooq nuannaartuuppat?
9 Babylonimit Angisuumit, upperisarsiornerup eqqunngitsup naalagaaffissuanit, aniguisitaasimanerput aamma nuannaarnissamut pissutissaavoq. Sallusuissutip Guutimeersup tamatumannga aniguisissimavaatigut. (Juánase 8:32) Upperisarsiornerup arnaanit atortittartumit aniguisitaanerput kinguneqarpoq taassumunnga ajortulioqataajunnaarnitsinnik, taamaattumillu atugarliuutissaanik suujunnaarsitaanissaanillu eqqorneqartussaajunnaarnitsinnik. (sarĸúmersitat 18:1-8) Tamatumannga qimaasinnaanerput nuanneqaaq!
10. Jehovap innuttaasut qaammarsagaaneq suna nuannaarutigaarput?
10 Guutip oqaasianik paasinninneq inuunermilu atuineq nuannaarnermik annertuumik nassataqartarput. Eqqunngitsumik upperisarsiornermit sunnerneqarsimajunnaarluta anersaakkut ilisimassuseq annertunerujartuinnartoq, „inussiaq aalajaallunilu silatooq“ aqqutigalugu Guutimit pisagarput, nuannaarutigisinnaavarput. (Matîuse 24:45-47, NV) Jehovamut tamakkiisumik tunniusimasut inunni nunarsuarmi inuusuni kisimik taassuma anersaavanik pigisaqarput taassumalu oqaasianik piumasaanillu paasinnissimallutik. Soorlu Paulus oqarsimasoq: ’Guutip anersaamigut [asannitsiminut pissamaartitani] saqqummersippaa; anersaammi suut tamaasa killisiortarpai Guutip itissusiinut allaat.’ (1 Korintumiut 2:9, 10) Ussatit 4:18-imi ersersinneqartutut paasisaqarnerujartuinnarnerput qujamasuutigalugulu nuannaarutigisinnaavarput: „Iluartulli aqqutaata assigaa ullaap qaammalernera qaammarissiartortoq ulluuneratut qaamatigilerserluni.“
Naalagaaffimmik inuunermillu naassaanngitsumik neriuut
11. Naalagaaffimmik neriuut nuannersoq qanoq ililluni allanut agguaqatigineqarsimava?
11 Naalagaaffimmik neriuutitta aamma nuannaartittarpaatigut. (Matîuse 6:9, 10) Jehovap Nalunaajaasuisut Guutip naalagaaffia inuiaat neriuutissatuaattut oqaluussissutigiuarsimavarput. 1931-imi nunarsuarmi sumi tamaani ataatsimeersuarnerni 51-iusuni „Jehovap Nalunaajaasui“-nik taaguuteqalernissatsinnik aalajangersagaq nuannaarluni akuersaarneqarpoq. (Jesaja 43:10-12) Aalajangersagaq tamanna J. F. Rutherfordillu oqalugiaataa pingaartoq atuagassiaaqqami, Riget, Verdens Haab-imi (Naalagaaffik, Silarsuup Neriuutissaa), saqqummiunneqarput. Aamma aalajangersagaq alla saqqummiunneqarpoq, aalajangersagaq kristumiuunerartunik tunussinerat Jehovallu unnersuussutaanik asissuinerat pillugit avoqqaarinnittoq. Kiisalu aamma ima allassimasoqarpoq: „Silarsuaq allamik Guutip naalagaaffiginngisaanik neriuutissaqanngilaq.“ Qaammatialunnguit ingerlaneranni Jehovap Nalunaajaasuisa atuagassiaaqqat taama ittut 5 millioninit amerlanerusut nunarsuup ilaanut tamanut siaruarterpaat. Taamanimiilli erseqqissartuartarsimavarput Guutip naalagaaffia inuiaat neriuutissatuarigaat.
12. Jehovamut kiffartortut inuunerminni sunik qilanaarutissaqarpat?
12 Aamma Naalagaaffiup naalakkersuinerata ataani naassaanngitsumik inuunissarput qilanaaralugu nuannaarutigisarparput. Kristumiut tanitat ’savarpannguit’ nuannersumik qilammi neriugisaqarput. ’Unnersiutigineqarli Guuti, Naalakkatta Jesus Kristusip Ataataa,’ apustili Peter allassimavoq, ’naakkinninnersuani naapertorlugu ernioqqissikkamisigut neriugisamut uumasumut Jesus Kristusip toqusunit makinneragut, kingornussassamut aserujuitsumut minguitsumullu nungujuitsumullu, ilissinnut qilammi toqqorsimasumut.’ (Lúkarse 12:32; 1 Pîtruse 1:3, 4) Ullumikkut Jehovap Nalunaajaasuisa amerlanersaasa Guutip naalagaaffiata naalakkersuinerani nunarsuarmi paratiisiusumi naassaanngitsumik inuulernissartik qilanaarlutik neriugisaraat. (Lúkarse 23:43, NV; Juánase 17:3) Qilanaarisatsinnut nuanningaartunut inuit allat naleqqiussinnaasaqanngillat. Neriugisarput eriagilluarniartigu!
Qatanngutigiit pilluaqqusaasut
13. Nunarsuaq tamakkerlugu qatanngutigiiussuserput qanoq isigisariaqarparput?
13 Nunarsuaq tamakkerlugu qatanngutigiissuarnut Guutip iluarisaanut kisiartaasunut ilaaneq aamma angisuumik nuannaarutissaavoq. Pilluarnaqaaq nunarsuarmi erlinnarnerpaanik ikinngutissaqaratta. Jehova Guuti nalerput pillugu ima oqarsimavoq: „Inuiaat tamaasa aalassatsissavakka, erlinnartuutitillu maanga aggiukkumaarpaat; illugalu manna pisuussutinik ulikkaassavara.“ (Haggaj 2:7) Kristumiut tamarmik naammalluinnanngitsuupput, taamaakkaluartorli Jehovap inuit naammalluinnanngitsut ataasiakkaat Jesus Kristus aqqutigalugu imminut qanillitissimavai. (Juánase 14:6) Inuit Jehovap erlinnartuutitut isigisai imminullu qanillitissimasai qatanngutitut asanninnermik ersersitsivigigutsigik, pingaartingaarlugit, Jehovamut kiffartornermi suleqatigalugit, misilinneqarnerini annertoqqusersortarlugillu qinnuttarutsigik nuannaarnerput suli annerungaalissaaq.
14. Pîtrusip agdlagai sujugdlît 5:5-11 qanoq qiimmassaatigisinnaavarput?
14 Tamakku tamarmik nuannaarnitsinnut ilasaataapput. Ilumummi Jehovami nuannaarneq nunarsuaq tamakkerlugu anersaakkut qatanngutigiissuit ’pallittaalisaraat’, tassa nakuussutigaat. Tamatta qinugisaaneq allatullu misilinneqarneq misigisarpavut. Tamakkuli immitsinnut qaninnerulissutigisariaqarpavut Guutillu nunarsuarmi peqatigiissortaanut ilumoortutuanut ilaasutut ataasiussusermik misigilissutigisariaqarlugit. Soorlu Peter oqarsimasoq Guutip assaasa pissarsuit ataanni imminut nikanartittariaqarpugut, isumakuluutivut tamaasa taassumunnga pisittarlugit nalunagu isumassoraatigut. Mianersortariaqarpugut Diaavulup iiniarluta persarimmatigut; kisimiinngilagulli, Peterimmi oqaatsini ima ilavai: ’Taanna assortorsiuk uppernikkut aalajangerlusi, ilisimagassiuk silarsuarmi qatanngutigisasi taamaaqataannik naalliutsitaasartut.’ Nunarsuarlu tamakkerlugu qatanngutigiissuit nuannaartut taakku aserunngisaannassapput, neriorsoqqissaarneqarpugummi ’sivikitsumik naallioreerutta Guutip piginnaanngorsarlutalu aalajangersillutalu pissatsillutalu tunngavilersussagaatigut’. (1 Pîtruse 5:5-11) Eqqarsaatigeriassagit: nuannaarluta qatanngutigiinnerput naassaanngitsumik atasussaavoq!
Inuuneq siunertalik
15. Sooq oqartoqarsinnaava Jehovap nalunaajaasui siunertaqarluartumik inuusut?
15 Silarsuarmi ajornartorsiorfioqisumi matumani nuannaarneq pigaarput inuunerput siunertaqarmat. Kiffartornermik immitsinnut allanullu nuannaarutaasumik tatigineqarluta suliassinneqarsimavugut. (Rûmamiut 10:10) Guutimut suleqataaneq ilumut immikkut pisinnaatitaaffiuvoq nuanningaartoq. Tamanna eqqarsaatigalugu Paulus ima oqarsimavoq: ’Apollos kinaammat? Paulusilu kinaammat? Kiffaapput, taakkunatigut uppertunngorpusi, massalu Naalakkap taakkununnga immikkut tunissutigisai missiliorlugit. Uanga ikkussuivunga, Apollos imerterivoq, Guutilu naajartortitsivoq. Taamaattumik ikkussuisorluunniit imerterisorluunniit pinngillat, kisianni Guuti naajartortsitsisoq. Ikkussuisoq imerterisorlu ataasiupput; tamarmilli immikkut akissarsissapput immikkut suliniarnertik missiliorlugu. Uagummi Guutip suleqatigaatigut; ilissi tassa Guutip naatsiivia, Guutip illuliaa.’ — 1 Korintumiut 3:5-9.
16, 17. Jehovap innuttaasa siunertaqarluartumik nuannaarnartumillu inuuneqarnerannut sunik uppernarsaatissaqarpa?
16 Assersuutissarpassuaqaraluarpoq ersersitsisunik Jehovamut aalajaalluni kiffartorneq inuunermik siunertaqartumik nuannaarutissarpassualimmik nassataqartartoq. Imatut misigineq takornartaanngilaq: „Naalagaaffilersaartarfik [atoqqaarfissiorneqarnerani] inunnik ulikkaartoq qimerloorpara, takusinnaavakkalu ilaquttakka arfineq-pingasut najuuttut — uanga nuliaralu meeqqavullu pingasut taakkualu aappaat. . . . Ilumut nuliaralu Guutimut kiffartornitsinni pilluarnartumik siunertaqarluartumillu inuusimavugut.“
17 Aamma nuanneqaaq nalunagu inuit qanorluunniit ukioqaraluartut Jehovamut kiffartulerlutik siunertaqarluartumik nuannersumillu inuulersinnaasut. Assersuutigalugu arnap ataatsip sallusuissut Biibilimiittoq paasisimavaa Jehovallu nalunaajaasuatut kuisilluni 102-nik ukioqarluni. Taava inuunini nuannersumik siunertalik naasimavaa ’Guuti ilumoortoq mianeralugu inatsisaalu maleruarlugit’. — Nalunaajaasup oqaasii 12:13.
Pallittaalisaq isumannaatsoq
18. Nikallunganeq qaangerniarlugu nuannaarnerlu allisinniarlugu qanoq iliortoqarsinnaava?
18 Jehovami nuannaarneq aalajaatsunut pallittaalisaavoq isumannaalluinnartoq. Nuannaarnermik tamatuminnga pigisaqarnerput isumaqanngilaq nikallungaffeqanngisaannassasugut Jesusip Getsemanemi misigisimaneratut: ’Tarniga aliasungaaqaaq toqumut allaat.’ (Mákorse 14:32-34) Namminissarsiormermummi nakkaannarsimanerput pissutigalugu nikallungagutta? Taamaappat inooriaaserput allanngortittariaqarparput. Pisussaaffivut Biibilimik tunngaveqartut pissutigalugit oqimaatsumik nammagassaqarnerput nuannaarnitsinnik millisitsisimappat immaqa arlaatigut allannguisinnaavugut oqilisitsisumik nuannaaleqqissutigisatsinnillu. Aammalu Jehovap nuannaarnermik pilluaqqusaatissavaatigut uinipput ajortiliusoq, silarsuaq ajortoq Diaavululu ilungersorluta assortorutsigik. — Galâsiamiut 5:24; 6:14; Jâko 4:7.
19. Guutip peqatigiissortaani immikkut pisinnaatitaaffivut qanoq isigisariaqarpavut?
19 Eqqartoriikkatsinnik, allarpassuarnillu, annertuumik nuannaarutissarpassuaqarpugut. Ilagiinni oqaluussisartuugaluarutta imaluunniit piffissaq tamaat kiffartortuugaluarutta tamatta ’Naalakkap suliaanik naammassisaqangaarsinnaavugut’, tamannalu nuannaarnitsinnut allisaataassaqaaq. (1 Korintumiut 15:58) Jehovap peqatigiissortaasa iluanni sumilluunniit immikkut pisinnaatitaaffeqartitaagaluarutta qujamasuutigisariaqarpavut, nuannaarlutalu Guutitsinnut pilluartumut asannittumullu illernartumik kiffartuuteqartuaannartariaqarpugut. — 1 Timûtiuse 1:11.
20. Immikkut pisinnaatitaaffipput annerpaaq suua, sunalu qularinngissinnaavarput?
20 Ingammik Jehovap nalunaajaasuisut taassuma aqqanik taaguuteqarnitsigut immikkut pisinnaatitaaffipput nuannaarnissatsinnut pissutissaavoq. Naammalluinnanngitsuugaluarpugut amerlasuunillu misilinneqartarluta, taamaakkaluartorli Jehovap Nalunaajaasuisut pilluaqqusaanivut nuanningaartut eqqaamajuaannartigik. Eqqaamajuaannassavarpullu Ataatatta qilammiusup asannittup pakatsisinngisaannassammatigut. Jehovami nuannaarneq pallittaalisarigutsigu pilluaqqusaajuaannarnissarput qularinngissinnaavarput. (wE 15/1 95)
Qanoq akissavit?
□ ’Jehovami nuannaarneq’ suua?
□ Kristumiut qanoq ilillutik nuannaarneq piviusoq pigilersinnaavaat?
□ Jehovap nalunaajaasuisa suut nuannaarutissaraat?
□ Jehovami nuannaarneq sooq pallittaalisaava isumannaatsoq?